3
1 اٛنْ اُمِّدِنَامَ اٜ اَلْمَسِيحُ دَغَ مَيْدٜ؞ نغَمْ نٛنْ نغَطٜىٰ ٻٜرْطٜ مٛوطٛنْ دٛوْ فِي غٛنْطُمْ تٛنْ دٛوْ تٛ اَلْمَسِيحُ جٛوطِي دٛوْ جٛوطٛرْغَلْ لَامُ مُوطُمْ تٛ جُنْغٛ ݧَامٛ اَللَّه؞
2 نغَطٜىٰ کَ ݧُمُکِ دٛوْ کٛ وٛنِ اٜ دٛوْ، نَاع دٛوْ فِي غٛنْطُمْ ندٜرْ دُونِيَارُ ندُعُ،
3 نغَمْ اٛنْ نغَرْتِي بٛ مَيْٻٜ، ندٜنْ جٛونِ اٛنْ نغٛودِ يٛنْکِ کٜسِ کِ غٛطّٛ وَاوَتَا يِيکِ اِرِ يٛنْکِ کِ اَلْمَسِيحُ وٛودِ غٛنْدُطٛ اٜ اَللَّه؞
4 يٛنْکِ مٛوطٛنْ کِ غٛونغَ وٛنِ اَلْمَسِيحُ؞ تٛ اٛ سٛعّٛيَکٜ دُونِيَارُ ندُعُ، اٛنٛنْ مَا، اٛنْ نغٛنْدَيْ اٜ مَاکٛ ندٜرْ تٜدُّنغَلْ مَاکٛ؞
جٛنْدٜ کِيندٜ اٜ جٛنْدٜ حٜيْرٜ
5 نغَمْ نٛنْ، شٜنْدِرٜىٰ اٜ سُونٛوجِ دُونِيَارُ غٛنْطِ ندٜرْ مٛوطٛنْ، وَاتٛ نجٜىٰنُ، اٜ کُوطٜ نٜفْنِيطٜ، اٜ تٛکِّرَنْکِ کٛ ٻَنْدُ يِطِ، اٜ سُونٛوجِ کَلُّطِ، اٜ يِطُکِ کٛ غٛطّٛ جٜيِ؞ ﴿نغَمْ يِطُکِ کٛ غٛطّٛ جٜيِ طُمْ غٛعٛ اٜ مَوْنِنْکِ غُنْکِيجِ﴾؞
6 نغَمْ وَطُکِ کُوطٜ طٜعٜ مٛنّٜرٜ اَللَّه يَنَيْ دٛوْ فُو غَݧُٻٜ نغَطَ کٛ اٛ وِعِ؞
7 ندٜنّٛ اٛنْ نغَطَ اِرِ کُوطٜ طٜعٜ ندٜرْ جٛنْدٜ ندٜ نغَطَيْنٛوطٛنْ؞
8 اَمَّا جٛونِ، شٜنْدِرٛنْ اٜ فُو اِرِ کُوطٜ طٜعٜ، وَاتٛ مٛنّٜرٜ، اٜ وَݧُکِ يِمْٻٜ، اٜ کُلّٜ، ندٜنْ تٛع اٛنْ اَلُ بٛلِيطٜ کَلُّطٜ مبُرْتٛو دَغَ حٛنْدُکٛ مٛوطٛنْ؞
9 تٛع اٛنْ ڤٜوِنْدِرْ، نغَمْ اٛنْ ٻٛرْتَکٜ نغِکُّ مٛوطٛنْ طُمْ ندٜنّٛ اٜ کُوطٜ مَاجُمْ؞
10 جٛونِ اٛنْ ٻٛرْنَکٜ نغِکُّ کٜسُمْ؞ اَللَّه تَغُطٛ نغِکُّ طُمْ، اٜ مٛ مٛعِّنَطُمْ طُمْ وَرْتَ اِرِ نغِکُّ مَاکٛ، نغَمْ اَنْدٛنْمٛ بٛطُّمْ؞
11 کَنْجُمْ وَطِ جٛونِ وَلَا فٜىٰرٛوتِرٛلْ حَکُّندٜ يَحُودَنْکٜىٰجٛ اٜ نٜطّٛ نَاع يَحُودَنْکٜىٰجٛ، اٜ حَکُّندٜ نَادَاطٛ اٜ مٛ نَادَاکَ، اٜ لَدّٜىٰجٛ، اٜ کٛطٛ، اٜ حَکُّندٜ مَشُّطٛ اٜ نَاع مَشُّطٛ؞ اَمَّا اَلْمَسِيحُ وٛنِ کٛو طُمٜ، کَنْکٛ وٛنِ ندٜرْ ٻٜرْطٜ مٜىٰطٜنْ اٜنْ فُو؞
12 اٛنٛنْ اٛنْ يِمْٻٜ ٻٜ اَللَّه سُٻِ، اٛنْ شٜنِيٻٜ ٻٜ اٛ يِطِ نَاع سٜطَّ؞ نغَمْ نٛنْ، نغَرْتٜىٰ غٛودُٻٜ يُرْمٜىٰندٜ اٜ يِدّٜ لٜيْنٛوٻٜ کٛعٜ، غٛودُٻٜ حَکِّيلٛ اٜ مُݧَلْ؞
