97
Abandu booshi mu kihugo, bakizi shambaala
1 Nahano ye mwami. Kwokwo, abandu booshi mu kihugo, bakizi shambaala.
Abandu ba mu tulira nabo, bakizi shagaluka.
2 Ubwami bwage busikamiiri ku bikwaniini, na ku byoꞌkuli.
Ee ma! Ibibungu biiru-biiru, bimúsokaniini.
3 Umuliro guli mu gwanwa imbere lyage, gugweti gugasavya.
Guli mu jigiivya abagoma baage booshi.
4 Imilavyo yage, iri mu yami huluka mu kihugo kyoshi.
Booshi ábali mwo, ikyanya bali mu gibona, banatondeere ukujuguma.
5 Nahano ye mwene amahanga gooshi.
Kiri neꞌmigazi, iri mu kizi jongoloka imbere lyage nga bulungu.
6 Íbiri kwiꞌgulu, biri mu menyeesania ngiisi kwo akwaniini.
Abandu booshi, bali mu bona ubulangashane bwage.
7 Haliko, ngiisi ábagweti bagayikumba imigisi, na ngiisi ábali mu yihaya hiꞌgulu lyayo,
boohe, bagaki teezibwa ishoni.
Mukuba, irya migisi yoshi ikwaniini ifukame imbere lyage.
8 E Nahano, yaga gooshi, ikyanya abandu beꞌSayuni
bali mu gayuvwa kwokwo, banashambaale.
Kiri naꞌba mu twaya tweꞌBuyuda, nabo banashagaluke.
Mukuba, we mu twa imaaja ku njira íkwaniini.
9 E Nahano, we riiri hiꞌgulu lyaꞌmahanga gooshi.
We kuliiri bweneene abandi ábali mu yikumbwa booshi.
10 Mweshi mwe mukuuziri Nahano, mukizi shomba amabi.
Mukuba, Rurema ye mu mùlanga,
anamùkize mu bushobozi bwa banangora-mabi.
11 Ngiisi ábakwaniini, umulengeerwe guli mu kizi batanguulira.
Bwo bagweti bagaagira íbikwaniini, bayamiri bashambiiri.
12 Mwe bandu boꞌkuli, mukizi shambaala mu kati ka Nahano,
munakizi yivuga iziina lyage, bwo liyamiri liri lyeru.