ଥେସଲନିକୀୟମାନଙ୍କ ନିକଟକୁ ପାଉଲଙ୍କ ପ୍ରଥମ ପତ୍ର
ତେସଲନିକିୟଇଂନେ ଡାଗ୍ରା ପାଉଲ୍ନେ ପର୍ତୁମ୍ ଉଲିଆଃ
ତେସଲନିକିୟ ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ମୁଲ୍ ତେସଲନିକିୟ ବେକ୍ନେ ପାଉଲ୍ ବାନ୍ ଗୁଆର୍ବଗେ୧:୧। ଆକେନ୍ ଡିଂଲେଃଏ ପାଉଲ୍ନେ ବାନ୍ ମୁଲ୍ ଉଲିଆ ଗୁଆର୍ବଗେ ବାରି ଆତେନ୍ ବାଇବଲ୍ନେ ମୁଇଙ୍ଗ୍ ବାଗ୍ ଲେଃକେ । ଆକେନ୍ ଜିସୁ କ୍ରିସ୍ଟନେ ଜନମ୍ନେ ତେପେଂଚାଃନେ ୫୧ ମୁଆଃ ଇଡ଼ିଙ୍ଗ୍ ଗୁଆର୍ବକେ । ପାଉଲ୍ ଉଡ଼ିବେଲା ତେସଲନିକିୟ ମଣ୍ଡଲିକେ ଉଲିଆ ଗୁଆର୍କେ ଅଃତେନ୍ ବେଲା ମେଁ କରନ୍ଥିୟ ମଣ୍ଡଲିନ୍ନିଆ ଲେଃଗେ । ମୁଡ଼ି ମଣ୍ଡଲିକେ ମେଁ ୨ ମିସ୍ନାରି ଅଲେଙ୍ଗ୍ ୱେ ବେଲା ଆତେନ୍ ମଣ୍ଡଲି ଆଃରେବଗେ ପ୍ରେରିତ୍ ୧୭:୧-୧୦ । ଆକେନ୍ ପ୍ରେରିତ୍ ଉଲିଆନ୍ନିଆ ବାସଂବକେ ଜେ ଆକେନ୍ ଉଡ଼ିକ୍ଲିଗ୍ ଜିହୁଦି ବାରି ଉଡ଼ିରୁଆ ଗ୍ରୀକ୍ ବ୍ନାସାରେ ବାସଂଡିଙ୍ଗ୍କ୍ନେ ରେମୁଆଁଇଂନେ ବାନ୍ ଆଃରେବଗେ ।
ପାଉଲ୍ ମଣ୍ଡଲି ଆଃରେକ୍ନେ ଇଡ଼ିଙ୍ଗ୍ ମେଁ ମାଲେ ଦିନ୍ ତେସଲନିକିୟନ୍ନିଆ ଲେଃଆୟାକେ ଣ୍ଡୁ । ତେନ୍ସା ସାରାସାରିନ୍ନିଆ ଆତ୍ତେ ଲେଃକ୍ନେ ବିସ୍ବାସିଇଂକେ ସାଆସ୍ ବିନେସା ମେଁ ଆକେନ୍ ଉଲିଆ ବକେ । ମୁଇଙ୍ଗ୍ କ୍ରିସ୍ଟିୟାନ୍ ଡିରକମ୍ ମ୍ବ୍ରନେ ଡିଂଏ ଆକେନ୍ ଉଲିଆନ୍ନିଆ ଉଃଡ଼ି ସାମୁଆଁ ବାରି ବିନ୍ବିନ୍ ମାମୁଲ୍ ଆଦେସ୍ ଲେଃକେ ।
ପାଉଲ୍ ଉଡ଼ିଟାନ୍ନ୍ନିଆ ବାର୍ମୁଇଂତର୍ ପାଙ୍ଗ୍ନେ ବିସଏରେ ମନ୍ ଆଃମିସୁ ବିଆର୍ଏ । ଡିଂୟାଏ ତେସଲନିକିୟ ମଣ୍ଡଲିନେ ବିସ୍ବାସିଇଙ୍ଗ୍ ବିନ୍ ବାବେ ଆକେନ୍ ବିସଏରେ ମ୍ୟାଃଲେଆର୍ଗେ । ପାଉଲ୍ ମ୍ବାର୍ତର୍ ପାଙ୍ଗ୍ନେ ବିସଏରେ ବାସଙ୍ଗ୍ଚେ ଡିରକମ୍ ଇସ୍ପର୍କେ ସାର୍ଦା ଆଃଡିଂନେ ସୁଗୁଆ ବ୍ରୁଆ ଡିକେଃ ଡିଂନେ ନ୍ସା ଆଦେସ୍ ବିଏ ୫:୬-୮ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ପାଉଲ୍ ମଣ୍ଡଲିକେ ସାର୍ଲ ଆମ୍ୟାଚେ ବାରି ଇସ୍ପର୍କେ ଦନ୍ୟବାଦ୍ ବିଚେ ଆକେନ୍ ଉଲିଆ ଆରାମ୍ । ୧
