63
1 Hali ikikalage íkiri mu lyoka i Bosira, mu kihugo kyeꞌHedoomu.
Agweti aganooka-nooka, anayambiiti ikanju lyeꞌbitorotonde bidukula.
Aahago! Uyo kikalage ali nyandi?
Nahano ashuvya: «Nie kikalage. Nie mu kizi deta íbikwaniini.
Mukuba nie shobwiri ukumùkiza.»
2 Hali úwangamúbuuza: «Aaho! Kituma kiki uyambiiti imirondo yeꞌbitorotonde bidukula,
nga yo mundu úli mu kanda imizabibu?»
3 Nahano naye, ti: «Njubi kaaziri imizabibu niengwa, ndanaaye gundi úwandabaala.
Ee! Mu buraakari bwani, keera nakanda-kanda ibinyamahanga.
Na bwo mbarakariiri bweneene,
keera nabahinyata-hinyata, halinde banaminikwa.
Kwokwo, imirondo yo nyambiiti, ikoli yijwiri umuko.
Yayulubala ngana-ngana!
4 Ulusiku keera lwahikaga, lwo nayihoolera kwaꞌbandu baani,
nanabaguluula mu bagoma baabo.
5 Keera nꞌgalangiiza hooshi,
haliko, ndaaye mundu ye nꞌgabona, úwangandabaala.
Neꞌri nꞌgabulaga umundu woꞌkunjiga, nanasoomerwa bweneene.
Kundu kwokwo, nanakiza abandu baani ku bushobozi bwani nienyene.
Uburaakari bwani, bwo bukanzikamya.
6 Ikyanya nâli rakiiri, nanakizi libata-libata ibinyamahanga,
halinde nanayona umuko gwabo.»
Rurema agirira Abahisiraheeri amiija
7 Ngamenyeesa ngiisi kwo Nahano ali mu nogerana,
ninamúyivuge ku byoshi byo âli kizi gira.
Âli kizi tukolera bwija.
Na buno, ngwiriiri ngizi múhuuza mu bandu.
Mukuba, agweti agatuyuvwirwa indengeerwa bweneene,
anali mu tukejeerera.
8 Nahano adetaga kwokuno: «Ku kasiisa, yaba Bahisiraheeri bali bandu baani,
ndaanakyo kyanya bâye nyihindulire.»
Kyo kitumiri Nahano agabakiza.
9 Ku kyanya Abahisiraheeri bâli kizi longa amakayu,
naye, bâli kizi galongera kuguma.
Anabakiza, mu kubalungikira umuganda.
Na bwo abakuuziri, kyanatuma agakizi bayuvwirwa indengeerwa, anabaguluula.
Âli kizi batengetera, iri anababetula.
10 Kundu kwokwo, balya Bahisiraheeri banakizi huna imbere lyage,
halinde banajengeeza Umutima gwage Mweru.
Kwokwo, Nahano anabahinduka, anaba mugoma wabo,
anakizi balwisa.
11 Iri hakatama, yabo Bahisiraheeri banakengeera ngiisi kwo Rurema akagira yaho keera, mu siku za Musa.
Banakizi yibuuza: «E balya, si Nahano ye kajabula Abahisiraheeri inyaaja, kuguma neꞌbirongoozi byabo!
Aaho! Buno, alyagagi hayi?
Si ye wâli kizi biika Umutima gwage Mweru mu kati kaabyo!
12 Anali ye wâli kizi rongoora Musa, ku bushobozi bwage bwaꞌkahebuuza,
anabera inyaaja imbere lyabo, halinde iziina lyage lyanalumbuuka imyaka neꞌmyakuula.
13 Ikyanya akarongoora abandu baage, banalenga heꞌnyaaja iyisiri.
Bâli riiri nga fwarasi íziri mu lenga mwiꞌshamba buzira kudendebagana.
14 Banaba nga ngaavu íziragiiri mu ndekeera,
bwoꞌmutima gwa Nahano gwo gukabaluhuusa.»
E Nahano, kwokwo, kwo wâli kizi rongoora abandu baawe,
halinde iziina lyawe lyanakizi lumbuuka.
Ukutabaaza Nahano
15 E Nahano, kundu utuuziri mwiꞌgulu, utulangiize.
Utulangiizagye ukulyoka ahandu haawe hataluule,
hanali ha kahebuuza.
Ewe! Ka utaki fitiirwi ukutuyereka ubushobozi bwawe?
Si utaki tukuuziri, utanakiri mu tuyuvwirwa indengeerwa!
16 Si we Daata!
Kundu Hiburahimu na Yakobo bangaba batatutwaziizi,
halikago wehe, ukiri Daata.
Ukulyokera keera, uyamiri uli mu buuzibwa kwo we Lukiza witu.
17 E Nahano, si watulekeerera, halinde twahabuka mu njira zaawe.
Kituma kiki wanayumya imitima yitu, halinde tutaki kuyobohiri?
E maashi Rurema, si tuli bakozi baawe, tunali bandu baawe!
Ku yukwo, utugalukire.
18 Ku kyanya kiniini, twâli riiri beene inyumba yawe.
Halikago buno, abagoma biitu keera bakayiji gihongola,
19 tunakoli tuuziri nga bandu bo utazindi twala, kiri neꞌhiniini.
Tunakolaga nga bandu ábatazindi menyeekana kwo tuli bandu baawe.
Twangasiimiri kwo ubere igulu,
unashonookere hano mu kihugo.
Si imigazi yangajugumbana imbere lyawe!