ହିବ୍ରୁମାନଙ୍କୁ ଲିଖିତ ପତ୍ର
ଏବ୍ରିଇଂକେ ଗୁଆର୍କ୍ନେ ଉଲିଆଃ
ଏବ୍ରି ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ଏବ୍ରୀ ସାସ୍ତର୍ ମୁଇଂ ସାର୍ଦା ବିଃନେ ଉଲିଆଃ । ବାୱିର୍ ନିୟମ୍ନେ ବିନ୍ବିନ୍ ବାବବାନି ସାପା ପୁରନ୍ ଡିଂଲେଃକ୍ନେ ସାମୁଆଁ ଆକ୍ଅରିଆ ନେଃବାଏ । ଆକେନ୍ ମୁଇଂ ଆଦେସ୍ ରକମ୍ ବଇ । ଆକ୍ଅରିଆ ଡିଂଲେଃଏ ୬୦ ବାନ୍ ମାଲେ ବାୱିର୍ ନିୟମ୍ନେ ସାମୁଆଁ ଲେଃକେ । ମେଃନେ ଜିସୁ କିସ୍ଟ ଡିରକମ୍ ବାବ୍ରେ ବାବବାନି ଆରି ଜିହୁଦି ପୁଜାରିଇଂନେ କାମ୍ ଆଃଡା ଆର୍କେ ଆକ୍ଅରିଆ ନେଃ ବାନେଃଲେଃଏ । ଆକେନ୍ ନ୍ସା ଆକେନ୍ ଜିହୁଦି କିସ୍ଟିୟାନ୍ଇଂକେ ସାହାସ୍ ବିଃନେ ସାସ୍ତର୍ । ଏବ୍ରୀ ସାସ୍ତର୍ ଜିସୁ ନିୟମ୍ ଆଃଡାକ୍ନେ ବାନ୍ ପୁଜାରିଇଂକେ ବାର୍ମୁଇଂତର୍ ଅଃନାଡିଗ୍ ବଲି ପୁଜା ଡିଂନେ ଦର୍କାର୍ ଣ୍ଡୁ ଆକେନ୍ ସାମୁଆଁକେ ଆଃସୁଏଃଏ । ଜିସୁ କିସ୍ଟ ଡିଂଡିଂକେ ସର୍ତେ ପାପ୍ନେ ବଲି ଆକେନ୍ ମୁଇଂ ତର୍କେ କାଲାଆଃ ନ୍ସା ଲେଃକେ । ଏନ୍ ଜୁଗ୍ନେ କିସ୍ଟିୟାନ୍ଇଂନେ ନ୍ସା ଏବ୍ରୀ ସାସ୍ତର୍ନ୍ନିଆ ସାଆସ୍ ତ୍ନାଏ । ଇସ୍ପର୍କେ ଆସା ଡିଂନେ ନ୍ସା ମୁଇଂ କିସ୍ଟ ଆଃ ଆନେଃକେ ସମ୍ବବ୍ ଆଃଡିଂୟାଏ । ଆରି ଣ୍ଡିଗ୍ ମେଁଡାଗ୍ରା ଆସା ଡିଂଚେ କେଚେଃ ନେଃଅଲେଙ୍ଗ୍ପା ୧୨:୨ ।
ଏବ୍ରୀ ସାସ୍ତର୍ ଜାଣ୍ଡେଃ ଗୁଆର୍ବକେ ମାମ୍ୟା ଲେଃକେ । ମାତର୍ ପଣ୍ଡିତ୍ଇଂ ବାସଙ୍ଗ୍ଆର୍ଏ ଜେ ପ୍ରେରିତ୍ ପାଉଲ୍ ଲୁକ୍ ଣ୍ଡୁଲା ବର୍ଣ୍ଣବ୍ବା ଡିଂ ଲେଃଆର୍ଏ । ଆକେନ୍ ସାସ୍ତର୍ ଗୁଆର୍ନେ ବେଲା ଣ୍ଡିଗ୍ ମାମ୍ୟାଃ ଲେଃକେ ମାତର୍ ଗୁଲୁଏ ରୁଆ ବିସ୍ବାସ୍ ଡିଆର୍ଡିଂକେ । ଆକେନ୍ ଜିସୁ କିସ୍ଟନେ ଜନମ୍ ଇଡ଼ିଂ ୭୦ ମସିଆରେ ଗୁଆର୍ବକେ । ଯିରୁଶାଲମ୍ ମନ୍ଦିର୍ ୭୦ ମସିଆରେ ଦଂସ ଡିଂକେ । ମାତର୍ ଆକେନ୍ ସାସ୍ତର୍ନେ ଗୁଆର୍ଣ୍ଡ୍ରେ ଆକେନ୍ ବିନସ୍ଟ ଡିଂ ଆଲେଃକ୍ନେ ସୁଗୁଆ ବାସଙ୍ଗ୍ଏ । ଏବ୍ରୀ ସାସ୍ତର୍ ଡିଂଲେଃଏ ରୋମୀୟ ସହର୍ନ୍ନିଆ ଗୁଆର୍ବଗେ ୧୩:୨୪ ଆରି ବିନ୍ବିନ୍ ମଣ୍ଡଲିନ୍ନିଆ ବାଟା ବିଃବଆର୍ଗେ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ଜିସୁ କିସ୍ଟ ଇସ୍ପର୍ନେ ବାବବାଦି ଆରି ଦୁତ୍ଇଂନେବାନ୍ ମ୍ନାଃ । ୧:୧–୪:୧୩
