2
اٜکِّتِنْکِ دٛوْ دٛعَارٜ
1 نغَمْ نٛنْ، اَرَنْدٜ اٜ مِ وِعَ طُمْ وَطَ کَ تٛرَاکِ اَللَّه، طُمْ وَطَ دٛعَارٜ، طُمْ تٛرٛومٛ، طُمْ يٜتَّمٛ نغَمْ کٛو مٛيٜ؞
2 طُمْ وَطَنَ لَامِيٻٜ دٛعَارٜ، اٜ کٛو مٛيٜ اَرْدِيطٛ نغَمْ نجٛوطٛوطٜنْ جَمْ حَکِّيلٛ مٜىٰطٜنْ اٜ فُکِّي، اٜنْ مَوْنِنَ اَللَّه، اٜنْ نغَطَ کٛ اٛ وِعِ؞
3 نٛنْ اٜ وٛوطِ؞ اَللَّه کِسْنٛووٛ مٜىٰطٜنْ اٜ نَنَ بٜلْطُمْ مَاجُمْ،
4 نغَمْ اٜ مٛ يِطِ کٛو مٛيٜ اَنْدَ غٛونغَ حِسَ؞
5 نغَمْ اَللَّه اٛ غٛعٛتٛ، ندٜنْ شِرْيٛوتِرْطٛ حَکُّندٜ اَللَّه اٜ يِمْٻٜ اٛ غٛعٛتٛ؞ کَنْکٛ وٛنِ يٜىٰسُ اَلْمَسِيحُ،
6 کٛکُّطٛ حٛورٜ مَاکٛ نغَمْ اٛ رِمْطِنَ يِمْٻٜ؞ کَنْجُمْ وٛنِ شٜيْدَ طُمْ اُمْ حٛکِّ ندٜ شَرٜلْ وَطِ؞
7 نغَمْ مَاجُمْ طُمْ سُٻِييَمْ مِ وَرْتَ غَعَجِنٛووٛ اٜ لِلَاطٛ اٜ اٜکِّتِنٛووٛ يِمْٻٜ نَاع يَحُودَنْکٛعٜنْ دٛوْ حٛولَاکِ غٛونغَحِ؞ غٛونغَ مبِعَيْمِ، نَاع مِ فٜوَيْ!
8 نغَمْ نٛنْ اٜ مِ يِطِ تٛ تٛکُّٻٜ يٜىٰسُ کَوْرِتِ فُو، وٛرْٻٜ نغَطَ دٛعَارٜ اٜ ٻٜ پٜفْتَ جُوطٜ شٜنِيطٜ نَاع ندٜرْ مٛنّٜرٜ کٛو غٜدِّ؞
9 نٛنْ مَا، اٜ مِ يِطِ رٜوْٻٜ ٻٛرْنٛو کٛلْتٜ نٛ حَانِ نغَمْ سٜمْتٜىٰندٜ اٜ فَامَنْکِ حٛورٜ؞ مِ يِطَا ٻٜ ٻٛرْنٛو کٛلْتٜ طٜ شٜىٰدٜ اٜ مٛعِّتِنَاکِ کٛشَّيْکِ حَکِّيلٛ يِمْٻٜ بٛ مٛعِّنْکِ غَاسَ، کٛو وَطُکِ شٛدِّ، کٛو جِينَارِ،
10 سٜيْ نِ ٻٜ کُوَ کُوطٜ بٛطّٜ نٛ رٜوْٻٜ کُلٛوٻٜ اَللَّه حَانِ نغَطَ؞
11 رٜوْٻٜ اٜکِّتٛو اٜکِّتِنٛلْ ندٜرْ دٜعُّتُکِ اٜ لٜسْنُکِ حٛورٜ؞
12 مِ جَٻَايِ غٛطّٛ دٜبّٛ اٜکِّتِنَ غٛرْکٛ کٛو لَامٛو دٛوْ مَاکٛ؛ دٛولٜ ٻٜ ندٜعِّتَ؞
13 نغَمْ اَادَمُ اَللَّه اَرْتِ تَغُکِ، ندٜنْ حَوَّاعُ؞
14 ندٜنْ نَاع اَادَمُ طُمْ پٛيْرِ، طُمْ دٜبّٛ اٛنْ طُمْ پٛيْرِ، اٛ يٜوِ دٛوکَ اَللَّه؞
15 فُو اٜ نٛنْ، رٜوْٻٜ ندٜرْ دَݧْنغٛلْ ٻِٻّٜ ٻٜ کِسَيْ تٛ ٻٜ نغَطِي کَ حٛولَاکِ يٜىٰسُ اٜ ٻٜ کٛلَّ يِدّٜ اٜ ٻٜ نغَطَ جٛنْدٜ لَمْندٜ اٜ سٜمْتٜىٰندٜ؞