୨୧
ପାଉଲ୍ ଯିରୁସାଲାମ୍ ୱେକେ
୧ ମେଇଂନେ ବିଦାୟ୍ ଡୁଙ୍ଗ୍ଡଚେ ଇଡ଼ିଙ୍ଗ୍ ନେ ଜାଆଜ୍ନ୍ନିଆ ଡେଃଚେ ସିଦା କୋସ୍ନ୍ନିଆ ନେପାଙ୍ଗ୍କେ ଆତେନ୍ ମାର୍ତଡ଼େ ରୋଡସ୍ନ୍ନିଆ ନେପିଙ୍ଗ୍ଚାକେ ବାରି ଆତ୍ବାନ୍ ପାତାରାନ୍ନିଆ ନେପାଙ୍ଗ୍କେ ।
୨ ଆତ୍ଅରିଆ ଫୈନିକୀୟା ପାକା ୱେଡିଂକ୍ନେ ମୁଇଂ ଣ୍ଡିଆ ଜାଆଜ୍ନ୍ନିଆ ଡେଃଚେ ନେୱେକେ ।
୩ ତେନ୍ ଇଡ଼ିଙ୍ଗ୍ ସାଇପ୍ରସ୍ ଇନି ତ୍ନାଡିଂକ୍ନେ ମୁଇଂ ଜାଗାନ୍ନିଆ ନେୱେଚାକେ । ଆତ୍ବାନ୍ ମେଃନେ ଦକିନ୍ ଦିଗ୍ ବିଚେ ନେ ସିରିଆପାକା ନେୱେକେ । ନେ ଟାୟର୍ ସହର୍ନ୍ନିଆ ଣ୍ଡିଆଃ ଜାଆଜ୍ବାନ୍ ନେଜାର୍କେ ଡାଗ୍ଲା ଆକେନ୍ ଜାଆଜ୍ବାନ୍ ଜିନିସ୍ ଆଜାର୍ନେ ଲେଃଗେ ।
୪ ଆତ୍ଅରିଆ ନେ ଉଡ଼ିରୁଆ ବିସ୍ବାସିଇଂକେ କେଚେ ମେଇଙ୍ଗ୍ ଏତେ ମୁଇଂ ସାନ୍ତା ନେଲେଃଗେ । ପବିତ୍ର ଆତ୍ମାନେ ଆଦେସ୍ ବାଚେ ମେଇଂ ପାଉଲ୍କେ ଯିରୁସାଲାମ୍ ୱେନ୍ସା ମନା ଡିଂଆର୍କେ ।
୫ ମାତର୍ ମେଇଂ ଏତେ ମୁଇଂ ସାନ୍ତା ୱେକ୍ନେ ଇଡ଼ିଙ୍ଗ୍ ନେ ଆମେଇଂକେ ଆନ୍ତାର୍ଚେ ନେନେ ଗାଲିପାକା ନେୱେକେ । ଆନେକେ ବିଦାୟ୍ ବିନ୍ସା ମେଇଂ ସାପାରେ ନିଜେନେ ସେଲାମ୍ବୁଏଃ ଆରି ଗଡ଼େଇଂ ଏତେ ସହର୍ ବାଏରେ ଲେକ୍ନେ ମ୍ନା କେଣ୍ଡିଆ ଆଡ଼ା ଜାକ ପାଙ୍ଗ୍ଆର୍କେ । ଆତ୍ଅରିଆ ନେ ସାପାରେ ଡେଙ୍ଗଚେ ପାର୍ତନା ନେଡିଂକେ ।
୬ ତେନ୍ ଇଡ଼ିଂ ନେ ଆମେଇଂକେ ବିଦାୟ୍ ବିଚେ ଣ୍ଡିଆଃ ଜାଆଜ୍ନ୍ନିଆ ନେଗାକେ ଆରି ମେଇଂ ନିଜର୍ ଡୁଆ ୱିଗ୍ଆର୍କେ ।
୭ ନେ ଟାୟର୍ବାନ୍ ଜାଆଜ୍ନ୍ନିଆ ଯାତ୍ରା ଡିଂଚେ ତାଲମେଇନ୍ନିଆ ନେପିଙ୍ଗ୍ଚାକେ ବାରି ବୟାଁଇଂକେ ସାର୍ଲଚେ ମୁଇଂ ଦିନା ମେଇଙ୍ଗ୍ ଏତେ ନେଲେଃଗେ ।
୮ ମାର୍ତଡ଼େ ନେ ଆତେନ୍ ଜାଗା ଆନ୍ତାର୍ଚେ କାଇସରିୟା ନେୱେଚାକେ । ଆତ୍ଅରିଆ ନେ ବାସଙ୍ଗ୍ ଡିଙ୍ଗ୍ଣ୍ଡ୍ରେ ଫିଲିପ୍ନେ ଡୁଆ ନେଲେଃଗେ ଯିରୁସାଲାମ୍ନ୍ନିଆ ସେବକ ରକମ୍ ମନନିତ୍ ଡିଙ୍ଗ୍ଲେକ୍ନେ ଗୁ ରୁଆବାନ୍ ମେଁ ମୁଇଂଜା ଲେଃଗେ ।
୯ ମେଁନେ ଅଁଣ୍ଡ୍ରୁଆ ବିହେ ମାଡିକ୍ନେ ସେଲା ଇସ୍ପର୍ନେ ବାବବାନି ବାସଙ୍ଗ୍ଡିଂ ଆର୍ଗେ ।
୧୦ ନେ ଆତ୍ଅରିଆ ଗୁଲେ ଦିନା ଲେକ୍ନେ ଇଡ଼ିଙ୍ଗ୍ ଜିଉଦା ପ୍ରଦେସ୍ବାନ୍ ଆଗାବ ମ୍ନିକ୍ନେ ମୁଇଂ ବାବବାଦି ଆତ୍ଅରିଆ ପାଂକେ ।
୧୧ ମେଁ ନେଡାଗ୍ରା ପାଙ୍ଗ୍ଚେ ପାଉଲ୍ନେ ନ୍ସାନ୍ନିଆ ଗାଗ୍ନେ ତୁଆଲ୍ ଡୁଂଡଆର୍କେ, ଆତ୍ବା ମେଁ ନିଜେନେ ନ୍ତି ବାରି ଞ୍ଚ ଗାଗ୍ଚେ ବାଲିର୍କେ “ପବିତ୍ର ଆତ୍ମା ଆନେଙ୍ଗ୍କେ ଆମ୍ୟାଃଡିଂକେ ଜେ ଆକେନ୍ ତୁଆଲ୍ ଗାଗ୍ମ୍ୟାଃକ୍ନେ ଅଦିକାରିକେ ଯିରୁସାଲାମ୍ନ୍ନିଆ ଜିଉଦିଇଂ ଦେକ୍ରକମ୍ ଗାଗ୍ଚେ ଆମେକେ ଅଣଜିଉଦିଇଂନେ ନ୍ତି ଡାଗ୍ରା ସର୍ପେ ବିଃଆର୍ଏ ।”
୧୨ ଏନ୍ ଅଁଚେ ନେ ଆରି ଆତ୍ଅରିଆ ଲେଃମ୍ୟାକ୍ନେ ବିନ୍ରେ ପାଉଲ୍କେ ଯିରୁସାଲାମ୍ନ୍ନିଆ ମାୱେନ୍ସା ଗୁଆରି ଡିଙ୍ଗ୍ ଆର୍କେ ।
୧୩ ମାତର୍ ପାଉଲ୍ ଉତର୍ ବିକେ, “ପେ ଏନ୍ ମେଁ ଡିଂ ପେଡିଂକେ ମେଁସା ଦେକ୍ରକମ୍ ଅଁଚେ ନେଙ୍ଗ୍ ଜିବନ୍କେ ଦୁକ୍ ଆଃଡିଂପେଡିଂକେ ? ଜିସୁନେ ମ୍ନି ନ୍ସା ଯିରୁସାଲାମ୍ନ୍ନିଆ ମାତର୍ ଗାଗ୍ ନ୍ସା ଣ୍ଡୁ ମାତର୍ ମାପ୍ରୁ ଜିସୁ ଆତ୍ଲା ଗୁଏଃନ୍ସା ଡିଗ୍ ନେଙ୍ଗ୍ ତିଆର୍ ଡିଂନ୍ଲେକେ ।”
୧୪ ନେ ଆମେକେ ଆଦ୍ରିଗ୍ ମାୟାଚେ ଆତ୍ବା ବୁଙ୍ଗ୍ ଲେଃଚେ ନେବାଲିର୍କେ, “ମାପ୍ରୁନେ ଇକ୍ଚା ପୁରନ୍ ଡିଂଲେ ।”