୨. ଜିସୁ କିସ୍ଟ ମ୍ନାଃ ପୁଜାରି । ୪:୧୪–୭:୨୮
୩. ଜିସୁନେ ସେବା କାମ୍ନେ ମ୍ନାଃ । ୮:୧–୧୦:୩୧
୪. ଜିସୁ ସର୍ତେ ଡାଗ୍ରା ମ୍ନାଃ । ୧୦:୩୨–୧୩:୧୭
୫. ଡାଟ୍ ଆଦେସ୍ ଆରି ସାରାସାରି ସାର୍ଲ । ୧୩:୧୮-୨୫
୧
ଉଂଡେ ବାନ୍ ଇସ୍ପର୍ ବିଃକ୍ନେ ସାମୁଆଁ
୧ ଅଃସେ ଇସ୍ପର୍ ବିନ୍ବିନ୍ ବେଲା ଆରି ବିନ୍ବିନ୍ ଉପାୟ୍ରେ ବାବବାଦିଇଂନେ ବାନ୍ ନେନେ ନ୍ତାଞ୍ଜାଇଂକେ ସାମୁଆଁ ବିଃବଗେ ।
୨ ମାତର୍ ଆକେନ୍ ସାରାସାରି ବେଲା ମେଁ ନିଜର୍ ଉଂଡେ ବାନ୍ ନେଁ ଏତେ ସାମୁଆଁ ବାସଙ୍ଗ୍ବକେ । ଆତେନ୍ ଉଂଡେନେ ବାନ୍ ଆଃ ଇସ୍ପର୍ କ୍ଲିଗ୍ ଦର୍ତନିକେ ଆରେବକେ ବାରି ସାରାସାରିନିଆ ସାପା ବିସଏନେ ଅଦିକାରି ଡିଂନେସା ମେଁ ଆମେକେ ସ୍ରି ବକେ ।
୩ ମେଁଡାଗ୍ରା ଇସ୍ପର୍ନେ ମଇମାନେ ତାର୍କିଗ୍ ତ୍ନାଡିଂକେ ଆରି କ୍ଲିଗ୍ଡା ମେଁନେ ସାର୍ମୁଆଁ ମିସୁଲେଃଗେ । ବାରି ମେଁ ନିଜର୍ ସାମୁଆଁ ବପୁରେ କ୍ଲିଗ୍ ଦର୍ତନିକେ ସା ବକେ । ମେଁ ରେମୁଆଁ ଜାତି ନ୍ସା ପାପ୍ କେମା ବିଚେ କିତଂନ୍ନିଆ ଇସ୍ପର୍ନେ ବେସ୍ୟା ପାକା କ ଲେଃକେ ।
ଇସ୍ପର୍ନେ ଉଙ୍ଗ୍ଡେ ମ୍ନା
୪ ମେଁ କିତଂ ଦୁତ୍ଇଂନେ ବାନ୍ ଡିରକମ୍ ମ୍ନା ମେଁନେ ମ୍ନି ଣ୍ଡିଗ୍ ଡେତ୍ରକମ୍ ମେଁଇଂନେ ମ୍ନି ବାନ୍ ମ୍ନା
୫ ଡାଗ୍ଲା ଅଃନାଡିଗ୍ ଇସ୍ପର୍ ମୁଡ଼ି ଦୁତ୍ଇଂକେ ବାସଙ୍ଗ୍ ଆବକେ:
“ନାଁ ନିଂନେ ଉଂ
ଏକେବାନ୍ ନିଂ ନାନେ ଆବା ଣ୍ଡିଂଗେ,”
ଇସ୍ପର୍ ଣ୍ଡିଗ୍ ବାସଂକେ
“ନିଂ ମେଁନେ ଆବା ବାରି
ମେଁ ନିଂନେ ଉଂ ଡିଂଏ ।”
୬ ମାତର୍ ଇସ୍ପର୍ ମେଁନେ ପର୍ତୁମ୍ ଜନମ୍ ଡିଂକ୍ନେ ଉଂକେ ଆକେନ୍ ଦର୍ତନିନ୍ତୁଗ୍ ବେନେ ବେଲା ଆକେନ୍ ବାସଙ୍ଗ୍ବଗେ
“ଇସ୍ପର୍ନେ ଦୁତ୍ଇଂ ମେଁନେ ପାର୍ତନା ଡିଂଆର୍ଏ ।”
୭ ଆରି କିତଂଦୁତ୍ଇଂନେ ବିସଏରେ ଇସ୍ପର୍ ଆକେନ୍ ସାମୁଆଁ ବାସଙ୍ଗ୍ବକେ:
“ଇସ୍ପର୍ ନିଜର୍ ଦୁତ୍ଇଂକେ ୱେଡ଼ିଆଃ ସୁଗୁଆ
ଆରି ଆପ୍ନା ସେବକ୍ଇଂକେ ଡୁଆକ୍ନେ ସୁଆ ସୁଗୁଆ ଆଡିଂବକେ ।”
୮ ମେଁନେ ଉଙ୍ଗ୍ଡେ ବିସଏରେ ମେଁ ବାସଙ୍ଗ୍ବଗେ
“ଅ ଇସ୍ପର୍ ନାଁନେ ରାଜି ମାଡାନେ କାଲ୍ ଜାକ ଲେଃଲେଃ !
