3
اَلْکَوَلْ اَللَّه کٜسَلْ
1 تٛو، اٛنْ کَمِّي مِنْ ڤُطِّي مَنْتُکِ کٛعٜ اَمِنْ کَدِنْ؟ کٛو بٛو طُمْ دٛولٜ مِنْ نغَرْدَ اٜ طٜرٜىٰجِ کٛلَّيْطِ مِنٛنْ مِنْ ٻٜيٜ، کٛو پِوُطِ تٛ مٛوطٛنْ نغَمْ کٛلَّ وٛٻّٜ مِنْ ٻٜيٜ نٛ وٛٻّٜ نغَطَتَ؟
2 اٛنٛنْ اٜ کٛعٜ مٛوطٛنْ نغٛنِ طٜرٜوٛلْ اَمِنْ بِنْدَانغٛلْ ندٜرْ ٻٜرْطٜ اَمِنْ؞ کٛو مٛيٜ وَاوَيْ جَنْغَنغٛلْ اَنْدَنغٛلْ؞
3 اٛنْ کٛلِّي اٛنٛنْ نغٛنِ طٜرٜوٛلْ نغٛلْ اَلْمَسِيحُ وِنْدِ، نغٛلْ اٛ لِلْدِ لَاوٛلْ اَمِنْ؞ نَاع اٜ دَوَارُ نغٛلْ وِنْدِرَا، اَمَّا اٜ رُوحُ اَللَّه غٛودُطٛ يٛنْکِ نغٛلْ وِنْدِرَا؞ نَاع دٛوْ اَلّٛوَلْ حَيْرٜ نغٛلْ وِنْدَا، اَمَّا دٛوْ اَلّٛوَلْ ٻٜرْطٜ يِمْٻٜ نغٛلْ وِنْدَا؞
4 مِنْ مبِعُ نٛنْ نغَمْ اٜ مِنْ کٛولِي اَللَّه لَاوٛلْ اَلْمَسِيحُ؞
5 مِنْ کٜپَايِ مِنْ مبِعَ مِنْ مبَاوَيْ وَطُکِ کٛو طُمٜ اٜ بَوْطٜ اَمِنْ، اَمَّا بَوْطٜ اَمِنْ تٛ اَللَّه پِوٛيِ؞
6 کَنْکٛ وَطِ مِنْ مبَاوِ وَرْتُکِ اٜکِّتِنٛوٻٜ اَلْکَوَلْ کٜسَلْ؞ اَلْکَوَلْ نغَلْ بٛو دَرَاکِ دٛوْ دٛوکَ بِنْدَاطُمْ، اَمَّا دٛوْ رُوحُ مَاکٛ نغَلْ دَرِ؞ نغَمْ دٛوکَ بِنْدَاطُمْ اٜ فٛوطَ مَيْدٜ، اَمَّا رُوحُ اٜ حٛکَّ يٛنْکِ کِ رٜعَتَا؞
7 طُمْ وِنْدِ دٛوکَ مُوسَ دٛوْ اَلّٛوجٜ حَيْرٜ، ندٜنْ شَرٜلْ کٛ مُوسَ حٛکّٜتٜىٰطُمْ، تٜدُّنغَلْ اَللَّه وَنْغِ وَطِ يٜىٰسٛ مَاکٛ اٜ طٜلْکِتٛو؞ کٛو ندٜ طٜلْکِتَاکِ کِنْ اٜ اُسْتٛو، فُو اٜ نٛنْ اِسْرَاعِيلَنْکٛعٜنْ مبَاوَايِ سُتَاکِ يٜىٰسٛ مَاکٛ؞ تٛ دٛوکَ غَدَّيْطُمْ مَيْدٜ وَرْدِي اٜ اِرِ نغَعَلْ تٜدُّنغَلْ،
8 تٛو، کُوغَلْ رُوحُ اَللَّه ٻُرَيْ نٛنْ تٜدُّنغَلْ!
9 تٛ کٛ فٛوطَتَ کِيتَ اٜ وٛودِ تٜدُّنغَلْ، تٛو، کٛ وَطَتَ يِمْٻٜ کٜٻَ اَادِلَاکُ اَللَّه ٻُرَيْ نٛنْ تٜدُّنغَلْ نَاع سٜطَّ!
10 غٛونغَ، تٜدُّنغَلْ اَلْکَوَلْ کِينغَلْ وَلَا مَنْغُ جٛونِ تٛ نغَلْ حَوْتَامَ اٜ تٜدُّنغَلْ اَلْکَوَلْ کٜسَلْ؞
11 تٛ پَٻّٛتٛوطُمْ وَرْدِي اٜ تٜدُّنغَلْ، تٛو، اَلْکَوَلْ کٜسَلْ تَبِتَيْنغَلْ ٻُرَيْ نٛنْ تٜدُّنغَلْ نَاع سٜطَّ!
12 نغَمْ نٛنْ، ندٜ اٜ مِنْ نغٛودِ اِرِ ندٜعٜ کَمُّندٜ، اٜ مِنْ مٜتِرَ سٜمْبٜ ٻٜرْندٜ نَاع سٜطَّ؞
13 مِنٛنْ نَاع بٛ مُوسَ مِنْ مبَعِ، شُدِّرْطٛ يٜىٰسٛ مَاکٛ اٜ لٜفٜلْ، نغَمْ تٛع اِسْرَاعِيلَنْکٛعٜنْ شُتٛومٛ نغِعَ نٛ طٜلْکِتٛلْ يٜىٰسٛ مَاکٛ اُسْتٛرْتٛو؞
14 اَمَّا ٻٜ ندُلِّي فَامُ، نغَمْ حَا حَنْدٜ تٛ ٻٜ نجَنْغَنَامَ اَلْکَوَلْ کِينغَلْ، لٜفٜلْ نغٜلْ اٜ حَطَٻٜ ٻٜ ڤَامَ غٛونغَ، نغَمْ سُمْڤٛوتِرْکِ اٜ اَلْمَسِيحُ تَنْ اِتَّتَنغٜلْ؞
15 غٛونغَ، حَا جٛونِ تٛ ٻٜ نجَنْغَنَامَ اَتَّوْرَ، لٜفٜلْ نغٜلْ اٜ وُمْنَ ٻٜرْطٜ مَٻّٜ؞
16 اَمَّا تٛ نٜطّٛ تُوبِي تٛکِّي جٛومِرَاوٛ، طُمْ اِتَّيْ لٜفٜلْ نغٜلْ دَغَ ٻٜرْندٜ مَاکٛ؞
17 تٛو، جٛومِرَاوٛ اٛنْ وٛنِ رُوحُ اَللَّه، ندٜنْ تٛ رُوحُ اَللَّه وٛنِ طٛنْ رِمْطِنٜىٰکِ وٛنِ؞
18 اٜنٜنْ ٻٜ غٜىٰشٜ مُعّٜنْ شُدِّتَا اٜنْ فُو اٜنْ کٛلَّ تٜدُّنغَلْ جٛومِرَاوٛ اٜنْ ٻٜيْدَ وَرْتُکِ بٛ مَاکٛ؞ تٜدُّنغَلْ نغَلْ وَطَيْ کَ ٻٜيْدَاکِ؞ طُعُمْ طُمْ کُوغَلْ جٛومِرَاوٛ، کَنْکٛ وٛنِ رُوحُ؞