୩
ନେ ନ୍ସା ପାର୍ତନା ଡିଙ୍ଗ୍ପା
୧ ବୟାଁ ବାରି ତନାଇଂ ନେଙ୍ଗ୍ନେ ସାରାସାରି ସାମୁଆଁ ନେଃନେ ନ୍ସାଃ ପାର୍ତନା ଡିଙ୍ଗ୍ପା, ପେନେ ଡାଗ୍ରା ଡିରକମ୍ ମାପ୍ରୁନେ ସାମୁଆଁ ଗିଆଃ ଗିଆଃ ବେପ୍ରେ ଲେଃଗେ, ଆତେନ୍ ଡିରକମ୍ ଦେତ୍ସୁଗୁଆ ଗିଆଃ ସମାନ୍ ଡିଙ୍ଗ୍ଚେ ସାପା ପାକା ୱେଚାଏ ।
୨ ବାରି ଡିଗ୍ ପାର୍ତନା ଡିଙ୍ଗ୍ପା ଇସ୍ପର୍ ଡିରକମ୍ ଆନେକେ ଦୁସ୍ଟ ବାରି ଦଦ୍ୟା ରେମୁଆଁଇଂନେ ନ୍ତିବାନ୍ ଆମ୍ବ୍ରଏ ମେଁନ୍ସା ଡାଗ୍ଲା ସାପାରେ ନିମାଣ୍ଡାସାମୁଆଁରେ ସତ୍ ଆମାନେଃ ଆର୍ଣ୍ଡୁ ।
୩ ମାତର୍ ମାପ୍ରୁ ବିସ୍ବାସ୍ଣ୍ଡ୍ରେ ! ମେଁ ଆପେକେ ବପୁ ବିଃଏ ବାରି ପାପ୍ବାନ୍ ରକ୍ୟା ଡିଙ୍ଗ୍ଏ ।
୪ ପେନେ ଆଡ଼ାତ୍ରା ଆସା ବନ୍ସା ମାପ୍ରୁ ଆନେକେ ଆସା ବିଃବକେ ବାରି ନେନେ ମେଁନେ ବାସଙ୍ଗ୍ନେଡିଙ୍ଗ୍ ଆତେନ୍ ପେ ଜେ ଡିଙ୍ଗ୍ପେଲେଃଏ ଏନ୍ ବିସୟ୍ରେ ନେନେ ସତେଆ ଦାବି ନେଡିଂଏ ।
୫ ଆରି ମାପ୍ରୁ ପେନେ ମନ୍କେ ଇସ୍ପର୍ନେ ଆଲାଦ୍ ଆରି କିସ୍ଟନେ ସାଆସ୍ ରକମ୍ନେ ଗାଲିନ୍ନିଆ ସିସେନୁଗ୍ ଆଃଡିଂଲେ ।
ସ୍ଲେନେ ଦର୍କାର୍
୬ ଅ ବୟାଁ ବାରି ତନାଇଂ ଜାଣ୍ଡେଇଂ ଅଲ୍ସୁଆ ବ୍ରୁଆ ଡିକେଃ ଡିଙ୍ଗ୍ ଆର୍ଏ ବାରି ନେନେବାନ୍ ବାଲେକ୍ନେ ସିକ୍ୟା ଅନୁସାରେ ଆଚରନ୍ ଆଡିଙ୍ଗ୍ ଆର୍ ଣ୍ଡୁ; ମାପ୍ରୁ ଜିସୁ କିସ୍ଟନେ ମ୍ନିରେ ଆପେକେ ଆଦେସ୍ ବିନେଡିଙ୍ଗ୍କେ ଆତେନ୍ ବୟାଁଇଂନେବାନ୍ ସ୍ଲ ଲାଃଲାପା ।
୭ ତେଲାଡିଗ୍ ପେ ମ୍ୟା ପେଲେକେ ପେ କାମ୍ ଡିଙ୍ଗ୍କ୍ନେବାନ୍ ନେନେ ପ୍ଲା ପାଂନେ ଦର୍କାର୍ । ପେ ଏତେ ଲେଃନେ ବେଲା ନେନେ ଅଲ୍ସୁଆ ରକମ୍ ନେଲେଃଗେ ଣ୍ଡୁ ।
୮ ସରା ଡାବୁରେ ନେନେ ଜାଣ୍ଡେବାନ୍ ଚଙ୍ଗ୍ନେ ନେଚଂକେ ଣ୍ଡୁ । ବାରି ଜାଣ୍ଡେନେ ଆଡ଼ାତ୍ରା ଡିଗ୍ ଲିଗିଙ୍ଗ୍ ମାଡିଂନ୍ସା ନେନେ ଆମେ କସ୍ଟ ଆଃମ୍ୟାଚେ ସ୍ମି ମିଡିଗ୍ ମାଲେ ସ୍ଲେ ନେବଗେ ।