୨. ଇଡ଼ିଙ୍ଗ୍ ତେନ୍ ତିମତି ଡୁଂପାଙ୍ଗ୍ବକ୍ନେ ବାରି ମେଁନେ କାମ୍ ବିସଏରେ ଆଃବୁଜେକେ । ୨:୧–୩:୧୩
୩. ପାଉଲ୍ ଆଦେସ୍ ବିଏ ଜେ କ୍ରିସ୍ଟିୟାନ୍ଇଂ ଜିସୁ କ୍ରିସ୍ଟନେ ବାରି ପାଙ୍ଗ୍ନେ ତାର୍କିଗ୍ନ୍ନିଆ ଡିରକମ୍ ବ୍ରୁଆ ଡିକେଃ ଡିଂନେ ଦର୍କାର୍ । ୪:୧; ୫:୧୫
୪. ପାଉଲ୍ ଆର୍ମୁଇଂତର୍ ମଣ୍ଡଲିକେ ସାର୍ଲ ଡିଙ୍ଗ୍ଡିଙ୍କେ ବାରି ଆମେଇଂକେ ସତ୍ ବାବ୍ରେ ଚିଟି ଲଃନେସା ବାସଂଚେ ଆଃଡାଡିଂକେ । ୫:୧୬-୨୮
୧
୧ ପାଉଲ୍ ସିଲ୍ୱାନ ବାରି ତିମତିନେ ତେସଲନିକିୟନ୍ନିଆ ଲେଃକ୍ନେ ରେମୁଆଁଇଂନେ ଆବା ଇସ୍ପର୍ ବାରି ମାପ୍ରୁ ଜିସୁ କିସ୍ଟନେ ବିସ୍ବାସି ମଣ୍ଡଲିକେ ଏନ୍ ଉଲିଆ । ଆବା ଇସ୍ପର୍ ବାରି ମାପ୍ରୁ ଜିସୁ କ୍ରିସ୍ଟନେ ଲିବିସ ବାରି ସାନ୍ତି ଆପେକେ ଲେଲେ ।
ତେସଲନିକିୟଇଂନେ ନ୍ସା ଜିବନ୍ ବିସ୍ବାସ୍
୨ ନେନେ କାଲାଆଃ ପେନେ ସାପାରେ ନ୍ସା ଇସ୍ପର୍କେ ଦନ୍ୟବାଦ୍ ବିନେ ଲେଃଏ ବାରି ନେନେ ପାର୍ତନାନ୍ନିଆ ପେନେ ବିସୟ୍ରେ କାଲାଆଃ ଆମ୍ୟା ନେମ୍ୟାଃକେ ।
୩ ନେ ଆବା ଇସ୍ପର୍ନେ ଡାଗ୍ରା ସୁମରନା ଡିଙ୍ଗ୍ନେମ୍ୟାକେ ଡିରକମ୍ ପେଇଂ ନିଜର୍ ବିସ୍ବାସ୍କେ ସ୍ଲେନିଆ ଆମିସୁ ପେବକେ ଆଲାଦ୍ନିଆ ଚାଗ୍ ଲାଣ୍ଡାଚେ ଡିରକମ୍ ଡାଟ୍ରେ କସ୍ଟ ପଡ଼େପେଡିଙ୍ଗ୍କେ ବାରି ନେନେ ମାପ୍ରୁ ଜିସୁ କିସ୍ଟନେ ଡାଗ୍ରା ପେଇଂନେ ଆସା ଡିରକମ୍ ଡାଟ୍ ।
୪ ବୟାଁ ବାରି ତନାଇଂ ନେନେ ମ୍ୟାନେଲେକେ ଜେ ଇସ୍ପର୍ ଆପେକେ ଆଲାଦ୍ ଡିଂଡିଂକେ ବାରି ମେଇଂନେ ନିଜର୍ନେ ରେମୁଆଁ ଡିଙ୍ଗ୍ନେ ସା ଆପେକେ ସ୍ରି ବକେ ।
