ପ୍ରେରିତ ଶିଷ୍ୟମାନଙ୍କ କାର୍ଯ୍ୟର ବିବରଣୀ
ପ୍ରେରିତ୍ ସିସ୍ଇଂନେ ପର୍ଚାର୍ ଡିଂକ୍ନେ ସାମୁଆଁଇଂ
ପ୍ରେରିତ୍ ବଇ ବିସୟ୍ରେ ଉଡ଼ିକ୍ଲିଗ୍ ସାମୁଆଁ
ପ୍ରେରିତ୍ ସାସ୍ତର୍ ଡିଂଡିଙ୍ଗ୍କେ ମଣ୍ଡଲିନେ ଆରାମ୍ ବାରି ଡିରକମ୍ ଆକେନ୍ ଯିରୁସାଲାମ୍ ବାନ୍ ଜିଉଦା ସମରିଆ ବାରି ବାଏରେ ଡିରକମ୍ ଉଡ୍ରାଡିଙ୍ଗ୍କେ । ଆକେନ୍ ଜିସୁନେ ସର୍ଗେ ୱେନେ ସେନୁଗ୍ ମେଁ ସିସ୍ଇଂକେ ବାସଙ୍ଗ୍ବଗେ । ୧:୮ ପ୍ରେରିତ୍ ସାସ୍ତର୍ ଲୁକ୍ବାନ୍ ଗ୍ନୁଆର୍ଲେଃକେ ଜାଣ୍ଡେ କି ଲୁକ୍ନେ ଗ୍ନୁଆର୍ ମାପ୍ରୁ ସାମୁଆଁ ଡିଗ୍ ଗୁଆର୍ବଗେ । ମେଁ ମୁଇଂ ଗଦାର୍ ଲେଃଗେ ବାରି ନିର୍ବୁଲ୍ ବାବ୍ରେ ଗୁଆର୍ନେ ପର୍ତୁମ୍ ଲେଃଗେ । ମେଁ ମ୍ବାକିଲିଗ୍ ମାପ୍ରୁନେ ସାମୁଆଁ ଆରି ପ୍ରେରିତ୍ ସାସ୍ତର୍ନ୍ନିଆ ଥିଅପିଲକେ ଗ୍ନୁଆର୍ବାନ୍ ଆତର୍ସାବଗେ ମେଁ ମୁଇଂ ଗ୍ରୀକ୍ ଲେଃଗେ । ସାସ୍ତର୍ ଆଣ୍ଡେଙ୍ଗ୍ ମ୍ୱାୟା ଗ୍ରୀକ୍ ଆରି ଜିଉଦା ବଂସ ନ୍ସା ଲେଃଗେ ୧:୧ ।
ଡିଙ୍ଗ୍ୟାଏ ତ ପ୍ରେରିତ୍ ସାସ୍ତର୍ ଜିସୁ କିସ୍ଟନେ ଜନମ୍ ଡିଙ୍ଗ୍କ୍ନେ ଇଡ଼ିଙ୍ଗ୍ ୬୦ ରୁ ୬୪ କିସ୍ଟାବ୍ଦ ବିତ୍ରେ ଗ୍ନୁଆର୍ ବଗେ । ମେଁ ଡାଗ୍ଲା ପାଉଲ୍ ବନ୍ଦିବାନ୍ ତାର୍ନେ ସିସେବାନ୍ ଏନ୍ ଉଲିଆ ଗୁଆର୍ ଡା ଲେଃଗେ । ଲୁକ୍ ଡିଗ୍ ପ୍ରେରିତ୍ ପାଉଲ୍ ଏତେ ଅଲେଙ୍ଗ୍ ଡିଙ୍ଗ୍ଗେ ବାରି ଆକେନ୍ ସାସ୍ତର୍କେ ଆନ୍ତଖିଆବାନ୍ ଗୁଆର୍ ଆଣ୍ଡେଙ୍ଗ୍ ବ ଡାଗ୍ଚେ ବାସଙ୍ଗ୍ଆର୍ଏ । ପ୍ରେରିତ୍ ସାସ୍ତର୍ ଲୁକ୍ ମାପ୍ରୁ ସାମୁଆନେ ନେଃଗାନେ ଡିଙ୍ଗ୍ଏ ଆକେନ୍ ଜିସୁନେ ସର୍ଗେ ୱେନେ ବାନ୍ ଆରାମ୍ ଡିଙ୍ଗ୍ଡିଙ୍ଗ୍କେ । ଲୁକ୍ ଗୁଆର୍କ୍ନେ ମାପ୍ରୁ ସାମୁଆଁ ବାରି ପ୍ରେରିତ୍ ସାସ୍ତର୍ ଗ୍ନୁଆର୍ନେ ଉଦେସ୍ ସମାନ୍ ଲେଃକେ । ମେଁ ଥିଅପିଲ୍କେ ଆରି ବୁଦି ବାଲେଃକ୍ନେ କିସ୍ଟାନ୍ଇଂକେ ଡିଡିଲାଡିଗ୍ ବାନେ ଚାଏଁଡିଙ୍ଗ୍କେ । ଆମେଇଂକେ ସିକ୍ୟା ବିବିଃନେ ବିସୟ୍ ଜିସୁ କିସ୍ଟନେ ଜିବନ୍ ସାମୁଆଁରେ ବାରି ଉଡ୍ରା ଆଡିଙ୍ଗ୍ମ୍ୟାଃକ୍ନେ କିସ୍ଟାନ୍ଇଂନେ ବିସୟ୍ରେ ବୁଲ୍ଣ୍ଡୁନେ ଇସାବ୍ ବଆର୍ଏ । ପ୍ରେରିତ୍ ସାସ୍ତର୍ନ୍ନିଆ ଅଃସେ ମାପ୍ରୁନେ କୁଦାଇଂ କିସ୍ଟଡାଗ୍ରା ବିସ୍ବାସ୍ ବୁବନେ ନେଁ ନ୍ସା ଉଦାଅରନ୍ ସୁଗୁଆ ଆଦ୍ରିଗ୍ ଡିଙ୍ଗ୍କେ । ପ୍ରେରିତ୍ଇଂନେ ଉଦାଅରନ୍ବାନ୍ ଆନେ ଆଃମ୍ୟାଃଏ ଜେ ଡିଡିରକମ୍ ପବିତ୍ର ଆତ୍ମାକେ ମାବ୍ଟଚେ ବିନ୍ରେଇଂ ଆଡ଼ାତ୍ରା ମାପ୍ରୁନେ ବ୍ନାଲିର୍ ବାସଙ୍ଗ୍ଡିଂଆର୍କେ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ପବିତ୍ର ଆତ୍ମା ଜିଜାର୍ନେ ବାରି ବିସ୍ବାସିଇଂନେ ମ୍ନାଃନେ । ୧:୧; ୮:୧
୨. ବିସ୍ବାସିଇଂ ନିନ୍ଦା ବାନେ ବାରି ମାପ୍ରୁନେ ସାମୁଆଁ ଉଡ୍ରାଡିଂକେ । ୮:୨; ୧୨:୨୩
୩. ପାଉଲ୍ନେ ପର୍ତୁମ୍ ମିସ୍ନାରୀ କାମ୍ ଡିଂକେ । ୧୨:୨୪; ୧୪:୨୮
୪. ତ୍ମିନେ ବିସ୍ବାସିଇଂନେ ଦର୍କାର୍ ଲେଃକ୍ନେ ଆରି ଯିରୁସାଲାମ୍ନ୍ନିଆ ସବା । ୧୫:୧-୩୫
୫. ପାଉଲ୍ ମ୍ୱାର୍ତର୍ ମିସ୍ନାରି କାମ୍ ଡିଂକେ । ୧୫:୩୬; ୧୮:୨୨
୬. ପାଉଲ୍ ଞ୍ଜିତର୍ ମିସ୍ନାରୀ କାମ୍ ଡିଂକେ । ୧୮:୨୩; ୨୦:୩୮
୭. ପାଉଲ୍ ଯିରୁସାଲାମ୍ନ୍ନିଆ ବନ୍ଦି ଡିଂକେ । ୨୧; ୨୬
