102
Ikyanya ngakutabaaza, ukizi yami njuvya
1 Amahuuno ga úli mu libuuka, anatabaaze Nahano.
2 E Nahano, ikyanya ndi mu kutabaaza, ukizi ndega amatwiri.
Ikyanya ndi mu kutakira, ukizi nyuvwiriza.
3 Buno, ngola mu libuuka bweneene.
Aaho! Utakizi mbindulira ingoto, si ukizi ndega amatwiri.
Ikyanya ndi mu kutabaaza,
ukizi vwaruka mu kunjuvya.
4 Isiku zaani, ziri mu yami nyerera nga kyusi.
Amavuha gaani, ganakoli duusiri.
5 Umutima gwani, gukoli lwaziri, nga mbuto íziyumiri.
Kiri neꞌbyokulya, ngola mu biyibagira.
6 Ngola mu shiiba ngweti ngagongeera naaho.
Na ngoli jambiri ngana,
halinde amavuha gaani gakoli bonesiri hooshi mu luhu.
7 Bwo nduuziragi nienyene mu biguuka,
ngoli ba nga nafufulu wa mwiꞌshamba.
8 Ndakiri mu toola iro.
Si ngola nga kanyuni ákali naꞌkahumbwe ku kashongya.
9 Ngiisi lusiku, abagoma baani bagweti baganduka,
iri bananjekeereza.
Kiri niꞌziina lyani, bali mu likoleesa mu kudaakana.
10 Ibyokulya byani, bikoli ba munyota-kiiko.
Neꞌkinywebwa kyani, kikolagi bushirwi mweꞌmigenge.
11 E Rurema, maashi! Nabonaga kwo ukoli rakiiri bweneene.
Keera ukandengeza, wananvugumula hala.
12 Isiku zaani, zikola mu lengaga duba nga kimbehwa,
na ngoli yumagusiri nga kishuka.
13 Kundu kwokwo, e Nahamwitu, wehe we twaziri hiꞌgulu lya byoshi, halinde imyaka neꞌmyakuula.
Iziina lyawe ligakizi yama ho, halinde ibibusi byoshi.
14 Ugaki yimuka, unakejeerere abandu beꞌSayuni.
Ee ma! Kirya kyanya kyo wâli mali shungika, keera kyahikaga.
Kikola kyanya kyoꞌkubakejeerera.
15 Yako kaaya keꞌSayuni, abandu baawe bakuuziri kiri naꞌmabuye ágayubasirwi mweꞌnzitiro zaako.
Noꞌlukungu lwako nalwo, bagweti bagaluhahalira.
16 E Nahano, ibinyamahanga bigakizi juguma imbere lyawe.
Abaami baabo, banakizi kugingika.
17 Kalya kaaya keꞌSayuni, ugashubi kayubakulula,
unakayerekane mwoꞌbulangashane bwawe.
18 Banakahuku, ikyanya bagakutabaaza, ugabayuvwiriza.
Yago mahuuno gaabo, utagagashemya.
19 Yaga magambo gooshi, tukwaniini tugayandikage,
gira abandu beꞌbindi bibusi bakagayuvwe,
nabo banakizi huuza Nahano.
20 Ubabwire kwo Nahano, kundu atuuziri iriira munda mwiꞌgulu,
haliko aki gweti agalangiiza hano mu kihugo.
21 Ngiisi ábalashirwi mu nyumba yeꞌmbohe,
ikyanya bali mu gongeera ali mu ba abayuvwiti.
Na kundu bakatwirwa ulubaaja kwo bayitwe,
haliko anabaguluule.
22 Kyo kitumiri abandu bagakizi yivuga Nahano mu kaaya keꞌYerusaleemu,
banakizi múhuuza mwo.
23 Ibinyamahanga bigakuumana kuguma,
gira bikizi yikumba Nahano.
24 Ala nie! Kundu ngiri musore, haliko Rurema keera akanvuna indege.
Isiku zaani, keera akaziniihya kwo.
25 Kwokwo, nanatakira Rurema, ti: «E Rurema wani,
si we yamiri ho, halinde imyaka neꞌmyakuula!
Aahago! Bwo ngiri musore, utalunguli nyita, maashi!
26 Yaho keera, we kabumba ikihugo.
Kiri niꞌgulu, we kalibumba naꞌmaboko gaawe.
27 Yibyo byombi, biganyerera, haliko, wehe ugayama ho.
Si bigahula nga mirondo,
unabihindule nga bishajiira, binakabulirwe.
28 Wehe, uyamiri uli we yolya-yolya.
Neꞌmyaka yawe, itâye heke.
29 Kwokwo, abaana baꞌbakozi baawe bagakizi tuula imbere lyawe.
Kiri naꞌbaana baabo bagakizi sikama ho.»