12
دٛکّٜ طٜ رُوحُ اَللَّه حٛکَّتَ
1 جٛونِ بَنْدِرَاٻٜ اَمْ، دٛوْ دٛکّٜ طٜ رُوحُ اَللَّه حٛکَّتَ، اٜ مِ يِطِ ڤَامٛنْ؞
2 اٛنْ اَنْدِ شَرٜلْ نغٜلْ نغٛنّٛوطٛنْ حٜىٰفٜرْٻٜ طُمْ فٛوطِي حَکِّيلٛ مٛوطٛنْ طُمْ مَجِّنِيعٛنْ، اٛنْ مَوْنِنَ غُنْکِيجِ طِ مٜتَتَا؞
3 نغَمْ نٛنْ، اٜ مِ يِطِ اَنْدٛنْ وَلَا نٜطّٛ مٛ رُوحُ اَللَّه تٛکِّنْتَ وِعَ، «يٜىٰسُ اٛ لَانَاطٛ!» نٛنْ مَا وَلَا بَاوَيْطٛ وِعَ، «يٜىٰسُ اٛ جٛومِرَاوٛ،» سٜيْ نِ تٛ رُوحُ اَللَّه تٛکِّنِيمٛ؞
4 تٛو، اٜ وٛودِ دٛکّٜ فٜىٰرٜ‑فٜىٰرٜ، اَمَّا رُوحُ غٛعٛتُمْ حٛکَّتَطٜ؞
5 اٜ وٛودِ کُوطٜ فٜىٰرٜ‑فٜىٰرٜ، اَمَّا جٛومِرَاوٛ غٛعٛتٛ حُوَنْتٜىٰطٜ؞
6 اٜ وٛودِ لَاوِ حُوَنْکِ اَللَّه فٜىٰرٜ‑فٜىٰرٜ، اَمَّا اَللَّه غٛعٛتٛ حٛکَّتَ کٛو مٛيٜ بَوْطٜ حُوتِرْکِطِ؞
7 اَللَّه اٜ حٛکَّ کٛو مٛيٜ نٜطّٛ اَلَامَ کٛلّٛوجُمْ اٜ مٛ وٛودِ رُوحُ اَللَّه نغَمْ ٻٜيْدَارِ کٛو مٛيٜ؞
8 رُوحُ طُمْ، کَنْجُمْ حٛکَّتَ غٛطّٛ دٛکَّلْ وٛلْدٜ فَامُ، غٛطّٛ بٛو دٛکَّلْ وٛلْدٜ اَنْدَلْ؞
9 کَنْجُمْ حٛکَّتَ غٛطّٛ دٛکَّلْ حٛولَاکِ اَللَّه، ندٜنْ غٛطّٛ بٛو دٛکَّلْ يَمْطِتِنْکِ ݧَوْٻٜ،
10 غٛطّٛ کَدِنْ دٛکَّلْ وَطُکِ فِي کَيْطِنِيطُمْ، غٛطّٛ وَطُکِ اَنَّبَاکُ، غٛطّٛ بٛو مبَوْکَ فٜىٰرٛوتِرْکِ حَکُّندٜ رُوحُ اَللَّه اٜ غِنِّ، غٛطّٛ بٛو مبَوْکَ وَطِرْکِ دٛعَارٜ طٜمْطٜ طٜ ٻٜ اَنْدَا، غٛطّٛ بٛو مبَوْکَ حٛکُّکِ مَعَنَ طٜمْطٜ طٜنْ؞
11 فُو فِي طُعُمْ طُمْ کُوغَلْ رُوحُ غٛعٛتُمْ، کَنْجُمْ حٛکَّتَ کٛو مٛيٜ دٛکَّلْ نٛنْ نٛ طُمْ سُٻِرِ؞
ٻَنْدُ غٛعٛ، جٛکّٛوطٜ طُطّٜ
12 ٻَنْدُ غٛعٛ اٜ وٛودِ جٛکّٛوطٜ طُطّٜ؞ فُو جٛکّٛوطٜ ٻَنْدُ ندُنْ کٛو ندٜ اٜ طٜ طُوطِ، کَنْجٜ کَوْتِ نغَرْتِ ٻَنْدُ غٛعٛ؞ تٛو، نٛنْ مَا تٛکُّٻٜ اَلْمَسِيحُ نغٛنْتِندِرِ؞
13 يَحُودَنْکٛعٜنْ، اٜ لٜپِّ فٜىٰرٜ، اٜ مَشُّٻٜ، اٜ نَاع مَشُّٻٜ، اٜنْ فُو اٜنْ نغَطَنَامَ بَڤْتِسْمَ ندٜرْ رُوحُ غٛعٛتُمْ نغَمْ نغَرْتٜنْ بٛ ٻَنْدُ غٛعٛ، ندٜنْ اٜنْ فُو اَللَّه حٛکِّيعٜنْ رُوحُ طُمْ؞
14 نغَمْ ٻَنْدُ نَاع جٛکّٛودٜ وٛعٛيْرٜ تَنْ وٛودِ، اَمَّا جٛکّٛوطٜ طُطّٜ ندُ وٛودِ؞
15 تٛ کٛيْنغَلْ وِعِي، «ندٜ نَاع مِ جُنْغٛ، ٻَنْدُ جٜيَايِيَمْ،» وِعُکِ نٛنْ سٜنْدَتَانغَلْ اٜ ٻَنْدُ ندُنْ؞
16 نٛنْ مَا تٛ نٛوْرُ وِعِي، «ندٜ نَاع مِ حِتٜرٜ، ٻَنْدُ جٜيَايِيَمْ،» وِعُکِ نٛنْ سٜنْدَتَاندُ اٜ ٻَنْدُ ندُنْ؞
