18
Ulwimbo lwoꞌbuhimi
(2 Samweri 22.1-51)
1 Imwoꞌmwimangizi waꞌbimbi. Izaburi ya Dahudi, umukozi wa Rurema. Akaluyimba ikyanya Nahano akamúkiza mu maboko ga Sahuli, na mu gaꞌbandi bagoma baage.
2 E Nahano, ngukuuziri!
Mukuba we ndi mu longera mweꞌmisi.
3 Nahano ye lwala lwani. Ye na gweti úgandanga. Ye na Lukiza wani.
Ee ma! Rurema wani ye lwala lwani, ye mu ndanga.
Yehe, alyagagi siribo yani.
Ye na misi yo ndi mu kizibwa mwo. Ye na busikamiro bwani.
4 Nahano ye kwaniini ukukizi yivugwa,
bwo ayamiri ali mu ngiza mu bagoma.
Kinatume ndi mu kizi mútabaaza.
5 Narufu âli koli nzokaniini.
Imigezi yage yâli kola iganyihonga kwo, gira imbindike.
6 Imigozi yage yâli koli ngoniri.
Naꞌmalamba gaage gâli kola ha mbere lyani.
7 Ikyanya nâli gweti ngalibuuka,
nanatabaaza Nahano.
Ee! Nꞌgatabaaza Rurema wani, kwo atuuziri mu nyumba yage.
Haaho ngana, ikyanya ngi gweti ngaalira,
ananyuvwa.
8 Lyeryo, ikihugo kyanayami lenga mwoꞌmusisi.
Kiri neꞌnguliro zeꞌmigazi, nazo zanahunga-hunga.
Ee ma! Bwo Rurema âli koli rakiiri,
zanalenga mwoꞌmusisi bweneene.
9 Mu mazuulu gaage mwanatutumuka ikyusi, tutu-tutu!
Na mu kanwa kaage mwanahuluka umuliro gwoꞌkujigiivya,
kuguma niꞌbengesheeshe.
10 Rurema anayanuula igulu, anashonookera haashi,
atabisiri ibibungu biiru mwiꞌdako lyaꞌmagulu gaage.
11 Anashooneraga ku makerubi,
anamúbalalana, halinde anasuula umulindi mu kyanyaanya, vwi!
12 Kirya kibungu kiiru kyanamúzunguluka,
kyanaba ngiꞌheema.
13 Mu bulangashane bwage,
imilavyo, lya-lya!
14 Nahano, kwo ali hiꞌgulu lya byoshi, anayimokooza,
halinde izu lyage lyanayuvwikana.
15 Anavugumula abagoma baani mweꞌmyambi, banashaabuka.
Analeeta neꞌmilavyo, yanabayimula.
16 Ikyanya Nahano akabakanukira,
umuuka gwanalyoka mu mazuulu gaage.
Haaho, amabenga geꞌnyaaja ganayanuuka,
halinde indaliro zeꞌkihugo zanayami boneka ku bweranyange.
17 Rurema akagolola ukuboko kwage ukulyoka hiꞌgulu,
ananyogorora mu miiji mingi.
18 Kundu abagoma baani balyagagi ndwani,
haliko Rurema anangiza mu maboko gaabo.
Ee ma! Akangiza mu kati kaabo,
kundu bâli njombiri, banâli mbimiri imisi.
19 Yewe! Kundu nâli kolaga mu malibu, haliko banandeera.
Kundu kwokwo, Nahano ananjuutira,
20 anandyosa yaho, anandwala áhali umutuula.
Ee ma! Bwo anguuziri, kyanatuma aganguluula.
21 Bwo nâli kizi gira íbikwaniini imbere lya Nahano buzira kuhuba,
kyanatuma agambemba.
22 Na bwo ndi mu simbaha imaaja zaage, anambemba,
ndakanayihandula ku Rurema wani mbu ngizi kola amabi.
23 Imaaja zaage, ndazijaaziri.
Si ngiisi byo akambwira, ndi mu kizi bisimbaha.
24 Ndâli gweti akashembo imbere lya Rurema,
si nâli kizi yihangirira, gira ndayifunde mu byaha.
25 Nahano, ayiji-yiji kwo ndi mweru,
na kwo ndi mu kizi gira íbikwaniini,
kyo kitumiri akambemba.
26 E Nahano, mu bemeera, uli mu yerekana kwo uli mwemeera.
Neꞌmwa ábakwaniini, uli mu yerekana íbikwaniini.
