121
Ubutabaazi bwani bugalyoka hayi?
1 Luli mu yimbwa na ábali mu zamuukira i Yerusaleemu.
Ngweti ngalegamira ku migazi.
Aaho! Ubutabaazi bwani bugalyoka hayi?
2 Niehe, ngabulongera imwa Nahano,
ulya úkabumba igulu neꞌkihugo.
3 Nahano agweti agakulanga.
Atagaaleka ulushando lwawe luyibindikire.
Ee! Ayamiri akulaaziri, atanâye hunire.
4 Umulaazi waꞌBahisiraheeri, atali mu yihunikira,
atanali mu hunira.
5 Nahano agweti agakulanga.
Ikizunguza kyage, kiri mu kusiikira, utababuke niꞌzuuba.
6 Izuuba litagakubabula ku kyanya kyoꞌmulege-rege.
Kiri na bushigi, umwezi gutagakizi kugira buligo.
7 Nahano agakizi kulanga na ngiisi mabi gooshi.
Agagenderera ukukizi kulanga, ukizi ba mugumaana.
8 Nahano agakizi kulanga mu kugenda kwawe,
na mu kugaluka kwawe.
Agagenderera ukukizi mùlanga, ukulyokera buno,
halinde imyaka neꞌmyakuula.