ଗାଲାତୀୟମାନଙ୍କ ନିକଟକୁ ପାଉଲଙ୍କ ପତ୍ର
ଗାଲାତିୟଇଂନେ ଡାଗ୍ରା ପାଉଲ୍ନେ ଉଲିଆଃ
ଗାଲାତିୟ ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ଗାଲାତିୟ ଉଲିଆଃ ବେକ୍ନେ ପାଉଲ୍ନେବାନ୍ ଗ୍ନୁଆର୍ ଡିଂଲେଃକେ ୧:୧ଆକେନ୍ ଉଲିଆଃନେ ଗାଲାତିୟ ମଣ୍ଡଲିନେ ବିସ୍ବାସିଇଂକେ ଜିସୁ କିସ୍ଟନେ ଜନମ୍ନେ ୪୮-୫୭ କିସ୍ଟାବ୍ଦ ବିତ୍ରେ ଗ୍ନୁଆର୍ ଡିଂଲେଃଗେ । ଡିଂଲେଃଏ ଗାଲାତିୟଇଂ ରୋମୀୟ ଦେସ୍ନେ ଗାଲାତିୟନ୍ନିଆ ବାସାଡିଂଗେ । ପାଉଲ୍ ଆକେନ୍ ଉଲିଆଃ ଗୁଆର୍ନେ ବେଲା ଆଣ୍ଡି ଲେଃଗେ ଆକେନ୍ ପଣ୍ଡିତ୍ଇଂ ମ୍ୟାଃଆଲେଃଆର୍ଗେ ମାତର୍ ଏଫିସ କି କରନ୍ଥି ଆକେନ୍ ମ୍ବାକ୍ଲିଗ୍ ଟାନ୍ ଡିଂଲେଃଏ ଡାଗ୍ଚେ ବାସଙ୍ଗ୍ଡିଂଆର୍କେ ।
ପାଉଲ୍ ଗାଲାତିୟ ମଣ୍ଡଲିନେ ମ୍ବାୟା ଜିଉଦି ଆରି ଅଣଜିଉଦି କିସ୍ଟିୟାନ୍ଇଂନେ ଟିକନା ବିଃଚେ ଉଲିଆଃ ଗୁଆର୍ଡିଂକେ । ବିନ୍ବାବ୍ରେ ବଣ୍ଡ ବାବବାଦିକେ ବାଃଲିର୍ବାତା ଡିଂନେ ନ୍ସା ଗୁଆର୍ବଗେ ଆତେନ୍ କିସ୍ଟିୟାନ୍ଇଂକେ ବାୱିର୍ ନିୟମ୍ନେ ଜିଉଦି ନିୟମ୍କେ ମାନେଃ ନ୍ସା ବାସଙ୍ଗ୍ଡିଂକେ ବିନ୍ବାବ୍ରେ ପବିତ୍ର ନିୟମ୍ ବିସୟ୍ରେ । କିସ୍ଟିୟାନ୍ଇଂନେ ବିତ୍ରେବାନ୍ ଉଃଡ଼ିକ୍ଲିଗ୍ ଦଲ୍ ଲେଃଗେ ଆଜାଣ୍ଡେଇଂକେ ଜୁଡାଇଜିମ୍ ବାସଙ୍ଗ୍ଆର୍ଡିଂଗେ । ମେଇଂ ଅଣଜିଉଦି କିସ୍ଟିୟାନ୍ଇଂକେ ପବିତ୍ର ନିୟମ୍ ମାନେଃନ୍ସା ବାସଙ୍ଗ୍ଆର୍ଡିଂଗେ । ମେଇଂ ଣ୍ଡିଗ୍ ପାଉଲ୍ ବେବକ୍ନେ ଅଦିକାର୍ ବିସୟ୍ରେ ପ୍ରସ୍ନ ଡିଂବଗେ । ପାଉଲ୍ ଉଃଡ଼ିକ୍ଲିଗ୍ ଉଃସ୍ରା ଏତେ ମେଁ ବେବକ୍ନେ ସାମୁଆଁ ବାସଙ୍ଗ୍ଚେ ମେଇଂକେ ବିରଦ୍ ଡିଂଡିଂକେ ୧:୧୧–୨:୧୪ ବାରି ଜିସୁ କିସ୍ଟକେ ବିସ୍ବାସ୍ ଡିଂନେ ବାନ୍ ଉଦାର୍ ନେବାଏ ଆକେନ୍ ଆଃବୁଜେଚେ ନିମାଣ୍ଡା ସାମୁଆଁକେ ଆମ୍ବ୍ର ଡିଂକେ ୨:୧୬ । ମେଃନେ ଇସ୍ପର୍ନେ ଲିବିସଃବାନ୍ ଡିଂଲେଃଏ ରେମୁଆଁ ମେଃନେ ଡିଂବଏ ଆତ୍ବାନ୍ ଣ୍ଡୁ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ପାଉଲ୍ନେ ସାର୍ଲ । ୧:୧-୫
୨. ପାଉଲ୍ନେ ସିସେ ଜିବନ୍ ମେଁନେ ସିକ୍ୟା ବିଃନେ ଅଦିକାର୍ ନିୟମ୍ନେ କାମ୍ଇଂ ବିସୟ୍ରେ । ୧:୬–୨:୨୧
୩. ନିୟମ୍ନେ କାମ୍ ବାରି ଇସ୍ପର୍ନେ ଲିବିସଃବାନ୍ ଉଦାର୍ ବିସୟ୍ରେ । ୩:୧–୪:୩୧
୪. ନିମାଣ୍ଡା କିସ୍ଟିୟାନ୍ ଡିଂଚେ ବ୍ରୁଆ ଡିକେଃ ନ୍ସା ଆଦେସ୍ । ୫:୧–୬:୧୦
୫. ପାଉଲ୍ନେ ସାର୍ଲ ଆରି ଇସ୍ପର୍ନେ ବାନ୍ ଜିବନ୍ ଆଃବଦ୍ଲେନେ ବିସୟ୍ରେ । ୬:୧୧-୧୮
୧
ଗାଲାତିୟ ମଣ୍ଡଲିନିଆ ପ୍ରେରିତ୍ ପାଉଲ୍ନେ ଉଲିଆ
୧ ନେଂ ପାଉଲ୍ ମୁଇଂ ପ୍ରେରିତ୍ ସିସ୍ ରେମୁଆଁନେ ବାନ୍ ଣ୍ଡୁ କି ରେମୁଆଁଇଂନେ ବିତ୍ରେବାନ୍ ୱା ଆବକେ ଣ୍ଡୁ ଡାଗ୍ଲା ମାପ୍ରୁ ଜିସୁ କିସ୍ଟନେ ଆଡ଼ା ବାରି ଆଣ୍ଡିନେ ଆବା ଇସ୍ପର୍ ଆମେକେ ଗୁଏକ୍ନେଣ୍ଡ୍ରେଇଂ ଆଡ଼ା ଆତଡ଼ିଆକେ ମେଁ ବାନ୍ ।
୨ ଆରି ନେଂ ଏତେ ଲେକ୍ନେ ବୟାଁଇଂ ସର୍ତେ ଗାଲାତିୟ ମଣ୍ଡଲିଇଂକେ ସାର୍ଲ ଡିଂକେ ।
୩ ନେନେ ଆବା ଇସ୍ପର୍ ବାରି ମାପ୍ରୁ ଜିସୁ କିସ୍ଟବାନ୍ ଅନୁଗ୍ରଅ ବାରି ସାନ୍ତି ଆପେକେ ବିଲେ ।
୪ ମେଁ ନେଇଂନେ ଆବା ଇସ୍ପର୍ ଇକ୍ଚା ସୁଗୁଆ ଆକେନ୍ ପାପ୍ ତ୍ନ ଲେଃକ୍ନେ ଦର୍ତନିବାନ୍ ଆନେକେ ଉଦାର୍ ଡିଂନେ ନ୍ସା ନେନେ ପାପ୍ନେସା ମେଁ ନିଜେ ଜିବନ୍ ବିକେ ।
