68
Abandu boꞌkuli bakizi ba naꞌmalega
1 Izaburi ya Dahudi, imwoꞌmwimangizi waꞌbimbi.
2 E Rurema, uyimukage, unashaabule abagoma baawe.
Ngiisi ábakushombiri, bakizi puumukaga imbere lyawe.
3 Ubayimulage, nga kweꞌmbuusi iri mu yehuula ikyusi.
E maashi! Nga kwoꞌbulungu buli mu jongoloka ku muliro,
kube kwo banangora-mabi bagayami minikwa imbere lya Rurema.
4 Haliko, abandu boꞌkuli boohe, bakizi shagaluka imbere lyawe.
Bakizi ba naꞌmalega, iri banakuyimbira ku bushambaale.
5-6 Rurema agweti agalenga mu bibungu!
Kwokwo, mukizi múyimbiraga, iri munayivuga iziina lyage.
Ee! Mukizi múhuuza.
Iziina lyage, ye Nahano,
anatuuziri mu nyumba yage ndaluule.
Kwokwo, mukizi shambaala imbere lyage.
Rurema ye yishe weꞌfuuvi, ye nali mu langa banamufwiri.
7 Ngiisi ábali mu kahumbwe, ali mu babiika mu mbaga.
Na ngiisi ábali bashweke, ali mu bashwekuula, halinde banashambaale.
Si abahuni boohe, bagayimulwa, bagendi tuula mu kihugo íkiyumiri.
8 E Rurema! Ikyanya ukalyosa abandu baawe i Miisiri,
wanakizi bashongaaniza injira mwiꞌshamba.
9 Haaho, ikihugo kyanajugumbana.
Niꞌgulu lyananiesa invula ku bwingi.
Ee ma! We Rurema waꞌBahisiraheeri,
ulya weꞌSinaayi.
10 E Rurema! Ikihugo, kundu kyâli mali shaka,
haliko wanakishakuulula,
wanakizi kiniesa mweꞌnvula nyingi,
11 halinde abandu baawe banalonga ho bagatuula.
Kiri naꞌbakeni, wanabatabaala ku magoorwa gaabo.
12-13 Ikyanya Nahano akakyula,
abahya-kazi bingi bweneene, banagenda bagweti bagamenyeesania kwokuno:
«Abaami kuguma naꞌbasirikaani baabo, keera bakapuumuka.»
Abakazi banasigala mu kaaya, bagweti bagagabaana iminyago.
14 Abangere nabo, kundu bâli keniri, banaba batuuziri ibibuzi mu ndagiriro.
Haliko buno, bakoli yambiiti inooro neꞌharija.
Bali nga ngunde ízibwikiirwi neꞌbyubi.
15 Yabo baami, ikyanya Rurema woꞌbushobozi bwoshi akabashaabula,
banashaabuka nga nvula yoꞌlugungu, ígweti ígaania ku mugazi Zalumooni.
16 E Bashaani! We kanywangi-nywangi koꞌmugazi,
unali kwaꞌmarango mingi!
17 Aahago! Umugazi gwo Rurema akatoola kwo agayiji tuula kwo,
kituma kiki uki gweti ugaagulya ikisuure?
Si haaho ku mugazi gwage, ho Nahano agakizi tuula, halinde imyaka neꞌmyakuula!
18 Nahano akalyoka ku mugazi Sinaayi,
anayiji beera ahandu haage heeru,
akulikiirwi naꞌmagaare gaage goꞌkubululwa,
ganali kandaharuurwa.
19 E Nahano Rurema! Ikyanya ukalengezibwa mwiꞌgulu, wanatwala bo ukagwata imbira.
Abandu banakizi kuleetera indengu, kiri na balya ábakahuna.
Kwokwo, ugayama utuuziri haaho.
20 Nahano akizi yivugwa! Mukuba, ye Rurema, anali ye Lukiza witu.
Yenyene ali mu betula imiteekerwa yitu ngiisi lusiku.
21 Rurema Nahamwitu, ye mu tukiza,
kiri na mu maboko ga Narufu.
22 Ku kasiisa, Rurema agavungula amatwe gaꞌbagoma baage.
Iri bangagenderera ukukizi yifunda mu byaha, agajiga utuhanga twabo.
23 Nahano adetaga kwokuno: «Abagoma baani, ngabagalula ukulyoka i Bashaani,
na mbashaaze na mu tulingi tweꞌnyaaja.
24 Kwokwo, e bandu baani, mukolaga mugashuka amagulu giinyu mu miko yabo.
Kiri noꞌtubwa twawe, tugagilabula kwo.»
25 E Rurema, uli Rurema wani, unali we mwami wani.
Abandu bagweti bagakukunga ku kisegengo,
halinde unayingire ahandu haawe heeru.
26 Abajoborozi bagweti bagashonga imbere.
Na ábagabalonda, bali mu lasa inanga.
Ha kati kaabo, hali abanyere ábagweti bagaalasa ingoma.
27 E Bahisiraheeri mweshi, mukizi huuza Rurema.
Ee! Mukizi múhuuza, mweshi.
28 Uwa mbere, ali Binyamiini, kundu ye toohiri.
Na ábagakulikira, bali bakulu beꞌBuyuda, naꞌbandu baabo booshi.
Hali naꞌbatwali beꞌZabulooni, naꞌbeꞌNafutaali.
29 E Rurema, uyerekane imisi yawe ya kahebuuza,
nga kwo wâli kizi gira yaho kare.
30 Kwokwo, lyaꞌbaami bagakizi kuleetera amatuulo
mu nyumba yawe i Yerusaleemu.
31 Haliko, abagoma ábatuuziri i mahanga boohe, ubakanukire.
Si balyagagi nga nyamiishwa ízituuziri mu masanga!
Bali nga shuuli ndangi mu kati keꞌnyana.
Kundu basiimiri ukukizi gira izibo, ubashaabule.
Ubatindimaze, halinde bakizi kuramburira.
32 Indumwa ziyijage ukulyoka i Miisiri.
Kiri naꞌBahendyopiya bagirage bakizi tabaaza Rurema.
33 E binyamahanga, mukizi yimbira Nahano Rurema.
Mukizi múyimbira inyimbo zoꞌbwivuge.
34 Mukuba, ye mu lenga mwiꞌgulu,
munali mwiꞌzu lyage liri mu kizi lunduma bukayu.
Ye na yamiri ho imyaka neꞌmyakuula.
35 Mumenyeesanie kwo Rurema ye riiri noꞌbushobozi bweneene.
Ye twaziri Abahisiraheeri.
Noꞌbulangashane bwage buyamiri butanguliiri Abahisiraheeri.
36 E Rurema waꞌBahisiraheeri, tubwini kwo uli wa kahebuza mu nyumba yawe ndaluule.
Uli mu heereza abandu baawe ubukalage noꞌbushobozi.
Rurema akizi yivugwa!