11
شٜيْدُعٜنْ اَللَّه طِطٛ
1 ندٜنْ طُمْ حٛکِّيَمْ غٛطُّمْ ڤٛوندِرْطُمْ نَنْدُطُمْ اٜ سَوْرُ، طُمْ وِعِيَمْ، «اُمَّ نجَحَا ڤٛوندَا وُرٛ شٜنِينغٛ اٜ تٛ طُمْ حٛکَّتَ اَللَّه شَاحُ، ندٜنْ لِمَا مَوْنِنٛوٻٜ اَللَّه ندٜرْ مَغّٛ؞
2 اَمَّا تَاع فٛوندُ نجَيْرِ يَاسِ وُرٛ نغٛنْ، اَلُندِ، نغَمْ طُمْ حٛکِّيندِ لٜپِّ دُونِيَارُ، ٻٜ لَامٛو غَرِيرِ شٜنِيندِ اٜ سٜمْبٜ حَا لٜبِّ 42؞
3 ندٜنْ مِ حٛکَّيْ شٜيْدُعٜنْ اَمْ طِطٛ لَامُ ٻٜ نغَعَجِنَ وٛلْدٜ اَمْ حَا بَلْطٜ 1,260، اٜ ٻٜ ٻٛرْنِي کٛلْتٜ کٛلَّيْطٜ وَنَّارٜ؞»
4 ٻٜنْ طٛنْ شٜيْدُعٜنْ طِطٛ کَمْٻٜ نغٛنِ لٜطّٜ جَيْتُنْ طِطِ اٜ فِتِلَاجِ طِطِ دَرِيطِ يٜىٰسٛ جٛومُ دُونِيَارُ فُو؞
5 فُو غِطّٛ حَلَّنَٻٜ، سٜيْ حِيتٜ وُرْتٛيٛو دَغَ ندٜرْ کٛنْدُطٜ مَٻّٜ حَلْکَمٛ؞ نٛنْ طُمْ وَرِرْتَ کٛو مٛيٜ غِطّٛ حَلَّنْکِٻٜ؞
6 اٜ ٻٜ نغٛودِ لَامُ حَطُکِ ندِيَمْ تٛٻَ ندٜرْ بَلْطٜ طٜ ٻٜ نغَعَجِنْتَ وٛلْدٜ جٛومِرَاوٛ؞ ندٜنْ اٜ ٻٜ نغٛودِ لَامُ ٻٜ نغَرْتِرَ ندِيَمْ پِيپَمْ؞ طٛنْمَا اٜ ٻٜ نغٛودِ لَامُ جِڤِّنَنْکِ دُونِيَارُ کٛو اِرِ طُمٜ بٛنٜ کَلُّطُمْ طُمْ ٻٜ نغِطِ؞
7 غَطَ ٻٜ کٜىٰݧِي وَعَجِنْکِ مَٻّٜ سٜيْ وٛنْدِ مَرْدِ کَلُّندِ بُرْتٛيْتٛوندِ ندٜرْ نغَيْکَ لُغُّکَ کَنْ حٛنَٻٜ؞ ندِ حٜٻَ جَالٛرْغَلْ دٛوْ مَٻّٜ ندِ وَرَٻٜ؞
8 طُمْ اَلَيْ ٻَلِّ مَٻّٜ شَکَ لُومٛ غَرِيرِ مَوْندِ؞ اٜ طُمْ نٛدِّرَ غَرِيرِ ندِنْ «سٛدٛمْ» کٛو «مَسَرْ» نغَمْ نغِکُّ جٛوطِيٻٜ ندٜرْ مَيْرِ؞ ندٜرْ مَيْرِ طُمْ ڤِيَنِ جٛومِرَاوٛ مَٻّٜ کُوسَاجٜ دٛوْ غَافَانغَلْ؞
9 يِمْٻٜ دَغَ کٛو ندِيٜ لٜيْدِ، اٜ لٜݧِ، اٜ طٜمْطٜ ٻٜ ندَارَيْ ٻَلِّ طِنْ حَا بَلْطٜ تَتِ اٜ سٜنْدٜرٜ ٻٜ کَطَ طُمْ اُوٛيَطِ؞
10 يِمْٻٜ دُونِيَارُ فُو نَنَيْ بٜلْطُمْ ٻٜ نغَطَ حُمْتٛ ٻٜ کٛکِّندِرَ دٛکّٜ نغَمْ اَنَّبٛعٜنْ طِطٛ ٻٜنْ مبَرَامَ؞ ٻٜ نغَطَيْ نٛنْ نغَمْ اَنَّبٛعٜنْ ٻٜنْ ڤٛوطَنِينٛ دُونِيَارُ فُو تٛرَّ کَلُّکَ؞
