61
Nahano amenyeesa kweꞌmbohe zigashwekuulwa
1 Umutima gwa Nahano Rurema gundi mwo.
Keera akandaluula, kwo ngizi menyeesa abakeni imyazi miija.
Akananduma imwa ábavunisiri umutima, kwo mbaholeeze.
Akanduma neꞌmwaꞌbashweke, neꞌmwa ábakagwatwa imbira, gira mbamenyeese kwo bagashwekuulwa.
2 Ninamenyeese ábajengiirwi kweꞌkyanya keera kyahika kyo Nahano agayerekana kwoꞌbwija bwage.
Si abagoma baage boohe, Rurema witu agabayihoola.
3 I Sayuni, kundu abandu bakola mu yibwandalika mu munyota-kiiko,
haliko agabaheereza ulushembe úlunonosiri.
Na kundu bajengiirwi,
agabashiiga amavuta, halinde balangashane.
Na ngiisi ábagaaba bavunisiri imitima,
agabashambaaza.
Yabo bandu, Nahano agababyala mu ndalo yage,
gira abayerekane mwoꞌbulangashane bwage,
Bagakizi gira íbikwaniini, bagaanaba bakaniri ngeꞌbiti bila byeꞌmyalooni.
4 Utwaya útusigiiri biguuka,
leero bagatuyubakulula.
Na kundu twâli koli maziri imyaka mingi tusibiri,
si bagatushakuulula.
5 Ibinyamahanga bigakizi mùragirira ibitugwa,
binakizi mùlimira, iri binakuya-kuya imizabibu yinyu.
6 Munakizi detwa Bagingi ba Nahano,
na Bakozi ba Rurema witu.
Birya binyamahanga, ibindu byabo bigamùyegukira,
munakizi yiyuvwa hiꞌgulu lyabyo.
7 Nahano adeta kwokuno: «Abandu baani, kundu abagoma bâli kizi bateeza ishoni,
halikago, bagaki longa ibindu bingi ubugira kabiri,
banashambaalire ubuhyane bwabo.
Ee! Bagahaabwa amahyane gabiri,
halinde banashambaale imyaka neꞌmyakuula!
8 Nie Nahano, ikyanya abandu bali mu kulikiriza íbikwaniini,
lyo bali mu ba banzimiisa bweneene.
Si abandu babi, naꞌbazimba, boohe, mbashombiri ngana.
Abandu baani, ngabahemba ku njira íkwaniini,
tunanywane ikihango kyeꞌmyaka neꞌmyakuula.
9 «Bijukulu baabo, ngabalumbuusa mu mahanga.
Ee! Ngiisi mundu úgababanda kwiꞌsu, agayami bamenya.
Yabo ábagababona, banayemeere, ti:
“Yaba, balyagagi bandu bo Nahano akagashaanira.”»
10 Ngweti ngashambaalira Nahano.
Ee! Umutima gwani guyamiri gumúshambaliiri.
Ye mu nyambika ubukize, nga mirondo,
anali mu ndimbiisa na íbikwaniini.
Ngoli limbisiibwi, ngoꞌmuhya mushosi.
Na ndi nga muhya mukazi, úkoli limbisiibwi noꞌbungeni-ngeni.
11 Mukuba, nga kwo uluvu luli mu kizi meza imbuto, zinakizi mera hooshi mu ndalo,
kwo na kwokwo Nahano Rurema agakiza abandu baage, halinde alonge ukuyivugwa mu bandu ba mu mahanga gooshi.