୧୫ ଆତ୍ଅରିଆ ଉଡ଼ିସି ୱେକ୍ନେ ଇଡ଼ିଙ୍ଗ୍ ନେ ନେନେ ଜିନିସ୍ ସାମାନ୍ଇଂ ସଜେଚେ ଯିରୁସାଲାମ୍ ପାକା ନେୱେକେ ।
୧୬ କାଇସରିୟାନେ ଉଡ଼ିରୁଆ ସିସ୍ ଆରି ସାଇପ୍ରସ୍ନେ ମନାସୋନ ମ୍ନିକ୍ନେ ମୁଇଂ ବିସ୍ବାସି ଡିଗ୍ ନେ ଏତେ ୱେକେ । ମନାସୋନନେ ଡୁଆ ନେ ଲେଃନେ ନିୟମ୍ ଆର୍ମେ ବଆର୍ଗେ ।
ଜାକୁବ୍ ଏତେ ପାଉଲ୍ ମିସୁକେ
୧୭ ନେ ଯିରୁସାଲାମ୍ନ୍ନିଆ ନେୱେଚାକେ ଆନେକେ ବୟାଁଇଂ ସାର୍ଦାରେ ସାର୍ଲ ଆମ୍ୟାଃଆର୍କେ ।
୧୮ ତେନ୍ ମାର୍ତଡ଼େ ପାଉଲ୍ ନେ ଏତେ ଜାକୁବ୍କେ କେନ୍ସା ୱେଆର୍କେ; ସେବକଇଂ ଆତ୍ଅରିଆ ପିଙ୍ଗ୍ଚାଲେ ଆର୍ଗେ ।
୧୯ ପାଉଲ୍ ଆମେଇଂକେ ଜୁଆର୍ ବେଟ୍ ଡିଙ୍ଗ୍ଚେ ମେଁନେ କାମ୍ ବାନ୍ ଇସ୍ପର୍ ଅଣଜିଉଦିଇଂନେ ବିତ୍ରେ ମେଁ ଡିଂବଗେ; ମେଁନେ ମୁଇଂ ପୁରାପୁରି ବାବ୍ରେ ଆମ୍ୟାଃବିଃଆର୍କେ ।
୨୦ ମେଁନେ ସାମୁଆଁ ଦ୍ରିଗ୍କ୍ନେ ଇଡ଼ିଙ୍ଗ୍ ମେଇଂ ସାପାରେ ଇସ୍ପର୍କେ ପ୍ରସଂସା ଡିଂ ଆର୍କେ । ତେନ୍ ଇଡ଼ିଂ ମେଇଂ ବାଲିର୍ ଆର୍କେ “ବୟାଁ ପାଉଲ୍ ନାଁ ତ କେନାଡିଂକେ, ଡିରକମ୍ ଏବେ ଅଜାର୍ ଅଜାର୍ ସଂକ୍ୟାରେ ଜିଉଦିଇଂ ମାପ୍ରୁ ଜିସୁ ଡାଗ୍ରା ବିସ୍ବାସ୍ ଡିଂଆର୍ଡିଂକେ ଆରି ମେଇଂ ନିୟମ୍ ଆଡ଼ାତ୍ରା ଡିଗ୍ ଜାବର୍ ସାର୍ଦାରେ ଲେଃଆର୍କେ ।
୨୧ ମେଇଂ କବର୍ ବାଲେଃଆର୍କେ ଜେ ନା ଅଣଜିଉଦିଇଂନେ ଦେସ୍ନ୍ନିଆ ବାସା ଡିଂଆର୍କ୍ନେ ଜିଉଦିଇଂକେ ମୋଶାନେ ନିୟମ୍ ଆନ୍ତାର୍ନ୍ସା ଆସିକେ ପେଡିଂ । ପେ ଆମେଇଂକେ ମେଇଂନେ ଗଡ଼େଅଇଂନେ ପବିତ୍ର ମାରାଃଡିଂନେ ନ୍ସା ଆରି ଜିଉଦିଇଂନେ ନିୟମ୍ଇଂ ମାମାନେଃ ନ୍ସା ଆଃସିକେ ପେଡିଂକେ ।
୨୨ ନା ଆକ୍ଅରିଆ ପିଙ୍ଗ୍ଚା ନେଲେଃକେ ଡାଗ୍ଚେ ମେଇଂ ଡିଲାଡିଗ୍ ଅଁ ଆର୍ଏ । ତେଲା ମେଃ ନେଡିଂଏ ?
