7
پَمٛلْ دٛوْ تٜىٰغَلْ
1 تٛو، جٛونِ مِ نٛوتٛتٛ پَمٛلْ نغٛلْ پَمْطٛنْيَمْ ندٜرْ طٜرٜوٛلْ نغٛلْ مبِنْدٛنٛيْطٛنْيَمْ: اٜ طُمْ وٛوطِ تٛع نٜطّٛ تٜعَ؞
2 اَمَّا ندٜ اٜ وٛودِ نجٜىٰنُ نَاع سٜطَّ حَکُّندٜ يِمْٻٜ، اٜ حَانِ کٛو مٛيٜ نٜطّٛ تٜعَ، ندٜنْ کٛو مٛيٜ دٜبّٛ وَطَ تٜىٰغَلْ؞
3 غٛرْکٛ حٛکَّ دٜبّٛ مُوطُمْ ٻَنْدُ مُوطُمْ نٛ دٛوکَ تٜىٰغَلْ وِعِ؞ نٛنْ مَا دٜبّٛ اٛنْ حٛکَّ غٛرْکٛ مُوطُمْ ٻَنْدُ مُوطُمْ نٛ دٛوکَ تٜىٰغَلْ وِعِ؞
4 نغَمْ دٜبّٛ جٜيَايِ ٻَنْدُ مُوطُمْ؛ غٛرْکٛ مَاکٛ جٜيِندُ؞ نٛنْ مَا غٛرْکٛ جٜيَايِ ٻَنْدُ مُوطُمْ، دٜبّٛ مَاکٛ جٜيِندُ؞
5 تٛع اٛنْ نغَݧُ وَلْدُکِ تٛ نَاع نٛنْ شِرْيِيطٛنْ حَکُّندٜ مٛوطٛنْ نغَمْ شَرٜلْ سٜطَّ، نغَمْ نغَطٛنْ حَکِّيلٛ مٛوطٛنْ دٛوْ دٛعَارٜ؞ غَطَ مَاجُمْ ݧَمْرٛنْ يٜىٰسٛ اٜ وَلْدُکِ نغَمْ تٛع شٜيْطَنْ فٛوطَعٛنْ نغَطٛنْ کٛ وٛوطَا نغَمْ شِيَ سُرُکِ کٛعٜ مٛوطٛنْ؞
6 کٛ مبِيمِعٛنْ، طُمْ شَاوٛرِ، نَاع طُمْ دٛوکَ؞
7 مِنْ مِ ٻُرِي يِطُکِ دَا کٛو مٛيٜ وَلَا تٜىٰغَلْ بٛ اَمْ! اَمَّا کٛو مٛيٜ اٜ اِرِ دٛکَّلْ نغَلْ اَللَّه حٛکِّمٛ، اٛعٛ اٜ نغَلْ مُوطُمْ، اٛنْ طَاعٜ اٜ نغَلْ مُوطُمْ؞
8 جٛونِ دٛوْ يِمْٻٜ ٻٜ نغَلَا تٜىٰغَلْ اٜ رٜوْٻٜ ٻٜ وٛرْٻٜ مَٻّٜ مَايِ، اٜ مِ وِعَ طُمْ ٻُرِي تٛع ٻٜ نغَطَ تٜىٰغَلْ بٛ اَمْ؞
9 اَمَّا تٛ ٻٜ مبَاوَتَا سُرُکِ کٛعٜ مَٻّٜ، اٜ حَانِ ٻٜ نغَطَ تٜىٰغَلْ؞ نغَمْ طُمْ ٻُرِي نٜطّٛ وَطَ تٜىٰغَلْ دٛوْ سُونٛ نجٜىٰنُ نَنْغَمٛ؞
10 غٛودُٻٜ تٜىٰغَلْ بٛو اٜ مِ حٛکَّٻٜ دٛوکَ طُعُمْ؞ نَاع طُمْ مِنْ حٛکِّطُمْ، جٛومِرَاوٛ حٛکِّطُمْ: تٛع دٜبّٛ يٛوفَ غٛرْکٛ مُوطُمْ؞
11 تٛ بٛو اٛ يٛوفِي غٛرْکٛ مَاکٛ، دٛولٜ اٛ وَطَتَا وٛنْغَلْ تٜىٰغَلْ، کٛو بٛو اٛ سِرْيٛوتِرَ اٜ غٛرْکٛ مَاکٛ؞ نٛنْ مَا تٛع غٛرْکٛ يٛوفَ دٜبّٛ مُوطُمْ؞
