24
Rurema ali mu nyumba yage
1 Izaburi ya Dahudi.
Ikihugo, na byoshi íbikiri mwo, biri bya Nahano.
Amahanga gali geꞌmwage, kuguma na booshi ábagatuuziri mwo.
2 Kino kihugo, akakitereka áhali amiiji mingi.
Haaho, ho akakisikamya.
3 Aaho! Nyandi úwangateramira ku mugazi gwa Nahano,
mbu agendi yimanga mu nyumba yage ndaluule?
4 Ábahangwirwi ukugenda yo naaho,
babe bandu baꞌmaboko gaabo gali shululu,
neꞌmitima yabo, inabe iyeruusiri.
Batagweti bagayikumba imigisi,
batanali mu biika indahiro zeꞌbibeesha.
5 Baabo, bo Nahano agaadeta kwo batungiini.
Bo na Rurema, Lukiza wabo agakizi gashaanira.
6 E Rurema wa Yakobo, abandu mwene yabo, bo bangakuyijira,
banayiji kuyikumba.
7 E nyiivi zaꞌkaaya, mwe muyamiri ho, muyiguke.
Muyigukage, gira mwami woꞌbulangashane ayingire.
8 Uyo mwami woꞌbulangashane, ali nyandi?
Ali Nahano woꞌbushobozi bwoshi, ulya kihagarusi.
Ee! Ye mu ba kihagarusi mwiꞌzibo.
9 E nyiivi zaꞌkaaya, mwe muyamiri ho, muyiguke!
Muyigukage, gira mwami woꞌbulangashane ayingire.
10 Uyo mwami woꞌbulangashane, ali nyandagi?
Ali Nahano woꞌbushobozi bwoshi.
Yoyo, ye mwami woꞌbulangashane.