ଜାକୁବଙ୍କ ପତ୍ର
ଜାକୁବ୍ନେ ଉଲିଆଃ
ଜାକୁବ୍ ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ଜାକୁବ୍ ଉଲିଆଃ ଜାକୁବ୍ ମ୍ନିରେ ୱାଡିଂଆର୍କ୍ନେ ମୁଇଂ ରେମୁଆଁ ବାନ୍ ଗ୍ନୁଆର୍ ଡିଂଲେଃକେ । ଆକେନ୍ ଜାକୁବ୍ ଡିଂଲେଃଏ ଜିସୁ କିସ୍ଟନେ ବୟାଁଣ୍ଡେ ଲେଃଗେ ଜା କି ପର୍ତୁମ୍ ମଣ୍ଡଲିନେ ମୁଇଂ ନେତା ବାରି ଯିରୂଶାଲାମ୍ କୁକପାର୍ନେ ମ୍ନା ରେମୁଆଁ ଲେଃଗେ ପ୍ରେରିତ୍ ୧୫:୧୩ । ପ୍ରେରିତ୍ ପାଉଲ୍ ଣ୍ଡିଗ୍ ଜାକୁବ୍କେ ଗାଲାତିୟ ମଣ୍ଡଲିନେ କୁଟ୍ ଡାଗ୍ଚେ ୱାଆର୍ଏ ଗାଲାତିୟ ୨:୯ । ଜାକୁବ୍ ଯିରୂଶାଲମ୍ନେ ନେତା ଲେଃଗେ ତେସା ଡିଂଲେଃଏ ଆତ୍ଅରିଆ ବାସା ଲେଃନେ ବେଲା ମେଁ ଆକେନ୍ ଉଲିଆଃ ଗୁଆର୍ବଗେ ।
ଜାକୁବ୍ ଦେସ୍ ଅରିଆ ଚିନ୍ବିନ୍ ଡିଂଲେଃକ୍ନେ ଗମ୍ବାର୍ କୁଟୁମ୍ଇଂକେ ମେଁନେ ଉଲିଆଃନ୍ନିଆ ସ୍ନାମୁଁଆଃ ବିଃବକେ ୧:୧ । ଡିଂଲେଃଏତ ଜାକୁବ୍ ଉଲିଆଃନେ ବେବଆର୍ ଦର୍କାର୍ ବିସୟ୍ ସର୍ତେ କିସ୍ଟିୟାନ୍ଇଂନେ ନ୍ସା ଲେଃକେ ମାତର୍ ଗମ୍ବାର୍ କୁଟୁମ୍ ବିସୟ୍ରେ ବେବଆର୍ ଡିଂଲେଃକ୍ନେ ସବ୍ଦ ଡିଂଲେଃଏ ଜାକୁବ୍ ସ୍ୱେଡ଼ାଃ ଜିଉଦି କିସ୍ଟିୟାନ୍ଇଂକେ ଗୁଆର୍ବଗେ । ଡାଗ୍ଲା ଆକେନ୍ ଉଲିଆଃ ବିନ୍ବିନ୍ ପାକା ଲେଃକ୍ନେ ପଡ଼େଣ୍ଡ୍ରେଇଂକେ ଆଃୱେଚା ବିସୟ୍ରେ ଟିକନା ବିଃବକେ । ଜାକୁବ୍ ବିସ୍ବାସ୍ ବାରି କାମ୍ନେ ପୁରା ସମ୍ପର୍କ ଆଡ଼ାତ୍ରା ଆଃଦର୍ସେଚେ ବାସଙ୍ଗ୍ଡିଂକେ ଜେ ସତ୍ ବିସ୍ବାସ୍ କାମ୍ନ୍ନିଆ ତ୍ନାଏ ୨:୧୭ । ମେଁ ଦନି ରେମୁଆଁଇଂନେ ନ୍ସା ସାପଟ୍ ବିସୟ୍ରେ ତରକ୍ ଆଃଡିଂଡିଂକେ ୨:୧-୪ । ସନ୍ମାନ୍ ବଚେ ବାଃଲିର୍ବାତା ଡିଂନେ ବିସୟ୍ରେ ଣ୍ଡିଗ୍ ତରକ୍ ଡିଂନେ ଆଃମ୍ୟାଡିଂକେ ୩:୧-୧୨ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ଜାକୁବ୍ ମେଁନେ ପଡ଼େଣ୍ଡ୍ରେଇଂକେ ସାର୍ଲଡିଂକେ । ୧:୧
