40
1 Nahano anashubi bwira Hayubu kwokuno:
2 «Ka ugagenderera ukumbaliiza, nie Rurema woꞌbushobozi bwoshi?
Si ugweti ugambaliiza, na ndi nie Rurema nienyene!
Aahago! Ngiisi byo ngakubuuza, ubishuvye.»
3 Haaho, Hayubu anashuvya Nahano:
4 «Si ndi mundu ngana! Aaho! Kuti kwo ngakushuvya?
Kwoku, ngola ngaaziba akanwa noꞌkuboko.
5 Keera naleeza ulugero mu kudeta.
Ndaanabyo ngaki yushuula.»
6 Mbu hatame, Nahano anashuvya Hayubu mu kihuhuuta, ti:
7 «Uyikanie nga mushosi.
Ngakizi kubuuza ibibuuzo. Kwokwo, ukwiriiri ubinjuvye kwo.
8 Aahago! Ka uloziizi ukudeta kwo ndi mu twa imaaja ku njira ítali nga yo?
Ka uloziizi ukubonesa kwo ndi munabuhube,
gira lyo naawe uyiyerekane kwo ukwaniini?
9 Ehee! Ka uhiiti imisi ngeꞌyeꞌmwani?
Ka wangalunduma kwiꞌzu lyani?
10 «Giraga uyerekane ubulangashane bwawe noꞌbukulu bwawe.
Uyilimbiise noꞌbushobozi, iri unagingikwa.
11 Uyerekane uburaakari bwawe imbere lyaꞌbandu.
Ulole umunabwikangaate, unamúgwise.
12 Ee! Yabo banabwikangaate, ubalole naaho, unabatindimaze.
Ufinage banangora-mabi ngiisi ho bali.
13 Unabaziike booshi kuguma mwiꞌdaho,
unabashwekere mu kuzimu.
14 Imisi yawe wenyene, yo yangakukiza.
Kwokwo, kiri na naani nangakuyivuga.
15 «Uloleekeze irya nyamiishwa mbamu yeꞌnvubu.
Si nie kagilema, nga kwo naawe nꞌgakulema.
Iyo nvubu, iri mu liisa ibyasi nga ngaavu.
16 Haliko, mu magala gaayo, ihiiti imisi bweneene.
Imisi yiꞌbunda lyayo idediiri ngana-ngana.
17 «Umukira gwayo, guli neꞌmisi nga biti byeꞌmyerezi.
Imisi yaꞌmagulu gaayo, ishaniirwi kuguma.
18 Amavuha gaayo, gali nga byuma byeꞌmiringa.
Amagulu gaayo, gali nga nguliro zeꞌkyuma.
19 Iyo nvubu, mu biremwa byani, iri mu ba ya mbere.
Kundu kwokwo, nie Mulemi wayo nie shobwiri ukugishereeza.
20 Mu malambo, mweꞌnyamiishwa ziri mu longera ibyokulya,
munali mwo ziri mu kizi shaatira.
21 Iyo nvubu, iri mu gwejera mu bishungu-shungu,
inali mu yibisha mu masanga mu buhomba.
22 Yibyo bishungu-shungu, biri mu kizi gibwikira.
Neꞌbiti ibutambi lyoꞌlwiji bigizungulusiri.
23 «Yulwo lwiji, kundu luli mu yijula, iyo nvubu itangayoboha.
Itanali mu kangwa, kundu ulwiji Yorodaani lwangayijula bulembe-rembe.
24 Aaho! Nyandagi úwangashweka amasu gaayo, mbu lyo agigwata mbira? Si ndaaye!
Ndaanaye úwangagitula izuulu niꞌgera.
25 «Ikingisho-ngisho kyoꞌmujoka Levyataani kwakundi, ndaaye úwangakigwasa kwiꞌgera.
Ndaanaye úwangashweka ululimi lwakyo noꞌlusinga.
26 E ma! Ndaaye úwangakishweka noꞌmugozi mwiꞌzuulu.
Ndaanaye úwangakitula umugeka niꞌgera.
27 «Ka utoniri kwo kyangakuyinginga kwo ukilikuule?
Ka kyangakuganuuza ku butuudu? Nanga maashi!
28 Kitangayemeera kwo kigakizi kukolera,
kitanâye be muja wawe, kiri noꞌlusiku luguma.
29 Ehee! Yikyo kingisho-ngisho, ka ugakisaasa nga kanyuni?
Ka ugagishweka noꞌlukoba, kikizi shaata naꞌbaja-kazi baawe?
30 «Ka utoniri kwaꞌbadandaaza bagakigereka?
Ababojozi, ka bagakibojola, mbu bakigabaane?
31 Ka bangatula uluhu lwakyo naꞌmatumu, mu kukiyita,
kandi iri, bakilashira mwiꞌtwe?
32 Geregeza naaho ukukihuma kwo. Utâye yibagire ngiisi kwo kigakuteera.
Utanâye ki shubi galukira hoofi lyakyo.