12 دٛوْ حٛرِيٻٜ بٛو اٜ مِ وِعَ طُعُمْ، نَاع جٛومِرَاوٛ وِعِکَ، مِنْ اٜ حٛورٜ اَمْ وِعِکَ؞ تٛ غٛطّٛ کٛولِيطٛ يٜىٰسُ اٜ وٛودِ دٜبّٛ مٛ حٛولَاکِ يٜىٰسُ، تٛ دٜبّٛ اٛنْ جَٻِي نجٛوطٛدٛو اٜ مَاکٛ، تٛو، تٛع اٛ يٛوفَمٛ؞
13 نٛنْ مَا تٛ دٜبّٛ کٛولِيطٛ يٜىٰسُ اٜ وٛودِ غٛرْکٛ مٛ حٛولَاکِ يٜىٰسُ، تٛ غٛرْکٛ اٛنْ جَٻِي جٛوطٛدٛو اٜ مَاکٛ، تٛع دٜبّٛ اٛنْ يٛوفَمٛ؞
14 نغَمْ غٛرْکٛ مٛ حٛولَاکِ يٜىٰسُ اٜ لَاٻِنٜىٰ بَرْکَ تٜىٰغَلْ مَاکٛ اٜ دٜبّٛ کٛولِيطٛ يٜىٰسُ؞ نٛنْ مَا دٜبّٛ مٛ حٛولَاکِ يٜىٰسُ اٜ لَاٻِنٜىٰ بَرْکَ تٜىٰغَلْ مَاکٛ اٜ غٛرْکٛ کٛولِيطٛ يٜىٰسُ؞ دَا نَاع طُمْ نٛنْ، دَا ٻِٻّٜ مٛوطٛنْ نغَرْتِي ٻٜ لَاٻَا، اَمَّا نٛ طُمْ وٛنْتِندِرِ جٛونِ ٻٜ نغَرْتِي لَٻّٜ؞
15 اَمَّا تٛ نٜطّٛ مٛ حٛولَاکِ يٜىٰسُ اٜ يِطِ يٛوفَ دٜبّٛ مُوطُمْ کٛولِيطٛ يٜىٰسُ، تٛو، سٜيْ اٛ يٛوفَمٛ؞ تٛ اِرِ نٛنْ وَطِي، کٛولِيطٛ يٜىٰسُ غٛرْکٛ کٛو دٜبّٛ نَاع طُمْ دٛولٜ اٛ جٛوطٛدٛو اٜ مٛ حٛولَاکِ يٜىٰسُ، نغَمْ اَللَّه سُٻِيعٜنْ نغَمْ نجٛوطٛدٛوطٜنْ جَمْ؞
16 اَنْ دٜبّٛ کٛولِيطٛ يٜىٰسُ، اَ اَنْدَا طُمْ غَطٛتٛوطُمْ نغَرْتَا لَاوٛلْ حِسْنُکِ غٛرْکٛ مَاطَ؟ اَنْ غٛرْکٛ کٛولِيطٛ يٜىٰسُ، اَ اَنْدَا طُمْ غَطٛتٛوطُمْ نغَرْتَا لَاوٛلْ حِسْنُکِ دٜبّٛ مَاطَ؟
اِرِ جٛنْدٜ ندٜ اَللَّه يِطِ طُمْ وَطَ
17 اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ جٛومِرَاوٛ سُٻِرِ اٛ جٛوطٛرٛو نٛنْ نٛ اٛ وٛنْتِندِرْنٛو کٛ اَللَّه نٛدَّمٛ؞ کَنْجُمْ وٛنِ کٛ اٜکِّتِنَيْمِ کٛو تٛيٜ ندٜرْ تٛکُّٻٜ يٜىٰسُ؞
18 نٜطّٛ نَادَاطٛ کٛ اَللَّه نٛدَّمٛ، تٛع اٛ طَٻِّتَ وَرْتُکِ مٛ نَادَاکَ؞ نٛنْ مَا نٜطّٛ مٛ نَادَاکَ کٛ اَللَّه نٛدَّمٛ، تٛع اٛ طَٻِّتَ وَرْتُکِ نَادَاطٛ؞
19 نَادٜىٰکِ نَاع طُمْ غٛطُّمْ، نٛنْ مَا شِيَ نَادٜىٰکِ نَاع طُمْ غٛطُّمْ؞ اَمَّا وَطُکِ کٛ اَللَّه وِعِ ٻُرِي کٛو طُمٜ؞
20 اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ اَللَّه سُٻِرِ اٛ جٛوطٛرٛو؞
