7
Kristus ovu Melkisedek
1 Terang a valing averi, lalan ana, Melkisedek neluk raja naꞌa kota Salem, ovu vali neluk mela falurut verin Ubu i Ni dawan nlia munuk afakataka. Ia nti ma ntuan Abraham. Naꞌut inyai, na Abraham notu rihi ma nfaleka raja ra, ma newal roak ia. Ba naꞌut inyai, na Melkisedek nera verin Ubu ma naflahar Abraham.
2 Ba Abraham nala ni perpuluhan tali afa ovi utun roak tali raja ra verin Melkisedek. Melkisedek naran ini ihin ne a, raja i notu lalawatan afa ovi rmalola ra. Ia neluk raja naꞌa Salem, ba naran isa vali ne, raja i nvua malinan, tevek Salem ihin a ne, malinan.
3 Wol tkaꞌa lahir ne, Melkisedek ini renan-yaman ovu ubun-nusin aba. Wol tkaꞌa vali ne, rarali ia naꞌut ba, ovu nmata naꞌut ba. Ia wean Ubu Yanan a ma neluk mela falurut, nata ti wol ni wahan.
4 Eka minovak! Melkisedek ini, dawan urun ia. Ubud-nusid i Abraham dawan vali wean ia, naꞌuk nalang Melkisedek ma nala ni perpuluhan tali afa ovi utun roak tali raja ra.
5 Inukun ovi Ubu nala verin Musa rfalak ne, mela falurut ra rtali arun dawan Lewi ubun-nusin ra ovu musti rasdovu perpuluhan tali terarir-valirira tamata Israel ra munuk, velik ne Abraham ubun-nusin munuk ira.
6 Melkisedek yai wol ntali Lewi ubun-nusin ra, naꞌuk Abraham nala ni perpuluhan yai verin ia. Melkisedek nera verin Ubu ma naflahar Abraham, velik ne Ubu nala roak Ni tnorung a verin Abraham.
7 Tkaꞌa roak ne, tamata i naflahar tamata liak ra ni dawan nlia ira.
8 Yahudi rira mela falurut ra rala perpuluhan tali tamata Israel ra, naꞌuk veka naran ni amar a ma rmata vali. Naꞌuk Melkisedek nala vali perpuluhan tali Israel ra, ovu rtulis naꞌa Surat Ralan ne, nvaꞌat, nata ti wol ni wahan.
9 Ba Lewi ubun-nusin ra baꞌi rala perpuluhan tali tamata Israel ra. Naꞌuk bisma tfalak ne, nahu Abraham, na ira rala vali perpuluhan verin Melkisedek, wean lahir naꞌut i Abraham nala ni perpuluhan verin Melkisedek.
10 Kena urun ma naꞌut i Abraham ntuan Melkisedek, na wol rarali Lewi ovu ubun-nusin ra obin, naꞌuk rnaꞌa roak Abraham tenan a. Ba Lewi wean i novu roak Abraham naꞌut i Abraham nala ni perpuluhan verin Melkisedek, tevek Abraham ubun nusin Lewi.
Kristus neluk Mela Falurut Ilaꞌa wean Melkisedek, ovu Ni dawan a nlia mela falurut ovi rtali arun dawan Lewi
11 Naꞌut i Ubu nala Ni inukun ra verin tamata Yahudi ra nahu Musa, na nsikat Lewi ubun-nusin ra ma reluk Yahudi rira mela falurut ra, ovu nfalak ma rair tamata Yahudi ra, boma rot-orang afa ovi rnaꞌa Ni inukun ra. Ba wean i rfabana nala munuk roak afa ovi rnaꞌa inukun avyai, na tamata rira vavaꞌat ra rmerat urun naꞌa Ubu wahan ralan a. Naꞌuk wol rfabana nala inukun avyai, ba tamata rira vavaꞌat ra wol rmerat urun naꞌa Ubu wahan ralan a. Wean inyai bi, Ubu nsinir mela falurut liak nma wean Melkisedek. Mela falurut yai wol nahu Lewi ubun-nusin ra, wean Harun.
12 Ba wean i rkati roak mela falurut tali Lewi ubun-nusin ra ovu mela falurut liak, na inyai ihin a ne, rkati vali roak Musa ni inukun ra.
13 Mela falurut i Ubu nfili Ia ini, wol nahu Lewi ubun-nusin ra, naꞌuk nahu arun dawan liak. Tamata ovi rahu arun dawan liak yai wol fasa obin rkarya ma rtaha tamata rira korban ra verin Ubu, ma ti rfadoku naꞌa wan i baꞌi rasnuri rira korban verin Ubu.
