2
Up aŋgɨrena ramtaɨra Polmo ndorita laplacauna kirar naaŋgɨrina
1 Aku an ndeaca iarira 14na mɨn maiatke, iŋmbaia aukapa Banambasap, aŋga Ierusalem mac nda gacatke, aku Taitusap aŋgɨrca ma toco aŋgap mataŋgat.
2 Raraŋ Aetaniaca ndo aukmo wandaca ainda moca aku taŋgatna. Aku taŋga Ierusalem ndeacatke, aku mina ramtaɨr paŋaind tocna ramtaɨr tiŋgiknanap mbopatna. Na aku minmo an kam wembaŋ laŋmo, Iudana meikramtaɨr wanaiŋmo, aku minmo ndo memetmbaca wiwitirena kam, an reikta nininina kam ndopacarica. Aku gaind ndamŋiatna. Ŋarikca, gan aiŋa, aku ŋgaua morina aiŋirapa, mandeacna aiŋirta kirarir, mana gagamma mba laruitndai.
3 Na anna gidik, Taitus ma Girikna ramoot ian, ma aukap eacatke, mina mba aimo mana tikiŋit katac nake mba mbopatke.
4 An kam laruatna mɨnɨŋa gaind. Paparuna laiplacar ndeida, mina aina tumbunmo iŋgoroca kɨpca mbukca watri, Iesus Karaisa aimo aina makukara moa kecariatke, mina aina eteac laŋ ainan mbatca toŋgorina. Ainda moca an ramtaɨr mina aimo Tɨp Wandɨkna kaŋgaukna tuombta aiŋir kamndera mac mona ndopri.
5 Na aia aindopatna, aia an paparuna ramtaɨrta toŋtoŋgarta reikta kaŋgauk ndeteaca, aia karica. Aia toŋgorinanna kam wembaŋ laŋa gidikca kai ŋgetriki teac. Ne memetmbaca an kam gidik niŋgikca nenap eacraŋ.
6 Aukna landamŋia, aku gaind ndamŋirina. Ramtaɨr ndeida, mina irembta ramtaɨr paŋaind tocna ramtaɨr, anna reac tekernoc. Raraŋ Aetaniac, ma mba irembta ramtaɨr tiŋgikta mba lamŋirenanna. Mina aukna morina reikta kambta nininia mina aukmo mba mac nda ipuŋga kam ianna mba mbopatke. Wanaiŋ ŋgoin!
7 Ainda moca mina watatke, Raraŋ Aetaniac, ma aukmo ndona aiŋa mona moca, aukmo an aiŋmo Iudana meikramtaɨr wanaiŋmo kam wembaŋ laŋnan wiwitina moca. Anna kirar, ma ndo Pitamo an kam wembaŋ laŋmo, Iudananda wiwitia mbopatna aiŋna kirar ŋgoin.
8 Anna gidik, Raraŋ Aetaniaca Pitamo, Iesusna up aŋgɨrena ramootmo aiŋ neaŋga ma Iudananta kɨdrɨkca tɨki mona gargar neaŋgatna. An aiŋna kirara Raraŋ Aetaniaca ndo auk motocmo, up aŋgɨrena aiŋ neaŋga aukmo Iudana meikramtaɨr wanaiŋna kɨdrɨkca tɨki mona an aiŋna gargarap neaŋgatke.
9 Na Iemisapa, Pitaapa, Ionap, minmo meikramtaɨra Iesusna rɨtɨpaikta meikramtaɨrta tumbunna ramtaɨr paŋaindta kirar toc watrenan. Na an mɨnna, an ramtaɨra lamŋia garacatna, Raraŋ Aetaniaca ndo aukmo, kakadmaina opotac laŋna aiŋ an neaŋga, ainda moca mina Banambas aŋmo, aŋna parniŋ ŋgutiŋga, mina aŋmo aŋgɨra ndorita laiplacarta kirar ŋgoinna wandacatna. Ainda moca aia muruŋa iro kabe aŋgɨca, aia kam leaca gaindopatna. Aŋga Iudana meikramtaɨr wanaiŋna kɨdrɨk ŋgirikca anna tɨkca, aiŋa mo te, mina ndori Iudananta kɨdrɨk ŋgirikca anna tɨkca aiŋa monandet.
10 Mina aŋmo, gan kam niŋgik ndopatna. Mina toŋgorinanna, aŋga mina Ierusalemna reik kocorta meikramtaɨrmo, aŋga mina rɨk ŋgirikca min ŋgotacna. Mina aindopatke. Aku ndomo, an aiŋa ndomo memetmbaca toŋgo moca taŋraŋna morena.
Pola Pitana katta moatna tɨp kirara an ndopca laruatna
11 Pita ma ndo, tɨp laŋa mo ŋgocor. Tik, an mɨn mbuŋa ma auŋ Antiok nakɨpatke, aku manmo mana inpaŋan ŋgoin mbatca, manmo kaeg mamoat.
12 Ri, Iudana ramtaɨr ndeida Iemisap eacrenanna, kɨp laru ŋgocor ndeacri. Na Pita ma Iudana meikramtaɨr wanaiŋap, amba taŋrina. Ri, Iudana tik katacrena tɨp kirara raŋgairena laiplacar ndeida kɨpca laruatke, Pita, min mbatca ma rugut mocarica. Ainda moca Pita, ma Iudana meikramtaɨr wanaiŋnanmo kɨpi mɨk ŋgocor. Ma minmo iukaia mon tawan maeacat.
