13
Rurema abwira Yeremiya agule umukaba
1 Nahano akambwira kwokuno: «Ugendi gula umukaba úgukalukwa mu nuzi zeꞌkitaani unaguyambale. Si yugwo mukaba, utakolwe mbu ugujabike.»
2 Kwokwo, yugwo mukaba, nanagendi gugula, nanagira nga kwo akambwira, nanaguyambala.
3 Ikyanya nꞌgagira kwokwo, anashubi mbwira:
4 «Gulya mukaba, keera ukagugulaga, unakoli guyambiiti. Aaho! Uguyabiire, unagutwale ku lwiji Hefuraati, unagubishe mu lwajwe.»
5 Kwokwo, nanagutwala yaho ku lwiji Hefuraati, nanagubisha yaho, hoofi lyoꞌlwiji, nga kwokulya Nahano akambwira.
6 Isiku iri zikalumba, Nahano anambwiraga kwokuno: «Gulya mukaba gwo nꞌgakubwira kwo ugendi bisha ku lwiji Hefuraati, ushubi gendi guleeta.»
7 Kwokwo, nanagenda yo. Neꞌri nꞌgahumba halya, nanagwana keera gwabola. Ndaanako kamaro gwâli ki hiiti.
8 Lyeryo, Nahano anashubi mbwiraga kwokuno:
9 «Abandu beꞌYerusaleemu, kiri naꞌbandi Bayuda, kwokwo kwo ngabashereeza. Si bagweti bagayikangaata bweneene,
10 banakoli bihuusiri, batanandwaziizi! Balyagagi mindagabika, iri banagira nga kwo baloziizi. Bakola mu yikumba imizimu, iri banagikolera. Kwokwo, bagayiji ba nga gulya mukaba, bazira kamaro kooshi-kooshi.
11 «Nga kwoꞌmundu ali mu shweka umukaba mu kibuno, kwo na kwokwo naani nꞌgashweka Abahisiraheeri naꞌBayuda, gira bakizi ba bandu baani. Kwokwo, lyo bamenyekane kwiꞌziina lyani, linakizi yivugwa mu kati koꞌlushaagwa. Halikago, batanandwaza.» Kwokwo, kwo Nahano adesiri.
Uburaakari bwa Rurema buyijwiri indaha zeꞌmbu
12 «Yabo Bayuda, ubabwire kwo Nahano Rurema waꞌBahisiraheeri, adetaga kwokuno: “Indaha zooshi zeꞌmbu zikwaniini ziyijule mweꞌdivaayi.” Haaho, abandu bagakushuvya, ti: “Ee ma! Si tuyiji-yiji kwo biri kwokwo.”
13 «Unashubize kwo Nahano adetaga kwokuno: “Abatuulaga booshi beꞌYerusaleemu, ngabalalusa, kiri naꞌbaami baabo, balya ba mwiꞌkondo lya mwami Dahudi, kiri naꞌbagingi, naꞌbaleevi, naꞌbagunda booshi.
14 Ha nyuma, ngakizi bateerania bongwa ku bongwa, kiri naꞌbabusi naꞌbaana baabo. Ndaanaye kiri noꞌmuguma ye ngakejeerera. Ndanâye bayuvwirwe indengeerwa, mbu ndeke ukubaminika.”» Kwokwo kwo Nahano adesiri.
Yeremiya akengula Abahisiraheeri
15 E Bahisiraheeri, si Nahano keera akamùganuuza.
Kwokwo, mumútegage amatwiri, munakizi ba batuudu.
16 Mukizi huuza Rurema Nahamwinyu, átazi mùyingiza mu kihulu,
mútanazi siitara mu migazi hiꞌgulu lyeꞌkihulu.
Kundu mulangaalire kwoꞌmulengeerwe gugamùtanguulira,
haliko hali ikyanya angamùtumira ikibungu kiiru, neꞌkihulu namudidi.
17 Keera namùkengula. Haliko, iri mutangandwaza, munabe mukiri noꞌbwikangaate,
iri ngakizi kungumira i mutima mu kumùlirira.
Ikyanya mugatwalwa imbohe, mwe bandu ba Nahano,
ngaliruuka ngana, imigenge yani inakereke.
Rurema alungikira mwami indumwa
18 «Mubwire mwami noꞌmugoli nyina kwokuno:
“Zirya njembe ziinyu, kundu zishubi limbiri, halikago keera zikatibuka.
Ku yukwo, mulyokage ku bitumbi biinyu.
19 Utwaya útuli mwiꞌshamba lyeꞌkisaka, inyiivi zaatwo zikahamikwa,
ndaanaye úwangashubi ziyigula.
Abayuda booshi-booshi bakatwalwa imbohe,
ndaanaye úkasigala.”»
20 «E bandu beꞌYerusaleemu, mulegamire, mulangiize bwija.
Si abagoma biinyu bakola mu yija, ukulyoka uluhande lweꞌmbembe.
Balya bandu bo Rurema akamùsikiiriza mbu mukizi balanga,
mwanakizi yiyuvwa hiꞌgulu lyabo, buno balyagagi hayi?
21 «Balya bandu, mwâli kizi baharuura mbu bali biira biinyu.
Aahago! Ikyanya bagayiji mùhima, banakizi mùtwala, bikagi mugaki deta?
Si mugakizi hindagala bweneene, ngoꞌmukazi úkola mu buta!
22 Hali ikyanya mwangayibuuza, ti:
“Yibi byoshi, kituma kiki bikola mu tuhikira?”
Íbitumiri biri kwokwo, bwo mukoli yifuuziri mu byaha.
Kyo kitumiri bakola mu mùkaturura imirondo, banamùgumbiire.
23 «Aahago! Umuhendyopiya, ka ashobwiri ukuyihindula uluhu lwage?
Neꞌngwi kwakundi, ka yangahindula ibikeba-bikeba byayo?
Kwo na kwokwo niinyu, bwo mukoli komiiri ukugira amabi,
ka mwangaki hasha ukuhinduka, mbu munakole amiija? Nanga, maashi!
24 Ngola ngamùshaabula,
nga kweꞌbyula biri mu shaabulwa neꞌmbuusi ukulyoka mwiꞌshamba.»
25 Nahano adetaga kwokuno: «Mwe batuulaga beꞌYerusaleemu, si keera mukanyibagira lwoshi,
mwanabiika ubwemeere ku mizimu.
Kwokwo, Nahano anashungisiri kweꞌkihano kimùlindiriiri.
26 Ngamùshemuula imirondo, halinde i malanga,
abandu booshi banabone ubukondwe bwinyu, munateezibwe ishoni.
27 Ngiisi byo mugweti mugaagira, kiri kyagaza bweneene imwani!
Mbwini ngiisi kwo mukoli yifuuziri mu busambani,
nga fiizi íri mu lungumirira ibuguma.
Munakola mu yilala mu byeꞌkipagaani, ku migazi, kiri na mu ndalo.
E bandu beꞌYerusaleemu, yayewe imwinyu! Ka mutâye yeruusibwe?»