୨୩ ନେ ଚାଏଁ ନେଡିଂକେ ନା ମୁଇଂ କାମ୍ ଡିଂ । ଆକ୍ଅରିଆ ଲେକ୍ନେ ଅଁଣ୍ଡ୍ରୁଆ ରେମୁଆଁ ଇସ୍ପର୍ ଡାଗ୍ରା ନ୍ତି ଟେକେ ବଆର୍କେ ।
୨୪ ମେଇଙ୍ଗ୍ ଏତେ ୱେଲା । ଶୁଚିକରଣ ନିୟମ୍ ପାଲନ୍ନିଆ ମେଇଙ୍ଗ୍ ଏତେ କୁଡ଼େଚେ ମେଇଂନେ ବାଆଃ କୁଆର୍ ନ୍ସା କର୍ଚ ବିଃପା । ଏନ୍ବାନ୍ ସାପାରେ ବାବେ ଆର୍ଏ ଜେ ମେଇଂ ପେ ବିସୟ୍ରେ ଜା ସାପା ଅଁଲେଃଆର୍କେ ଆତେନ୍ ମିଚ୍ । ମେଇଂ କେଆର୍ଏ ଜେ ପେ ନିଜର୍ ନିଜର୍ ଜିବନ୍ରେ ମସାନେ ନିୟମ୍ ମାନେଃଚେ ଚଲେ ପେଡିଂକେ ।
୨୫ ନେ ଅଣଜିଉଦି ବିସ୍ବାସି ରେମୁଆଁଇଂକେ ଚିଟି ଉଲିଆ ଗୁଆର୍ନେଡିଂକେ ଜେ ନେନେ ନିସ୍ପତି ଇସାବ୍ରେ ମେଇଂ ମୁର୍ତ୍ତି ପୁଜାଅରିଆ ନ୍ତି ଟେକେବକ୍ନେ ଜିନିସ୍ ଆଚଂଆର୍ ଣ୍ଡୁ ମିଆଁ ଆଉଗ୍ଆର୍ ଣ୍ଡୁ, ଲୁଗଃ ଲିଃଗଚେ ଆଗୁଏବକ୍ନେ ପସୁନେ ଚିଲି ଆଚଂଆର୍ଲେ ଆରି ଦଦ୍ୟା ପାପ୍ବାନ୍ ସ୍ଲ ଲେଃଆର୍ଲେ ।”
୨୬ ତେନ୍ ଆମାର୍ତଡ଼େ ପାଉଲ୍ ଆତେନ୍ ଅଁ ଣ୍ଡ୍ରୁଆ ଏତେ ଶୁଚିକରଣ ନିୟମ୍ ପାଲେ ଆର୍କେ । ତେନ୍ ଇଡ଼ିଂ ମେଁ ମନ୍ଦିର୍ନ୍ନିଆ ୱେଚେ ପବିତ୍ର ଡିଂନେ କାମ୍ ଅଃନା ଡାଏ ଆରି ଉଡ଼ି ବେଲା ଗିମିଃ ମିଆଁ ବିଃଆର୍ଏ, ଆତେନ୍ ଆମ୍ୟାଃଆର୍କେ ।
ପାଉଲ୍ ମନ୍ଦିର୍ ବିତ୍ରେ ଗେରେଆର୍କେ
୨୭ ପବିତ୍ର ଡିଂନେ କାମ୍ନେ ଗୁ ଦିନା ଡାକ୍ନେ ଇଡ଼ିଙ୍ଗ୍ ଆସିଆ ପ୍ରଦେସ୍ନେ ଉଡ଼ିରୁଆ ଜିଉଦି ମନ୍ଦିର୍ନ୍ନିଆ ପାଉଲ୍କେ କେଆର୍କେ । ମେଇଂ ଆତ୍ଅରିଆ ମୁଇଂନୁଗ୍ ରିସିଂଲେକ୍ନେ ରେମୁଆଁଇଂକେ ଅବାଃଲିର୍ଚେ ପାଉଲ୍କେ ସାଃଆର୍କେ ।