13 Karica Iudana laiplacar ndeida Antiok auŋ ndeacrenan toco manap ainda morinan, mina paparuna an tɨp kirar mbuŋa anna moatke. Iŋmbaia mina paparuna tɨp kirara, Banambasna iro motocmo moa ŋgetrikica, ma mina raŋgaiatna.
14 Iŋmbaia aku wattatnanna, mina mba kam wembaŋ laŋ gidikca mba ŋaŋaria raŋgaiatke. Ainda moca aku Pitamo meikramtaɨr wɨtta lamnik ŋgoutta tɨkca gaindopatna, “Pita, u Iudananta ramoot ian. Una raŋgaiatna tɨp kirara, u Iudana meikramtaɨr wanaiŋ morena tɨpna kirar. U Iudananta ramootna kirara wanaiŋ. Aintik kaina moca, u Iudana wanaiŋna rɨpacrena laiplacarmo gagraca mina Iudana tɨp kirara raŋgaina moca.”
Mandaibinna Iesus Karaisa rɨpacrenan min tiŋgikca Raraŋ Aetaniacna lamnɨacmo wandoŋ ndeacrena
(2.15—4.31)
Meacramoota Iesusa rɨpac te, ma meacramoot wandoŋ ndarunande
15 Karica aku gaind mac mbopatna, “Pita, anna gidik. Aŋga Iudanan. Iudana meaca ndo aŋmo mɨratnan. Aŋga mba Iudana meikramtaɨr wanaiŋna, tɨp ŋgoreacna makukca morena meikramtaɨra wanaiŋ.
16 Aŋga malamŋireke, Raraŋ Aetaniaca ma mba gainda mba lamŋirenanna, ramootta Tɨp Wandɨkca raŋgai te, ma manmo, anna moca manmo ramoot wandoŋ laŋ ŋgacna mɨnna wanaiŋ ŋgoin! Ramootta Iesus Karaisa rɨpaca utiŋ te, anmo Raraŋ Aetaniaca manmo ramoot wandoŋ laŋ ŋgacraŋnande. Ainda moca aŋ toca rɨpacrena. Ramoot ianna Iesus Karaismo rɨpaca utiŋ te, an taup niŋgikca ndo Raraŋ Aetaniaca anmo ramoot wandoŋ laŋ ŋgacnande. Tɨp Wandɨkca raŋtaŋgaina tɨp kirara wanaiŋ. Aintik an taupca ramoot ianna ainda ŋaŋari raŋgaica Raraŋ Aetaniac manmo ramoot wandoŋ laŋa mba acatke. Wanaiŋ.
17 Aia Iesus Karaisna rɨtɨpacmo utiŋ te, anna ndo aimo Raraŋ Aetaniacna lamnɨac ŋgoutmo ramoot wandoŋ laŋ ndarunande. Na aia Iudanan, aia ndorimo mac nda wat te, aia gaind mbatnande. Ai toco, aia tɨpemb ŋgorikta makukarta aiŋa morena meikramtaɨr ndeacrena. Ainda mo te, aia gaindopna mɨn, ‘Karais, ma ndo tɨp ŋgoreacna makukna tɨpna kirara mo gagarana moca more ki, a?’ Ainda wanaiŋ! Aia ainda kai mbop teac.
18 Ŋarikca, aku ndomo Tɨp Wandɨkna kaŋgauk ndeacrenan, an kecarica eacici, iŋmbaia aku an tɨp kirar mac nda mo te, aku ndomo mawandacri, aku meikramtaɨrmo ndomo waekeke ŋgoinna wandacrina, aku Tɨp Wandɨkca mba raŋgairena ramoot.
19 Tɨp Wandɨkca ma aukmo memenacna taupca tɨkca eacrena, mana wapatta, aku menaca eacrena ramootna kirar toc. Na gan taup mbuŋ tik, aku Karaisap ik nakeraca manap mamenacri. Aku mandeaca Raraŋ Aetaniacnan. Aukna eteacna wat, anna manan. Ainda moca aku menaca, mandeaca aku eteacna wat ŋgam maaŋgɨri.
20 Na an eteacna wat, anna aukna eteacna watta wanaiŋ. Anna Karaisna eteacna wat mananna ndo aukap eacreke. Mandeaca aku an tɨpemb kirarirapa, an aiŋira gan tiacarpaikca tɨkca morena aiŋirta gargara, aku Raraŋ Aetaniacna Nuocna rɨtɨpacna tɨp kirar mbuŋa morena aiŋir. Ma aukna moca mamatŋi ŋgoin. Ainda moca ma auk ŋgotacna moca ndona eteacna watnan kecariatna.
21 Ainda moca aku Raraŋ Aetaniacna kakadmaina opotacmo reac ŋgoreac toca kai mo kecari teac. Na Tɨp Wandɨkca ma aimo aŋgɨri wandoŋaica aia Raraŋ Aetaniacna lamnɨac ŋgoutmo, wandoŋ ŋgoin ndacari te, anna gidik ecte, Karaisna memenaca, ma reac wanaiŋ toc ndacarinande.”