17 تٛ ٻَنْدُ فُو وَرْتِي غِتٜ، تٛو، کٛ طُمْ نَنِرْتَ؟ تٛ ٻَنْدُ فُو وَرْتِي نٛڤِّ، کٛ طُمْ نَنِرْتَ لُمْنغٛلْ؟
18 اَمَّا نٛ طُمْ وٛنْتِندِرِ، اَللَّه سِرْيَکٜ جٛکّٛوطٜ ندٜرْ ٻَنْدُ، اٛ سِرْيَکٜ کٛو ندٜيٜ جٛکّٛودٜ نٛنْ نٛ اٛ يِطِرِ؞
19 تٛ ٻَنْدُ اٜ وٛودِ جٛکّٛودٜ غٛعٛ تَنْ، ندٜنْ نَاع طُمْ ٻَنْدُ؞
20 نٛ طُمْ وٛنْتِندِرِ، ٻَنْدُ ندُ وٛعٛيْرُ، اَمَّا اٜ ندُ وٛودِ جٛکّٛوطٜ طُطّٜ؞
21 حِتٜرٜ فٛتَايِ وِعَ جُنْغٛ، «اَ نَفَنْتَايَمْ؞» طٛنْمَا حٛورٜ فٛتَايِ وِعَ کٛيْطٜ، «اٛنْ نَفَنْتَايَمْ؞»
22 نَاع نٛنْ طُمْ وٛنِ؞ جٛکّٛوطٜ طٜ طُمْ يِعَتَ بٛ طٜ شٜمْبِطَا، کَنْجٜ ٻُرِ نَفُکِ؞
23 جٛکُّلٜ ٻَنْدُ طٜ نغِعٜتٜنْ بٛ سٜطَّ تَنْ طٜ نَفِ، کَنْجٜ ٻُرْطٜنْ فَامَنْکِ بٛطُّمْ، ندٜنْ جٛکّٛوطٜ طٜ شٜمْتٜتٜنْ يِيکِ، کَنْجٜ ٻُرْطٜنْ فَامَنْکِ؞
24 جٛکُّلٜ مٜىٰطٜنْ ٻُرْطٜ وٛوطُکِ، نَاع نَا اٜنْ ڤَامَنِيطٜ؞ اَمَّا اَللَّه حَوْتِي جٛکّٛوطٜ ٻَنْدُ فُو؞ جٛکُّلٜ طٜ نغِعٜتٜنْ بٛ سٜطَّ تَنْ طٜ نَفِ، اٛ حٛکِّيطٜ مَنْغُ ٻُرْطُمْ،
25 نغَمْ تٛع طُمْ حٜٻَ فٜىٰرٛوتِرٛلْ ندٜرْ ٻَنْدُ، اَمَّا جٛکّٛوطٜ طٜنْ فُو طٜ نغِطِندِرَ يِدّٜ غٛعٛ؞
26 تٛ وٛنْدٜ جٛکّٛودٜ نَوْنَکٜ، سٜيْ کٛرِيطٜ فُو نَنِدَ نَوْطُمْ اٜ جٛکّٛودٜ ندٜنْ؞ تٛ جٛکّٛودٜ وٛعٛيْرٜ مَوْنِنَامَ، سٜيْ کٛرِيطٜ فُو کَوْتَ مبٜلْمبٜلْتَ حَوْتِ اٜ جٛکّٛودٜ ندٜنْ؞
27 تٛو، اٛنٛنْ نغٛنِ ٻَنْدُ اَلْمَسِيحُ، کٛو مٛيٜ مٛوطٛنْ بٛ طُمْ جٛکّٛودٜ مَاکٛ؞
28 ندٜرْ کَوْتَلْ تٛکُّٻٜ يٜىٰسُ، اَرَنْدٜ اَللَّه وَرْتِرِي وٛٻّٜ لِلَاٻٜ، وٛٻّٜ بٛو اٛ وَرْتِرِيٻٜ اَنَّبٛعٜنْ، ندٜنْ وٛٻّٜ اٜکِّتِنٛوٻٜ، وٛٻّٜ بٛو غَطٛوٻٜ کُوطٜ کَيْطِنِيطٜ، وٛٻّٜ بٛو يَمْطِتِنٛوٻٜ ݧَوْٻٜ، وٛٻّٜ بٛو وَلّٛوٻٜ، وٛٻّٜ اَرْدِيٻٜ، وٛٻّٜ بٛو غَطِرٛوٻٜ دٛعَارٜ طٜمْطٜ طٜ ٻٜ اَنْدَا؞
29 ٻٜ فُو نغٛنِ لِلَاٻٜ؟ ٻٜ فُو نغٛنِ اَنَّبٛعٜنْ؟ ٻٜ فُو نغٛنِ اٜکِّتِنٛوٻٜ؟ ٻٜ فُو نغٛنِ غَطٛوٻٜ کُوطٜ کَيْطِنِيطٜ؟
30 ٻٜ فُو نغٛنِ يَمْطِتِنٛوٻٜ ݧَوْٻٜ؟ ٻٜ فُو نغٛنِ غَطِرٛوٻٜ دٛعَارٜ طٜمْطٜ طٜ ٻٜ اَنْدَا؟ ٻٜ فُو مبَاوِ حٛکُّکِ مَعَنَ طٜمْطٜ طٜنْ؟ نَاع نٛنْ!
31 اَمَّا اٛنٛنْ طَٻِّتٜىٰ حٜٻُکِ دٛکّٜ ٻُرْطٜ مَنْغُ؞
جٛونِ مِ حٛلَّيْعٛنْ لَاوٛلْ ٻُرْنغٛلْ وٛوطُکِ؞