୩
ତ୍ମି ନିୟମ୍ନେ ଗୁତିରେ
୧ ନେ ମେଃନେ ବାରି ଆତ୍ମା ବଡ଼୍ପନ୍ ଡିଙ୍ଗ୍ନେ ରକମ୍ ମନେ ଡିଙ୍ଗ୍ନେଡିଂକେ ? ଣ୍ତୁଲା ବିନ୍ରେନେ ରକମ୍ ନେ ମେଃନେ ପେନେ ଡାଗ୍ରା ଣ୍ତୁଲା ପେନେ ଡାଗ୍ରାବାନ୍ ସ୍ନାମୁଆଃ ଉଲିଆ ଦର୍କାର୍ ଡିଙ୍ଗ୍ନେଡିଙ୍ଗ୍ ?
୨ ପେଇଂ ଆଃ ନେନେ ସ୍ନାମୁଆଁ ଉଲିଆ ନେନେ ଗାଗ୍ଡ଼େନ୍ନିଆ ଗୁଆର୍ ବକ୍ନେ ଲେକା ଜାଣ୍ତେକେ ସାପାରେ ମ୍ୟାଆର୍ଏ ବାରି ପଡ଼େ ୟାଆର୍ଏ ।
୩ ଏନ୍ ସ୍ନାମୁଆଁ ଉଲିଆ କିସ୍ଟନେ ବାନ୍ ସେବାନ୍ନିଆ ଗୁଆର୍ବକେ ବାରି ନେ ବାନ୍ ମେଁନେ ଆତ୍ନା ବକେ । ଏନ୍ ଏଲେଃସବାନ୍ ବ୍ରି ଆଡ଼ାତ୍ରା ଗୁଆର୍ ଆବକେ ଣ୍ତୁ, ମାତର୍ ଜିବନ୍ ଇସ୍ପର୍ନେ ଆତ୍ମାବାନ୍ ରେମୁଆଁ ଗାଗ୍ଡ଼େନ୍ନିଆ ଗୁଆର୍ବକେ ।
୪ ବାରି କିସ୍ଟନେ ବାନ୍ ଇସ୍ପର୍ନେ ଆଡ଼ାତ୍ରା ଆସା ବଚେ ନେଁଇଂନେ ଦେକ୍ରକମ୍ ବିସ୍ବାସ୍ ଲେଃକେ ।
୫ ନେ ଜେ ନିଜର୍ ବାନ୍ ମେଃଡିଗ୍ ଆନ୍ତାର୍ ନ୍ସା ବପୁ ଣ୍ତୁ ମାତର୍ ନେ ବପୁ ଇସ୍ପର୍ବାନ୍;
୬ ତ୍ମି ନିୟମ୍କେ ପାଲନ୍ ଡିଙ୍ଗ୍ନେସା ଇସ୍ପର୍ ଆନେକେ ସ୍ରି ବକେ । ଏନ୍ ନିଅମ୍ ଗୁଆର୍କ୍ନେ ଣ୍ତୁ ମାତର୍ ଆତ୍ମାନେ ବାନ୍ ଗୁଆର୍ବକେ; ଡାଗ୍ଲା ଗୁଆର୍କ୍ନେ ନିଅମ୍ ଗୁଏ ଡିଙ୍ଗ୍ଏ ମାତର୍ ଆତ୍ମାନେ ନିଅମ୍ ଜିବନ୍ ବିଃଏ ।
୭ ବ୍ରି ଆଡ଼ାତ୍ରା ଗୁଆର୍କ୍ନେ ମସାନେ ନିୟମ୍ନେ ତିଆର୍ ବେଲା ଇସ୍ପର୍ନେ ମଇମା ତ୍ନା ଲେଃକେ । ଆତେନ୍ ମଇମା ତାର୍କିଗ୍ ଲିଗ୍ ୱେଲେଲା ଡିଗ୍ ମସାନେ ତାର୍କିଗ୍ ସାର୍ମୁଆଁ ପାକା ଇସ୍ରାଏଲ୍ ରେମୁଆଁଇଂ କେୟା ଆୟା ଆର୍କେ ଣ୍ତୁ । ଆଃଗୁଏନେ ନିଅମ୍ ଜଦି ଦେକ୍ରକମ୍ ସନ୍ମାନ୍ ଏତେ ତ୍ନା ଲେଃକେ
୮ ତେଲା ପବିତ୍ର ଆତ୍ମାନେ ସେବାକାମ୍ ଉଡ଼ି ଜାବର୍ ମଇମା ଆଡିଙ୍ଗ୍ ଣ୍ତୁ ?
