7
Ungize mu maboko gaꞌbagoma baani
1 Ulwimbo lwa Dahudi, hiꞌgulu lyoꞌkuganyira Kuushi mwene Binyamiini.
2 E Rurema Nahamwitu, we ngweti ngatibitira.
Aaho! Undabaalage,
unangize mu maboko gaꞌbagoma baani booshi.
3 Buzira kwokwo, baganjanganula-njanganula nga kweꞌndare iri mu janganulana.
Neꞌri bangandwala, ndagaki bona woꞌkungiza.
4 E Rurema Nahamwitu, hali ikyanya nangaba nꞌgakuhubira.
Ngeeka amaboko gaani gakakoleesa íbitali nga byo.
5 Ngeeka nꞌgahubira mwira wani.
Kandi iri, nꞌgagendi zimba umugoma wani, kundu ali muzira buhube.
6 Iri byangaba biryagagi kwokwo,
umugoma wani andibite kwo, anangwate.
Ee! Andibate-ndibate, halinde anyite,
ananziike mu kuzimu.
7 E Nahano, uyimukage, maashi! Si abagoma baani bakoli rakiiri bweneene!
Aaho! Ubahaniirize ngana ku buraakari bwawe.
E Rurema wani, vyukaga!
Si we mu twa ulubaaja mu kati koꞌkuli.
8 Abandu baꞌmahanga gooshi, ubakumanize ha butambi lyawe.
Na bwo utuuziri hiꞌgulu lyabo, ukizi batwala.
9 E Nahano, we riiri hiꞌgulu lya booshi.
We nali mu twa imaaja zaꞌbandu booshi.
Aahago! Bwo ndaabwo buhube mbiiti,
undwirage imaaja mu kati koꞌkuli.
10 Si ulyagagi Rurema woꞌkuli!
We na yiji íbiyifundereziizi mu mitima yaꞌbandu,
nga ngiisi kwo bakoli toniri.
Aaho! Ikyanya banangora-mabi bagweti bagayifunda mu mabi, ugaheze.
Haliko, abandu boꞌkuli boohe, ukizi batabaala.
11 Rurema, ye siribo yani.
Ye gweti úgaakiza abandu boꞌkuli.
12 Ye mu twa imaaja mu kati koꞌkuli.
Si banangora-mabi boohe, agweti agabarakarira.
13 Abandu, iri batangajanda ibyaha byabo,
Rurema agatyaza ingooti yage, anafwore noꞌmuheto, gira abalashe.
14 Ee! Agalingikania ibyugi byoꞌkuyitana.
Imyambi yage, igweti igagulumira, gira igendi yasania.
15 Umundu mubi agweti agayiga agandi mabi mahyahya,
anali mu fumba ubugoma,
bunayiji buta ibibeesha.
16 Yabo banabibeesha, bali mu ba nga bayihumbira ikishimo kila.
Haliko, hanatame boonyene banayiji kiyihongoleka mwo.
Kwokwo, kwo bali mu kizi yikululira umwama.
17 Kundu bali mu shungika ukugira abandi buligo,
yubwo buligo, bunayiji bagwa kwo boonyene.
18 Nahano alyagagi hiꞌgulu lya byoshi, anali woꞌkuli.
Kwokwo, ngakizi múyivuga, mu kumúyimbira.