118
Mukizi tanga kongwa imwa Nahano
1 Mukizi tanga kongwa imwa Nahano. Mukuba, ali mwija.
Urukundo lwage luyamiri ho, halinde imyaka neꞌmyakuula.
2 Abahisiraheeri bakwaniini bakizi deta:
«Urukundo lwage luyamiri ho, halinde imyaka neꞌmyakuula.»
3 Naꞌba mwiꞌkondo lya Harooni, nabo bakizi deta:
«Urukundo lwage luyamiri ho, halinde imyaka neꞌmyakuula.»
4 Ngiisi ábasimbahiri Nahano, booshi bakizi deta:
«Urukundo lwage luyamiri ho, halinde imyaka neꞌmyakuula.»
5 Ikyanya nâli kola mu makuba, nꞌgatakira Nahano,
ananyuvwa, ananjwekuula.
6 Nahano ali kuguma na naani.
Ku yukwo ndayobohiri.
Aaho! Kuti kwoꞌmundu angaki ngira?
7 Ee ma! Nahano ali kuguma na naani,
anagweti agandabaala.
Ku yukwo, ikyanya abagoma baani bagaahimwa, ngabahenekera!
8 Tukwaniini tukizi tibitira Nahano,
ho twangalangaalira abandu.
9 Ee! Buli bwija ukutibitira Nahano,
ho twangalangaalira abatwali beꞌkihugo.
10 Abandu baꞌmahanga gooshi bâli koli nzokaniini.
Halikago, nanabaminika kwiꞌziina lya Nahano.
11 Kundu bâli nzokaniini imbande zooshi,
haliko, nanabaminika ngana kwiꞌziina lya Nahano.
12-13 Yabo bagoma, bâli nzokaniini nga lukuuli lweꞌnjuki,
banagira imisi yoshi, mbu banyite.
Kundu kwokwo, boohe, bo bakakizi fwa.
Ee ma! Bâli nga kishungu-shungu íkikola mu jigimba.
Kwokwo, Nahano ye kandabaala,
nanabaminika kwiꞌziina lyage.
14 Nahano ye ndi mu longera mweꞌmisi, keera anangiza.
Kyo kitumiri ndi mu múyimbira.
15 Ábakoli kwaniini, Nahano keera akakoleesa ubushobozi, mu kubahimira.
Kyo kitumiri bakola noꞌbushambaale,
banakola mu banda akabuuli mu maheema gaabo, iri banadeta:
16 «Nahano akakoleesa ubushobozi bwage, mu kutuhimira.
Yubwo bushobozi bwage, keera bwagira ibitangaaza.»
17 Buno, ndagaki fwagaga. Si ngayama ho.
Birya byoshi byo Nahano akangirira, ngakizi bimenyeesania.
18 Mukuba, kundu Nahano akambaniiriza bweneene,
halikago, atakandeka kwo nvwe.
19 Munyigulirage inyiivi za mu nyumba ya Rurema,
ngiisi haꞌbandu ábakwaniini bali mu yingira.
Ngayingira mwo,
na ngizi tanga kongwa imwa Nahano.
20 Yugu mulyango, guli mu lola imunda Nahano.
Ngiisi ábakwaniini naaho, bo bagagulenga mwo.
21 E Nahano, bwo keera ukanjuvya, wanangiza,
nadeta kongwa bweneene imwawe.
22 Ibuye lyaꞌbuubasi bakalahira,
lyeryo lyo ligweti ligakania akagongo koꞌlutaliro.
23 Yiri igambo, Nahano yenyene ye kaligira,
linakoli tusomeziizi bweneene.
24 Luno lusiku, Nahano yenyene ye kalugira.
Aaho! Tukizi lushagaluka kwo, iri tunalushambaalira.
25 E Nahano, twakuyinginga, utukizagye, maashi!
Unakizi tugashaanira, we kongwa!
26 Agashaanirwe, ngiisi úwayija kwiꞌziina lya Nahano.
Bwo tuli mu nyumba ya Rurema, tugweti tugamùgashanira.
27 Nahano ye Rurema!
Anagweti agatutanguulira.
Kwokwo, muyabiire amatavi, munakizi genda ku kisegengo,
halinde ha katanda koꞌkutangira kwaꞌmatuulo.
28 Wehe, uli Rurema wani.
Kwokwo, ngakizi kutangira kongwa!
Ee! Ngakizi kuhuuza.
29 Mukizi tanga kongwa imwa Nahano! Mukuba, ali mwija.
Urukundo lwage luyamiri ho, halinde imyaka neꞌmyakuula.