48
Rurema ye yiji íbigaaba
1 «Mwe Bahisiraheeri, beene Yakobo, munali ba mu kibusi kya Yuda! Muyuvwirize!
Muli mu kizi biika indahiro kwiꞌziina lya Nahano,
munali mu gira mbu muli mu yikumba Rurema waꞌBahisiraheeri.
Kundu kwokwo, mutali mu kola ku kuli.
2 Mugweti mugayihaya, mbu: “Twehe, tutuuziri mu kaaya kataluule!”
Munali mu yihega ku Rurema waꞌBahisiraheeri,
ulya úli mu buuzibwa Nahano woꞌbushobozi bwoshi.
3 Yaho kare, nâli mali gwanwa namùmenyeesa íbigakoleka.
Ha nyuma, nanatondeera ukubikwiza, byanabuli kizi koleka.
4 Kundu kwokwo, nâli mùyiji-yiji kwo muli mindagabika.
Amagosi giinyu, gatigaliiri nga kyuma.
Naꞌmatwe giinyu, gali makomu nga mulinga.
5 Yaga magambo, nꞌgagwanwa namùmenyeesa go, gátazi koleka.
Kwokwo lyo mutalonge ukuyiji deta:
“Yaga gooshi, imigisi yani, ye gweti igagagira.
Irya migisi yani yo nꞌgabaaja mu biti,
neꞌgindi yo nꞌgatula mu byuma, yo ikagashungika.”
6 Ngiisi byo nꞌgagwanwa namùkengula, mwanabiyiyuvwirwa,
byebino, bikola mu koleka.
«Aahago! Kituma kiki mutangabiyemeera?
Buno, ngola ngamùyereka ibihyahya.
Ee! Kundu bishubi bishamiri, ngaki mùmenyeesa byo.
7 Byohe, bitali bya keera. Si lyo bikiri mu koleka.
Halinde zeene buno, mutazindi biyuvwa.
Ku yukwo, mutangadeta mbu:
“Nanga! Tukoli biyiji!”
8 Kundu kwokwo, mutazindi nyuvwa, kandi iri kusobanukirwa.
Kiri na yaho keera, mutâli kizi ndega amatwiri.
Nduula nimùyiji, kwo mulyagagi ngulani.
Ukulyokera ho mukabutirwa, muyamiri mugweti mugaahuna naaho.
9 Kundu ngwasirwi noꞌbute, ngatee buhoohya.
Ngweti ngamùnogera, ndayami mùminika,
gira lyaꞌbandu balonga ukunyivuga.
10 Lolagi! Keera nꞌgamùyeruusa.
Si kutâli ku njira yoꞌmuliro, nga kwaꞌbandu bali mu guleeza ku harija.
Halikago nꞌgamùyeruusa mu kumùleeza mu malibu.
11 Na íbitumiri nꞌgagira kwokwo, biri hiꞌgulu lyani nienyene,
gira ndayiji gwanwa natukwa.
Kiri noꞌbulangashane bwani, ndangabushangiira neꞌmizimu.»
Nahano atoola Kiiro, gira akwize imihango yage
12 «E Bahisiraheeri, beene Yakobo! Mundegage amatwiri.
Nie kamùhamagala, kwo mube bandu baani.
Na nyamiri ndi nie yolya.
Nie ndangiriro, na ndi nie nyukizo.
Hatanayimbwa gundi Rurema átali niehe.
13 Indaliro zeꞌkihugo, nie kazibiika naꞌmaboko gaani nienyene.
Kiri niꞌgulu, nie kalitabika.
Ikyanya ndi mu bihamagala, binayami nyitaba.
14 Mweshi mukuumanage, gira muyuvwirize.
Nahano keera atoola Kiiro, abe mwira wage,
gira agendi teera i Babeeri.
Aaho! Mu mizimu yinyu, ka hali úgukagwanwa gwadeta kwokwo? Aahabi!
15 Niehe naaho, nie kabideta.
Uyo Kiiro, keera nꞌgamúhamagala, anayija.
Na mu ngiisi byo agakizi gira, ngakizi múgenduusa.»
16 Munyegeerage, gira munyuvwirize.
Niehe, ukulyokera ku ndondeko, ndazindi deta ku bumbishwa.
«Galya magambo, ikyanya gakatondeera ukukoleka, nâli riiri ho.
Buno, ndi mwoꞌmutima gwa Nahano Rurema,
keera anandungika kwo ngendi mùbwira, ti:
17 “Nahano ali Mutaluule waꞌBahisiraheeri, ye na Lukiza wabo.”
Ye wanadetaga kwokuno: “Nie Rurema Nahamwinyu.
Nie gweti ngakuyigiriza, halinde ukizi genduukirwa.
Na ngweti ngakurongoora mu njira íkwaniini.
18 Imaaja zaani, úkibaagage uzisimbahiri,
ushuba ugaaba noꞌbutoge ngoꞌlwiji.
Unashuba ugalonga amiija,
halinde ganakizi kuyijira nga midunda mu nyaaja.
19 Aba mu kibusi kyawe, banaluguuke nga mushenyu kwiꞌbuga.
Iziina lyabo lyangayamiri imbere lyani.”»
20 E balya, mulyokage i Babeeri. Mutibitage, mulyoke yo!
Munakizi menyeesa umwazi mu kubanda akabuuli, awi yiyi yiyi!
Mugumenyeese halinde heꞌkihugo kihekiiri.
Mukizi deta: «Nahano keera akaguluula abandu baage, beene Yakobo.»
21 Ikyanya Nahano âli kizi rongoora Abahisiraheeri mwiꞌshamba, batâli nyotiirwi.
Mukuba akababerera ulwala, anabalyokeze mwaꞌmiiji mingi.
Yago miiji ganakizi golomba.
22 Kundu kwokwo, Nahano adetaga kwokuno:
«Banangora-mabi boohe, ndaagwo mutuula gwo bâye longe!»