31
Abahisiraheeri bagalukira imwabo
1 Nahano adetaga kwokuno: «Ku yikyo kyanya, ngaaba nie Rurema weꞌmilala yoshi yaꞌBahisiraheeri. Nabo, banabe bo bandu baani.»
2 Nahano adetaga kwokuno:
«Yabo Bahisiraheeri, ngiisi ábakafuuka ulufu mwiꞌshamba,
ngababonera ulukogo, na mbaluhuule.
3 Yaho kishangi, nie Nahano nꞌgabahulukira kwo, nanababwira:
“Nyamiri nimùkuuziri halinde imyaka neꞌmyakuula!
Kyo kitumiri ngi genderiiri ukumùkejeerera.
4 E Bahisiraheeri! Ngashubi mùyubakulula,
halinde munabe kaaya ákalimbiri.
Mugashubi yabiira zirya ngoma ziinyu,
munagendi shambaalira kuguma naꞌbandi, iri munatamba.
5 Mugashubi kizi byala imizabibu mu migazi yeꞌSamariya.
Ee! Abalimi bagagibyala, banakizi gilya ku bushambaale.
6 Mu yizo siku, abalaliizi bagakizi yimanga mu migazi ya Hifurahimu, banatange ikitambira, ti:
E balya! Mugire tuzamuukire ku mugazi Sayuni,
gira tugendi yikumba Rurema Nahamwitu.”»
7 Nahano adetaga kwokuno: «Mushambaale, munakizi yimba hiꞌgulu lyaꞌBahisiraheeri.
Munakizi babandira akabuuli, bwo bakoli himiri ibinyamahanga byoshi.
Mukizi balumbiisa, iri munabahuuza kwokuno:
“E Nahano! Ukizagye abandu baawe, balya ábasigiiri mu Bahisiraheeri!”
8 Lolagi! Ngabalyosa mu kihugo kyeꞌmbembe,
na mbakuumanie ho batuuziri ku mbeka zeꞌkihugo.
Mu kati kaabo, baguma balyagagi mbumi neꞌbirema.
Abakazi baguma, bakola neꞌnda, naꞌbandi bakola bu buta.
Yabo booshi, kwo bakoli luguusiri bweneene, bagagaluka.
9 Ikyanya bagagaluka, bagayija bakola mu lira,
iri banandabaaza.
Ngabaleeza mu njira ígolosiri, hoofi noꞌtudota,
bataganakizi siitara.
Ee ma! Yabo Bahisiraheeri, nyamiri ndi yishe, Hifurahimu ye fula yani.»
10 Mwe binyamahanga! Yuvwagwi ngiisi kwo Nahano atubwira.
Iyo ndumwa yage, mukizi gimenyeesa mu batuuziri hala, ha butambi lyeꞌnyaaja.
Mukizi babwira: «Kundu Nahano akashabulira Abahisiraheeri mu mahanga,
halikago buno, akola agashubi bakuumania.
Agakizi bakuya-kuya, nga kwoꞌmungere ali mu kuya-kuya ibibuzi byage.»
11 Yabo Bahisiraheeri, abagoma baabo bakiri neꞌmisi mingi ukubahima.
Kundu kwokwo, Nahano agabakiza mu maboko gaabo.
12 Bagataaha bagweti bagayimba ku kisegengo ku mugazi Sayuni.
«Ngabaheereza ingano, neꞌdivaayi, naꞌmavuta, neꞌbibuzi, kiri neꞌngaavu.
Yibyo byoshi, ikyanya ngabaheereza byo, imitima igashenguuka neꞌbimwemwe.
Bagaaba nga ndalo yo bali mu nywisa, batanâye ki libuzibwe.
13 Ku yikyo kyanya, abanyere bagakizi tamba ku busiime, kiri neꞌmisore naꞌbashaaja.
Kundu bakiri mu jengeerwa, haliko ngaki bashambaaza.
