Ikitaabo kya kataanu
107
(Zaburi 107–150)
Rurema ali mu ba mwemeera, anayamiri atukuuziri
1 Nahano ali mwija! Kwokwo, mukizi tanga kongwa imwage.
Nahano anali mwemeera, anayamiri atukuuziri, halinde imyaka neꞌmyakuula.
2 Bwo Nahano keera akamùguluula, mukizi bwira abandi.
Mubabwire ngiisi kwo agweti agamùkiza mu bagoma biinyu.
3 Ee! Akamùshaaza mu mahanga gooshi,
ukulyoka uluhande lweꞌsheere, na lweꞌmuga, na lweꞌmbembe, na lweꞌkisaka.
4 Yabo bandu baage, baguma baabo bâli gweti bagajeba-jeba mwiꞌshamba.
Kundu bâli bagagendi tuula mu kaaya, haliko batanakabona.
5 Inyoota niꞌshali, byâli kizi gunuuza bweneene,
halinde banahambiri fwa.
6 Ikyanya bâli kolaga mu malibu, banalirira Nahano,
kyanatuma agabakiza.
7 Akabaleeza mu njira ígolosiri,
halinde anabahisa mu kihugo kyo bagatuula mwo.
8 Ku yukwo, bakizi tanga kongwa imwa Nahano.
Mukuba, urukundo lwage luyamiri ho,
anali mu gira ibisoomeza mu kati kaabo.
9 Ngiisi ábanyotiirwi, agweti agabaheereza ikinywebwa.
Na ábashalisiri, ali mu bayigusa neꞌbyokulya biija.
10-11 Baguma baabo, kundu Rurema úli hiꞌgulu lya byoshi akabahanuula,
halikago banamúgayiriza, banahuna imbere lyage.
Kwokwo, banashwekwa mu kihulu, banaba mu kahumbwe.
Bâli shwesirwi utubangira, iri banalibuukira mu nyumba zeꞌmbohe.
12 Rurema anabavuna imitima,
mu kuhanguula kwo bakoleesibwe ku kahaati.
Neꞌkyanya bâli kizi yitimba haashi,
ndaanaye woꞌkubayinamula.
13 Ikyanya bâli kola mu malibu, banalirira Nahano,
kyanatuma agabakiza.
14 Yutwo tubangira twabo, anatuvuna,
anabalyosa mu kihulu, na mu kahumbwe.
15 Ku yukwo, bakizi tanga kongwa imwa Nahano.
Mukuba, urukundo lwage luyamiri ho,
anali mu gira ibisoomeza mu kati kaabo.
16 Kundu bakahamikwa neꞌbyuma, banâli shwesirwi mu nyiivi zeꞌmiringa,
haliko anazivungula zooshi.
17 Abandi baabo, banahwijikala mu byaha byabo, banahuna,
kyanatuma bagakizi libuuka bweneene.
18 Ibyokulya byabo, byanabaneka,
kyanatuma bâli kola bu fwa.
19 Ikyanya bâli kolaga mu malibu, banalirira Nahano,
kyanatuma agabakiza.
20 Nahano anakyula, banakizibwa.
Kwokwo, kwo akabanyugutula mu lufu.
21 Ku yukwo, bakizi tanga kongwa imwa Nahano.
Mukuba, urukundo lwage luyamiri ho,
anali mu gira ibisoomeza mu kati kaabo.
22 Bwo Nahano âli gweti agakizi gira ibisoomeza,
bakwaniini bakizi deta kongwa, mu kumútangira ituulo.
Banakizi múyimbira ku bushambaale.
23 Abandi baabo, bâli kizi balama naꞌmashuba,
banagende bagweti bagadandaza mu mahanga gooshi.
24 Nabo, bakabona ngiisi kwo Nahano akakola ku bukalage,
banabona neꞌbitangaaza byo akagira mu nyaaja.
25 Ikyanya akakyulaga, ikihuhuuta kyanayija,
kyanabirindula imidunda mu nyaaja.
26 Iyo midunda, yanakizi baheba-heba hiꞌgulu bweneene,
iri inakizi shubi bayisa.
Mu yago makuba, banagwatwa neꞌkihuumula.
27 Banakizi yifuka iyo munda neꞌyo munda,
iri banabambaajira nga balalwe.
Batanaki menya byo bagaagira.
28 Ikyanya bâli kolaga mu malibu, banalirira Nahano,
kyanatuma agabakiza.
29 Yikyo kihuhuuta, anakihoohya, shwaa!
Neꞌmidunda, yanabatama.
30 Neꞌkyanya imidunda ikabatama, banashagaluka.
Nahano anabarongoora, halinde banajabukira mu kyambu.
31 Ku yukwo, bakizi tanga kongwa imwa Nahano.
Mukuba, urukundo lwage luyamiri ho,
anali mu gira ibisoomeza mu kati kaabo.
32 Bakwaniini bakizi huuza Nahano mu mihumaanano,
na mu naama zaꞌbashaaja.
33 Nahano âli kizi hindula inyiiji zibe ngiꞌshamba.
Kiri neꞌshyoko, anakizi zikamya.
34 Ikyanya abandu bâli yifuuziri mu byaha,
anakizi hindula ikihugo kyabo kiginuunuke.
35 Na kwakundi, anahindula ishamba,
zibe kitenga kyaꞌmiiji.
Kiri neꞌkihugo íkiyumiri,
anakihindula kibe mweꞌshyoko íziri mu hinga.
36 Na kundu abandu bâli kizi teerwa noꞌmwena, haliko anababungiisa,
banagendi yubaka akaaya ko bagatuula mwo.
37 Na buno, yabo bandu bali mu byala imizabibu neꞌzindi mbuto,
banakizi yeza bweneene.
38 Yabo bandu, Nahano anakizi bagashaanira ngana,
halinde banaluguuka.
Kiri neꞌbitugwa byabo, byanayolola.
39 Ha nyuma, ikyanya bakalongaga amakuba, banaba bakola bakeni,
umuharuuro gwabo gwanayondobera.
40 Nahano ananegura abakulu baabo,
anabaleeza mwiꞌshamba, muzira injira.
41 Kwokwo, ngiisi ábakola mu makuba, ali mu bakiza,
anakizi yushuula imbaga zaabo, nga lukuuli lweꞌbibuzi.
42 Mwene yago magambo, ikyanya abatuudu bali mu gabona,
bali mu kizi shambaala.
Si banangora-mabi boohe, banatibaalirwe.
43 Yaga magambo, ngiisi úli mu ba mwitegeereza,
akizi gayitoneesa kwo.
Anakizi sobaanura ngiisi kwo Nahano
ali mu kizi kundana mu kati koꞌbwemeere.