11
يُرْمٜىٰندٜ اَللَّه دٛوْ اِسْرَاعِيلَ
1 اٜ مِ پَمَ، اَللَّه وَݧِي يِمْٻٜ مُوطُمْ؟ غٛونغَ، اٛ وَݧَايِٻٜ؞ مِنْ اٜ حٛورٜ اَمْ مِ اِسْرَاعِيلَنْکٜىٰجٛ، تَانِرَاوٛ اِبْرَاهِمْ دَغَ لٜݧٛلْ بِلِيَامِنُ؞
2 اَللَّه وَݧَايِ يِمْٻٜ مُوطُمْ ٻٜ اٛ سُٻِ دَغَ فُطّٛودٜ دُونِيَارُ؞ اٛنْ اَنْدِ کٛ اَايَارٜ وِعِ دٛوْ اِلِيَ، نٛ اٛ وُلّٛرِي اِسْرَاعِيلَنْکٛعٜنْ تٛ اَللَّه؞
3 اٛ وِعِي، «جٛومِرَاوٛ، ٻٜ مبَرِي اَنَّبٛعٜنْ مَاطَ، ٻٜ ڤُسِي شَکِّرْلٜ مَاطَ؞ مِنْ تَنْ وٛنِ کٛرِيطٛ، ندٜنْ اٜ ٻٜ طَٻِّتَ وَرْکِيَمْ؞»
4 اَمَّا طُمٜ اَللَّه وِعِمٛ؟ اَللَّه وِعِمٛ، «مِ رٜسَنِي حٛورٜ اَمْ يِمْٻٜ 7,000 ٻٜ مٜىٰطَايِ مَوْنِنْکِ نغُنْکِوَ مبِعٜتٜىٰنغَ بَعَلْ؞»
5 نٛنْ طُمْ وٛنْتِندِرِ ندٜرْ جَامَنُ طُعُمْ، اٜ وٛودِ يِمْٻٜ سٜطَّ کٛرِيٻٜ ٻٜ اَللَّه سُٻِ، نغَمْ يِدّٜ مَاکٛ؞
6 تٛ اٜ مٛ سُٻِرَ يِمْٻٜ لَاوٛلْ يِدّٜ مَاکٛ، اٛ سُٻُٻٜ نَاع نغَمْ کُوطٜ بٛطّٜ طٜ ٻٜ نغَطِ؞ نغَمْ تٛ اٜ مٛ سُٻَ يِمْٻٜ نغَمْ کُوطٜ طٜ ٻٜ نغَطِ، سُٻُکِ کِنْ نَاع طُمْ شَاحُ، طُمْ نجٛٻَارِ يِدّٜ مَاکٛ نَاع ندٜ غٛونغَ؞
7 تٛو، نٛيٜ وٛنْ طٛنْ؟ يِمْٻٜ اِسْرَاعِيلَ تَمْڤِي کٜٻَ کٛ طَٻِّتَتَ؞ سٜطَّ ندٜرْ مَٻّٜ کٜٻِطُمْ، ٻٜ اَللَّه سُٻِ، اَمَّا کٛرِيٻٜ طُمْ سَاتِنَنِيٻٜ ٻٜرْطٜ؞
8 نٛ اَايَارٜ وِعِ، «اَللَّه وَرْتِرِيٻٜ يِمْٻٜ ٻٜ نغَلَا حَکِّيلٛ ٻٜ نغَلَا فَامُ؞ اٜ ٻٜ نغٛودِ غِتٜ، اَمَّا ٻٜ نغِعَتَا، اٜ ٻٜ نغٛودِ نٛڤِّ، اَمَّا ٻٜ نَنَتَا، حَا ندٜعٜ ݧَلْندٜ؞»
9 ندٜنْ دَوْدَ وِعِي،
«اَللَّه وَطَ حُمْتٛ مَٻّٜ وَرْتَنَٻٜ تَرْکٛوٛلْ
ٻٜ نجَنَ ندٜرْ مَغّٛلْ، ٻٜ نجَرَ تٛرَّ نٛ حَانَنِٻٜ؛
10 غِتٜ مَٻّٜ مبُمَ ٻٜ تَمْڤَ يِيکِ،
تٛرَّ کَلُّکَ وَرْتَنَٻٜ دٛنْغَلْ حَا اَبَدَا؞»