୮. ପାଉଲ୍ ରୋମ୍ ୱେକେ । ୨୭; ୨୮
୧
୧ ଅ ଥିୟୋଫିଲସ୍ ନେଙ୍ଗ୍ନେ ପରତୁମ୍ ବଇନ୍ନିଆ ଜିସୁ ମେଁନେ କାମ୍ ମୁଲେକ୍ନେ ଦିନ୍ବାନ୍
୨ ସର୍ଗେ ୱେକ୍ନେ ବାନ୍ ଆଣ୍ଡିନ୍ ସାପା କାମ୍ ଡିଙ୍ଗ୍ବଗେ ଆରି ବୁଦି ବିବଗେ ଆତେନ୍ ସାପା ବିସୟ୍ରେ ଗୁଆର୍ ମ୍ୱକେ । ସର୍ଗେ ୱେନେ ସେନୁଗ୍ ଜାଣ୍ଡେକେ ମେଁ ନିଜର୍ନେ ସିସ୍ ରକମ୍ ସ୍ରିବଗେ ଆମେଇଂକେ ମେଁ ପବିତ୍ର ଆତ୍ମାନେ ବପୁରେ ବୁଦି ବିବଗେ ।
୩ ଆତେନ୍ ବେଲା ମେଁ ମ୍ୱ୍ରଲେଃଗେ, ଏନ୍ ପାର୍ମାନ୍ ଆଡିଙ୍ଗ୍ନ୍ସା ଆରି ସିସ୍ଇଂନେ ଡାଉଟ୍ ସ୍ଲ ଆଡିଙ୍ଗ୍ନ୍ସା ମେଁ ମେଁନେ ଗୁଏକ୍ନେ ଇଡ଼ିଙ୍ଗ୍ ଚାଲିସ୍ ଦିନା ଜାକ ଗୁଲେତର୍ ଆମେଇଂକେ ଦର୍ସନ୍ ବିଃବଗେ । ମେଇଂ ଜିସୁକେ କେଲେଃଆର୍ଗେ ଆରି ଜିସୁ ଆମେଇଂକେ ଇସ୍ପର୍ନେ ରାଜି ବିସୟ୍ରେ ଆଦ୍ରିଗ୍ ବଗେ ।
୪ ମେଇଂ ମୁଇଂନୁଗ୍ ରିସିଙ୍ଗ୍ଲେ କେଲା ଜିସୁ ଆମେଇଂକେ ଆକେନ୍ ଆଦେସ୍ ବିକେ: “ଯିରୁସାଲାମ୍କେ ଆଆଁନ୍ତାର୍ଗେପା । ଆବା ଆପେକେ ମେଃନେ ମ୍ୱିଃଏ ଡାଗ୍ଚେ ସପତ୍ ଡିଙ୍ଗ୍ବକେ ଆରି ଆଣ୍ଡିନେ ଦାନ୍ ବିସୟ୍ରେ ନେଙ୍ଗ୍ ଆପେକେ ବାସଙ୍ଗ୍ମ୍ୱଗେ ଆତାନ୍ ବା ଜାକ ଉର୍ପା ।
୫ ଜହନ୍ ଣ୍ଡିଆନ୍ନିଆ ଡୁବନ୍ ବିକେ ମାତର୍ ପେଇଂ ଉଡ଼ିଦିନା ବିତ୍ରେ ପବିତ୍ର ଆତ୍ମାରେ ଡୁବନ୍ ପେବାଏ ।”
ଜିସୁ ସର୍ଗେ ୱେକେ
୬ ମେଁସୁଆ ପ୍ରେରିତ୍ ସିସ୍ଇଂ ମୁଇଂନୁଗ୍ ଲେଃକେଲା ଜିସୁକେ ସାଲିଆକୁକେ “ମାପ୍ରୁ ନା ମେଁନେ ଏବେଆ ଇଶ୍ରାୟେଲୀୟନେ ରେମୁଆଁଇଂକେ ମେଇଂନେ ରାଜି ଆଆଁଣ୍ଡେ ନାବିଏ ?”
