147
Rurema ali mu tabaala abandu baage
1 Tukizi huuza Nahano!
Buli bwija tukizi yimbira Rurema witu inyimbo zoꞌbwivuge.
Ee! Ukukizi múyivuga, kusimisiizi bweneene, kwo kunakwaniini.
2 Ikyanya Abahisiraheeri bakaba keera bashaabuka mu mahanga,
Nahano anabakuumania, gira bahunguuke.
Kiri naꞌkaaya kaabo keꞌYerusaleemu, anakashakuulula.
3 Ngiisi ábali mu ba bavunisiri imitima, ali mu bakania yo.
Neꞌnguma zaabo, anazishweke.
4 Nahamwitu, ye mu haruura indonde zooshi.
Ngiisi ndonde, ali mu giyinika iziina.
5 Ali mu gingikwa, anali noꞌbushobozi bweneene.
Ubwenge bwage, butahiiti ho buhekiiri.
6 Ngiisi ábali batuudu, Nahano agweti agabashiga.
Si banangora-mabi boohe, ali mu badeedeka haashi.
7 Mukizi yimbira Rurema Nahamwitu, iri munadeta kongwa.
Munakizi múlakiza inanga.
8 Mukuba, ye biisiri ibibungu kwiꞌgulu,
ye nali mu niesa invula mu kihugo,
halinde imigazi inamere kweꞌkishuka.
9 Agweti agayigusa ibitugwa ku bwasi.
Neꞌkyanya ibyana bya namujongo biri mu huuna ibiheerwa,
ali mu biheereza byo.
10 Nahano, mu kubona imisi mingi yeꞌfwarasi, atasiimiri.
Atanasiimiri mbu bwaꞌmagulu goꞌmundu gafiisiri.
11 Si ali mu ba asiimiri ngiisi ábali mu ba bamúsimbahiri,
banabe babiisiri umulangaaliro gwabo ku rukundo lwage, kwo lutâye male.
12 E bandu beꞌYerusaleemu, mukizi huuza Nahano.
Mukizi yivuga Rurema winyu.
13 Mukuba, ali mu gashaanira abandu biinyu.
Kiri neꞌnyiivi zaꞌkaaya kiinyu, ye mu kizi zisikamya.
14 Imbibi zeꞌkihugo kiinyu, ali mu zibiika mwoꞌmutuula,
anakizi mùyigusa neꞌngano nyiija.
15 Ikyanya ali mu kyula mu kihugo,
kiri mu yami músimbaha.
16 Ali mu shasha ulugungu, kwo luli lweru ngiꞌpamba,
anali mu kwiza ikimi hooshi, nga munyota-kiiko.
17 Yulwo lugungu, ikyanya ali mu lutibula, luli nga lushegebwe.
Aahago! Nyandi úwangahebera akajambi kaalwo?
18 Kundu kwokwo, Rurema ali mu kyula, imbuusi inahuuse,
yulwo lugungu, lunajongoloke,
halinde amiiji ganatondeere ukuhinga.
19 Rurema akamenyeesa Abahisiraheeri igambo lyage,
kuguma neꞌmaaja zaage, naꞌmategeko gaage.
20 Yibyo byoshi, atakabimenyeesa mu bandu beꞌgindi milala.
Si boohe, batayiji imaaja zaage!
Tukizi huuza Nahano!