59
Abandu balangi bakoli ndegiiri
1 Imwoꞌmwimangizi weꞌnyimbo. Izaburi ya Dahudi, ikyanya Sahuli akalungika abashosi, bakizi loleekeza inyumba ya Dahudi, gira bamúyite. Luli mu yimbwa ngoꞌlwimbo «Utakizi shereeza.»
2 E Rurema wani, ungizagye mu bagoma, we kongwa!
Ikyanya bali mu ndeera, ukizi njuutira.
3 Si balyagagi banakuhambwa, banali mu yitana!
Kwokwo ubangize mwo.
4 Lolaga, e Nahano! Abandu balangi bakoli ndegiiri.
Bagweti bagaagira igambi libi hiꞌgulu lyani,
kundu ndazi bahubira, ndaanabyo byaha ngiziri.
5 Ee! Kundu ndaabwo buhube nagira,
haliko bakola mu yiji ndeera.
E Nahano, vyukaga, maashi!
Ulolage ngiisi kwo nagooka, unayiji ndabaala.
6 E Rurema waꞌBahisiraheeri! Si uhiiti ubushobozi bwoshi!
Aaho! Yimukaga! Bwo yibyo binyamahanga balyagagi biitani,
ubahane booshi.
Si bagweti bagayihindulirana! Kwokwo, utabakejeerere.
7 Balya bagoma, si bali mu galukaga kabigingwe,
banakizi sokanana akaaya, iri banamoka nga tubwa!
8 Ewe! Yuvwa ngiisi kwo bagweti bagatukana.
Amagambo gaabo gali mu kerana nga ngooti nyugi.
Si bagweti bagayitoneesa kwo ndaaye úli mu bayuvwa!
9 E Nahano! Yibyo binyamahanga, si ugweti ugabishekeereza,
iri unabihonyoleza ngana.
10 E Rurema, we ngweti ngatibitira, unali mu mbeereza imisi.
Kwokwo, ngulindiriiri.
11 Uyamiri unguuziri.
Unagweti ugashokola injira imbere lyani,
halinde ndonge ukuhima abagoma.
12 E Nahano, utalunguli bayita,
gira abandu bakizi bakengeera.
Ubashaabule naaho, gira bakizi genda bagajeba-jeba.
Unakizi batindimaza ku bushobozi bwawe.
13 Bwo bagweti bagayiheemya, ubagwakize mu bwihemye bwabo.
Si mu kudeta, lyo bali mu kizi yifunda mu byaha!
Bali mu daakana, noꞌkubeesherana.
14 Kwokwo, ubasivye ku buraakari bwawe,
halinde bataki be ho.
Haaho, lyaꞌbandu booshi beꞌmahanga bamenye
kwo we twaziri mu kihugo kyeꞌHisiraheeri.
15 Yabo bagoma, si bali mu galuka kabigingwe,
banakizi sokanana akaaya, iri banamoka nga tubwa.
16 Bali mu jeba-jeba, mu kulooza byo bagaalya.
Neꞌri batangayiguta, banakizi bwija.
17 Haliko niehe, ngakizi yimba hiꞌgulu lyeꞌmisi yawe.
Ngiisi shesheezi, ngayimba ngiisi kwo uli mu kundana.
We gweti ugakizi njuutira.
Ikyanya nalonga amakuba, we ndi mu tibitira.
18 E Rurema, we misi yani.
Ngakizi kuyimbira inyimbo zoꞌbwivuge.
Uli busikamiro bwani. We na yamiri unguuziri.