12
اَللَّه ݧَاکٛ مٜىٰطٜنْ مٛ دٛوْ
1 نغَمْ مَاجُمْ، ندٜ اٜ وٛودِ يِمْٻٜ طُطْٻٜ کٛلُّٻٜ نٛ ٻٜ کٛولٛرِي اَللَّه، اٜنْ شٜنْدِرْ اٜ کٛو طُمٜ کَطَيْطُمْعٜنْ وَطُکِ کٛ حَانِ نغَطٜنْ اٜ حَکّٜ کَٻُّطُمْعٜنْ؞ اٜنْ نغَطُ کٛ مبَاوٜتٜنْ وَطُکِ نجٛتِّنٜنْ کٛ اَللَّه وِعِ نغَطٜنْ؞
2 اٜنْ نغَطُ حَکِّيلٛ مٜىٰطٜنْ دٛوْ يٜىٰسُ، مَٻِّتَنْطٛعٜنْ لَاوٛلْ حٛولَاکِ اَللَّه بَلَّيْطٛعٜنْ حٛولَارٜ مٜىٰطٜنْ وَرْتَ کٜوْندٜ؞ نغَمْ وٜلْوٜلٛ نغٛ اٛ حٜٻَتَ يٜىٰسٛ، اٛ مُݧِي ندٜرْ تٛرَّ ندٜ اٛ وَرَا دٛوْ غَافَانغَلْ، اٛ وَنَّايِ اٜ شٜمْتُطُمْ وَرٜىٰکِ دٛوْ غَافَانغَلْ، ندٜنْ جٛونِ اٜ مٛ تٛنْ جٛوطِي تٛ ݧَامٛ جٛوطٛرْغَلْ لَامُ اَللَّه؞
3 ݧُمٜىٰ دٛوْ نٛ اٛ مُݧِرِ ندٜ غَطٛوٻٜ حَکّٜ نغَݧِمٛ؞ نٛنْ وَلَّيْعٛنْ تٛع نغٜوْرٛنْ اِتّٛنْ کَمُّندٜ؞
4 اٛنْ کَٻْدَ اٜ حَکّٜ، اَمَّا اٛنْ نجٛتَّاکِ تٛ حٜوْتِ طُمْ وَرَعٛنْ؞
5 اٛنْ نغٜجِّتِي بٛلِيطٜ شٜمْبِطِنَيْطٜعٛنْ طٜ اَللَّه مٜتَنِعٛنْ کٛلُّطٜ اٛنْ ٻِٻّٜ مَاکٛ؟ اٛ وِعِي،
«ٻِطّٛ اَمْ، تٛ جٛومِرَاوٛ اٜلْتِيمَ، تَاع وَرْتِرْطُمْ مٜىٰرٜ؞
تٛ اٛ حَٻَنِيمَ بٛو، تَاع يٜوْرُ؞
6 نغَمْ مٛ جٛومِرَاوٛ يِطِ، کَنْکٛ اٛ اٜلْتَتَ،
ندٜنْ اٜ مٛ حَٻَنَ کٛو مٛيٜ مٛ اٛ جَٻِ اٛ ٻِطّٛ مَاکٛ؞»
7 مُݧٜىٰ ندٜرْ تٛرَّ کَ نجَرٛتٛنْ نغَمْ طُمْ اٜلْتُکِعٛنْ؞ نٛنْ حٛلِّي اَللَّه اٜ جٛغِيعٛنْ بٛ ٻِٻّٜ مَاکٛ؞ مٛيٜ ٻِطّٛ وٛنِ مٛ ݧَاکٛ مُوطُمْ اٜلْتَتَا؟
8 کٛو مٛيٜ ٻِطّٛ طُمْ اٜلْتَيْمٛ؞ تٛ بٛو اٛنْ اٜلْتَاکَ، نٛنْ حٛلِّي نَاع اٛنْ ٻِٻّٜ، اٛنْ جَالُعٜنْ؞
9 کَدِمَا اٜنْ نغٛودِ دَݧٛوٻٜ اٜلْتَيْٻٜعٜنْ ندٜنْ اٜنْ کٛکَّٻٜ مَنْغُ؞ اٜنْ ٻُرَيْ نٛنْ جَٻُکِ اٜلْتُکِ کِ ݧَاکٛ مٜىٰطٜنْ مٛ دٛوْ وَطَنِعٜنْ، ندٜنْ کٜٻٜنْ يٛنْکِ کِ رٜعَتَا!