୨୮ ମେଇଂ କିରଚେ ବାଲିର୍ ଆର୍କେ “ଏ ଇଶ୍ରାଏଲ୍ନେ ବୟାଁଇଂ ଆନେକେ ସାଇଜ୍ୟ ଡିଂପା ! ଆକେନ୍ ରେମୁଆଁ ପିତୁର୍ପାକା ୱେଚେ ଇସ୍ରାଏଲ୍ନେ ରେମୁଆଁଇଂନେ ବିରଦ୍ରେ ମୋଶାନେ ନିୟମ୍ ଆରି ଏନ୍ ମନ୍ଦିର୍ ବିରଦ୍ରେ ଗ୍ୟାନ୍ ବିଣ୍ଡିଂ । ବାରି ଏବେ ମେଁ ଉଡ଼ିରୁଆ ଗ୍ରୀକ୍ ରେମୁଆଁଇଂକେ ମନ୍ଦିର୍ ଡାଗ୍ରା ଡୁଙ୍ଗ୍ପାଂଚେ ଏନ୍ ପବିତ୍ର ଜାଗାକେ ଅସୁଚି ଆଡିଂବ ଆର୍କେ ।”
୨୯ ମେଇଂ ସହର୍ନ୍ନିଆ ଏଫିସିୟନେ ତ୍ରଫିମକେ ପାଉଲ୍ ଏତେ କେଲେଃଗ୍ସା ବାବେଆର୍କେ ଜେ ପାଉଲ୍ ଆମେକେ ମନ୍ଦିର୍ନ୍ନିଆ ଡୁଂୱେବକେ ।
୩୦ ଗୁଲେ ସହର୍ପାକା ଉଡ୍ରା ଡିଂୱେଗେ ରେମୁଆଁଇଂ ମୁଇଂ ମାଡ୍ରେ ୱିର୍ ଡୁଂୱେଆର୍କେ ଆରି ମେଇଂ ପାଉଲ୍କେ ସାଚେ ମନ୍ଦିର୍ ବାଏରେ ଉର୍ଗୁ ଡୁଂପାଙ୍ଗ୍ ଆର୍କେ ଆରି ଆତେନ୍ ଦାପ୍ରେ କାପାଟ୍ ସାପା ବନ୍ଦ୍ ଡିଂୱେଗେ ।
୩୧ ଆରି ମେଇଂ ଆମେକେ ବାଗୁଏଃ ବିଃନ୍ସା ଚେସ୍ଟା ଡିଂଆର୍କେ ଗୁଲେ ଯିରୁସାଲାମ୍ କିରମର ଡିଂଡିଂଗେ ଡାଗ୍ଚେ ସନ୍ୟଦଲ୍ନେ ମୁଇଂ ସ ସେନାପତିଇଂନେ ଡାଗ୍ରା କବର୍ ବିଆର୍କେ
୩୨ ଆତ୍ବା ମେଁ ଆତେନ୍ ଦାପ୍ରେ ସନ୍ୟ ଆରି ମୁଇଂ ଶହନେ ନେତା ମୁଇଂସ ସନ୍ୟଇଂନେ ନେତାଇଂକେ ସାଚେ ମେଇଂ ଡାଗ୍ରା ୱିର୍ ଡୁଂୱେଆର୍କେ । ମେଇଂ ମୁଇଂ ଶହ ସେନାପତି ଆରି ସନ୍ୟଇଂ କେଚେ ପାଉଲ୍କେ ବାରି ମାବଗ୍ଚେ ଆନ୍ତାର୍ ବିଆର୍କେ ।
୩୩ ଆତେନ୍ବେଲା ମୁଇଂ ଶହ ସେନାପତି ଡାଗ୍ରା ପାଙ୍ଗ୍ଚେ ଆମେକେ ମ୍ୱାର୍ତି ସିକ୍ଲିଏତେ ଗାଗ୍ନ୍ସା ଆଦେସ୍ ବିଃଆର୍କେ ବାରି “ମେଁ ଜାଣ୍ଡେ ଆରି ମେଁ ମେଁ ଡିଙ୍ଗ୍ବକେ ?” ଡାଗ୍ଚେ ସାଲିଆକୁଆର୍କେ ।