14 Ita tkaꞌa munuk roak ne, Duilaꞌa Yesus ntali arun dawan Yehuda. Ba Musa ni inukun ra wol rfalak ne, bisma rfili mela falurut tali arun dawan yai ma rkarya verin Ubu.
15 Duilaꞌa Yesus nma ma neluk mela falurut wean lahir lan a Melkisedek neluk mela falurut. Ba lyawan lahir ne, Ia wol nahu Lewi ubun-nusin ra.
16 Duilaꞌa Yesus neluk mela falurut, wol ntali inukun i nfalak ne, mela falurut musti rtali Lewi ubun-nusin ra. Naꞌuk Ia neluk mela falurut tevek Ni ngrebat, ovu Ni vavaꞌat i wol ni wahan.
17 Tevek rtulis roak naꞌa Surat Ralan ne,
“Oa meluk mela falurut, nata ti wol ni wahan,
wean lan a otu vali verin Melkisedek.”
18 Ubu nfadok-aling roak Musa ni inukun ra, tevek wol fyawarira, ovu wol rot-nala ma tamata rfaseri Ubu.
19 Musa ni inukun ra wol rot-nala ma tamata rira vavaꞌat ra rmalola. Ba wol tfakloꞌi roak dida vavaꞌat ra naꞌa inukun avyai. Naꞌuk fiang ini tfakloꞌi aꞌuk dida vavaꞌat ra verin Yesus, boma notu ma tfaseri Ubu.
20 Nlia tali inyai, na ita tkaꞌa ne, Yesus neluk mela falurut ma Ni karya lolin lia mela falurut ovi rtali Lewi ubun-nusin ra, tevek Ubu nafwaba roak ma Yesus neluk mela falurut. Naꞌuk Ubu wol notu wean inyai verin mela falurut ovi ula roak ira.
21 Naꞌut i Ubu nfili Yesus ma neluk mela falurut, na Ia nafwaba lahir ne,
“Yaꞌa ufwaba roak ma veka
wol ukati afa ovi ufalak roak naꞌa Ning fawaba a ne,
‘Oa meluk mela falurut, nata ti wol ni wahan.’ ”
22 Tali Ubu Ni fawaba yai, na ita tkaꞌa tnorung ngorvaꞌan a tali afa i Yesus notu a. Tnorung yai lolin lia Musa ni inukun ra, ovu Ia veka nfakena lahir Ni tnorung yai.
23 Terang a valing averi, eka tanovak ewal naꞌa afa isa ini. Tamata Yahudi rira mela falurut ra musti rivun ira, boma naꞌut i rmata, na liak ra bisma rkati ira ma rfabana rira karya a.
24 Naꞌuk Yesus nvaꞌat nata ti wol ni wahan, ba Ia neluk mela falurut, nata ti wol ni wahan. Wean inyai bi wol mela falurut liak roak ma rkati Ia.
25 Ba Yesus Ni ngrebat ma nsikat nala tamata ra tali rira salasilan ra, tali amar ini, nata ti wol ni wahan. Notu wean inyai verin tamata ovi rorang Ia ma rfaseri Ubu. Ia nvaꞌat, nata ti wol ni wahan, boma nera verin Ubu ma nlobang ira.
26 Yesus Ni vavaꞌat a lolin urun, ba inovan ma neluk Mela Falurut Ilaꞌa verin ita. Ia Ni vavaꞌat a nmerat urun, wol notu afa sala, ovu wol Ni salasilan. Ia Ni vavaꞌat a naling ia tali tamata salasilan ra, ovu vali Ubu nala Ia ma nrata roak lanit ratan ma naꞌa wan i karatat lia munuk.
27 Ia wol wean Yahudi rira Mela Falurut Ilaꞌa ra ma lokat amar, na musti rfedan afwatan ra ma reluk rira korban verin Ubu ma naꞌi vatuk rira salasilan ra. Rotu wean inyai, beti rfedan afwatan ovi tamata ra rala vali verin Ubu, boma naꞌi vatuk tamata rira salasilan ra. Naꞌuk Yesus kaꞌi nala tenan a ma neluk korban verin Ubu. Ia notu wean inyai fasa watan.
28 Musa ni inukun ra rfalak ne, tamata ra reluk Mela Falurut Ilaꞌa, naꞌuk wol rira ngrebat, tevek tamata watan ira. Naꞌuk Ubu nala roak Ni inukun ra verin Musa, beti nafwaba ma nsikat Yanan a ma neluk Mela Falurut Ilaꞌa. Ubu Yanan a Ni ngrebat dawan urun ovu wol Ni salasilan akataka, nata ti wol ni wahan.