21 تَا مَشُّطٛ شَرٜلْ کٛ اَللَّه نٛدُّمَا، تَاع وَنُّ دٛوْ مَاجُمْ؞ اَمَّا تَا حٜٻِي لَاوٛلْ رِمْطِنٜىٰکِ، وَطُطُمْ؞
22 تٛ نٜطّٛ اٛ مَشُّطٛ شَرٜلْ کٛ جٛومِرَاوٛ نٛدِّمٛ، اٛ وَرْتِي رِمْطِنَاطٛ جٛومِرَاوٛ؞ نٛنْ مَا تٛ نٜطّٛ نَاع اٛ مَشُّطٛ شَرٜلْ کٛ اَللَّه نٛدِّمٛ، اٛ وَرْتِي مَشُّطٛ اَلْمَسِيحُ؞
23 اَللَّه حٛکِّي ٻِطّٛ مُوطُمْ نغَمْ اٛ وَرْتِرَعٛنْ ٻٜ مَاکٛ؞ نغَمْ نٛنْ، تٛع اٛنْ نغَرْتُ مَشُّٻٜ يِمْٻٜ؞
24 تٛو، بَنْدِرَاٻٜ اَمْ، اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ اَللَّه سُٻِرِ اٛ جٛوطٛرٛو يٜىٰسٛ مَاکٛ؞
ٻٜ نغَلَا تٜىٰغَلْ اٜ ٻٜ وٛرْٻٜ مُعّٜنْ مَايِ
25 جٛونِ مِ نٛوتٛتٛ پَمٛلْ نغٛلْ پَمْطٛنْيَمْ ندٜرْ طٜرٜوٛلْ نغٛلْ مبِنْدٛنٛيْطٛنْيَمْ دٛوْ يِمْٻٜ ٻٜ نغَلَا تٜىٰغَلْ؞ جٛومِرَاوٛ وِعَايِيَمْ غٛطُّمْ دٛوْ مَٻّٜ، اَمَّا مِ حٛکَّيْ شَاوٛرِ؞ مِ تَبِّتِنِي اٛنْ نجَٻَيْ کٛ مبِيمِ نغَمْ جٛومِرَاوٛ وَرْتِرِييَمْ کٛولَاطٛ بَرْکَ يُرْمٜىٰندٜ مَاکٛ؞
26 نغَمْ تٛرَّاجِ طِ نغٛنْطٜنْ ندٜرْ حَنْدٜ، اٜ يِيکِ اَمْ طُمْ ٻُرِي کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ وٛنْتِندِرِ؞
27 تَا وٛودِ دٜبّٛ، تَاع طَٻُّتُ يٛوفُکِمٛ؞ تَا وَلَا دٜبّٛ بٛو، تَاع طَٻُّتُ تٜعُکِ؞
28 اَمَّا تَا وَطِي تٜىٰغَلْ، نَاع حَکّٜ نغَطَّا؞ طٛنْمَا تٛ سُرْبَاجٛ وَطِي تٜىٰغَلْ، نَاع حَکّٜ اٛ وَطِ؞ فُو اٜ نٛنْ، فُو غَطُٻٜ تٜىٰغَلْ نجَرَيْ تٛرَّ ندٜرْ جٛنْدٜ مَٻّٜ؞ مِنْ بٛو، مِ يِطَا نجَرٛنْ کَنْ طٛنْ تٛرَّ؞
29 بَنْدِرَاٻٜ اَمْ، کٛ نغِطُمِ وِيکِ وٛنِ نَاع کٛ نٜىٰٻِ يٜىٰسُ اَلْمَسِيحُ وَرْتٛيَيْ دُونِيَارُ؞ دَغَ جٛونِ غٛودُٻٜ تٜىٰغَلْ تٛع ٻٜ نغَطَ حَکِّيلٛ مَٻّٜ دٛوْ مَاغَلْ تَنْ؞
30 وٛيٛوٻٜ نغَمْ مَيْدٜ، اٜ وٜلْوٜلْتٛوٻٜ، اٜ لُومٛتٛوٻٜ،
31 اٜ کُوتِرٛوٻٜ کٛ وٛنِ ندٜرْ دُونِيَارُ ندُعُ، تٛع ٻٜ نغَطَ حَکِّيلٛ مَٻّٜ دٛوْ مَاجُمْ تَنْ، نغَمْ دُونِيَارُ ندُعُ اٜ کٛ وٛنِ ندٜرْ مَيْرُ طُمْ پَٻّٛتٛوطُمْ؞