13 مُݧِندِرٜىٰ؞ تٛ غٛطّٛ وَطَنِي غٛطّٛ کٛ حَانَا، ٻٜ نجَافٛوتِرَ؞ نٛنْ نٛ جٛومِرَاوٛ يَافٛرَنِيعٛنْ، اٛنٛنْ مَا سٜيْ نجَافٛوتِرٛنْ؞
14 کٛ ٻُرِ طُعُمْ فُو وٛنِ نغِطِنْدِرٛنْ، نغَمْ يِدّٜ حَوْتِي کٛعٜ مٜىٰطٜنْ نٛ حَانِ؞
15 جَمْ پِوٛيْطُمْ تٛ اَلْمَسِيحُ وَلَّعٛنْ شُٻٛنْ کٛ حَانِ نغَطٛنْ، ندٜ اَللَّه نٛدِّيعٛنْ نغَمْ نغَرْتٛنْ بٛ ٻَنْدُ غٛعٛ نجٛوطٛدٛوطٛنْ جَمْ؞ نغَرْتٜىٰ غٜتّٛوٻٜ اَللَّه کٛو ندٜيٜ؞
16 اَلٜىٰ بٛلِيطٜ اَلْمَسِيحُ نجٛوطٛو ندٜرْ ٻٜرْطٜ مٛوطٛنْ نَاع سٜطَّ؞ اٜکِّتِندِرٜىٰ، وَغِّندِرٜىٰ ندٜرْ فُو فَامُ؞ نغِمٜىٰ غِمِ جَبُورَ، اٜ غِمِ مَنْتُکِ جٛومِرَاوٛ، اٜ غِمِ طِ اَللَّه حٛکِّعٛنْ ندٜرْ ٻٜرْطٜ، اٛنْ نغٜتَّمٛ ندٜرْ ٻٜرْطٜ مٛوطٛنْ؞
17 ندٜرْ کٛو طُمٜ طُمْ نغَطٛتٛنْ، ندٜرْ بٛلِيطٜ مٛوطٛنْ کٛو ندٜرْ کُوطٜ مٛوطٛنْ، نغَطٜىٰطُمْ ندٜرْ اِنْدٜ يٜىٰسُ جٛومِرَاوٛ، اٛنْ نغٜتَّ اَللَّه ݧَاکٛ مٛ دٛوْ لَاوٛلْ مَاکٛ؞
نٛ حَانِ وُرٛ تٛکُّٻٜ يٜىٰسُ جٛوطٛرٛو
18 اٛنٛنْ رٜوْٻٜ تٜىٰغَلْ، کٛکّٜىٰ وٛرْٻٜ مٛوطٛنْ مَنْغُ نٛنْ نٛ حَانِ تٛکُّٻٜ جٛومِرَاوٛ نغَطَ؞
19 وٛرْٻٜ، نغِطٜىٰ رٜوْٻٜ مٛوطٛنْ، تٛع اٛنْ کٛلُّٻٜ نغِکُّ شَاتُطُمْ؞
20 سُکَاٻٜ، کٛکّٜىٰ دَݧٛوٻٜ مٛوطٛنْ مَنْغُ ندٜرْ کٛو طُمٜ، نغَمْ نٛنْ اٜ وٜلْنَنَ جٛومِرَاوٛ ٻٜرْندٜ؞
21 اٛنٛنْ غٛودُٻٜ ٻِٻّٜ، تٛع اٛنْ کَلَّنْ ٻِٻّٜ مٛوطٛنْ نغَمْ نٛنْ وَاوَيْ وَطَ ٻٜ اَلَ وَطُکِ کٛ حَانِ؞
22 مَشُّٻٜ، کٛکّٜىٰ جٜيْٻٜعٛنْ مَنْغُ ندٜرْ کٛو طُمٜ؞ کٛکّٜىٰٻٜ مَنْغُ نَاع اٜ شَرٜلْ نغٜلْ ٻٜ نغِعَتَعٛنْ تَنْ کٛو بٛو نغَمْ ٻٜ ٻٜيْدَ يِطُکِعٛنْ، اَمَّا نغَطٜىٰطُمْ اٜ ٻٜرْندٜ غٛعٛ ندٜرْ کُلٛلْ جٛومِرَاوٛ؞
23 ندٜرْ کٛو طُمٜ طُمْ نغَطٛتٛنْ، نغَطٜىٰطُمْ اٜ ٻٜرْطٜ مٛوطٛنْ فُو بٛ جٛومِرَاوٛ نغَطَنْتٛنْطُمْ، نَاع يِمْٻٜ؞
24 نغَمْ اٛنْ اَنْدِ اٛنْ کٜٻَيْ مبَرْجَارِ دَغَ تٛ جٛومِرَاوٛ؞ اَلْمَسِيحُ وٛنِ جٛومِرَاوٛ مٛ کُوَنْتٛنْ؞
25 کٛو مٛيٜ غَطٛووٛ کٛ وٛوطَا طُمْ وَاتَنَيْمٛ کٛ حَانَنِمٛ، نغَمْ اَللَّه حٛلَّتَا فٜىٰرٛوتِرٛلْ؞