طٜرٜوٛلْ طِطَٻٛلْ نغٛلْ بُلُسْ وِنْدَنِ
کٛرِنْتِيَنْکٛعٜنْ
حَبَرُ دٛوْ طٜرٜوٛلْ نغٛعٛلْ
بُلُسْ لِلَاطٛ يٜىٰسُ وِنْدِ طٜرٜوٛلْ نغٛعٛلْ حَادٜ کٛ اٛ وِنْدِ اَرَنْدٜوٛلْ نغٛلْ؞ اٜ طُمْ کَمّٛو اٛ وِنْدِي طٜرٜوٛلْ نغٛعٛلْ دُوٻِ 55 غَطَ دَݧْنغٛلْ يٜىٰسُ، شَرٜلْ کٛ اٛ وَعَجِنْتَ اٜ لٜيْدِ ڤَمَرْدِ ندِ مَکِدٛونِيَ؞ اٛ وِنْدِينغٛلْ شَرٜلْ نغٜلْ سُمْڤٛ مَاکٛ اٜ تٛکُّٻٜ يٜىٰسُ غٛنْٻٜ تٛنْ نَتِّ شَطُّمْ مَوْطُمْ؞ وٛٻّٜ مَٻّٜ مٜتِ حَالَاجِ کَلُّطِ دٛوْ مَاکٛ، اَمَّا اٛ حٛلِّ اٜ مٛ يِطِ سِرْيٛوتِرْکِ اٜ مَٻّٜ، ندٜنْ اٛ نَنَيْ بٜلْطُمْ نَاع سٜطَّ شَرٜلْ نغٜلْ اٛ سِرْيٛوتِرِ اٜ مَٻّٜ؞ طٛنْمَا اٛ تٛرَکٜ کَوْتَلْ نغَلْ فُو ٻٜ مٛٻْتَ بَلَّلْ شٜىٰدٜ نغَمْ ٻٜ مبَلَّ تٛکُّٻٜ يٜىٰسُ ندٜرْ يَحُودِيَ نغَمْ اٜ ٻٜ تٛرّٛدٛو اٜ وٜىٰلٛ کَلُّنغٛ؞ ندٜرْ نغٛعٛلْ طٜرٜوٛلْ تَنْ بُلُسْ ٻُرِ مٜتُکِ دٛوْ حٛورٜ مُوطُمْ؞ اٛ وَطُ نٛنْ نغَمْ اٜ وٛودِ شَطُّمْ حَکُّندٜ مَاکٛ اٜ وٛٻّٜ ندٜرْ تٛکُّٻٜ يٜىٰسُ اٜ کٛرِنْتِ؞ طٛنْمَا بُلُسْ تَٻَّنَکٜ حٛورٜ مُوطُمْ دٛوْ مٜتٜمٜتٜىٰجِ طِ مٛودِٻّٜ ڤٜوٛوٻٜ مٜتَتَ دٛوْ مَاکٛ، نغَمْ اٜ ٻٜ مبِعَ کَنْکٛ نَاع اٛ لِلَاطٛ مٛ غٛونغَ؞
1
1 مِنْ بُلُسْ مٛ اَللَّه سُٻِ وَرْتَ لِلَاطٛ يٜىٰسُ اَلْمَسِيحُ اٜ بَنْدِرَاوٛ مٜىٰطٜنْ تِمٛوتِ مِنٛنْ مبِنْدِ طٜرٜوٛلْ نغٛعٛلْ؞
مِنْ مبِنْدَنْغٛلْ کَوْتَلْ يِمْٻٜ اَللَّه غٛنْٻٜ غَرِيرِ کٛرِنْتِ، اٜ فُو يِمْٻٜ اَللَّه غٛنْٻٜ ندٜرْ فُو لٜيْدِ اَکَايَ؞
2 اَللَّه ݧَاکٛ مٜىٰطٜنْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ حٛکَّعٛنْ جَمْ؞
بُلُسْ يٜتِّي اَللَّه
3 يٜتّٛورٜ تَبِّتَ تٛ اَللَّه، ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ کَنْکٛ وٛنِ ݧَاکٛ مٛ يُرْمٜىٰندٜ، اَللَّه بَلْتِنَيْطٛ ٻٜرْطٜ؞
4 اٜ مٛ وَلْتِنَ ٻٜرْطٜ مٜىٰطٜنْ ندٜرْ فُو تٛرَّاجِ طِ نجَرٜتٜنْ، نغَمْ اٜنٜنْ مَا مبَلْتِنٜنْ ٻٜرْطٜ وٛنْٻٜ ندٜرْ کٛو اِرِ کَيٜ تٛرَّ؞ اٜنْ مبَلْتِنَيْ ٻٜرْطٜ مَٻّٜ اٜ اِرِ وَلْتِنْکِ کِ اٛ وَلْتِنِ ٻٜرْطٜ مٜىٰطٜنْ؞