୫ ମାତର୍ ସାମୁଆଁନ୍ନିଆ ଣ୍ଡୁ ପବିତ୍ର ଆତ୍ମାନେ ସାଇଜରେ ବପୁନେ ଏତେ ନିମାଣ୍ଡାସାମୁଆଁନେ ସତ୍କେ କ୍ଲିଗ୍ଡା ବାବ୍ରେ ଗୁଆର୍ଚେ ନେନେ ଆତେନ୍ ପେନେ ଡାଗ୍ରା ବାସଂ ନେବଗେ । ପେଇଂ ପେମ୍ୟାକେ ପେ ଏତେ ଲେଃନେବେଲା ନେନେ ଡିରକମ୍ ବ୍ରୁଆ ଡିଂକେ ଡିଙ୍ଗ୍ନେଲେଃଗେ; ଡିରକମ୍ ପେଇଂନେ ନିମାଣ୍ଡା ନେନେ ଜିବନ୍ନେ ଆସା ଲେଃଗେ ।
୬ ପେଇଂ ଆନେକେ ବାରି ନେନେ ମାପ୍ରୁନେ ପ୍ଲା ୱେପେଲେଃଗେ ବାରି ମାଲେ ଡଣ୍ଡ୍ ପେବାଲା ଡିଗ୍ ପବିତ୍ର ଆତ୍ମାନେ ବାନ୍ ବାଲେକ୍ନେ ସାର୍ଦା ଏତେ ଆତେନ୍ ନିମାଣ୍ଡାସାମୁଆଁନେ ସାଃ ପେଲେଗେ ।
୭ ତେସା ପେଇଂ ମାସିଦୋନିଆ ବାରି ଆଖାୟାନ୍ନିଆ ଲେଃକ୍ନେ ସାପା ବିସ୍ବାସିଇଂନେ ଆତ୍ଲା ନିମାଣ୍ଡା ରେମୁଆଁ ସୁଗୁଆ ଡିଙ୍ଗ୍ପେଲେଗେ ।
୮ ପେଇଂନେ ଡାଗ୍ରା ଜା ମାତର୍ ମାପ୍ରୁନେ ନିମାଣ୍ଡା ସାମୁଆଁ ମାସିଦୋନିଆ ବାରି ଆଖାୟାନ୍ନିଆ ବେପ୍ରେ ୱେଲେଗେ ଆତେନ୍ ଣ୍ଡୁ; ମାତର୍ ପେଇଂନେ ଇସ୍ପର୍ନେ ବିସ୍ବାସ୍ ସାମୁଆଁ ସାପା ପାକା ଦେକ୍ ରକମ୍ ବାବ୍ରେ ତ୍ନା ଲେଃକେ ଜେ ଏନ୍ ବିସୟ୍ରେ ନେନେ ବାରି ମାଲେ ମେଃଡିଗ୍ ବାସଂନେ ଦର୍କାର୍ ଣ୍ଡୁ ।
୯ ନେନେ ପେ ଡାଗ୍ରା ୱେନେ ବେଲା ପେଇଂ ଡିରକମ୍ ଆନେକେ ସାର୍ଦାରେ ପେସାଃକେ ବାରି ମୁର୍ତ୍ତି ପୁଜା ଆନ୍ତାର୍ଚେଃ ସତ୍ ବାରି ଜିବନ୍ ଲେକ୍ନେ ଇସ୍ପର୍ନେ ପାର୍ତନା ଡିଙ୍ଗ୍ନେସାଃ ସେନୁଗ୍ ପାଙ୍ଗ୍ପେଲେଃଗେ;
୧୦ ବାରି ଡିରକମ୍ ଇସ୍ପର୍ନେ ରିସାବାନ୍ ଆନେକେ ରକ୍ୟା ଡିଙ୍ଗ୍ନେସାଃ ଗୁଏକ୍ନେବାନ୍ ତଡ଼ିଆଲେକ୍ନେ ମେଁନେ ଉଙ୍ଗ୍ଡେ ଜିସୁ ବାରିପାଙ୍ଗ୍ନେକେ ପେଇଂ ଉର୍ଲେଚେ ପେଲେଃକେ ଏନ୍ ସାପା ବିସୟ୍ରେ ଆତ୍ଡାଗ୍ରାନେ ରେମୁଆଁଇଂ ବାଃଲିର୍ବାତା ଡିଂଆର୍ଡିଂକେ ।