୫ ଜୁଗ୍ ଜୁଗ୍ ମେଁନେ ମ୍ନାଃ ଡିଂଲେ । ଆମେନ୍ ।
ମୁଇଂ ମାତର୍ ନିମାଣ୍ଡାସାମୁଆଁ
୬ କିସ୍ଟନେ ଦୟାରେ ଜାଣ୍ଡେ ଆପେକେ ୱାକେ ମେଇଂନେ ବାନ୍ ପେଇଂ ଜେ ଅଃକେନ୍ ଜିଆଃ ତେରେପେତେ ଡିଂଚେ ବିନ୍ନେ ନିମାଣ୍ଡାସାମୁଆଁ ଆଡ଼ା ବଲ୍ ବାପେଡିଂକେ ଆକ୍ବାନ୍ ନେଂ ଇରିଆତୁଗ୍ ଡିଂଣ୍ଡିଂକେ ।
୭ ସତ୍ରେ ବିନ୍ ମେଃଡିଗ୍ ନିମାଣ୍ଡାସାମୁଆଁ ଣ୍ଡୁ । ମାତର୍ ନେଙ୍ଗ୍ ଦେକ୍ରକମ୍ ବାସଂଣ୍ଡିଂକେ ଡାଗ୍ଲା ଉଡ଼ିରୁଆ କିସ୍ଟ ନିମାଣ୍ଡାସାମୁଆଁକେ ବିନ୍ ରୁପ୍ ବିଚେ ଆପେକେ ଆଙ୍କ୍ ଆନ୍ତ୍ ଆଡିଂନେସା ଚେସ୍ଟା ଆଃଡିଂଡିଂକେ ।
୮ ମାତର୍ ଆଣ୍ଡିନେ ନିମାଣ୍ଡାସାମୁଆଁ ନେ ପେ ଅରିଆ ବାସଙ୍ଗ୍ ଡିଂନେବକେ ଜଦି ମେଁବାନ୍ ବିନ୍ନେ ମୁଇଂ ନିମାଣ୍ଡାସାମୁଆଁ ନେ ନିଜେ ଣ୍ଡୁଲା କିତଂ ଦୁତ୍ ବାସଙ୍ଗ୍ ଡିଂଏ ତେଲା ମେଁ ନର୍କେ ଲଃଚେ ଡଣ୍ଡ୍ ବାଲେଃ ।
୯ ଡିରକମ୍ ନେ ଅଃସେ ବାସଂନେବଗେ ଦେତ୍ସୁଗୁଆ ନେଂ ଆରି ମୁଇଂତର୍ ବାସଂଣ୍ଡିଂକେ ଆଣ୍ଡିନେ ନିମାଣ୍ଡାସାମୁଆଁ ପେ ସା ପେଲେଗେ ମେଁବାନ୍ ବିନ୍ ମେଃଡିଗ୍ ନିମାଣ୍ଡାସାମୁଆଁ ଜଦି ବାସଙ୍ଗ୍ ଡିଂଏ ତେଲା ମେଁ ନର୍କେ ଡଣ୍ଡ୍ ବାଲେଃ ।
୧୦ ଆକେନ୍ ଦ୍ରିଗ୍ଚେ ପେଇଂ ମେଃ ମନେ ଡିଂପେଡିଂକେ ଜେ, ନେଙ୍ଗ୍ ରେମୁଆଁଇଂନେ ସପଟ୍ ବାନ୍ସା ଚେସ୍ଟା ଡିଂଣ୍ଡିଂକେ ? ଣ୍ଡୁ ଅଃନା ଡିଗ୍ ଣ୍ଡୁ । ନେଙ୍ଗ୍ ଚାଏଁ ଣ୍ଡିଙ୍ଗ୍କେ ଇସ୍ପର୍ନେ ସପଟ୍ । ନେଙ୍ଗ୍ ମେଃନେ ରେମୁଆଁଇଂ ଡାଗ୍ରା ଉଡ୍ରା ଆଡିଂନେସା ଇକ୍ଚା ଡିଂଣ୍ଡିଂକେ ? ନେଙ୍ଗ୍ ଜଦି ଏଃଜାକ ରେମୁଆଁଇଂ ଡାଗ୍ରା ଉଡ୍ରା ଆଡିଂନେସା ଚେସ୍ଟା ମ୍ପାଡିଂ ତେଲା ନେଙ୍ଗ୍ ଏକେ କିସ୍ଟନେ ସେବକ୍ ଡିଂନାଲେ ପାଡିଂ ଣ୍ଡୁ ।
