8
جٛنْدٜ ندٜرْ رُوحُ اَللَّه
1 نغَمْ نٛنْ، جٛونِ طُمْ تَپَنْتَا ٻٜنْ طٛنْ شُمْڤٛوتِرٛوٻٜ اٜ يٜىٰسُ اَلْمَسِيحُ کِيتَ حَلْکٜرٜ؞
2 نغَمْ دٛوکَ رُوحُ اَللَّه کٛکّٛوجُمْ يٛنْکِ ندٜرْ سُمْڤٛوتِرْکِ اٜ يٜىٰسُ رِمْطِنِييَمْ دَغَ بَوْطٜ حَکّٜ لَامٛتٛوطُمْعٜنْ ڤٛوطَنَيْطُمْعٜنْ حَلْکٜرٜ؞
3 کٛ اَتَّوْرَ وَاوَايِ وَطُکِ، نغَمْ نغِکُّ حَکّٜ طُمْ نٜطّٛ وٛودِ، اَللَّه وَطِيطُمْ؞ ندٜ اٛ لِلِ ٻِطّٛ مَاکٛ ندٜرْ نَنْدِ ٻَنْدُ مٜىٰطٜنْ ندُ حَکّٜ نغَمْ اٛ وَرْتَ شَکِّرِ نغَمْ حَکّٜ مٜىٰطٜنْ، اٛ سَنْکِتِي لَامُ حَکّٜ ندٜرْ ٻَنْدُ؞
4 اَللَّه وَطِي طُعُمْ نغَمْ مبَاوٜنْ وَطُکِ فُو کُوطٜ اَادِلَاکُ طٜ اَتَّوْرَ وِعِ طُمْ وَطَ، اٜنٜنْ تٛکّٛوٻٜ کٛ رُوحُ اَللَّه وِعِ، نَاع کٛ ٻَلِّ مٜىٰطٜنْ نغِطِ؞
5 يِمْٻٜ غَطٛوٻٜ کٛ ٻَلِّ مَٻّٜ نغِطِ، اٜ ٻٜ نجٛوَ ٻٜرْطٜ مَٻّٜ دٛوْ کٛ ٻَلِّ مَٻّٜ نغِطِ؞ اَمَّا يِمْٻٜ غَطٛوٻٜ کٛ رُوحُ اَللَّه وِعِ، اٜ ٻٜ نجٛوَ ٻٜرْطٜ مَٻّٜ دٛوْ کٛ رُوحُ اَللَّه يِطِ؞
6 يٛوُکِ ٻٜرْندٜ دٛوْ کٛ ٻَنْدُ يِطِ اٜ طُمْ فٛوطَ حَلْکٜرٜ، اَمَّا يٛوُکِ ٻٜرْندٜ دٛوْ کٛ رُوحُ اَللَّه يِطِ اٜ طُمْ وَدَّ يٛنْکِ اٜ جَمْ؞
7 نغَمْ يٛوُکِ ٻٜرْندٜ دٛوْ کٛ ٻَنْدُ يِطِ طُمْ وَݧُکِ اَللَّه، طُمْ تٛکَّتَا کٛ دٛوکَ اَللَّه وِعِ، طُمْ وَاوَتَا وَطُکِطُمْ؞
8 يِمْٻٜ غَطٛوٻٜ کٛ ٻَلِّ مَٻّٜ نغِطِ ٻٜ مبَاوَتَا وٜلْنَنْکِ اَللَّه ٻٜرْندٜ؞
9 اَمَّا اٛنٛنْ اٛنْ نغَطَتَا کٛ ٻَلِّ مٛوطٛنْ نغِطِ؞ اٛنْ نغَطَ کٛ رُوحُ اَللَّه وِعِ، تٛ نِ طُمْ غٛونغَ رُوحُ اَللَّه اٜ جٛوطِي ندٜرْ ٻٜرْطٜ مٛوطٛنْ؞ کٛو مٛيٜ تٛ وَلَا رُوحُ اَلْمَسِيحُ، نَاع اَلْمَسِيحُ جٜيِمٛ؞
