11
Ubuleevi bwa Shemaya
(1 Baami 12.1-24)
1 Ikyanya Rehobwamu akahika i Yerusaleemu, anakuumania abasirikaani boꞌmulala gwaꞌBayuda, naꞌba mu gwa Binyamiini. Booshi kuguma, bâli riiri bihumbi igana na makumi galimunaana. Mukuba, âli loziizi ukulwisa ubwami bwaꞌBahisiraheeri, gira abugalule mu butwali bwage.
2 Haliko, Rurema anatuma umukozi wage Shemaya, ti:
3 «Ugendi ganuuza Rehobwamu mugala Sulumaani, mwami weꞌBuyuda. Umúbwire kuguma naꞌbandu booshi beꞌBuyuda, naꞌbeꞌBinyamiini,
4 kwo nie Nahano nadeta kwokuno: “Mutakolwe kwo mwagendi lwisa beene winyu, Abahisiraheeri. Si ngiisi muguma winyu ataahe. Mukuba, ngiisi keera íbyakoleka, nie wabishungika.”»
Ikyanya Nahano akadeta kwokwo, yabo booshi banamúsimbaha, banataaha. Batanaki gendi teera Yerobwamu.
Rehobwamu asikamya utwaya
5 Mwami Rehobwamu anagendi tuula i Yerusaleemu, anayubakulula inzitiro zoꞌtwaya tweꞌBuyuda,
6 ngaꞌkaaya keꞌBetereheemu, naꞌkeꞌHetamu, naꞌkeꞌTekowa,
7 naꞌkeꞌBeeti-Zuuri, naꞌkeꞌSooko, naꞌkeꞌHadulaamu,
8 naꞌkeꞌGaati, naꞌkeꞌMaresha, naꞌkeꞌZiifu,
9 naꞌkeꞌHadorayimu, naꞌkeꞌLakishi, naꞌkeꞌHazeeka,
10 naꞌkeꞌZoora, naꞌkeꞌHayalooni, naꞌkeꞌHeburooni. Yutwo twaya twa Yuda, noꞌtwa Binyamiini, two twâli zitiirwi.
11 Yizo nzitiro, iri Rehobwamu akaziyubakulula, anabiika naꞌbimangizi. Ha nyuma, anabiika na mweꞌbihinda byeꞌbyokulya, neꞌbyaꞌmavuta, na byeꞌdivaayi.
12 Mu ngiisi kaaya, akabiika mweꞌsiribo mbamu, anabiika naꞌmatumu, halinde twoshi twanaba tukoli zitiirwi. Kwokwo, uyo Rehobwamu anagenderera ukutwala ikihugo kyeꞌBuyuda, neꞌkyeꞌBinyamiini.
Abagingi naꞌBalaawi babungira mu kihugo kyeꞌBuyuda
13 Hooshi mu kihugo kyeꞌHisiraheeri, abagingi naꞌBalaawi banakizi gendi yibiika ku Rehobwamu.
14 Kyanatuma yabo Balaawi, Yerobwamu na bagala baage, bagakizi bahangirira kwo bataki kolere Nahano nga bagingi. Kwokwo, banasiga indagiriro, banasiga noꞌbuhyane bwabo, banabungira mu kihugo kyeꞌBuyuda, na mu kaaya keꞌYerusaleemu.
15 Uyo Yerobwamu, iri akabona kwokwo, anatoola abeꞌmwage bagingi, gira bakizi múkolera mu marango. Anatuliisa imigisi yeꞌmbene, na yeꞌnyana, anakizi giyikumba.
16 Kundu kwokwo, mu Bahisiraheeri, mwâli ki riiri abandu baguma ábâli shungisiri ukuyikumba Nahano Rurema waꞌBahisiraheeri. Kyanatuma bagakizi kulikira Abalaawi, mu kugenda i Yerusaleemu, gira bagendi tanga amatuulo imwa Nahano Rurema wa bashokuluza baabo.
17 Banahisa imyaka ishatu bagweti bagasikamya ubwami bweꞌBuyuda, banayibiika ku butwali bwa Rehobwamu mugala Sulumaani. Ee! Bâli loziizi ukusimbaha Nahano, nga kwo bâli kizi gira ku byanya Dahudi na Sulumaani bâli twaziri.
Imbaga ya Rehobwamu
18 Rehobwamu âli yaziri umukazi, iziina lyage Mahalati. Uyo Mahalati âli munyere Yeremooti mugala Dahudi. Na nyina ye wâli Habihahiri munyere Heryabu mugala Yese.
19 Uyo Mahalati akabutira Rehobwamu abaana bashatu boꞌbutabana: Yehushi, na Shemariya, na Zahamu.
20 Ha nyuma, Rehobwamu anayanga Maka munyere Habusalumu. Uyo naye, anamúbutira Habiya, na Hataayi, na Ziiza, na Selomiti.
21 Uyo Rehobwamu âli yaziri abakazi ikumi na munaana, naꞌbandi bakazi beꞌmbuga makumi galindatu, anabuta abaana boꞌbutabana makumi gabiri na munaana, naꞌbaana boꞌbunyere makumi galindatu. Mu bakaage booshi, Maka munyere Habusalumu, ye wâli nakiriri.
22 Uyo Rehobwamu, ha kati ka bagala baage, anakundirira Habiya mugala Maka, anashungika kwo agamúyimika, abe mwami.
23 Rehobwamu âli mwitegeereza. Yabo bagala baage, anabashabulira mu kihugo kyoshi kyeꞌBuyuda, na mu kyeꞌBinyamiini, anababiika na mu twaya twoshi tuzitire. Anakizi baheereza ibyokulya bingi, anabayangira naꞌbakazi bingi.