32 اٜ مِ يِطِ نغَطٛنْ جٛنْدٜ ندٜ وَلَا وَنَّارٜ؞ غٛرْکٛ مٛ وَلَا دٜبّٛ اٜ مٛ وَطَ ٻٜرْندٜ مَاکٛ فُو دٛوْ وَطُکِ کُوغَلْ جٛومِرَاوٛ، نغَمْ اٜ مٛ يِطِ اٛ وٜلْنَنَ جٛومِرَاوٛ ٻٜرْندٜ؞
33 اَمَّا غٛودُطٛ دٜبّٛ بٛو اٜ وَنِّ اٜ فِي دُونِيَارُ، نغَمْ اٜ مٛ يِطِ اٛ وٜلْنَنَ دٜبّٛ مَاکٛ ٻٜرْندٜ؞
34 حَکِّيلٛ مَاکٛ سٜنْدَکٜ طِطِ وٛنْ طٛنْ؞ طٛنْمَا سُرْبَاجٛ کٛو دٜبّٛ مٛ وَطَايِ تٜىٰغَلْ اٜ مٛ وَطَ ٻٜرْندٜ مَاکٛ فُو دٛوْ وَطُکِ کُوغَلْ جٛومِرَاوٛ، نغَمْ اٛ وَرْتَ لَاٻُطٛ ندٜرْ فُو کٛ اٛ وَطَتَ اٜ کٛ اٛ ݧُمَتَ؞ دٜبّٛ غٛودُطٛ تٜىٰغَلْ بٛو اٜ مٛ وَنِّ اٜ فِي دُونِيَارُ، نغَمْ اٜ مٛ يِطِ اٛ وٜلْنَنَ غٛرْکٛ مَاکٛ ٻٜرْندٜ؞
35 مِ وِعُ نٛنْ نغَمْ ٻٜيْدَارِ مٛوطٛنْ، نَاع نغَمْ مِ ٻِطَّعٛنْ، اَمَّا نغَمْ نغَطٛنْ جٛنْدٜ مٛوطٛنْ نٛ حَانِ، تٛکّٛنْ جٛومِرَاوٛ اٜ ٻٜرْندٜ غٛعٛ؞
36 تٛ نٜطّٛ وَطِدِي اَلْکَوَلْ تٜىٰغَلْ اٜ سُرْبَاجٛ، تٛ اٜ مٛ ݧُمَ اٜ مٛ وَطَنَ سُرْبَاجٛ اٛنْ کٛ حَانَا، تٛ اٛ وَاوَتَا سُرُکِ سُونٛ مَاکٛ، اٜ مٛ ݧُمَ اٜ حَانِ اٛ تٜعَمٛ، تٛو، سٜيْ اٛ تٜعَمٛ، نَاع طُمْ حَکّٜ؞
37 اَمَّا تٛ اٛ سُٻِي ندٜرْ ٻٜرْندٜ مَاکٛ تٛع اٛ تٜعَ سُرْبَاجٛ اٛنْ، کَدِنْ تٛ وَلَا دٛولُطٛمٛ اٛ تٜعَمٛ، اَمَّا اٜ مٛ سُرِ سُونٛ مَاکٛ، اٛ وَطِي کٛ حَانِ؞
38 نغَمْ نٛنْ، فُو تٜعُطٛ سُرْبَاجٛ مٛ اٛ وَادِ اَلْکَوَلْ تٜىٰغَلْ وَطِي کٛ وٛوطِ، اَمَّا نٜطّٛ مٛ وَطَايِ تٜىٰغَلْ وَطِي کٛ ٻُرِ وٛوطُکِ؞
39 تٜىٰغَلْ حَٻِّي دٜبّٛ اٜ غٛرْکٛ مُوطُمْ، تٛ نِ غٛرْکٛ اٛنْ اٜ فٛوفَ؞ تٛ بٛو غٛرْکٛ اٛنْ مَايِي، اٛ وَاوَيْ اٛ تٜىٰرَ اٜ مٛ اٛ يِطِ فُو، اَمَّا سٜيْ نِ اٛ تٜىٰرَ اٜ تٛکُّطٛ يٜىٰسُ؞
40 اَمَّا اٜ مِ ݧُمَ اٛ ٻُرَيْ نَنْکِ بٜلْطُمْ تٛ اٛ وَطَايِ تٜىٰغَلْ، ندٜنْ اٜ يِيکِ اَمْ اٜ مِ وٛودِ رُوحُ اَللَّه؞