Ngakizi baholeeza, halinde umwizingeerwe gwabo gunahinduke bushambaale.
14 Yabo bandu baani, ngabayigusa ku biija byani.
Kiri naꞌbagingi, ngakizi baheereza inyama íziri tiita.»
Kwokwo, kwo Nahano adesiri.
Rurema akejeerera Abahisiraheeri
15 Nahano adetaga kwokuno:
«Mu kaaya keꞌRama, abandu bakola mu bululuka ku kimombo,
munali mu yuvwikana uluhanga bweneene!
Ee! Laheeri ye gweti úgalirira abaana baage.
Atanaloziizi kwo hagire úgamúholeeza,
bwo batakiri ho.
16 Nie Nahano, nadetaga kwokuno:
“Uhulikage ma! Uhotole imigenge.
Si ngaki kuhemba ku ngiisi byo wâli kizi kola.
Abaana biinyu, kundu bakiri mu maboko gaꞌbagoma biinyu,
bâye ki gafuushuke mwo.
17 Ee ma! Mu siku ízigayija, yabo baana bâye galukire mu kihugo kyabo,
banabe bakola noꞌmulangaaliro.”»
Kwokwo, kwo Nahano adesiri.
18 «Nyuvwiti ngiisi kwaꞌBahifurahimu bakola mu yidodomba, mbu:
“E Nahano! Twâli riiri nga nyana ítazi hetwa ukubetula ingata.
Watuhaniiriza bweneene, halinde twanagiyiga.
Aaho! Utugalulage, halinde tushubi ba bandu baawe.
Si wenyene naaho, we Rurema Nahamwitu!
19 E Nahano! Twâli mali habuka, twanayijamburiisa, iri tunayiteeza ishoni.
Ee! Ku kyanya twâli ki riiri baanuke, tukavujuuka mu bitali nga byo.
Halikago ha nyuma, twanatumburukwa, twanayemeera kwo tuli banabyaha.
Na buno, tukolaga mu gerania, iri tunakugalukira.”»
20 Nahano adetaga kwokuno: «Hifurahimu ye fula yani, ninamúkuuziri bweneene.
Na kundu ngiri mu múkambira, haliko na njubi kizi múyidula.
Umutima gwani, gumúshengukiiri ngana-ngana,
na ndoziizi ukumúkejeerera.
21 «E Bahisiraheeri, irya njira yo mukalenga mwo, mu kulyosibwa mu kihugo kiinyu,
mugishakule bwija, munagibiike mwoꞌtulangikizo,
gira tukakizi yerekana injira yo mugagaluka mwo.
Yutwo twaya twoshi two mukashaaga mwo, mushubi tugalukira mwo.
22 E bahuni, mugagenderera ukuhabuka, halinde mangoki?
Si mu kihugo, Nahamwitu agakoleesa igambo lihyahya.
E ma! Abahisiraheeri bakolaga bagashubi hoobera Rurema wabo.»
Abayuda, Nahano âye shubi bagashaanira
23 Nahano woꞌbushobozi bwoshi, Rurema waꞌBahisiraheeri adetaga kwokuno: «Yabo Bayuda, ikyanya ngabagalula mu kihugo kyabo, na mu twaya twamwo, lyaꞌbandu bagashubi kizi deta kwokuno:
“Nahano akizi gashaanira umugazi Sayuni!
Ee! Haaho, ho atuuziri.”
24 «Abayuda bagakizi tuulanwa mu kihugo kyabo, na mu twaya twamwo. Ee! Abalimi bagatuulanwa bwija kuguma naꞌbangere.
25 Ngiisi ábakoli luhiri, ngakizi bahembulula. Na ábakoli vunisiri indege, ngashubi basikamya.
26 Byo bigaatuma umundu agaaba ali mu deta kwokuno: “Iri nashaaga mwiꞌro, nabona kwo njubi luhuusiri bwija bweneene!”»
27 Nahano adetaga kwokuno: «Ikihugo kyeꞌHisiraheeri neꞌkyaꞌBayuda, mu siku ízigayija, ngashubi biyijuza mwaꞌbandu, kiri na mweꞌbitugwa.
