ଯୋହନଙ୍କ ପ୍ରଥମ ପତ୍ର
ଜହନ୍ନେ ପର୍ତୁମ୍ ଉଲିଆଃ
ଜହନ୍ ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ପର୍ତୁମ୍ ଜହନ୍ନେ ଉଲିଆ ଜିସୁ କ୍ରିସ୍ଟନେ ଜନମ୍ ଇଡ଼ିଙ୍ଗ୍ ୫୦ ବାନ୍ ୧୦୦ କ୍ରିସ୍ଟାବ୍ଦ ବିତ୍ରେ ପ୍ରେରିତ୍ ପାଉଲ୍ନେ ବାନ୍ ଗୁଆର୍ ବଆର୍କେ । ଜହନ୍ ନିଜେ ଗୁଆର୍ଣ୍ଡ୍ରେ ବାବ୍ରେ ପରିଚୟ୍ ଆବିକେ ଣ୍ତୁ, ମାତର୍ ପର୍ତୁମ୍ ଅଦ୍ୟାୟ୍ନ୍ନିଆ ମେଁ ଜିସୁ କ୍ରିସ୍ଟନେ ଜିବନ୍ ବାରି ଗୁଏଚେ ମ୍ୱ୍ରକ୍ନେ ସାକି ଲେଃକେ ଡାଗ୍ଚେ ଜାନା ପଡ଼େଡିଂକେ ୧:୧-୩ । ପର୍ତୁମ୍ ଜହନ୍ ଗୁଆର୍କ୍ନେ ଲେକା ଜହନ୍ ଗୁଆର୍କ୍ନେ ନିମାଣ୍ଡାସାମୁଆଁ ଏତେ ଜାବର୍ ଡାଗ୍ରା ତ୍ନାଡିଂକେ । ଏନ୍ ବିସ୍ବାସ୍ ଡିଙ୍ଗ୍ଆର୍ଡିଂକେ ଜେ ଉଡ଼ି ବେଲା ମେଁ ଏପିସିୟନ୍ନିଆ ଲେଃକେ ମେଁ ଜହନ୍ ଗୁଆର୍କ୍ନେ ନିମାଣ୍ଡାସାମୁଆଁ ବାରି ଜହନ୍ନେ ଞ୍ଜିକ୍ଲିଗ୍ ଉଲିଆ ମିସେଚେ ଗୁଆର୍ ବକେ ଆତେନ୍ଇଂ, ୧ ଜହନ୍ ୨ ଜହନ୍ ୩ ଜହନ୍ ।
ବୁଦି ଲେଃକେ ଡାଗ୍ଚେ ବାସଙ୍ଗ୍ ମ୍ୟାକ୍ନେ ଗୁଲୁଏ ରେମୁଆଁଇଂନେ ବାନ୍ ମଣ୍ତଲି ଗଟ୍ନାନେ ସେଃମଁ ଡିଙ୍ଗ୍ନେ ବେଲା ଜହନ୍ ସାପା କ୍ରିସ୍ଟିୟାନ୍ଇଂକେ ଏନ୍ ଉଲିଆ ଗୁଆର୍ ବକେ । ମେଇଂ ବିସ୍ବାସ୍ ଡିଙ୍ଗ୍ଆର୍ଡିଂକେ ଜେ ଜିସୁ ସତ୍ରେ ଇସ୍ପର୍, ମାତର୍ ମଞ୍ଚ୍ପୁର୍ନ୍ନିଆ ଲେଃନେ ବେଲା ମେଁ ମିଆଁ ଚିଲି ସାଚେ ରେମୁଆଁ ଣ୍ତୁ । ଜହନ୍ ଜିସୁ କ୍ରିସ୍ଟନେ ସତ୍ରେ ସାକି ବାରି ମେଁନେ ନ୍ତି ଜିସୁକେ ଲିଗ୍ ବକେ ସା ମେଁ ଏନ୍ ଗୁଆର୍ଡିଂକେ ୧:୧-୩ । ଜହନ୍ ଏନ୍ ଉଲିଆ ଗୁଆର୍ନେ କାରନ୍ ଆମେକେ ସାର୍ଦା ଆଡିଙ୍ଗ୍ନେ ୧ ଜହନ୍ ୧:୪ ବାରି ବିସ୍ବାସିଇଂକେ ପାପ୍ ବାନ୍ ନିମାଣ୍ତା ବନ୍ସା ୧ ଜହନ୍ ୨:୧ ବାରି ମିଚ୍ ଗ୍ୟାନ୍ ବାନ୍ ବିସ୍ବାସିଇଂକେ ରକ୍ୟା ବିନ୍ସା ୧ ଜହନ୍ ୨:୨୬ ବାରି ବିସ୍ବାସିଇଂକେ ରକ୍ୟା ଡିଙ୍ଗ୍ନେ ସତେଆ ଡାଗ୍ଚେ ମ୍ୟାନ୍ସା ୫:୧୩ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ଅଜନ୍ ମେଁନେ ଉଲିଆନେ ପରିଚୟ୍ ବିନେ ଗୁଆର୍କ୍ନେ ବିସୟ୍ ଗୁଆର୍ଡିଂକେ । ୧:୧-୪
୨. ଇସ୍ପର୍ ଡିରକମ୍ ତାର୍କିଗ୍ ଲେଃକେ ବୁଜେ ବଚେ ଜିସୁନେ ରକମ୍ ଜିବନ୍ କାଟେ ନ୍ସା ବାସଙ୍ଗ୍ଡିଂକେ । ୧:୫–୩:୧୦
୩. ପର୍ମେସର୍କେ ଆଲାଦ୍ ଡିଙ୍ଗ୍ନେ ବିସୟ୍ରେ ଆନେକେ ମନେ ତ୍ଲାଗ୍ ବିଃଡିଂକେ । ୩:୧୧–୫:୧୨
୪. ମେଁ ନିଜେ ଗୁଆର୍କ୍ନେ ବନ୍ଦ୍ ଆଡିଙ୍ଗ୍କେ । ୫:୧୩-୨୧
୧
ପାରାନ୍ ରକମ୍ନେ ବ୍ନାଲିର୍
୧ ଅଃସେବାନ୍ ଜା ଲେଃକେ ଜାନେ ବ୍ନାଲିର୍ ନେ ଅଁନ୍ଲେକେ ଜାଣ୍ତେକେ ନେନେ ମ୍ମୁଁଆଃନ୍ନିଆ କେନେଲେଃକେ ଜାଣ୍ତେକେ ନେନେ ତୁର୍ନେଡିଙ୍ଗ୍କେ ବାରି ନିଜର୍ ନ୍ତିନ୍ନିଆ ଲିଗ୍ନେବକେ । ଆତେନ୍ ପାରାନ୍ ରକମ୍ ବ୍ନାଲିର୍ ବିସୟ୍ରେ ଆପେକେ ଆଅଁ ନେଡିଙ୍ଗ୍କେ ।
୨ ଆତେନ୍ ପାରାନ୍ ବାଏରେ ତାର୍କେ ବାରି ନେ କେନେଡିଙ୍ଗ୍କେ ବାରି ସାକି ବିନେଡିଙ୍ଗ୍; ଆଣ୍ଡିନେ ମାଡାନେ ପାରାନ୍ ଆବାନେ ଏତେ ଲେଃକେ । ବାରି ନେଁଇଂନେ ଡାଗ୍ରା ତାର୍କେ ମେଁନେ ବିସୟ୍ରେ ଆପେକେ ଆଅଁ ନେଡିଙ୍ଗ୍ ।