୯ ପେଇଂନେବାନ୍ ମେଃଡିଗ୍ ଗ୍ରଅନ୍ ଡିଂନେ ନ୍ସାଃ ଜେ ନେନେ ଅଦିକାର୍ ଣ୍ଡୁ ଆତେନ୍ ଣ୍ଡୁ ମାତର୍ ଡିରକମ୍ ପେଇଂ ଆନେଃକେ ଡିଙ୍ଗ୍ପେବକେ । ଆତେନ୍ସାଃ ନେ ପେଇଂଡାଗ୍ରା ନିଜେ ନିଜେକେ ନିମାଣ୍ଡା ରେମୁଆଁ ସୁଗୁଆ ଆଃସୁଏ ନ୍ସାଃ ଦେତ୍ରକମ୍ ନେଡିଙ୍ଗ୍କେ ।
୧୦ ପେଇଂ ଏଃତେ ଲେଃନେ ବେଲା ନେନେ ଆପେକେ ବାସଙ୍ଗ୍ନେବଗେ ମୁଡ଼ି ରେମୁଆଁ ସ୍ଲେନ୍ସାଃ ଇକ୍ଚା ଆଡିଂ ଣ୍ଡୁ ମେଁ ଆଚଙ୍ଗ୍ଲେ ।
୧୧ ଆକେନ୍ ବ୍ନାଲିର୍ ଏକେ ଜାକ ବାଲିର୍ ନେଡିଙ୍ଗ୍କେ ଡାଗ୍ଲା ନେନେ କବର୍ ବାନେଲେଃକ ଜେ ପେ ବିତ୍ରେ ଉଡ଼ିରୁଆ ଗାଣ୍ଡିଆ ବାବ୍ରେ ବ୍ରୁଆ ଡିଂକେ ଡିଂଆର୍ଡିଂକେ । ବାରି ବିନ୍ଣ୍ଡ୍ରେନେ ସ୍ଲେନିଆ ସରା କୁଡ଼େନେ ଆନ୍ତାର୍ଚେ ବିନ୍ ମେଃଡିଗ୍ ଆଡିଙ୍ଗ୍ ଆର୍ଣ୍ଡୁ ।
୧୨ ମାପ୍ରୁ ଜିସୁ କିସ୍ଟନେ ମ୍ନିରେ ନେନେ ଆତେନ୍ ରେମୁଆଁଇଂକେ ତରକ୍ ଆଡିଙ୍ଗ୍ନ୍ସା ଆମେଇଂକେ ବାଲିର୍ ନେଡିଙ୍ଗ୍କେ ମେଇଂନେ ପାରାନ୍ନିଆ ବାରି ଇକୁଡ଼ା ମିସୁଚେ ନିଜେ ବ୍ରୁଆନେ ଆର୍ମେ ନେଡିଂକେ ।
୧୩ ଏ ବୟାଁ ବାରି ତନାଇଙ୍ଗ୍ ସତ୍କାମ୍ ଡିଙ୍ଗ୍ନେସା ଆଲାକାଃଗେପା ।
୧୪ ଆକେନ୍ ଉଲିଆନିଆ ଆପେକେ ଆଣ୍ଡିନେ ବ୍ନାଲିର୍ ବେନେଡିଙ୍ଗ୍କେ ଡିଙ୍ଗ୍ଏତ ପେ ବିତ୍ରେ ବାନ୍ ଜାଣ୍ଡେ ଆତେନ୍ ପାଲନ୍ ଡିଙ୍ଗ୍ନ୍ସା ରାଜି ଆଡିଙ୍ଗ୍ ଣ୍ଡୁ । ଦେତ୍ରକମ୍ ରେମୁଆଁ ସାମୁଆଁ ବପା ବାରି ମେଁ ଏତେ ପେ ଆମିସୁଃଗେପା ।
୧୫ ତେଲା ମେଁ ଗିଆସଃଏ । ମାତର୍ ମେଁ ଆଡ଼ତ୍ରା ସତ୍ରୁ ରକମ୍ ବେବଆର୍ ଆଡିଂଲେଃ ବୟାଁ ରକମ୍ ଆମେକେ ତରକ୍ ଆଃଡିଙ୍ଗ୍ବିଃପା ।
ସାରାସାରି ସାମୁଆଁ
୧୬ ମୁଡ଼ି ମାପ୍ରୁ ନେଃନେ ସାନ୍ତିନେ ଚିନା ମେଁ ଆପେକେ କାଲାଆଃ ବାରି ସାପା ରକମ୍ ସାନ୍ତି ବିଃଲେ । ମାପ୍ରୁ ପେ ସାପାରେ ଡାଗ୍ରା ଲେଃଲେଃ ।
୧୭ ନେଙ୍ଗ୍ ନିଜର୍ ନ୍ତିଏତେ ଆକେନ୍ ଗୁଆର୍ ମ୍ୱକେ “ପାଉଲ୍ବାନ୍ ଦନ୍ୟବାଦ୍ ବିଃଣ୍ଡିଂକେ ।”
୧୮ ନେନେ ମାପ୍ରୁ ଜିସୁ କିସ୍ଟନେ ଦୟା ପେ ସାପାରେନେ ଜିବନ୍ନିଆ ଲିବିସ ଡିଂଲେଃ ।