11 اَمَّا غَطَ بَلْطٜ تَتِ اٜ سٜنْدٜرٜ، سٜيْ فٛوفَانغٛ يٛنْکِ وَرٛيِ دَغَ تٛ اَللَّه نَتِّٻٜ؞ ٻٜ اُمِّي ٻٜ ندَرِي، کُلٛلْ مَنْغٛلْ نَنْغِ کٛو مٛيٜ غِيطٛٻٜ؞
12 سٜيْ اَنَّبٛعٜنْ طِطٛ ٻٜنْ نَنِ وٛنْدٜ حٛنٛنْدٜ شٜمْبِنْدٜ دَغَ دٛوْ اٜ وِعَٻٜ، «پٜنْتٛيٜىٰ طٛعٛ!» سٜيْ ٻٜ کٛشَّا يَاکِ دٛوْ ندٜرْ ندُولَ، وَݧْوَݧْٻٜ مَٻّٜ اٜ ندَارَ؞
13 طٛنْ اٜ طٛنْ طُمْ وَطِ وٛنْغٛلْ دِمْبٛلْ لٜيْدِ کَلُّنغٛلْ، سٜيْ سٜنْدٜرٜ غٛعٛ ندٜرْ شٜنْدٜ سَڤّٛ طٜ غَرِيرِ ندِنْ يَنِ، طُمْ وَرِ يِمْٻٜ 7,000؞ کُلٛلْ مَنْغٛلْ نَنْغِ يِمْٻٜ کٛرِيٻٜ، ٻٜ مَوْنِنِ اَللَّه مٛ دٛوْ؞
14 حَلْکٜرٜ طِطَوْرٜ پَٻَّکٜ؞ حَلْکٜرٜ تَتَوْرٜ اٜ وَرَ نَاع کٛ نٜىٰٻِ؞
لُوَلْ جٛوٜىٰطِطَٻَلْ
15 سٜيْ مَلَاعِکَاجٛ جٛوٜىٰطِطَٻٛ دُودِ لُوَلْ مُوطُمْ، سٜيْ طُمْ نَنِ حٛنٛنْطٜ شٜمْبِطّٜ دَغَ دٛوْ اٜ مبِعَ، «لَامُ دُونِيَارُ فُو وَرْتِي طُمْ جٛومِرَاوٛ مٜىٰطٜنْ اٜ اَلْمَسِيحُ مَاکٛ؞ اٛ لَامٛتٛ حَا اَبَدَا اَبَدِنْ!»
16 سٜيْ مَوْٻٜ ٻٜنْ طٛنْ 42 جٛوطِيٻٜ دٛوْ جٛوطٛرْلٜ لَامُ مَٻّٜ يٜىٰسٛ اَللَّه ٻٜ نجَنِ يٜىٰسٛ مَاکٛ ٻٜ مَوْنِنِمٛ؞
17 اٜ ٻٜ مبِعَ،
«يَا اَللَّه جٛومِرَاوٛ جٛومُ بَوْطٜ، اَنْ وٛنِ جٛونِ، اَنْ وٛنِ ندٜنّٛ!
مِنْ نغٜتِّيمَ نغَمْ اَ حُوتِرِي بَوْطٜ مَاطَ اَ فُطِّي لَامَاکِ؞
18 يِمْٻٜ ٻٜ اَنْدَامَ ٻٜرْنِي،
اَمَّا شَرٜلْ مٛنّٜرٜ مَاطَ وَرِي؞
شَرٜلْ وَرِي نغٜلْ طُمْ وَطَنْتَ مَيْٻٜ کِيتَ،
ندٜنْ طُمْ وَاتَنَ مَشُّٻٜ مَاطَ اَنَّبٛعٜنْ کٛ ٻٜ نغَطِ،
اٜ يِمْٻٜ کُلٛوٻٜ اِنْدٜ مَاطَ
مَوْطٛ اٜ ڤَمَرٛ،
ندٜنْ طُمْ حَلْکَ بَرٛوٻٜ يِمْٻٜ؞»
19 سٜيْ طُمْ مَٻِّتِ وُرٛ شٜنِينغٛ تٛنْ دٛوْ، طُمْ يِعِ اَکوَاتِيَ اَلْکَوَلْ مَاکٛ ندٜرْ مَغّٛ؞ سٜيْ طُمْ نَنْغِ وَطُکِ مَپّٜ اٜ ڤَلْمَالِ اٜ رِغَّاکِ اٜ دِمْبٛلْ لٜيْدِ اٜ مَلٜمَلّٜحٛ مَوْکٛ‑مَوْکٛ؞