ନାଁନେ ନ୍ୟାୟ୍ ଡଣ୍ଡ୍ନ୍ନିଆ ନାଁନେ ରେମୁଆଁଇଂକେ ସାସନ୍ ଡିଂନାଡିଂକେ ।
୯ ନାଁ ଦରମ୍ଣ୍ଡ୍ରେକେ ବଲ୍ ନାବାଏ ଆରି ଅନ୍ୟାୟ୍କେ ଗୃନା ନାଡିଂଏ ।
ଆତେନ୍ସା ଅ ଇସ୍ପର୍ ନାଁନେ ଇସ୍ପର୍ ଆନାକେ ସ୍ରିବକେ
ନାଁନେ ସାଙ୍ଗଇଂନେ ବାନ୍ ଆନାକେ
ମାଲେ ସାର୍ଦାରେ ଞ୍ଚୁ ଏତେ ଆସିର୍ବାଦ୍ ଡିଙ୍ଗ୍ବକେ ।”
୧୦ ମେଁ ଆରି ଣ୍ଡିଗ୍ ବାସଙ୍ଗ୍ବକେ
“ଅ ମାପ୍ରୁ ନାଁ ପର୍ତୁମ୍ ମଞ୍ଚ୍ପୁର୍ନେ ପାଣ୍ଡୁସନ୍ ତିଆର୍ ନାଡିଙ୍ଗ୍କେ
ବାରି କିତଂଇନି ନାଁନେ ନ୍ତି ଏତେ ନାରାରେକେ ।
୧୧ ତେନ୍ ସର୍ତେ ମେସୁଆ ନସ୍ଟ ଡିଂଏ । ମାତର୍ ନା କାଲାଆଃ ନାଲେଃଏ ।
ମେଇଂ ବାୱିର୍ ସକା ରକମ୍ ନସ୍ଟ ଡିଂଆର୍ଏ ।
୧୨ ସକାପାଟାଇ ତାମୁଙ୍ଗ୍କେ ସୁଗୁଆ
ନା ଆତେନ୍ ସାପା ସଜେ ନାବଏ
ବାରି ସକା ଆଃବଦ୍ଲେନେ ସୁଗୁଆ ନାରାଃବଦ୍ଲେଏ ।
ମାତର୍ ନିଜେ ନାଁ ନାବଦ୍ଲେ ଆରି କାଲାଆଃ ନାଲେଃଏ ।”
୧୩ ଇସ୍ପର୍ ମେଁନେ ମୁଡ଼ି ଦୁତ୍କେ ଅଃନା ଆବାସଙ୍ଗ୍କେ;
“ନେଙ୍ଗ୍ ନାନେ ସତ୍ରୁଇଂକେ
ନାନେ ଞ୍ଚ ଆଲ ମାରାଡିଂ ଜାକ
ନାଁ ନେଙ୍ଗ୍ନେ ଞ୍ଚଙ୍ଗ୍ନ୍ତି ପାକା କଲାଃଲା ।”
୧୪ ତେଲା କିତଂଦୁତ୍ଇଂ ଜାଣ୍ଡେ ? ମେଁଇଂ ଡିଂଡିଂକେ ଇସ୍ପର୍ନେ ପୁଜା ଡିଂଣ୍ଡ୍ରେ ଉଦାର୍ ବାକ୍ନେ ରେମୁଆଁଇଂନେ ସାଇଜ ନ୍ସା ଇସ୍ପର୍ନେ ବାନ୍ ବେବକ୍ନେ ଆତ୍ମାଇଂ ।