10 دَݧٛوٻٜ مٜىٰطٜنْ اٜ اٜلْتَعٜنْ نغَرْتٜنْ نٛ ٻٜ نغِطِ نغَمْ شَرٜلْ سٜطَّ؞ اَمَّا اَللَّه اٜ اٜلْتَعٜنْ نغَمْ ٻٜيْدَارِ مٜىٰطٜنْ، نغَمْ نغَرْتٜنْ شٜنِيٻٜ بٛ مَاکٛ؞
11 شَرٜلْ نغٜلْ طُمْ اٜلْتَتَ نٜطّٛ، طُمْ وٜلَا، سٜيْ نَوْطُمْ؞ اَمَّا غَطَ طٛنْ، طُمْ وَدَّيْ اَادِلَاکُ اٜ جَمْ ندٜرْ جٛنْدٜ اٜلْتَاطٛعٛنْ؞
اٜکِّتِنْکِ اٜ وَغِّنْکِ
12 نغَمْ مَاجُمْ شٜمْبِطِنٜىٰ جُوطٜ مٛوطٛنْ تَمْڤُطٜ، اٜ کٛڤِّ مٛوطٛنْ تَغِّيطِ؞
13 مٛعِّنَنٜىٰ کٛيْطٜ مٛوطٛنْ طَتٜ ڤٛرْتِيطٜ، نغَمْ تٛع کٛيْطٜ مٛوطٛنْ تَغِّيطٜ نغَرْتَ نَاع کٛ نَفِ، اَمَّا طٜ کٛيَ؞
14 نغَطٜىٰ کٛ مبَاوٛتٛنْ وَطُکِ نجٛوطٛدٛوطٛنْ جَمْ اٜ کٛو مٛيٜ نغَرْتٛنْ شٜنِيٻٜ، نغَمْ تٛ نَاع اٜ جٛنْدٜ شٜنِيندٜ وَلَا غِعَيْطٛ جٛومِرَاوٛ؞
15 ڤَامَنٜىٰ کٛعٜ مٛوطٛنْ تٛع ندُلّٛنْ حٜٻُکِ بَرْکَ اَللَّه، نغَمْ تٛع وٛنْغٛلْ طَطٛلْ کَاطُنغٛلْ مَوْنَ فٛوطَ شَطُّمْ وٛنَّ يِمْٻٜ طُطْٻٜ؞
16 تٛع غٛطّٛ وَرْتَ غَطٛووٛ نجٜىٰنُ کٛو مٛ وَلَا کُلٛلْ اَللَّه بٛ اِسَوْ شٛورُطٛ مَنْغُ مُوطُمْ طُمْ اَفٛ نغَمْ حٜٻَ ݧَامَ ندٜ غٛعٛ تَنْ؞
17 اٛنْ اَنْدِ غَطَ طٛنْ، ندٜ اٛ طَٻِّتِ ݧَاکٛ مَاکٛ بَرْکِطِنَمٛ، طُمْ وَݧِيمٛ؞ اٛ حٜٻَايِ وَيْلُکِ کٛ اٛ وَطُنٛو، کٛو ندٜ اٛ طَٻِّتِي حَا اٜ غٛنْطِ؞
18 اٛنْ نغَرَايِ تٛ وِغٜىٰرٜ بٛ حٛشّٜىٰرٜ سِنَيْ ندٜ طُمْ وَاوَتَ مٜىٰمُکِ غٛودُندٜ حِيتٜ ݧَامٛويٜ، اٜ ندُولَ ٻَلٜوَ، اٜ حٜنْدُ شٜمْبِنْدُ،
19 اٜ اِيدٛ دُودَاندُ، اٜ حٛنٛنْدٜ؞ ندٜ اِسْرَاعِيلَنْکٛعٜنْ نَنِ حٛنٛنْدٜ ندٜنْ، ٻٜ تٛرِي تٛع طُمْ فُطِّتَ طُمْ مٜتَنَٻٜ،