11 اٜ مِ پَمَ، ندٜ يَحُودَنْکٛعٜنْ نجَنِ ندٜرْ حَکّٜ، ٻٜ اُمَّتَاکٛ وٛنْ طٛنْ؟ غٛونغَ نَاع نٛنْ! اَمَّا نغَمْ حَکّٜ طُمْ ٻٜ نغَطِ، کِسْندَمْ وَرَنِي يِمْٻٜ نَاع يَحُودَنْکٛعٜنْ نغَمْ يَحُودَنْکٛعٜنْ نَنَ لَوْلِيرُ مَٻّٜ؞
12 جٛونِ تٛ حَکّٜ طُمْ يَحُودَنْکٛعٜنْ نغَطِ وَرْتِ بَرْکَ تٛ يِمْٻٜ دُونِيَارُ، ندٜنْ تٛ تَمْڤٜرٜ مَٻّٜ نغَرْتِي بَرْکَ تٛ يِمْٻٜ نَاع يَحُودَنْکٛعٜنْ، بَرْکَ طُمْ ٻُرَيْ نٛنْ تٛ فُو يَحُودَنْکٛعٜنْ ٻٜ اَللَّه سُٻِ نجَٻِي کِسْندَمْ مَاکٛ؞
کِسْندَمْ يِمْٻٜ نَاع يَحُودَنْکٛعٜنْ
13 جٛونِ اٜ مِ مٜتَنَعٛنْ اٛنٛنْ يِمْٻٜ نَاع يَحُودَنْکٛعٜنْ؞ ندٜ مِ لِلَاطٛ تٛ يِمْٻٜ نَاع يَحُودَنْکٛعٜنْ، مِ فِيَيْ غَبَارٜ اَمْ دٛوْ کُوغَلْ نغَلْ اَللَّه حٛکِّيَمْ مِ وَطَ،
14 نغَمْ مِ وَطَ بَنْدِرَاٻٜ اَمْ يَحُودَنْکٛعٜنْ نَنَ لَوْلِيرُ، نٛنْ حِسْنَ وٛٻّٜ مَٻّٜ؞
15 نغَمْ تٛ وَݧُکِ کِ اَللَّه وَݧِٻٜ وَرْتِي لَاوٛلْ سِرْيٛوتِرْکِ مَاکٛ اٜ دُونِيَارُ، نٛيٜ طُمْ وَرْتَتَ تٛ اٛ سِرْيٛوتِرِي اٜ مَٻّٜ؟ طُمْ وَرْتَيْ بٛ اٛ اُمِّنْٻٜ دَغَ مَيْدٜ؞
16 تٛ طُمْ حٛکِّي اَللَّه ݝٛشِّتٜلْ بُرٛودِ، ندٜنْ فُو بُرٛودِ کٛرِيطُمْ طُمْ وَرْتِي بٛ طُمْ حٛکِّيطُمْ اَللَّه؞ تٛ طُمْ حٛکِّي اَللَّه طَطِ لٜکِّ، ندٜنْ لِشٜ مَاکِ مَا نغَرْتِي طٜ مَاکٛ؞
17 رَا مِسَالُ؞ لٜݧٛلْ اِبْرَاهِمْ، وَاتٛ يَحُودَنْکٛعٜنْ اٜ نَنْدِ اٜ لٜکِّ جَيْتُنْ کِ طُمْ اَاوِ، اَمَّا اَللَّه اِتِّي غٛطّٜ لِشٜ مَاکِ، اٛ وَدِّي لِشٜ کٜسٜ دَغَ لٜکِّ جَيْتُنْ کِ لَدّٜ اٛ تَکِّطٜ تٛ اٛ اِتِّ طٜنْ تٛنْ لِشٜ نغَمْ طٜ کٜٻَ بَرْکَ لٜکِّ کِنْ طٜ مَوْنِدَ اٜ مَاکِ؞ اٛنٛنْ يِمْٻٜ نَاع يَحُودَنْکٛعٜنْ، اٛنٛنْ نغٛنِ لِشٜ کٜسٜ طٜنْ؞