୩ ମେଁନେ ନେ କେନେଡିଙ୍ଗ୍କେ ବାରି ଦ୍ରିଗ୍ନେଡିଙ୍ଗ୍ ଆତେନ୍ ଆପେକେ ଡିଗ୍ ଆଅଁ ନେଡିଙ୍ଗ୍ ଡିରକମ୍ ପେଇଂନେ ଡିଗ୍ ନେଁଇଂନେ ଏତେ ସାଇଜ ଡିଙ୍ଗ୍ପାରେ; ବାରି ନେଁଇଂନେ ସାଇଜନେ ଆବା ବାରି ମେଁନେ ଉଙ୍ଗ୍ଡେ ଜିସୁ କିସ୍ଟନେ ଏତେ ଲେଃକେ ।
୪ ନେଁଇଂନେ ସାର୍ଦା ଡିରକମ୍ ବର୍ତି ଡିଙ୍ଗ୍ଏ ଏନ୍ସା ନେ ଏନ୍ସାପା ଆପେକେ ଗୁଆର୍ନେଡିଂକେ ।
ଇସ୍ପର୍ନେ ତାର୍କିଗ୍
୫ ଇସ୍ପର୍ନେ ଉଙ୍ଗ୍ଡେ ଜିସୁ କିସ୍ଟନେ ବାନ୍ ନେନେ ଆଣ୍ଡିନେ ବ୍ନାଲିର୍ ଅଁଚେ ବାଲିର୍ ନେଡିଙ୍ଗ୍ ଆତେନ୍ ଡିଂକେ ଇସ୍ପର୍ ତାର୍କିଗ୍ । ମେଁନେ ଡାଗ୍ରା ଚିନା ଡିଗ୍ ତାଙ୍ଗ୍କିଗ୍ ଣ୍ତୁ ।
୬ ମେଁନେ ଏତେ ନେଁଇଂନେ ସଙ୍ଗ୍ସାତି ଲେଃକେ ଡାଗ୍ଚେ ବାସଙ୍ଗ୍ଚେ ଜଦି ନେ ତାଙ୍ଗ୍କିଗ୍ନ୍ନିଆ ବାସା ନେଡିଙ୍ଗ୍ଏ, ତେଲା ନେ ସାମୁଆଁରେ ବାରି କାମ୍ରେ ମିଚୁଆ ନେଡିଙ୍ଗ୍ଏ, ଆରି ସତ୍ ବେବଆର୍ ଡିଂ ନେଃଲେଃ ଣ୍ଡୁ ।
୭ ମାତର୍ ଇସ୍ପର୍ନେ ରକମ୍ ନେନେ ଜଦି ତାର୍କିଗ୍ନ୍ନିଆ ବାସା ନେଲେଏ ନେନେ ନିଜେ ନିଜେ କୁଡ଼େଚେ ନେଲେଃଏ ବାରି ମେଁନେ ଉଙ୍ଗ୍ଡେ ଜିସୁନେ ମ୍ୟା ନେ ସାପାରେକେ ପାପ୍ବାନ୍ ପର୍ଚଲ୍ ଆଃଡିଙ୍ଗ୍ଏ ।
୮ ନେଁଇଂନେ ପାପ୍ ଣ୍ତୁ ଏନ୍ ଜଦି ନେବାସଙ୍ଗ୍ଏ ତେଲା ନିଜେ ନିଜେକେ ନାଲେ ନେଡିଙ୍ଗ୍କେ ବାରି ନେଇଂନେ ଡାଗ୍ରା ସତ୍ ଣ୍ତୁ ।
୯ ଜଦି ନେ ନିଜର୍ ନିଜର୍ ପାପ୍ କେମା ନେଡିଙ୍ଗ୍ଏ, ତେଲା ମେଁ ନେଁଇଂନେ ପାପ୍ କେମା ଡିଙ୍ଗ୍ ନ୍ସା ଦରମ୍ ବାରି ବିଚାର୍ ଡିଂଣ୍ଡ୍ରେ ।
୧୦ ନେ ପାପ୍ ନେଡିଙ୍ଗ୍କେ ଣ୍ତୁ ଏନ୍ ଜଦି ନେବାସଙ୍ଗ୍ଏ ତେଲା ନେ ଆମେକେ ମିଚୁଆ ଆଡିଙ୍ଗ୍ ନେଡିଙ୍ଗ୍ ବାରି ମେଁଇଂନେ ବ୍ନାଲିର୍ ନେଁଇଂନେ ଡାଗ୍ରା ଣ୍ତୁ ।