10 اَمَّا تٛ اَلْمَسِيحُ اٜ جٛوطِي ندٜرْ ٻٜرْطٜ مٛوطٛنْ، کٛو ندٜ ٻَلِّ مٛوطٛنْ مَايَيْ نغَمْ حَکّٜ، فُو اٜ نٛنْ رُوحُ اَللَّه حٛکَّيْعٛنْ يٛنْکِ، نغَمْ اٛنْ نغَرْتِرَامَ اَادِلِعٜنْ؞
11 تٛ رُوحُ اَللَّه اُمِّنْطٛ يٜىٰسُ دَغَ مَيْدٜ اٜ جٛوطٛو ندٜرْ ٻٜرْطٜ مٛوطٛنْ، اٛنْ طٛنْ اُمِّنْطٛ اَلْمَسِيحُ دَغَ مَيْدٜ حٛکَّيْ ٻَلِّ مٛوطٛنْ مَايَيْطِ يٛنْکِ بَرْکَ رُوحُ مَاکٛ جٛوطِيطُمْ ندٜرْ ٻٜرْطٜ مٛوطٛنْ؞
12 نغَمْ نٛنْ بَنْدِرَاٻٜ اَمْ، اٜ وٛودِ غٛطُّمْ طُمْ نغَطٜتٜنْ دٛولٜ، اَمَّا کَنْجُمْ نَاع طُمْ تٛکُّکِ کٛ ٻَلِّ مٜىٰطٜنْ نغِطِ؞
13 نغَمْ تٛ اٛنْ نغَطَ جٛنْدٜ نٛ ٻَلِّ مٛوطٛنْ نغِطِرِ، اٛنْ مَايَيْ؞ اَمَّا بَرْکَ رُوحُ اَللَّه، تٛ اٛنْ مبَرِي کُوطٜ طٜ ٻَلِّ مٛوطٛنْ نغِطِ وَطُکِ، اٛنْ کٜٻَيْ يٛنْکِ کِ رٜعَتَا؞
14 نغَمْ فُو يِمْٻٜ ٻٜ رُوحُ اَللَّه تٛکِّنْتَ ٻٜ ٻِٻّٜ اَللَّه؞
15 نغَمْ اَللَّه حٛکَّايِعٛنْ رُوحُ غَرْتِرَيْطُمْعٛنْ مَشُّٻٜ حَا ڤُطِّتٛنْ نغَطٛنْ جٛنْدٜ ندٜرْ کُلٛلْ، اَمَّا اٛ حٛکُّعٛنْ رُوحُ غَرْتِرَيْطُمْعٛنْ ٻِٻّٜ مَاکٛ؞ بَرْکَ رُوحُ طُمْ اٜنْ مبَاوَيْ نٛدّٜنْ اَللَّه «اَبَّ! ݧَاکٛ مٜىٰطٜنْ!»
16 رُوحُ اَللَّه اٜ حٛورٜ مَاجُمْ حَوْتِ اٜ ٻٜرْطٜ مٜىٰطٜنْ تَبِّتِنْتَ اٜنٜنْ اٜنْ ٻِٻّٜ اَللَّه؞
17 جٛونِ ندٜ اٜنْ ٻِٻّٜ، اٜنْ نغَرْتِي دٛنٛوٻٜ؞ اٜنْ ندٛنَيْ فِي بٛطُّمْ طُمْ اَللَّه رٜسَنِ يِمْٻٜ مَاکٛ، کَدِنْ اٜنْ دٛنِدٛوٻٜ اٜ اَلْمَسِيحُ، تٛ نِ اٜنْ نجَرْدِي تٛرَّ اٜ مَاکٛ نغَمْ کٜٻٜنْ تٜدُّنغَلْ حَوْتِ اٜ مَاکٛ؞
تٜدِّنْکِ کِ طُمْ تٜدِّنْتَعٜنْ طٛعٛ يٜىٰسٛ
18 مِ تَبِّتِنِي تٛرَّ کَ نجَرٜتٜنْ جٛونِ کَ حٜوْتَايِ کَ حَوْتٜىٰ اٜ تٜدُّنغَلْ نغَلْ طُمْ تٜدِّنْتَعٜنْ طٛعٛ يٜىٰسٛ؞
19 فُو کٛ تَغَا اٜ حٜطِي اٜ حَاٻِ نغَمْ يِعَ اَللَّه وَنْغِنِي ٻِٻّٜ مُوطُمْ؞