ପାଉଲ୍ ଡିରକମ୍ ପ୍ରେରିତ୍ ସିସ୍ ଡିଂକେ
୧୧ ଅ ବୟାଁ ବାରି ତନାଇଂ ଆପେକେ ବାସଙ୍ଗ୍ଚେ ବଣ୍ଡିଂକେ ନେଙ୍ଗ୍ ଆଣ୍ଡିନେ ନିମାଣ୍ଡାସାମୁଆଁ ମ୍ବାଲିର୍ଏ ଆତେନ୍ ରେମୁଆଁ ବାନ୍ ଆପାଙ୍ଗ୍କେ ଣ୍ଡୁ ।
୧୨ ନେଙ୍ଗ୍ ଆଣ୍ଡିନେ ରେମୁଆଁ ଆଡ଼ା ବାନ୍ ଆତେନ୍ ନାବାକେ ଣ୍ଡୁ ବା ଜାଣ୍ଡେ ଆନେଙ୍ଗ୍କେ ଆରାସିକେକେ ଣ୍ଡୁ । ନିଜେ ଜିସୁ କିସ୍ଟ ଆତେନ୍ ନେଙ୍ଗ୍ ଅରିଆ ବାଲିର୍ ବକେ ।
୧୩ ପେଇଂ ନିଂନେ ଅସେନେ ଜିବନ୍ ସାମୁଆଁରେ ଦ୍ରିଗ୍ ପେଲେକେ । ନେଙ୍ଗ୍ ଜିଉଦି ଦର୍ମ ନ୍ଲେଗେ । ନେଙ୍ଗ୍ ପର୍ମେସର୍ନେ ମଣ୍ଡଲିକେ ତାଡ଼ନା ବିଣ୍ଡିଂଗେ । ନେଙ୍ଗ୍ ମଣ୍ଡଲିଇଂକେ ଦଦ୍ୟା ଆଡିଂନେସା ଚେସ୍ଟା ଡିଂଣ୍ଡିଂଗେ ।
୧୪ ନେଙ୍ଗ୍ ଜିଉଦି ଦର୍ମ ପାଲନ୍ ଡିଂନ୍ନିଆ ନେଙ୍ଗ୍ନେ ବୟସ୍ ସୁଗୁଆ ବିନ୍ନେ ଜିଉଦିଇଂନେ ଆଡ଼ା ସିସେ ନ୍ଲେଗେ । ବାୱିର୍ନେ ନିୟମ୍ଇଂ ପାଲେନ୍ସା ନେଙ୍ଗ୍ ଜାବର୍ କଷ୍ଟ ଡିଂଣ୍ଡିଂଗେ । ଆକେନ୍ ନିୟମ୍ଇଂନେ ନିୟମ୍ ନେନେ ଅଃସେନେ ରେମୁଆଁଇଂନେ ଆଃଡ଼ା ସେନୁଗ୍ ଲେଃଗେ ।
୧୫ ମାତର୍ ପର୍ମେସର୍ ନେଙ୍ଗ୍ନେ ଜନମ୍ ଅଃସେ ଆନେଙ୍ଗ୍ ଅନୁଗ୍ରଅ ଡିଂଚେ ସ୍ରି ଡୁଂଡବଗେ । ମେଁ ଆର୍ମେ ବଗେ ଜେ
୧୬ ନେଙ୍ଗ୍ ଅଣଜିଉଦିଇଂକେ ମେଃନେ ଉଂଡେ ଜିସୁ କିସ୍ଟନେ ନିମାଣ୍ଡାସାମୁଆଁ ମ୍ୱାସଙ୍ଗ୍ଏ । ପର୍ମେସର୍ ମେଃନେ ଉଂଡେ ସାମୁଆଁରେ ବାସଙ୍ଗ୍କେ ଉଡ଼ିବେଲା ପର୍ମେସର୍ ଆନେଙ୍ଗ୍କେ ୱାକେ ନେଙ୍ଗ୍ ଆଣ୍ଡିନେ ରେମୁଆଁ ଏତେ ନାକୁଡ଼େକେ ବା ସାଇଜ୍ୟ ଡୁଂଡ ନାବକେ ଣ୍ଡୁ ।