5 نٛنْ نٛ نجَرْدٜتٜنْ تٛرَّ نَاع سٜطَّ اِرِ کَ اَلْمَسِيحُ يَرِ، نٛنْ مَا بَرْکَ اَلْمَسِيحُ طُمْ وَلْتِنَيْ ٻٜرْطٜ مٜىٰطٜنْ نَاع سٜطَّ؞
6 تٛ مِنْ تٛرَّامَ، مِنْ تٛرَّ نغَمْ طُمْ وَلْتِنَ ٻٜرْطٜ مٛوطٛنْ ندٜنْ نغَمْ کِسْندَمْ مٛوطٛنْ؞ تٛ بٛو اَللَّه وَلْتِنِي ٻٜرْطٜ اَمِنْ، اٛ وَلْتِنْطٜ نغَمْ مِنٛنْ مَا مِنْ مبَلْتِنَ ٻٜرْطٜ مٛوطٛنْ نغَمْ کٜٻٛنْ سٜمْبٜ مُݧٛنْ ندٜرْ تٛرَّاجِ طِ نجَرٛتٛنْ اِرِ طِ مِنْ نجَرَتَ؞
7 مِنْ تَبِّتِنِي، اٜ مِنْ اَنْدِ نٛنْ نٛ نجَرْدٛتٛنْ تٛرَّ اِرِ کَ مِنْ نجَرِ، نٛنْ مَا ٻٜرْطٜ مٛوطٛنْ مبَلْتٛتٛ اِرِ وَلْتَاکِ ٻٜرْندٜ کِ مِنْ کٜٻِ؞
8 بَنْدِرَاٻٜ، اٜ مِنْ نغِطِ اَنْدٛنْ اِرِ تٛرَّ کَ مِنْ نجَرِ ندٜرْ لٜيْدِ اَاسِيَ؞ مِنْ نَتِّي تٛرَّ کَلُّکَ ٻُرْکَ سٜمْبٜ اَمِنْ حَا مِنْ اِتِّي کَمُّندٜ يٛنْکِ اَمِنْ؞
9 ندٜرْ ٻٜرْطٜ اَمِنْ مِنْ نَنِي بٛ کِيتَ مَيْدٜ مِنْ تَپَنَا، اَمَّا نٛنْ وَطِي نغَمْ تٛع مِنْ کٛولٛو کٛعٜ اَمِنْ، اَمَّا مِنْ کٛولٛو اَللَّه اُمِّنٛووٛ مَيْٻٜ؞
10 کَنْکٛ حِسْنِمِنْ دَغَ مَيْدٜ کَلُّندٜ، اٛ ݧَمْرَيْ يٜىٰسٛ اٜ حِسْنُکِمِنْ؞ دٛوْ مَاکٛ مِنْ نغَطِ کَمُّندٜ اٛ حِسْنَيْمِنْ کَدِنْ؞
11 اٛنٛنْ مَا مبَلِّرٜىٰمِنْ دٛعَارٜ، سٜيْ اَللَّه بَرْکِطِنَيْمِنْ، ندٜنْ طُطْٻٜ نغٜتَّمٛ نغَمْ اَمِنْ؞
بُلُسْ فَرِتِي يَادُ مُوطُمْ
12 کٛ مِنْ مَنْتٛرْتٛو وٛنِ ٻٜرْطٜ اَمِنْ اٜ تَبِّتِنَنَمِنْ مِنْ نغَطِي جٛنْدٜ ندٜرْ دُونِيَارُ ندٜرْ سٜنَاکِ اٜ غٛونغَ پِوٛيْطُمْ تٛ اَللَّه، حَکّٛ مَا ندٜرْ مٛوطٛنْ؞ مِنْ نجٛوطٛرِ نٛنْ نَاع دٛوْ اَنْدَلْ اِرِ نغَلْ يِمْٻٜ دُونِيَارُ، اَمَّا يِدّٜ اَللَّه وَلِّمِنْ؞
13 ندٜرْ طٜرٜىٰجِ اَمِنْ مِنْ مبِنْدَنَايِعٛنْ غٛطُّمْ طُمْ اٛنْ مبَاوَتَا جَنْغُکِ کٛو فَامُکِ؞