୩୪ ରେମୁଆଁ ଗହଲିବାନ୍ ଜା ଉଡ଼ି ରକମ୍ନେ ସାମୁଆଁ ବାଲିର୍ଚେ ୱାସାର୍ ଆର୍କେ ଦେକ୍ରକମ୍ କିରମର ଡିଂକେ ଜେ ସେନା ନେତା ସତ୍ ଗଟ୍ନା ମେଁନେ ମେଃଡିଗ୍ ବୁଜେ ଆୟାକେ ଣ୍ଡୁ । ତେସା ମେଁ ପାଉଲ୍କେ ସନ୍ୟ ଡୁଆ ବିତ୍ରେ ଡୁଂୱେନ୍ସା ସୈନିକ୍ଇଂକେ ଆଦେସ୍ ବିଆର୍କେ ।
୩୫ ମେଇଂ ଆମେକେ ଡୁଂୱେଚେ ସନ୍ୟ ଡୁଆନେ ପାଆଚ୍ ଡାଗ୍ରା ୱେଚାନେ ବେଲା ଆମେକେ ଗେରେ ଲେକ୍ନେ ରେମୁଆଁଗଣ୍ଡ୍ଇଂ ଏନ୍ତି କିରମର ଡିଂଆର୍କେ ଜେ ସନ୍ୟଇଂ ପାଉଲ୍କେ ଡୁଙ୍ଗ୍ଚେ ଡୁଂଡଆର୍କେ ।
୩୬ ରେମୁଆଁଇଂ ସାପାରେ ମେଁ ପ୍ଲା ପାଙ୍ଗ୍ଚେ ୱାସାର୍ଚେ ବାସଙ୍ଗ୍ଡିଂଆର୍ଗେ “ଆମେକେ ବାଗୁଏ ବିଃପା ।”
ପାଉଲ୍ ଜିବନ୍ ଅପେଃକେ
୩୭ ସନ୍ୟଇଂ ପାଉଲ୍କେ ପ୍ରାସାଦ୍ ବିତ୍ରେ ଡୁଂୱେନେ ବେଲା ମେଁ ସେନାଇଂନେ ନେତାକେ ବାଲିର୍କେ, “ଆନା ନେଙ୍ଗ୍ ମେଁ ଡିଗ୍ ବାସଙ୍ଗ୍ ୟାଲେଃ ?” ସେନାଇଂନେ ନେତା ସାଲିଆକୁକେ, “ନା ତ ଗ୍ରୀକ୍ ବାସା ବାଲିର୍ ନାଡିଂକେ ।
୩୮ ତେଲା ନା ମେଁନେ ଆତେନ୍ ମିସର୍ନେ ରେମୁଆଁ ଣ୍ଡୁ, ଜା ଉଡ଼ିମୁଆଁ ଅଃସେ ସର୍କାର୍ନେ ବିରୁଦ୍ରେ ଜୁଦ୍ ଡିଂବଗେ ଆରି ଅଁ ଅଜାର୍ ଡାକୁ ସାଚେ ବାଲିଲଃନ୍ନିଆ ୱେଲେଃଆର୍ଗେ ।”
୩୯ ପାଉଲ୍ ଉତର୍ ବିକେ “ସିଲିଷୀଆନେ ତାର୍ଷିସ୍ନ୍ନିଆ ଜନମ୍ ଡିଂଲେକ୍ନେ ନେଙ୍ଗ୍ ମୁଇଂ ଜିଉଦି ରେମୁଆଁ ମୁଇଂ ମ୍ନା ସହର୍ନେ ନାଗରିକ । ଏନ୍ ରେମୁଆଁଇଂକେ ଆଦ୍ରିଗ୍ଚେ ବାଲିର୍ ନ୍ସା ଦୟା ଡିଂଚେ ଆନେଙ୍ଗ୍ ଆଦେସ୍ ବିଲା ।”
୪୦ ସେନାପତି ଆମେକେ ଆଦେସ୍ ବିଲା ପାଉଲ୍ ପାଆଚ୍ ଆଡ଼ାତ୍ରା ତୁଆଁଚେ ରେମୁଆଁଇଂକେ ବୁଙ୍ଗ୍ଲେଃ ନ୍ସା ନ୍ତି ଆତଡ଼ିଆଚେ ବାଲିର୍କେ । ମେଇଂ ବୁଙ୍ଗ୍କ୍ନେ ଇଡ଼ିଙ୍ଗ୍ ପାଉଲ୍ ଏବ୍ରୀ ବ୍ନାସାରେ ବାଲିର୍କେ ।