24
1 Leero, umunamaleere Balaamu anabona kwo Nahano asiimiri naaho ukugashaanira Abahisiraheeri. Kwokwo, atanaki shubi gendi lagula, nga kwo âli kizi gira. Anakizi langiiza naaho mwiꞌshamba.
2 Neꞌri akalangiiza, anabona ishumbi zaꞌBahisiraheeri. Ngiisi mulala, gwâli naꞌhandu haagwo. Ha nyuma, Umutima gwa Rurema gwanamúyijira,
3 anatangaga ubuleevi kwokuno:
«Balaamu mugala Behoori, akayigulirwa ubuleevi, anabubona neꞌnooka.
Yubwo buleevi bwage, abubwini ku bweranyange.
4 Yubwo buleevi, buli bwoꞌmundu úkayuvwa amagambo ga Rurema.
Ikyanya Rurema woꞌbushobozi bwoshi akanyereka amabone,
amasu gaani ganayigulwa, nanagwa haashi mu kumúyikumba.
5 E beene Yakobo, amaheema giinyu, ganonosiri ngana-ngana!
Ishumbi ziinyu, zisimisiizi amasu bweneene.
6 Yizo shumbi ziyajabusiri ngeꞌbiti bingi byeꞌbigazi.
Ziri nga ndalo íziri ku ngombe yoꞌlwiji.
Ziri ngeꞌbiti byeꞌmyerezi byo Nahano akabyala.
Zinali ngeꞌbiti byeꞌmyerezi, ímeziri hoofi lyoꞌlwiji.
7 Abahisiraheeri bagakizi ba naꞌmiiji mingi.
Kiri naꞌbaana baabo, bagakizi longa amiiji nga ngiisi kwo basiimiri.
Mwami wabo, agaaba mukulu bweneene ukuhima Hagagi.
Ubwami bwage, bugalumbuuka hooshi.
8 Rurema akabashaaza i Miisiri.
Na buno, balyagagi bikalage, nga mbogo.
Ngiisi milala íbashombiri, bali mu gimirangusa.
Amavuha geꞌyo milala, banagavungule-vungule,
banakizi batumita neꞌmyambi.
9 Bali mu ba bayibishiri, mu kubunda haashi nga ndare.
Aahago! Nyandi úwangagira mbu abavyule?
Ngiisi ábagagashaanira Abahisiraheeri, nabo bakizi gashaanirwa.
Si ngiisi ábagabadaaka boohe, bagakizi daakwa.»
10 Ulya mwami Balaaki, mbu ayuvwagwe kwokwo, anayami rakarira Balaamu bweneene. Anayami yishumata ku buraakari, ti: «Si nꞌgakutumira kwo uyiji daaka abagoma baani. Haliko buno, keera wabagashaanira ubugira kashatu.
11 Aaho! Uyigenderage, ugalukire i kaaya. Nꞌgakulagaania kwo ngakuhemba bwija ngana. Si Nahano ataloziizi mbu ubilonge.»
12 Balaamu anamúshuvya: «E Balaaki, ka utaki kengiiri ngiisi kwo nꞌgabwira indumwa zaawe?
13 Si nꞌgababwira: “Kundu angambeereza akajumiro kaage, kanabe kayijwiri mweꞌharija, neꞌnooro, haliko ndaalyo igambo lyo nangagira ha lwani nienyene, liba liija, kandi iri libi. Ngaadeta naaho ngiisi byo Nahano agambwira. Ee! Byebyo byo ngaadeta.”
14 «Kwokwo buno, namu galukira mu bandu baani. Haliko, ku kyanya ndazi galuka, ngatee gwanwa nakubwira ngiisi byo yaba bandu bagagirira abandu baawe, mu siku ízigayija.»
15 Lyeryo, Balaamu anatanga yubu bundi buleevi kwokuno:
«Yubu, bulyagagi buleevi bwa Balaamu mugala Behoori.
Yubu buleevi, mbubwini ku bweranyange.
16 Nyuvwiti amagambo ga Rurema.
Keera anammenyeesa hiꞌgulu lyabo, anali Rurema úli Hiꞌgulu lya Byoshi.
Ngweti ngaabona amabone ukulyoka Rurema woꞌbushobozi bwoshi.
Na ngweti ngayami fukama imbere lyage, buzira kuziba amasu.
17 Nimúbwini, haliko bitazi ba bwobuno.
Si nimúbwini ku siku ízâye yije.
Mu beene Yakobo, mugahuluka indonde.
Mu beene Hisiraheeri, mugahuluka umwami.
Agakizi vungula-vungula abandu beꞌMohabu,
anakizi bera utuhanga twa beene Seeti.
18 Abahedoomu bagaahimwa, kuguma naꞌBaseyiri.
Naꞌbandi bandu banayiji tuula mu kihugo kyabo.
Haliko, beene Hisiraheeri boohe, bagakizi longa ubuhimi.
19 Mu yabo beene Yakobo, mugayima umutwali.
Kundu hali ábagafuuka mu twaya, haliko uyo mutwali agabashereeza.»
20 Ha nyuma, Balaamu analangiiza Abahamareki, anatanga ubuleevi hiꞌgulu lyabo, ti:
«Abahamareki bâli hiiti imisi ukuhima abandi booshi.
Kundu kwokwo, ukuheza kwabo, bagaminikwa ngana.»
21 Haaho, Balaamu analangiiza Abakeeni, anatanga ubuleevi hiꞌgulu lyabo kwokuno:
«E Bakeeni, utwaya twinyu tusikamiragi.
Tuli nga ngisha ízibiisirwi hiꞌgulu ku nyaala.
22 Kundu kwokwo, Abahashuuri bagayiji mùgwata imbira,
halinde munashereezibwe.»
23 Ha nyuma, umunamaleere Balaamu anashubi tanga ubuleevi kwokuno:
«Yibyo byoshi, ikyanya Rurema agabigira, nyandagi úgaaba úkiri ho?
24 Amashuba gagalyoka i Kitimu,
ganayiji teera i Hashuuri neꞌHebeeri.
Kundu kwokwo, mu kugaluka, nabo bagashereezibwa lwoshi.»
25 Uyo Balaamu, ikyanya akayusa ukutanga amaleevi, anagalukira i kaaya. Mwami Balaaki, naye anataaha.