27 Neꞌmwa beeru, uli mu yerekana kwo uli mweru.
Haliko, imwa banangora-mabi boohe, ulyagagi nga ngengya.
28 Ee! Abanabwikangaate, uli mu batindimaza.
Si abatuudu boohe, uli mu bakiza.
29 E Nahano, wehe uli itara lyani.
Ikyanya ndi mu yidikirwa neꞌkihulu,
uli mu kihindula, gube mulengeerwe.
30 Ku butabaazi bwawe, ndi mu hima ikiso kyaꞌbasirikaani.
Unali mu njoboleesa ukusimbuka ikigo.
31 E Rurema, ngiisi byo uli mu gira, bikwaniini bweneene.
Na ngiisi byo uli mu ndagaania, uli mu bigira.
Ngiisi úli mu kutibitira, we siribo yage.
32 Ndaaye gundi Rurema, átali Nahamwitu naaho.
Ee ma! Rurema yenyene, ye lwala lwitu.
33 Ye mu nzikamya,
ye nali mu njongaaniza ho ngakizi lenga.
34 Ibigere-gere byani, ali mu bisikamya ngeꞌnenge zaꞌkabale.
Kiri na ku marango, ali mu ndanga.
35 Amaboko gaani, ayamiri ali mu gakomeereza mwiꞌzibo.
Na kundu bakatula umuheto mu miringa,
haliko amaboko gaani gali mu yami gufwora.
36 Uyamiri uli mu njuutira neꞌsiribo zaawe, gira ungize.
Ukuboko kwawe kweꞌlulyo kugweti kuganzikamya.
Ee ma! Ku butabaazi bwawe, ndi mu sikama.
37 Ugweti ugakizi nyeshuhya,
halinde ishando zaani zitakizi ki tyerera.
38 Nâli kizi bingiriza abagoma baani, halinde na mbagwate,
Ndanâli kizi galuka índazi baminika.
39 Yabo bagoma baani, bâli kizi gwa mwiꞌdako lyeꞌshando zaani,
na mbajigiirize lwoshi-lwoshi,
halinde batangaki yimuka.
40 We kanjoboleesa, halinde ngizi gira izibo,
wanafukamya abagoma baani mu magulu gaani.
41 Balya bagoma baani, wanabapuumusa.
Na ábâli njombiri, nanabaminika.
42 Balya bagoma baani, ikyanya bâli koli loziizi woꞌkubatabaala, atanaboneka.
Na kundu bâli kizi takiraga Nahano, si atanabayakula.
43 Nanabafutiiriza, halinde banaba nga lukungu úluli mu yehuulwa neꞌmbuusi.
Nanakizi genda ngabashemya ha butambi lyeꞌnjira, nga bidaka.
44 Kiri neꞌkyanya abiitu bakandeera, ukangiza.
Neꞌkyanya ukangira mbe mutwali waꞌmahanga, wanakizi ndanga.
Hali abandi bo ndâli yiji.
Nabo kwakundi, bakoli gweti bagangolera.
45 Ibinyamahanga, biri mu yija bigweti bigaagoka imbere lyani.
Ikyanya bali mu nyuvwa, banakizi ngingika.
46 Balya bandu, bakayija bakoli vunisiri imitima.
Na ábâli bishamiri, banakizi yibishuula, iri banalenga mweꞌkinyukura.
47 Nahano ayamiri ho. Na bwo ye lwala lwani, akizi yivugwa.
Rurema wani akizi huuzibwa.
Ye Lwala lwani, ye na Lukiza wani.
48 Ye mu nyihoolera.
Anali mu biika ibinyamahanga mwiꞌdako lyani.
49 Ayamiri ali mu nguluula mu maboko gaꞌbagoma baani.
E Nahano, keera ukambiika hiꞌgulu lyaꞌbagoma baani.
Wanangiza kiri na mu biitani.
50 E Nahamwitu, ngakizi kuhuuza mu bandu baꞌmahanga gooshi.
Iziina lyawe, ngakizi lilumbuusa mu kuliyimba.
51 Nie Dahudi, Rurema akandoola,
ananyimika, kwo mbe mwami wage.
Na buno, agweti aganjoboleesa, halinde ngizi hima.
Ayamiri ali mu ngirira amiija,
kuguma neꞌmbaga yani, halinde imyaka neꞌmyakuula.