୭ ଜିସୁ ବାସଙ୍ଗ୍କେ, “ବେଲା ଆରି ସେଃମଁ ନେଙ୍ଗ୍ ଆବା ମେଁ ସାସନ୍ରେ ବକେ । ଆକେନ୍ ସାପା ଅଃନା ଗଟେଏ, ପେ ମ୍ୟାଃନେ ଦରକାର୍ ଣ୍ଡୁ ।
୮ ମାତର୍ ପେ ଆଡ଼ାତ୍ରା ପବିତ୍ର ଆତ୍ମା ଜାର୍ଲା ପେ ବପୁ ପେଡିଙ୍ଗ୍ଏ ଆରି ଯିରୁସାଲାମ୍ ସାପା ଜିଉଦା ପ୍ରଦେସ୍ ଆରି ଶମିରୋଣୀୟ ଆରି ମଞ୍ଚ୍ପୁର୍ନେ ଲିଙ୍ଗ୍ଡିଆଃକିଗ୍ ଜାକ ନେଙ୍ଗ୍ ନ୍ସା ପେ ସାକି ପେଡିଙ୍ଗ୍ଏ ।”
୯ ଆକେନ୍ ସାପା ସାମୁଆଁ ବାସଙ୍ଗ୍କ୍ନେ ଇଡ଼ିଙ୍ଗ୍ ଜିସୁକେ ସର୍ଗେ ୱେକ୍ନେ ମେଇଂ କେକେ ଆରି ନ୍ତୁଡ଼ା ତ୍ରିଗ୍ଡ୍ୟାଃ ଡାଚେ ମେଁ ଆମେଇଂକେ ମୁଆଃବାନ୍ ମାୟା ଡିଙ୍ଗ୍ୱେଗେ ।
୧୦ ମେଁ ଆଡ଼ାତ୍ରା ୱେକ୍ନେ ଇଡ଼ିଙ୍ଗ୍ ଡିଗ୍ ମେଇଂ ମୁଇଂ ଲୟରେ କିତଂଇନିକେ କେଲେଃଆର୍ଗେ । ତୁଲୁଏ ପାଟାଇ ସଃଲେକ୍ନେ ମ୍ୱାୟା ଙ୍ଗିରେ ଟାପ୍ନା ମେଇଙ୍ଗ୍ ଡାଗ୍ରା ପାଙ୍ଗ୍ଚେ ତୁଆଁଚେ ବାସଙ୍ଗ୍କେ
୧୧ “ଅ ଗାଲିଲୀୟଇଂ ମେଃନ୍ସା ଆକ୍ଅରିଆ ତୁଆଁଚେ କିତଂଇନିକେ କିକେ ପେଡିଙ୍ଗ୍କେ ? ଜିସୁ ପେବାନ୍ ୱେଚେ ସର୍ଗେନ୍ନିଆ କଲେଃକେ । ମାତର୍ ମେଁ ଡିରକମ୍ ସର୍ଗେ ୱେନେ ପେଇଂ ପେକେକେ ଟିକ୍ ଦେତ୍ରକମ୍ ଆଃ ମେଁ ବାରି ଆଁଣ୍ଡେ ପାଙ୍ଗ୍ଏ ।”
ଜିଉଦାନେ ଜାଗାନ୍ନିଆ ମାତିଉକେ ସ୍ରିକେ
୧୨ ମେଁ ଇଡ଼ିଙ୍ଗ୍ ପ୍ରେରିତ୍ ସିସ୍ଇଂ ଜିତ କଣ୍ଡାବାନ୍ ଯିରୁସାଲାମ୍ ଆଣ୍ଡେ ଆର୍ଗେ । ଜିତ କଣ୍ଡା ସହର୍ବାନ୍ ମୁଇଂ କିଲମିଟର୍ ସ୍ଲ ଲେଃଗେ ।
୧୩ ଯିରୁସାଲାମ୍ ୱେଚେ ମେଇଂ ଲେଃଡିଂକ୍ନେ ଆଡ଼ାତ୍ରା ମହଲାନେ ବାକ୍ରାନ୍ନିଆ ଗାଆର୍କେ । ଆତେନ୍ ପ୍ରେରିତ୍ ସିସ୍ଇଂ ଡିଙ୍ଗ୍ଡିଙ୍ଗ୍କେ ପିତର୍ ଜହନ୍ ଜାକୁବ୍, ଆଦ୍ରିୟ, ଫିଲିପ୍ପ, ଥୋମା, ବାର୍ଥଲମି, ମାତିଉ, ଆଲଫିନେ ଉଂଡେ ଜାକୁବ୍, ଦେସ୍ପ୍ରେମି ଶିମୋନ ଆରି ଜାକୁବ୍ନେ ଉଂଡେ ଜିଉଦା ।
