36
Rurema, ubwija bwage buli buhamu bweneene
1 Imwoꞌmwimangizi waꞌbimbi. Izaburi ya Dahudi, umukozi wa Nahano.
2 Banangora-mabi batayobohiri Rurema.
Si ibyaha biri mu bahwehweteza mu mutima gwabo.
3 Bagweti bagakizi yihaya naaho,
batanganamenya kwo bakoli bihuusiri.
4 Byo bali mu deta, gali mabi naaho,
gira bakizi henderezania.
Keera bakajandirira ubwitegeereze, batanali mu gira amiija.
5 Ikyanya bali mu ba bagwejiiri,
ishungi zaabo ziri mu lola naaho ku mabi.
Bakoli higiiri kwo bagakizi gira ubuligo,
batanali mu twikira ku mabi gaabo.
6 E Nahano, wehe, urukundo lwawe luhisiri halinde mwiꞌgulu.
Ubwemeera bwawe, buhisiri ku bibungu.
7 Ubwija bwawe, buyinamusiri bweneene, nga tunywangi-nywangi tweꞌmigazi,
neꞌkihano kyawe kiyisiri bweneene nga nyaaja.
E Nahano, we yamiri uli mu langa abandu, kiri neꞌbitugwa.
8 Urukundo lwawe, lulyagagi lwaꞌkahebuuza, lutanali mu hera.
Abakulu, kiri naꞌbakiga, bali mu tibitira mu kimbehwa kyeꞌbyubi byawe.
9 Yabo booshi, uli mu bayigusa ku bugale bwa mu nyumba yawe,
unali mu banywesa ku lwiji úluli mu bashambaaza.
10 We mu tuma tugaalama.
Na ku mulengeerwe gwawe, lyo tuli mu bona.
11 Abandu ábakuyiji, ugenderere ukubayereka urukundo lwawe.
Ee! Ngiisi ábali biija, nabo ukizi bagirira amiija.
12 Haliko abanabwikangaate, utabahanguule mbu bayiji ndeera.
Utanaleke banangora-mabi, mbu banyimule.
13 Yabo banabyaha, lolaga ngiisi kwo bakoli lambamiri haashi.
Keera batibulirwa haashi,
batanahiiti ubulyo bwoꞌkushubi vyuka.