୯ ଡାଗ୍ଲା ଡଣ୍ଡ୍ ବାନେ ସେବାକମ୍ ମଇମାମୟ ଲେଃକେ ତେଲା ଦରମ୍ନେ ସେବାକାମ୍ ବାରି ଆରି ଜାବର୍ ମଇମାମୟ ଲେଃକେ ।
୧୦ ବାୱିର୍ ସେବାନ୍ନିଆ ମଇମା ଲେଃକେ ମାତର୍ ଜାବର୍ ମଇମାମୟ ତ୍ମି ସେବା ଏତେ ସମାନ୍ ଆଡିଙ୍ଗ୍ଲା ଆତେନ୍ ସେନୁଗ୍ ମଇମା ମେଃଡିଗ୍ ଣ୍ତୁ ।
୧୧ ଆଣ୍ଡିନେ ଜତନ୍ ଉଡ଼ି ଦିନ୍ ସାଃଲେଃଗେ ଆତେନ୍ ଜଦି ମଇମା ଏତେ ପାଙ୍ଗ୍ଲେଃକେ ତେଲା ଏନ୍ ମାଡାନେ ଜୁଗ୍ ଲେଃକ୍ନେ ଜତନ୍ ଜାବର୍ ବୁଦିରେ ଡିଙ୍ଗ୍ନେ ଜନମ୍ବାନ୍ ବୁଦି ଡିଂକେ ।
୧୨ ଆତେନ୍ ଆସା ଲେଃଲା ନେନେ ଜାବର୍ ସାହାସ୍ ।
୧୩ ନେନେ ମସାନେ ରକମ୍ ଣ୍ତୁ । ମେଁ ନିଜର୍ ସାର୍ମୁଆଁ ଡାଚେ ଡିରକମ୍ ଡା ଡୁଂୱେକ୍ନେ ମେଁ ତାର୍କିଗ୍ନେ ଅବସ୍ତା ଇଶ୍ରାୟେଲ ରେମୁଆଁଇଂ କିକେ ଆୟାଆର୍ ଣ୍ତୁ ।
୧୪ ସତେଆ ମେଁଇଂନେ ମନ୍ଆଣ୍ଡେଂ ନସ୍ଟ ଡିଙ୍ଗ୍ଲେଃକେ । ଏବେ ଡିଗ୍ ବାୱିର୍ ନିଅମ୍ ପଡ଼େନେ ବେଲା ମେଁଇଂନେ ସାର୍ମୁଆଃନ୍ନିଆ ଡିଡା ଲେଃକେ । ଜିସୁ କ୍ରିସ୍ଟନେ ଏତେ ମିସେଚେ ଲେଃନେ ବାନ୍ ମାତର୍ ଆତେନ୍ ଡିଡି ସ୍ଲ ଆଡିଙ୍ଗ୍ବକେ ।
୧୫ ମାତର୍ ଦେକ୍ରକମ୍ କି ଏକେ ଉଡ଼ିବେଲା ଏନ୍ ରେମୁଆଁଇଂ ମସାନେ ନିୟମ୍କେ ପଡ଼େଆର୍ଏ ଆତେନ୍ ଡିଡି ନ୍ସା ମେଇଂ ଆକ୍ନେ ଅରତ୍ ବୁଜେ ଆୟାଆର୍ ଣ୍ତୁ ।
୧୬ ମାତର୍ ମୁଇଂଜା ରେମୁଆଁ ଉଡ଼ିବେଲା ବଦ୍ଲେ ୱେଏ ବାରି ମେଁ ମାପ୍ରୁନେ ପ୍ଲା ଡିଙ୍ଗ୍ଏ ଆତେନ୍ ଡିଡାକ୍ନେ ରଃ ବିକେ ।
୧୭ ମାପ୍ରୁ ଆତ୍ମା ଡିଙ୍ଗ୍ଡିଙ୍କେ “ଆଣ୍ତିଅରିଆ ମାପ୍ରୁନେ ଆତ୍ମା ଲେଃକେ ଆତ୍ଅରିଆ ମୁକ୍ତି ଲେଃକେ ।”
୧୮ ନେନେ ଗାଗ୍ଡ଼େଇଂ ସୁନ୍ଦର୍ ଣ୍ତୁ । ନେନେ ସାପାରେ ମଇମା ବଦ୍ଲେ ଡିଙ୍ଗ୍କେ । ନେନେ ମେଁନେ ରକମ୍ ଡିଙ୍ଗ୍ନେ ନିଜେକେ ବଦ୍ଲେ ନେଡିଙ୍ଗ୍କେ । ଏନ୍ ବଦ୍ଲେଃନେ ନେନେ ବିତ୍ରେ ଜାବର୍ବାନ୍ ଜାବର୍ ମଇମା ଡୁଙ୍ଗ୍ବିଏ । ଆତେନ୍ ମଇମା ମାପ୍ରୁନେ ବାନ୍ ବାଲେଃ ।