୧୪ ମେଇଂ ଉଃଡ଼ିଉଃଡ଼ି ବେଲା ମୁଇଂ ଦଲ୍ ଡିଙ୍ଗ୍ଚେ ପାର୍ତନା ଡିଙ୍ଗ୍ନ୍ସା ମୁଇଂନୁଗ୍ ରିସିଂ ଡିଂ ଆର୍ଗେ ଆରି ମେଇଂନେ ଏତେ ଜିସୁନେ ଇୟାଙ୍ଗ୍ ମରିୟମ୍ ଆରି ବିନ୍ବିନ୍ ସେଲାମ୍ବୁଏଃ ରେମୁଆଁଇଂ ଆରି ଜିସୁନେ ବୟାଁଇଂ ଡିଗ୍ ୱେଲେଃଆର୍ଗେ ।
୧୫ ଆତେନ୍ ଦିନା ଇଡ଼ିଙ୍ଗ୍ ପ୍ରାୟ୍ ମୁଇଂ ସହ ମୁଇଂକୁଡ଼ି ରୁଆ ବିସ୍ବାସି ବୟାଁଇଂନେ ମୁଇଂ କୁକପାର୍ନ୍ନିଆ ପିତର୍ ତୁଆଁଚେ ବାସଙ୍ଗ୍କେ:
୧୬ “ବୟାଁ ଆରି ତନାଇଂ ମୁଡ଼ି ଜିଉଦା ଜିସୁକେ ସାନ୍ସା ବିରଦ୍ ରେମୁଆଁଇଂକେ ଗାଲି ଆସୁଏବି ବଗେ ମେଁ ବିସୟ୍ରେ ଦାଉଦ୍ ପବିତ୍ର ଆତ୍ମାନେ ବାନ୍ ବବିସତ୍ ଇଲ୍ଏଁ ଆଃଅଁ ବଆର୍ଗେ । ଦରମ୍ ସାସ୍ତର୍ ଗୁଆର୍କ୍ନେ ଆତେନ୍ ସାମୁଆଁ ପୁରନ୍ ଡିଙ୍ଗ୍ନେ ଦର୍କାର୍ ଲେଃଗେ ।
୧୭ ଡାଗ୍ଲା ମେଁ ନେଇଂନେ ବିତ୍ରେ ମୁଇଂଡା ଡାଗ୍ଚେ ଏଜାବଗେ ଆରି ଆକେନ୍ ସେବା ପଦ୍ନ୍ନିଆ ଟାନ୍ ବାଲେଃଆର୍ଗେ ।”
୧୮ ମେଁନେ ଅଦର୍ମନେ କାମ୍ ବାନ୍ ଜିଉଦା ବାଲେକ୍ନେ ଡାବୁ ଏତେ ମୁଇଂ ଲିଜ ବିଆର୍ ବଆର୍ଗେ ବାରି ଆତେନ୍ ଲିଜନ୍ନିଆ ଲଃଚେ ମେଁ ଗୁଏକେ । ବାରି ମେଁନେ ସୁଲୁଏଃ ତେକ୍ପ୍ୟାଃଚେ ସୁଲେଃରେ ତାର୍ୱେକେ ।
୧୯ ଯିରୂଶାଲମ୍ନେ ରେମୁଆଁଇଂ ଆକେନ୍ ସାପା ମ୍ୟାଃଚେ ଆତେନ୍ ଲିଜକେ ମେଇଂନେ ବ୍ନାସାରେ “ଆକେଲ୍ ଦାମା” ବା “ମିଆଁ ଲିଜ” ଡାଗ୍ଚେ ମ୍ନି ବଆର୍କେ ।
୨୦ ପିତର ବାସଙ୍ଗ୍ଡିଂକେ, “ଆକେନ୍ ବିସୟ୍ରେ ଗୀତସଂହିତା ବଇନ୍ନିଆ ଗୁଆର୍ ବକେ”