14 جٛونِ سٜطَّ تَنْ ڤَامُطٛنْمِنْ، اَمَّا يٜىٰسٛ طٛعٛ اٜ مِ يِطِ ڤَامٛنْمِنْ بٛطُّمْ، نغَمْ ݧَلْندٜ ندٜ يٜىٰسُ جٛومِرَاوٛ مٜىٰطٜنْ وَرْتٛيْتَ مبَاوٛنْ مَنْتٛرٛوطٛنْمِنْ نٛنْ نٛ مِنٛنْ مَا مِنْ مبَاوِرْتَ مَنْتٛرَاکِعٛنْ؞
15 ندٜ مِ تَبِّتِنِي طُعُمْ، مِ يِطِينٛ وَرْکِ تٛ مٛوطٛنْ اَرَنْدٜ نغَمْ کٜٻٛنْ بَرْکَ ندٜ طِطِ؞
16 اٜ مِ يِطُنٛو دٛوْ لَاوٛلْ اَمْ يَاکِ مَکِدٛونِيَ، مِ يَالَ تٛ مٛوطٛنْ، ندٜنْ غَطَ مِ يَحِي مَکِدٛونِيَ، مِ سٛعّٛيْتٛ تٛ مٛوطٛنْ، نغَمْ مبَلّٛنْيَمْ ندٜرْ يَادُ اَمْ يَاکِ لٜيْدِ يَحُودِيَ؞
17 ندٜ مِ حٜٻَايِ نغَطُمِ يَادُ ندُنْ، اٜ يِيکِ مٛوطٛنْ مِ وَطِي ٻٜرْطٜ طِطِ ندٜ شِرْيِنٛومِ وَطُکِ يَادُ ندُنْ؟ کٛو اٜ يِيکِ مٛوطٛنْ اٜ مِ سِرْيٛو يَادُ اَمْ نٛ يِمْٻٜ دُونِيَارُ نغَطَتَ، وِعٛوٻٜ «اٜىٰ» ڤُطِّتَ مبِعَ «اَاعَ؟»
18 اَللَّه اٛ غَطٛووٛ کٛ اٛ وِعِ، اٛ شٜيْدُوجٛ اَمِنْ، مِنْ مبِعَتَا «اٜىٰ» اٜ «اَاعَ» شَرٜلْ غٛعٛ؞
19 نغَمْ حَبَرُ ٻِطّٛ اَللَّه، وَاتٛ يٜىٰسُ اَلْمَسِيحُ، مٛ مِنْ نغَعَجِنَنِعٛنْ، مِنْ اٜ سِيلَ اٜ تِمٛوتِ، نَاع طُمْ «اٜىٰ» اٜ «اَاعَ،» اَمَّا کَنْکٛ کٛو ندٜيٜ «اٜىٰ» مَاکٛ طُمْ «اٜىٰ؞»
20 نغَمْ اَلْمَسِيحُ حٜبِّنِي کٛو نغَلٜ اَلْکَوَلْ نغَلْ اَللَّه وَطِ؞ کَنْجُمْ وَطِ مبِعٜتٜنْ «اَامِنْ» لَاوٛلْ مَاکٛ نغَمْ تٜدِّنْکِ اَللَّه؞
21 نغَمْ اَللَّه وٛنِ غَطُطٛعٜنْ ندَرِيطٜنْ بٛطُّمْ ندٜرْ سُمْڤٛوتِرْکِ مٜىٰطٜنْ اٜ يٜىٰسُ اَلْمَسِيحُ؞ کَنْکٛ سُٻِعٜنْ،
22 اٛ وَطَنِيعٜنْ اَلَامَ مَاکٛ کٛلُّطُمْ اٜنٜنْ طُمْ ٻٜ مَاکٛ؞ اٛ حٛکِّيعٜنْ رُوحُ مَاکٛ ندٜرْ ٻٜرْطٜ مٜىٰطٜنْ، نغَمْ طُمْ تَبِّتِنَنَعٜنْ کٛ اٛ حٛکَّتَعٜنْ يٜىٰسٛ طٛعٛ؞
23 اَللَّه وٛنِ شٜيْدُوجٛ اَمْ تٛ مِ فٜوَيْ، مِ يِطَا مِ وَطَعٛنْ نَنٛنْ شِيَ بٜلْطُمْ، کَنْجُمْ حَطِيَمْ سٛعَّاکِ کٛرِنْتِ؞
24 مِنْ نغِطَا مِنْ کٛلَّعٛنْ لَامُ سٜمْبٜ دٛوْ حٛولَارٜ مٛوطٛنْ؞ مِنٛنْ مِنْ کُودٛوٻٜ اٜ مٛوطٛنْ نغَمْ نَنٛنْ بٜلْطُمْ ندٜرْ ٻٜرْطٜ مٛوطٛنْ، نغَمْ اٛنْ ندَرَکٜ بٛطُّمْ دٛوْ کٛ کٛولِيطٛنْ؞