18 نغَمْ نٛنْ، تٛع اٛنْ ڤِيُ غَبَارٜ مبِعٛنْ اٛنْ ٻُرِي طٜنْ تٛنْ لِشٜ طٜ طُمْ اِتِّ؞ تٛ اٛنْ نغَطِي نٛنْ، تٛع اٛنْ نغٜجُّتُ، نَاع اٛنٛنْ نجٛغِي طَطِ لٜکِّ کِنْ، اَمَّا طَطِ طِنْ نجٛغِيعٛنْ؞
19 اٛنْ مبِعَيْ، «لِشٜ طٜنْ اِتِّ نغَمْ طُمْ تَکِّندِرَمِنْ اٜ لٜکِّ کِنْ؞»
20 طُعُمْ طُمْ غٛونغَ؞ ٻٜ اِتَّ دَغَ لٜکِّ کِنْ نغَمْ ٻٜ کٛولَاکِ اَللَّه، اَمَّا اَنْ بٛو اَ تَکَّ اٜ لٜکِّ کِنْ نغَمْ اَ حٛولَکٜ اَلْمَسِيحُ؞ نغَمْ نٛنْ، تَاع مَوْنِنْ حٛورٜ، اَمَّا جٛوطَ ندٜرْ کُلٛلْ اَللَّه؞
21 نغَمْ ندٜ اَللَّه اِتِّ طٜنْ طٛنْ لِشٜ لٜکِّ جَيْتُنْ اَاوَاکِ، اٛنْ ݧُمَ اٛنٛنْ مَا اٛ اَلَيْعٛنْ؟
22 نغَمْ نٛنْ، ݧُمُ دٛوْ يِدّٜ اَللَّه اٜ مٛنّٜرٜ مَاکٛ؞ اٜ مٛ مٛنَّنَ ٻٜنْ طٛنْ اَلُٻٜ تٛکُّکِمٛ، اَمَّا اٛ حٛلّٜتٜ يِدّٜ مَاکٛ، تَا وَطِي کَ حٛولَاکِمٛ کَنْکٛ کٛلّٛووٛ يِدّٜ؞ اَمَّا تَا وَطَايِ نٛنْ، اَنْ مَا طُمْ اِتّٜتٜ دَغَ لٜکِّ کِنْ؞
23 ندٜنْ کٛو يَحُودَنْکٛعٜنْ اِتَّاٻٜ دَغَ لٜکِّ کِنْ، تٛ ٻٜ ݧَمْرَايِ يٜىٰسٛ اٜ شِيَ حٛولَاکِ اَللَّه، اٛ تَکِّندِرَيْٻٜ اٜ لٜکِّ کِنْ، نغَمْ اٛ وَاوَيْ اٛ فُطِّتَ اٛ تَکِّندِرَٻٜ اٜ مَاکِ؞
24 اٛنٛنْ يِمْٻٜ نَاع يَحُودَنْکٛعٜنْ اٛنٛنْ نغٛنِ بٛ لِشٜ اِتَّاطٜ دَغَ لٜکِّ جَيْتُنْ ڤُطُکِ ندٜرْ لَدّٜ طٜ تَکِّندِرَا اٜ لٜکِّ جَيْتُنْ اَاوَاکِ؞ نَاع نٛنْ اَللَّه تَغِرِ لٜکِّ کِنْ؞ ندٜ طُمْ نٛنْ، طُمْ سَطَنْتَا اَللَّه اٛ فُطِّتَ اٛ سٛعَّ لِشٜ لٜکِّ جَيْتُنْ اَاوَاکِ طٜ اٛ اِتُّنٛو تٛ مَاکِ اٛ تَکَّطٜ تٛ مَاکِ؞
اَللَّه اٜ يُرْمِنَنَ کٛو مٛيٜ
25 بَنْدِرَاٻٜ اَمْ، مِ يِطَا ندُلّٛنْ اَنْدُکِ سِرُّ طُعُمْ، نغَمْ تٛع نغَرْتٛنْ ٻٜ مَنْغُ حٛورٜ؞ اِسْرَاعِيلَنْکٛعٜنْ طُطْٻٜ نغَطَيْ کَ وَݧُکِ کٛ اَللَّه وِعِ سٜيْ تٛ شَرٜلْ وَطِي نغٜلْ فُو يِمْٻٜ نَاع يَحُودَنْکٛعٜنْ ٻٜ اَللَّه سُٻِ کٛولِيمٛ؞
