Ikitaabo kyoꞌmuleevi
Hosheya
Indangiriro
Yiki kitaabo, kiyerekiini ngiisi kwo Rurema ali mu kundana. Gomeeri, muka Hosheya, akajanda yiba, nga kwaꞌBahisiraheeri nabo bakajanda Rurema. Kundu kwokwo, uyo Gomeeri Hosheya anamúguluula, anamúyegereza kandi imwage, nga kwo Rurema naye ali mu yegereza abandu baage kwo bamúgalukire.
Mu baleevi booshi, Hosheya naaho ye wâli shaaziri imbembe mu bwami bwaꞌBahisiraheeri. Ku yikyo kyanya, bâli kola bagatwalwa mu mahanga. Umuleevi Hosheya âli kizi balangamira, mu kubamenyeesa hiꞌgulu lyeꞌkihano, ngiisi kwo bagabiikwa mu maboko gaꞌbagoma baabo. Yabo bagoma, Hosheya anamenyeesa kwo bali Bahasuriya (7.11; 8.9; 10.6; 11.11).
Muziizi muguma gwiꞌsikamiro, guli mu Hosheya 6.6: «Byo ndoziizi, kutali kutangirwa amatuulo. Si ndoziizi kwo mukizi kundana. Na ndoziizi mube munyiji bwija, kwo nie Rurema. Yukwo, kwo kuhimiri ukukizi ndangira amatuulo goꞌkusiriiza.»
Íbiri mwo ku bwofi
a) Umukazi útali mwemeera, na yiba ali mwemeera (1–3)
b) Kundu Abahisiraheeri batâli bemeera, haliko Rurema yehe ayamiri ali mwemeera (4–14)
1
1 Ino ndumwa, Nahano akagimenyeesa umuleevi Hosheya, mugala Beeri. Ikyanya akamúmenyeesa yo, kyâli riiri kyanya kyoꞌbutwali bwa mwami Huziya, noꞌbwa mwami Yotamu, noꞌbwa mwami Ahaazi, noꞌbwa mwami Hezekiya. Yabo booshi, bâli baami ba mu kihugo kyeꞌBuyuda. Mu kyekyo kyanya, mwami Yerobwamu, mugala Yohaashi âli riiri mwami wa mu kihugo kyeꞌHisiraheeri.
Muka Hosheya naꞌbaana baage
2 Ino ndumwa, ikyanya Nahano akatondeera ukugimenyeesa mu Bahisiraheeri ku njira ya Hosheya, anamúbwira kwokuno: «Ugendi yanga umukazi mushule, gira akubutire abaana boꞌbushule. Mu kugira kwokwo, ugayerekana ngiisi kwaꞌBahisiraheeri nabo bakayigira bashule, mu kunjandagira nie Nahano, banakizi yikumba ibindi íbiri mu yikumbwa.»
3 Kwokwo, Hosheya anagendi yanga Gomeeri, munyere Dibulahimu. Uyo Gomeeri anaheeka inda, anabutira Hosheya umwana woꞌbutabana.
4 Nahano anabwira Hosheya: «Uyo mwana, umúyinike iziina Yezereheri. Mukuba mu ndekeera yeꞌYezereheri, mwami Yehu akayita mwaꞌbandu bingi. Kwokwo mu siku niniini, imbaga yage, ngagihana. Kuguma na yibyo, ubwami bwaꞌBahisiraheeri, nâye buhese.
5 Ku yikyo kyanya, imisi yaꞌbasirikaani baabo, ngagivunira-vunira mu ndekeera yeꞌYezereheri.»
6 Ha nyuma, Gomeeri anashubi heeka inda, anabuta umwana woꞌbunyere. Rurema anabwira Hosheya: «Uyo mwana, umúyinike iziina Lo-Ruhama, (kuli kudeta: Ndakundwa). Mukuba, ndagaki kunda Abahisiraheeri, ndaganaki bakoga.
7 Haliko Abayuda boohe, ngaaba mbakuuziri, na mbakize mu bagoma baabo. Si kutagaaba ku miheto yaꞌbasirikaani, kandi iri ku ngooti, kandi iri mu kukoleesa ifwarasi, kandi iri ábali mu zigendera kwo. Haliko nienyene, nie Rurema Nahamwabo, nie gabakiza.»
8 Uyo Gomeeri, iri akaba keera alyosa ulya munyere wage wa Ndakundwa kwiꞌbeere, anashubi heeka inda, anabuta ugundi mwana woꞌbutabana.
9 Nahano anabwira Hosheya: «Uyo mwana, umúyinike iziina Lo-Hami, (kuli kudeta: atali weꞌmwani). Mukuba, Abahisiraheeri batakiri bandu baani. Naani, ndakiri Rurema wabo.»