୧୭ ଦେକ୍ରକମ୍କି ନେଙ୍ଗ୍ ଅଃସେ ବାନ୍ ଜାଣ୍ଡେଇଂ ପ୍ରେରିତ୍ ସିସ୍ ଡିଂଲେ ଆର୍ଗେ । ମେଇଂ ଏତେ କୁଡ଼େନ୍ସା ଯିରୁସାଲାମ୍ ୱେନାଲେଃଗେ । ଏଲେ ଡିଗ୍ ନେଙ୍ଗ୍ ଜିଆ ଜିଆ ଆରବ ଦେସ୍ ୱେନ୍ଲେଗେ ବାରି ଇଡ଼ିଂ ଦାମାସ୍କସ୍ ଅରିଆ ଆଆଣ୍ଡେକେ ।
୧୮ କିମେନେ ଞ୍ଜିମୁଆଁ ଇଡ଼ିଂ ପିତର୍ ଏତେ ସାଃତିଂନେସା ଯିରୂଶାଲମ୍ ଉଁୱେକେ ବାରି ମେଁ ଏତେ ମ୍ୱାର୍ ସାନ୍ତା ନ୍ଲେଗେ ।
୧୯ ମାପ୍ରୁନେ ବୟାଁ ଜାକୁବ୍କେ ଆନ୍ତାର୍ଚେ ନେଙ୍ଗ୍ନେ ବିନ୍ ମେଃଡିଗ୍ ପ୍ରେରିତ୍ ସିସ୍ ଏତେ କୁଡ଼େଃ ନାଲେଗେ ଣ୍ଡୁ ।
୨୦ ନେଙ୍ଗ୍ ମେଁ ଗୁଆର୍ ଣ୍ଡିଂକେ ଆତେନ୍ ସତ୍; ଇସ୍ପର୍ ମ୍ୟାଃ ଲେଃକେ ନେଙ୍ଗ୍ ତ ମିଚ୍ ବାଲିର୍ ନାଡିଂକେ ଣ୍ଡୁ !
୨୧ ଆକେନ୍ ଇଡ଼ିଂ ନେଙ୍ଗ୍ ସିରିଆ ଆରି ସିଲିଷୀଆନେ ଗୁଲେ ଜାଗାନ୍ନିଆ ୱେନ୍ଲେଗେ ।
୨୨ ଆତେନ୍ ବେଲା ଜିଉଦାପ୍ରଦେଶ୍ ଲେକ୍ନେ କିସ୍ଟାନ୍ ମଣ୍ଡଲିନେ ବିସ୍ବାସିଇଂ ଆନେଙ୍ଗ୍କେ ମୁଇଂଜା ନିମାଣ୍ଡା ବାବ୍ରେ ମ୍ୟାଃ ଆଲେଆର୍କେ ଣ୍ଡୁ ।
୨୩ ନେଙ୍ଗ୍ ବିସୟ୍ରେ ବିନ୍ ରେମୁଆଁଇଂ ଜା ବାଲିର୍ବଗେ ମେଇଂ ମାତର୍ ଅଃତେନ୍ ଆଃ ମ୍ୟାଃଲେଆର୍ଗେ । ମେଇଂ ଦ୍ରିଗ୍ ଲେଆର୍ଗେ ଆଣ୍ଡିନେ ରେମୁଆଁ ଆନେକେ କସ୍ଟ ବିଃଡିଂଗେ ବାରି ମେସୁଆ ନେ ଦର୍ମକେ ଦଂସ ଆଡିଂନେସା ଚେସ୍ଟା ଡିଂଆର୍ ଡିଂଗେ ଏବେ ମେଁ ଆତେନ୍ ଦର୍ମକେ ବାସଙ୍ଗ୍ ଡିଂଡିଂକେ ।
୨୪ ଏନ୍ସା ମେଇଂ ନେଙ୍ଗ୍ସା ଇସ୍ପର୍କେ ପ୍ରସଂଶା ଡିଂଡିଂଗେ ।