26 نٛنْ اِسْرَاعِيلَنْکٛعٜنْ فُو کِسِرْتَ؞ نٛنْ نٛ طُمْ وِنْدِرَا،
«کِسْنٛووٛ وَرَيْ دَغَ سِحِيٛونَ،
اٛ اِتَّيْ فُو شِيَ کُلٛلْ اَللَّه دَغَ ٻٜرْطٜ لٜݧٛلْ يَاکُبُ؞
27 کَنْجُمْ وٛنِ اَلْکَوَلْ نغَلْ نغَادَيْمِ اٜ مَٻّٜ
شَرٜلْ نغٜلْ نجَافَنْتٛومِٻٜ حَکّٜىٰجِ مَٻّٜ؞»
28 يَحُودَنْکٛعٜنْ نغَرْتِي وَݧْوَݧْٻٜ اَللَّه نغَمْ ٻٜ نغَݧِي حَبَرُ بٜلْطُمْ؞ طُعُمْ وَرْتِي ٻٜيْدَارِ مٛوطٛنْ؞ اَمَّا ٻٜ شُٻَاٻٜ اَللَّه، حَا جٛونِ اٜ مٛ يِطِٻٜ، نغَمْ اٛ وَطَنِي مَامَعٜنْ مَٻّٜ اَلْکَوَلْ؞
29 نغَمْ اَللَّه وَيْلِتَتَا ٻٜرْندٜ مُوطُمْ دٛوْ مٛ اٛ سُٻِ اٜ مٛ اٛ بَرْکِطِنِ؞
30 ندٜنّٛ اٛنٛنْ يِمْٻٜ نَاع يَحُودَنْکٛعٜنْ، اٛنْ نغَݧِينٛ اَللَّه، اَمَّا جٛونِ اٛ يُرْمِنَنِيعٛنْ نغَمْ يَحُودَنْکٛعٜنْ نغَݧِي نغَطَ کٛ اٛ وِعِ؞
31 نٛنْ مَا يَحُودَنْکٛعٜنْ ٻٜ نغَݧِي ٻٜ نغَطَ کٛ اَللَّه وِعِ، نغَمْ اٜ لَاوٛلْ يُرْمٜىٰندٜ ندٜ اَللَّه حٛلِّعٛنْ کَمْٻٜ مَا اٛ يُرْمِنَنَٻٜ؞
32 اَللَّه وَرْتِرِي فُو يِمْٻٜ بٛ شُرَاٻٜ نغَمْ ٻٜ نغَݧِي وَطُکِ کٛ اٛ وِعِ، اٛ وَطُ نٛنْ نغَمْ اٛ يُرْمِنَنَ کٛو مٛيٜ؞
مَنْتُکِ اَللَّه
33 غٛونغَ، يِدّٜ اَللَّه، اٜ فَامُ مَاکٛ، اٜ اَنْدَلْ مَاکٛ اٜ طُمْ لُغِّ؞ وَلَا بَاوَيْطٛ اَنْدَ کٛ اٛ سُٻِ وَطُکِ؞ کٛ اٛ وَطَتَ ٻُرِي سٜمْبٜ فَامُ نٜطّٛ؞
34 اَايَارٜ وِعِ،
«مٛيٜ مٜىٰطِ اَنْدُکِ کٛ وٛنِ ندٜرْ ٻٜرْندٜ جٛومِرَاوٛ؟
مٛيٜ مٜىٰطِ وَرْتُکِ کٛکَّيْطٛمٛ شَاوٛرِ؟
35 مٛيٜ مٜىٰطِ حٛکُّکِ اَللَّه غٛطُّمْ
طُمْ اٛ وَاتَنْتَمٛ؟»
36 نغَمْ کٛو طُمٜ کَنْکٛ تَغِطُمْ، تٛ مَاکٛ کٛو طُمٜ پِوِ، تٛ مَاکٛ طُمْ سٛعّٛتٛ؞ مَنْغُ تَبِّتَ تٛ اَللَّه حَا اَبَدَا؞ اَامِنْ؞