20 نغَمْ کٛ تَغَا وَرْتِرَامَ مٜىٰرٜ، نَاع نغَمْ يِدّٜ مَاجُمْ، اَمَّا نٛنْ اَللَّه يِطِرِ طُمْ وَطٛرٛو؞ فُو اٜ نٛنْ اٜ وٛودِ کَمُّندٜ،
21 نغَمْ کٛ تَغَا اٜ حٛورٜ مَاجُمْ طُمْ دِمْطِنْتٜىٰطُمْ دَغَ مَشُّنغَاکُ ݧٛلُکِ، طُمْ حٜٻَ رِمْطِنٜىٰکِ اٜ تٜدِّنٜىٰکِ طُمْ يِمْٻٜ اَللَّه نجٜيِ؞
22 اٜنْ اَنْدِ حَا جٛونِ فُو کٛ تَغَا اٜ اٛتَّ نغَمْ نَوْطُمْ نٛ دٜبّٛ ڤِيدٛووٛ اٜ نَوْطُمْ دَݧْنغٛلْ اٛتِّرْتَ؞
23 اَمَّا نَاع کٛ تَغَا تَنْ اٛتَّتَ، حَا مَا اٜ اٜنٜنْ؞ اٜنٜنْ غٛودُٻٜ رُوحُ اَللَّه، دٛکَّلْ مَاکٛ اَرَنْدٜوَلْ ندٜرْ کٛ اٛ حٛکَّتَعٜنْ، اٜنْ اٛتَّ ندٜرْ ٻٜرْطٜ مٜىٰطٜنْ، اٜنْ کَاٻِي اَللَّه وَرْتِرَعٜنْ ٻِٻّٜ مَاکٛ، طٛنْمَا اٛ رِمْطِنَ ٻَلِّ مٜىٰطٜنْ؞
24 دَغَ شَرٜلْ کٛ طُمْ حِسْنِعٜنْ نغٛودُطٜنْ کَمُّندٜ ندٜعٜ؞ اَمَّا تٛ اٜنْ نغِعَ کٛ کَمِّيطٜنْ، نَاع طُمْ کَمُّندٜ وٛنْ طٛنْ؞ مٛيٜ وَطَتَ کَمُّندٜ دٛوْ کٛ يَادِ حٜٻِ؟
25 اَمَّا تٛ اٜنْ نغَطَ کَمُّندٜ دٛوْ غٛطُّمْ طُمْ اٜنْ نغِعَتَا، اٜنْ کٜطٛطُمْ ندٜرْ مُݧَلْ؞
26 نٛنْ مَا، رُوحُ اَللَّه اٜ وَلَّعٜنْ تٛ تَمْڤُطٜنْ؞ نغَمْ اٜنْ اَنْدَا نٛ حَانِ نغَطِرٜنْ دٛعَارٜ، اَمَّا رُوحُ اَللَّه اٜ حٛورٜ مَاجُمْ اٜ تٛرٛو اَللَّه نغَمْ مٜىٰطٜنْ شَرٜلْ نغٜلْ ندُلُّطٜنْ کٛ مبِعٜتٜنْ اٜنْ اٛتَّ؞
27 ندٜنْ اَللَّه اَنْدُطٛ کٛ وٛنِ ندٜرْ ٻٜرْطٜ مٜىٰطٜنْ، اٜ مٛ اَنْدِ کٛ رُوحُ يِطِ، نغَمْ رُوحُ اٜ تٛرٛو اَللَّه نغَمْ يِمْٻٜ مَاکٛ نٛنْ نٛ اٛ يِطِرِ؞
28 اٜنْ اَنْدِ ندٜرْ کٛو طُمٜ اَللَّه اٜ حُوَ نغَمْ ٻٜيْدَارِ يِمْٻٜ غِطْٻٜمٛ، ٻٜ اٛ سُٻِ نٛنْ نٛ اٛ يِطِرِ؞
29 اَللَّه اٜ اَندِٻٜ دَغَ اَرَنْدٜ اٛ سُٻِيٻٜ کٛ دُونِيَارُ تَغٜىٰ نغَمْ ٻٜ نغَرْتَ بٛ ٻِطّٛ مَاکٛ، نغَمْ ٻِطّٛ اٛنْ وَرْتَ اَفٛ ندٜرْ بَنْدِرَاٻٜ طُطْٻٜ؞