28 «Yaho keera, nienyene nꞌgabashikula, nanabahongola, halinde nanabasivya lwoshi. Halikago buno, ngola ngabakuya-kuya, ninashubi bashinga, noꞌkubayubakulula.» Kwokwo, kwo Nahano adesiri.
29 «Mu yizo siku, ndaaye úgaki shubi twa yugu mugani:
“Ababusi bakalya imizabibu mibishi,
naꞌbaana baabo banagwatwa neꞌnjijira.”
30 «Yibyo bitumbwe bibishi, ngiisi úwabilya, ye ganayuvwa injijira. Umundu, iri angagira ibyaha, yenyene ye ganayitwa hiꞌgulu lyabyo.
31 «Mu siku ízigayija, ngashubi nywana ikihango kihyahya naꞌBahisiraheeri, kiri naꞌBayuda.
32 Kitaganaki ba nga kirya kyo nꞌgatangi nywana na bashokuluza baabo, ku kyanya nꞌgabarongoora noꞌkuboko kwani, mu kubalyosa i Miisiri. Mukuba kundu nâli bakuuziri, nga kwoꞌmushosi ali mu kunda mukaage, halikago kirya kihango, bakakihongola.» Kwokwo, kwo Nahano adesiri.
33 Nahano ashubi detaga kwokuno: «Ku yikyo kyanya, ikihango kyo nganywana naꞌBahisiraheeri, kyo kyekino: Imaaja zaani, ngola ngaziyandika mu menge gaabo, na mu mitima yabo. Ngaaba Rurema wabo. Nabo, banabe bandu baani.
34 Ku yizo siku, ndaaye úwâye ki be niꞌgoorwa mbu ayigirize abaabo, kandi iri abatuulani baage, kwo bayige ibya Nahano. Si booshi bagaaba bakoli nyiji, ukulyokera ku batoohiri mwo, halinde ku bakulu. Naani, ngabakoga ibyaha byabo, ndanâye ki bikengeere.»
35 Rurema, iziina lyage ye Nahano woꞌbushobozi bwoshi! Ye mu yasa izuuba ku bukiiri. Ye nali mu yasa umwezi neꞌndonde bushigi. Ali mu kizi yehuula imidunda, inakizi yipukula ku ngombe yeꞌnyaaja.
36 Yoyo ye wanadeta kwokuno: «Ngiisi byo njungisiri, ndaakyo kyanya byâye ki hinduke. Kwo na kwokwo naꞌBahisiraheeri, ndaakyo kyanya ngabajandirira, mbu bataki be bandu baani.»
37 Nahano adetaga kwokuno: «Igulu litangagerwa. Kiri niꞌdaho, ndaaye úwangamenya byoshi íbilibishamiri mwo. Kwokwo naꞌBahisiraheeri, kundu bakahuba, si bitangaziga kwo mbajande.»
38 Nahano adetaga kwokuno: «Mu siku ízigayija, bagashubi nyubakululira akaaya keꞌYerusaleemu. Bagatangirira ku lwingo lweꞌHananeeri, halinde ku lwivi úluli ha kakuma.
39 Ikyanya bagakagera, bagatee golola umugozi uluhande lweꞌmbembe halinde ku mugazi Garebu, banagusoose, halinde i Goha.
40 «Irya ndekeera yoshi, bagagindaluulira, kuli kudeta halya hooshi ho bali mu kabulira ibirunda noꞌmunyota-kiiko. Bagandaluulira neꞌndalo zooshi, halinde mu musima gweꞌKidorooni, kiri naꞌkakuma ákali hoofi niꞌrembo lyoꞌmulyango gweꞌFwarasi, úguloziri isheere. Yaho hooshi, ndaaye úgaki shubi hagwata, kandi iri ahahongola kiri neꞌhiniini!»