“ମେଁନେ ଡୁଆ ରେମୁଆଁ ଗଣ୍ଡ୍ ଆଲେଲେ
ଆତ୍ଅରିଆ ଜାଡିଗ୍ ଆବାସାଲେ”
ବାରି ଡିଗ୍ ଗୁଆର୍ ବକେ;
“ବିନ୍ ରେମୁଆଁ ମେଁନେ କାମ୍ନ୍ନିଆ ଗାଲେଃ ।”
୨୧ “ତେସା ମାପ୍ରୁ ଜିସୁନେ ଗୁଏଚେ ତଡ଼୍ୟାକ୍ନେ ସାକି ଡିଙ୍ଗ୍ନ୍ସା ବାରି ମୁଇଂଜା ନେ ଏତେ ଲେଃନେ ଦର୍କାର୍ ।
୨୨ ଜିସୁ ଜହନ୍ ବାନ୍ ଣ୍ଡିଆଦିକ୍ୟା ବାକ୍ନେ ବେଲାବାନ୍ ଆରାମ୍ ଡିଙ୍ଗ୍ଚେ ନେ ଡାଗ୍ରାବାନ୍ ଗୁଏଚେ ତଡ଼ିଆନେ ଦିନା ଜାକ ଉଡ଼ି ବେଲା ମାପ୍ରୁ ଜିସୁ ନେ ଏତେ ଅଲେଙ୍ଗ୍ ଡିଙ୍ଗ୍ନେ ବେଲା ଆଡିନେ ରେମୁଆଁଇଂ ନେ ଦଲ୍ନ୍ନିଆ ଲେଃଆର୍କେ ମେଇଂନେ ବିତ୍ରେ ମୁଇଂଜାକେ ସାକି ଆଃଡିଙ୍ଗ୍ ପଡ଼େଏ ।”
୨୩ ଆତ୍ବା ମେଇଂ ମ୍ବାୟାକେ ବା ଯୋସେଫ୍କେ ଆଜାକେ ବର୍ଶବା ଡାଗ୍ଚେ ବାସଙ୍ଗ୍ମ୍ୟାଃକେ ଆରି ଜାନେ ୱାନେ ମ୍ନି ଯୁସ୍ତ, ଆମେକେ ବାରି ମଥିୟସ୍କେ ମ୍ବାର୍ ବାଗ୍ ଆଡିଙ୍ଗ୍ଚେ ଦେକ୍ ରକମ୍ ପାର୍ତନା ଡିଙ୍ଗ୍ଆର୍କେ
୨୪ ବାରି ପାର୍ତନା ଡିଙ୍ଗ୍କେ, ଏ “ମାପ୍ରୁ ନା ସାପାରେନେ ଚିନ୍ତା ମ୍ୟାନାଡିଂକେ । ଜିଉଦା ମେଁ ନିଜେ ସ୍ରିବକ୍ନେ ଜାଗାନ୍ନିଆ ୱେନ୍ସା ଆକେନ୍ ସେବା ଆରି ପ୍ରେରିତ୍ ପଦବି ବାନ୍ ଆନ୍ତାର୍ ଲେଃକେ
୨୫ ଜିଉଦା ପଦବିକେ ଗ୍ରଅନ୍ ଡିଙ୍ଗ୍ନେସା ଆକେନ୍ ମ୍ୱାୟା ବିତ୍ରେ ବାନ୍ ନା ଆଜାକେ ସ୍ରି ନାବକେ, ଆତାନ୍ ଆସୁଏ ବିଲା ।”
୨୬ ତେନ୍ ଇଡ଼ିଂ ମ୍ୱାୟା ସିସ୍ ବିତ୍ରେ ବାନ୍ ମୁଇଂଜାକେ ସ୍ରିନ୍ସା ଲେଟ୍ରିକ୍ ତ୍ଲାଗ୍ଆର୍କେ । ଲେଟ୍ରିକ୍ ତ୍ଲାଗ୍ନ୍ନିଆ ମଥିୟସ୍ନେ ମ୍ନିରେ ପୁଟେକେ, ଆତ୍ଅରିଆ ମେଁ ଗୋମୁଇଂ ପ୍ରେରିତ୍ଇଂ ଏତେ ମିସୁକେ ।