30 ٻٜنْ طٛنْ ٻٜ اٛ سُٻِ، اٛ نٛدِّيٻٜ، اٛ وَرْتِرِيٻٜ اَادِلِعٜنْ، اٛ نَتِّنِيٻٜ تٜدُّنغَلْ مَاکٛ؞
يِدّٜ اَللَّه
31 طُمٜ مبِعٜتٜنْ دٛوْ فِي طُعُمْ؟ تٛ اَللَّه اٜ وٛنْدِ اٜ مٜىٰطٜنْ، مٛيٜ وَاوَتَ حٜٻَ جَالٛرْغَلْ دٛوْ مٜىٰطٜنْ؟
32 اَللَّه حَطَايِ ٻِطّٛ مُوطُمْ يَرْکِ تٛرَّ، اَمَّا اٛ حٛکِّيمٛ نغَمْ اٛ سَکّٜىٰ نغَمْ مٜىٰطٜنْ اٜنْ فُو؞ ندٜ اٛ وَطِي نٛنْ، اٛ حٛکَّتَاعٜنْ کٛو طُمٜ شَاحُ؟
33 مٛيٜ وَاوَتَ وُلَّاکِ يِمْٻٜ ٻٜ اَللَّه سُٻِ؟ طُمْ اَللَّه اٜ حٛورٜ مُوطُمْ وَرْتِرِٻٜ اَادِلِعٜنْ؞
34 مٛيٜ وَاوَتَ تَپَنْکِٻٜ کِيتَ؟ وَلَا! يٜىٰسُ اَلْمَسِيحُ مَايِي، کٛ ٻُرِ وٛنِ اٛ اُمِّنَامَ دَغَ مَيْدٜ، اٜ مٛ تٛنْ جٛوطِي تٛ جُنْغٛ ݧَامٛ نغٛ اَللَّه، کَدِنْ اٜ مٛ تٛرٛو اَللَّه نغَمْ مٜىٰطٜنْ؞
35 طُمٜ وَاوَتَ سٜنْدَعٜنْ اٜ يِدّٜ ندٜ اَلْمَسِيحُ يِطِعٜنْ؟ طُمْ تٛرَّ کَلُّکَ، کٛو بٛنٜ، کٛو حَلّٜىٰندٜ يِمْٻٜ، کٛو وٜىٰلٛ، کٛو شِيَ کٛلْتٜ، کٛو نغَݧَاندِ يِمْٻٜ، کٛو مَيْدٜ؟
36 نٛنْ نٛ طُمْ وِنْدِرَا،
«نغَمْ مَاطَ کٛو ندٜيٜ ݧَلْندٜ اٜ طُمْ طَٻِّتَ وَرْکِمِنْ؛
طُمْ حٛشِّيمِنْ بٛ بَالِ طِ طُمْ حِرْسَتَ؞»
37 نَاع نٛنْ، ندٜرْ فُو فِي طُعُمْ اٜنْ کٜٻِي جَالٛرْغَلْ بَرْکَ اَلْمَسِيحُ غِطّٛعٜنْ؞
38 نغَمْ مِ تَبِّتِنِي وَلَا کٛ وَاوَتَ حَطَ اَلْمَسِيحُ يِطُکِعٜنْ، کٛو مَيْدٜ، کٛو يٛنْکِ، کٛو مَلَاعِکَعٜنْ، کٛو کٛ لَامٛتٛو دٛوْ، کٛو جَامَنُ طُعُمْ، کٛو جَامَنُ غَرَيْطُمْ، کٛو بَوْطٜ،
39 کٛو کٛ وٛنِ اٜ دٛوْ، کٛو کٛ وٛنِ اٜ لٜيْ، وَلَا غٛطُّمْ ندٜرْ فُو کٛ تَغَا بَاوَيْطُمْ حَطَ اَللَّه يِطُکِعٜنْ يِدّٜ ندٜ اٛ حٛلَّتَعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