Ikitolo kya kashatu kyeꞌMiganuulo
22
(22.1–27.23)
Amagambo ga Herifaazi
1 Ha nyuma, Herifaazi weꞌTemaani anashuvya Hayubu kwokuno:
2 «Ka hali igambo lyoꞌmundu angatabaala kwo Rurema?
Kiri noꞌmwitegeereza, ka ahiiti akamaro imwage?
3 Iri wangaba uli woꞌkuli, unabe utungiini imbere lyage,
ka utoniri kwo uli mu shambaaza Rurema woꞌbushobozi bwoshi?
Ka halyagagi ubunguke bwo angakulonga kwo?
4 «Na kwakundi, ka Rurema ali mu kuhana, iri anakutwira ulubaaja,
mbu bwo umúsimbahiri?
5 Nanga, maashi! Si íbitumiri ali mu kuhana, bwo uli nangora-mabi.
Ibyaha byawe, biluguusiri ngana-ngana.
6 «Ku mugani, tudetage kwo keera ukanyaga uwinyu ibyambalwa,
mu kubeesha mbu iri ngwati.
Neꞌkyanya ukamúshulumula byo, wanamúsiga bukondwe.
7 Na kwakundi, ikyanya abandu bâli nyotiirwi, wanabayima amiiji.
Neꞌkyanya bâli shalisiri, wanabayima ibyokulya.
8 Ewe! Si ulyagagi mundu mukulu, unagweti amatongo,
unatuuziri mu kihugo, iri banakugingika!
9 Haliko, banamufwiri boohe, ugweti ugabayimula maboko mamaata.
Neꞌkyanya ifuuvi zihiiti umulangaaliro, uli mu guhongola.
10 «Kyo kitumiri imibashu ikoli kuzungulusiri.
Neꞌkyanya bali mu kukanga, uli mu yami lenga mwoꞌmusisi.
11 Uli mu zingwa neꞌkihulu, halinde utanaki bone kindu.
Neꞌmigezi yaꞌmiiji ikufuliiri.
12 «Rurema atuuziri iyo munda mwiꞌgulu.
Na kundu indonde ziri hala, haliko atuuziri hiꞌgulu lyazo.
13 Si ugweti ugaadeta mbu:
“Ngiisi byo ngweti ngaagira, Rurema atabibwini.
Aaho! Kutagi kwo angasheshera mu bibungu, mbu atutwire ulubaaja?
14 Si ibibungu biiru-biiru bimúzungulusiri, atanaki shobwiri ukutubona!
Anali mu zaatira iyo munda hiꞌgulu bweneene lyeꞌkihugo.”
15 «Aaho! Ka ugagenderera ukukizi kulikira zeezo njira za keera?
Si yizo njira, abandu babi bâli kizi ziyifunda mwo!
16 Yabo babi, bâli kizi fwa mbura-kihe.
Neꞌndaliro zaabo, zinayami bindikirwa hala noꞌmwijulire.
17 «Bâli kizi bwira Rurema, mbu: “Ngahwe! Utushaagire hano.
Kundu we Rurema woꞌbushobozi bwoshi, haliko ndaabyo ugatugirira.”
18 Kundu kwokwo, yoyo Rurema ye kayijuza inyumba zaabo mwoꞌbugale.
Ku yukwo, yabo babi, ndagabayibiika kwo.
19 «Abandu boꞌkuli, ikyanya bali mu bona
ngiisi kwo yabo babi bali mu shereezibwa, banasiime.
Abandu bazira buhube, banakizi bashekeereza.
20 Banadete, ti: “Lolagi ngiisi kwaꞌbagoma biitu keera baminikwa.
Na ngiisi byo bakasiga, keera byajigimba noꞌmuliro.”
21 «E maashi Hayubu, buno uyibiikage haashi imbere lya Rurema,
lyo uba noꞌmutuula, unakizi genduukirwa.
22 Yago migirizo ga Rurema, ugayuvwirize,
unagasingule mu mutima gwawe.
23 «Iri wangagalukira Rurema woꞌbushobozi bwoshi, ugashubi gashaanirwa.
Ku yukwo, uyeruuse inyumba yawe.
24 Utakizi ki hemukira ibindu byeꞌkishingo,
si inooro zeꞌHofiiri, ukizi zikabulira mu lwiji.
25 Uleke Rurema woꞌbushobozi bwoshi yenyene abe ye gaaba kihinda kyawe.
Abe ye gaanaba nga nooro zaawe, kandi iri harija zaawe.
26 «Kwokwo, lyo ugamúlegamira,
unakizi múshambaalira.
27 Ugakizi múhuuna, anakuyuvwirize.
Ngiisi byo ukamúlagaania, ukizi múgirira byo.
28 Kwokwo, ngiisi igambo lyo ugashungika, ligakizi genduukirwa.
Ikyanya ukola mu njira, umulengeerwe gugakizi kumolekera.
29 «Ikyanya abandu batwika indege,
unabaholeeze, ti: “Uyihe ikise!” Haaho, banakizibwe.
30 Abandu bazira byaha, anakizi bakiza.
Kwokwo naawe, bwaꞌmaboko gaawe gali shululu, ugakizibwa.»