20 نغَمْ ٻٜ نغَنِّي دٛوْ کٛ حٛنٛنْدٜ ندٜنْ وِعِٻٜ، «کٛو مَرْدِ مٜىٰمِ حٛشّٜىٰرٜ ندٜنْ، دٛولٜ ندِ وَرْدٜىٰ اٜ کَاپٜ؞»
21 مُوسَ حُلِي اٜ کٛ يِعِ حَا وِعِ، «اٜ مِ حُلَ حَا اٜ مِ دِوْنَ؞»
22 اَمَّا اٛنْ نغَرِي حٛشّٜىٰرٜ سِحِيٛونَ، غَرِيرِ اَللَّه مٛ يٛنْکِ، وَاتٛ اُرُشَلِيمَ ندِ دٛوْ، اٜ تٛ مَلَاعِکَعٜنْ ٻٜ لِمَتَاکٛ حَوْرُتُٻٜ ندٜرْ وٜلْوٜلٛ؞
23 اٛنْ نغَرِي تٛ کَوْتَلْ اَفٛعٜنْ اَللَّه، ٻٜ طُمْ وِنْدِ اِنْطٜ مَٻّٜ ندٜرْ وُرٛ مَاکٛ تٛنْ دٛوْ؞ اٛنْ نغَرِي تٛ اَللَّه، غَطَنٛووٛ فُو يِمْٻٜ کِيتَ، تٛ يٛنْکِيجِ اَادِلِعٜنْ غَرْتِرَاٻٜ کٜىٰوُٻٜ؞
24 اٛنْ نغَرِي تٛ يٜىٰسُ، شِرْيِيطٛ اَلْکَوَلْ کٜسَلْ حَکُّندٜ يِمْٻٜ اٜ اَللَّه؞ اٛنْ نغَرِي تٛ پِيپَمْ مِسَاطَمْ مٜتُطَمْ وٛلْدٜ ٻُرْندٜ وٛوطُکِ دٛوْ کٛ پِيپَمْ حَبِيلَ وِعِ؞
25 ڤَامٜىٰ، تٛع نغَݧٛنْ اٛنْ طٛنْ مٜتُطٛ؞ يِمْٻٜ غَݧُٻٜ نَنَ کٛ وَغِّنْطٛٻٜ ندٜرْ دُونِيَارُ وِعِٻٜ ٻٜ ندَطَايِ؞ تٛو، نٛ وَطَتَ اٜنٜنْ ندَطٜنْ، تٛ اٜنْ نغَݧِي اٛنْ طٛنْ بَغِّنْطٛعٜنْ دَغَ دٛوْ؟
26 اٜ نغٜلْ تٛنْ شَرٜلْ حٛنٛنْدٜ مَاکٛ دِمْبِي دُونِيَارُ، اَمَّا جٛونِ اٛ وَطِي اَلْکَوَلْ، اٛ وِعِي، «مِ دِمْبَيْ دُونِيَارُ ندٜ غٛعٛ کَدِنْ؞ نَاع دُونِيَارُ تَنْ ندِمْبَيْمِ، اَمَّا فُو اٜ دٛوْ؞»
27 طٜعٜ بٛلِيطٜ، «ندٜ غٛعٛ کَدِنْ» حٛلِّي فُو کٛ تَغَا طُمْ دِمْبٜتٜىٰطُمْ طُمْ اِتّٜىٰ، نغَمْ کٛ دِمْبَتَاکٛ جٛوطٛو؞
28 نغَمْ مَاجُمْ اٜنْ نغٜتُّ اَللَّه نغَمْ اٜنْ کٜٻِي لَامُ طُمْ دِمْبَتَاکٛ؞ اٜنْ مَوْنِنْ اَللَّه ندٜرْ کُلٛلْ، مَوْنِنْکِ کِ اٛ جَٻَتَ؞
29 نغَمْ اَللَّه مٜىٰطٜنْ اٛ حِيتٜ کَلْکٛويٜ؞