4
Amar i Ubu nfadoku ma tyari ita
1 Terang a valing averi, Ubu Ni tnorung nanaꞌa obin. Ni tnorung nfalak ne, iki watan norang Ia, na veka nyari ia ovu Ubu. Ba msyiꞌik wabira ma lolin, beta ne tamata boku tali mia wol bisma ti ryari ira, wean lahir i Ubu nfalak roak naꞌa Ni tnorung yai.
2 Tamata ra rfamalik roak Ubu Ni Ivar Lolin a verin ita, wean i lalan a rfamalik roak verin ubud-nusid ra. Naꞌuk wol uturira akataka, tevek rarenar Ivar yai, naꞌuk rafena ma rorang.
3 Ita tamata ovi torang Ubu saꞌi veka tyari ita ovu Ia, wean nfalak naꞌa Ni tnorung a. Ubu nfamalik naꞌa afa yai verin tamata ovi wol rorang Ia ne,
“Ungrova ovu ufwaba roak ne, ira veka wol rti ryari ira ovu Yaꞌa.”
Naꞌut i Ubu notu munuk roak lanit ivavan a, na Ni karya roak rok, ba nyari Ia.
4 Ita tkaꞌa roak ne, Ubu nasusan munuk roak amar verin ita ma tyari ita, tevek rtulis roak naꞌa Surat Ralan ne, “Ubu notu munuk roak afakataka, ba ti naran amar ifitu, beti nyari Ia.”
5 Ubu nfalak vali roak naꞌa Surat Ralan ne, “Tamata ovi wol rorang Yaꞌa, wol bisma ryari ira ovu Yaꞌa.”
6 Ba lyawan roak ne, tamata boku veka ryari ira ovu Ubu. Tamata ovi rarenar lan roak Ubu Ni Ivar Lolin a, naꞌuk wol rot-orang, na ira wol ryari ira wean inyai.
7 Ba Ubu nfadoku amar ngorvaꞌan ma tamata ra bisma ryari ira ovu Ia. Amar yai ihin a ne, fiang ini. Tali naꞌut i Musa nanaꞌa, nata varat ratratut relak roak, beti Ubu nfalak afa ini nahu Raja Daud, wean lahir i ufalak roak naꞌa ratan ne,
“Amar ini, wean i mryenar Ubu vain a,
na deka fyangrebat ralabira ra.”
8 Lan ana, Yosua novun roak tamata Yahudi ra ma rti wan i ryari ira ovu Ubu, naꞌuk wol ryari ira wean Ubu ralan nfalak a. Wean i tamata Yahudi ra bisma ryari ira ovu Ubu naꞌa wan yai, na Ia wol notu tnorung roak ma nala amar liak ma veka tyari ita ovu Ia.
9 Ba Ubu nfadoku roak amar isa verin Ni tamata ovi rorang Ia, ma irmunuk veka ryari ira ovu Ia. Inyai wean i Ubu nkarya amar inean, naꞌuk naꞌa amar ifitu a, na nyari Ia tali Ni karya a.
10 Iki watan wean i nyari ia ovu Ubu, na ia veka nyari roak ia tali ni karya ra, wean lahir i Ubu nyari roak Ia naꞌut i notu munuk lanit ivavan a.
11 Mya ma did tinemun tkiwal ovu ralad urun ma tyari ita ovu Ubu. Totu wean inyai, boma deka tamata isa vali tali ita nleka naꞌa ni inorang a, wean tamata Yahudi ovi lalan a rafena ma rorang Ubu, ba wol ryari ira ovu Ia.
12 Ba tkiwal ma torang urun Ubu Ni Vaivatul ra, tevek Ni Vaivatul ra rvua ngrebat ovu rala vavaꞌat. Ni Vaivatul ra ramneran urun, nlia nahin blawat i namneran mela-balit a, tevek rlahi dida fikiran ra ovu raladida ilaꞌa ra. Ni vaivatul ra rfaturu munuk afa fanfonak ovi rnaꞌa raladida ra, wean relat ovu lurid ovi rnaꞌa tenadida ra. Ia nfadoku vali ne, afa fanfonak avyai munuk lolin te sian, ovu Ia nkaꞌa munuk afa ovi rnaꞌa raladida ra.
13 Ia nrea ovu nkaꞌa munuk afa ovi trea ovu afa ovi wol trea ra, tevek afakataka munuk ratvelar naꞌa wahan ralan a. Ita veka tvalat Ia naꞌa afa ovi totu ra.
Yesus neluk dida Mela Falurut Ilaꞌa i nlia Yahudi rira mela falurut ra munuk
14 Ita dida Mela Falurut Ilaꞌa Ni dawan nlia munuk afakataka, ovu nrata roak lanit ratan ma nanaꞌa Ubu wahan ralan a. Inyai Yesus, Ubu Yanan a. Ni lolin a, musti tatorung ovu ralad urun ne, torang Ia.
15 Dida Mela Falurut Ilaꞌa nfan-aran ovu nfarnuang dida laklekan ra. Ia nkaꞌa ma nlobang ita, tevek nitdawan nlabir teman Ia naꞌa afakataka munuk wean ita vali, naꞌuk Ia wol notu salasilan.
16 Ba deka tbobar ma tatuan Ubu naꞌa dida falurut ra, tevek nfaturu Ni rala lolin verin ita. Ia ntaha fareta a ovu nlobang lalawatan ita. Tfaseri Ubu ma taflurut, boma naꞌut amar i tatuan angangal te susa ra, na nlobang ita ovu nfaturu Ni rala lolin verin ita.