୨. ମେଁ କିସ୍ଟିୟାନ୍ଇଂକେ ଦୁକ୍ ବେଲା ଡାଟ୍ରେ ଲେଃନେସା ସାଆସ୍ ବିଃଡିଂକେ । ୧:୨-୨୭
୩. କାମ୍ ଡିଂଚେ ଡିରକମ୍ ବିସ୍ବାସ୍ ଆଃସୁଏନେ ଦର୍କାର୍ ତେନ୍ ବିସୟ୍ରେ ବାସଙ୍ଗ୍ଡିଂକେ । ୨:୧-୨୬
୪. ମାପ୍ରୁ ସାମୁଆଁ ଡିରକମ୍ ବପୁ ଡିଂୟାଏ ଆତେନ୍ ମେଁ ଆଃଦର୍ସେ ବକେ । ୩:୧-୧୨
୫. ଜାକୁବ୍ ଇସ୍ପର୍ନେ ବୁଦି ଜାଗତିକ ବୁଦିବାନ୍ ବିନ୍ ରକମ୍ ଡିଂପାରେ ଆତେନ୍ ବାସଙ୍ଗ୍ଡିଂକେ । ୩:୧୩–୪:୧୦
୬. ଇଡ଼ିଂ ମେଁ ପଡ଼େଣ୍ଡ୍ରେଇଂକେ ଗରବ୍ ମାଡିଂନେ ନ୍ସା ତରକ୍ ଆଃଡିଂଡିଂକେ । ୪:୧୧–୫:୬
୭. ସାରାସାରି ଜାକୁବ୍ ଉଃଡ଼ିକ୍ଲିଗ୍ ଡାଆଁ ଆଦେସ୍ ବିଚେ ମେଁନେ ଗୁଆର୍ନେ ଆଃଡାକେ । ୫:୭-୨୦
୧
୧ ନେଙ୍ଗ୍ ଜାକୁବ୍ ଇସ୍ପର୍ନେ ବାରି ମାପ୍ରୁ ଜିସୁ କିସ୍ଟନେ ଦାସ ସାପା ମଞ୍ଚ୍ପୁର୍ନ୍ନିଆ ଜତେକତେ ଡିଙ୍ଗ୍ଲେଃକ୍ନେ ଇସ୍ପର୍ନେ ରେମୁଆଁଇଂକେ ସାର୍ଲ ଆଃମ୍ୟାଚେ ଏନ୍ ଉଲିଆ ଗୁଆର୍ଣ୍ଡିଂକେ ।
ବିସ୍ବାସ୍ ଆରି ବୁଦି
୨ ବୟାଁ ଆରି ତନାଇଂ ଜିବନ୍ ବ୍ରୁଆ ଡିକେଃନେ ବାରବାନିନେ ଦୁକ୍କଷ୍ଟ ପାଂଲା ଆତେନ୍ କରମ୍ନେ ବିସୟ୍ ଡାଗ୍ଚେ ମ୍ୟାଃପା ।
୩ ମେଃଡାଗ୍ଲା ପେ ପେମ୍ୟାଃକେ, ଦେକ୍ରକମ୍ କଷ୍ଟ ସେଃମଁ ପାଂବେଲା ବିସ୍ବାସ୍ ବପୁ ଲେଃଲା ସାମାଲେନେ ସକତ୍ ମାଲେ ଡିଂଏ ।
୪ ପେ ଇଡ଼ିଙ୍ଗ୍ ଜାକ ସାମ୍ୱାଲେ ପେଲେଃଲା ମେଃଡିଗ୍ ବିସୟ୍ରେ ଗଣ୍ଡା ମାଡିଙ୍ଗ୍ଚେ ଜନମ୍ବାନ୍ ଦର୍ମ ବୁଦି ବାରି ନିମାଣ୍ଡା ପେଡିଙ୍ଗ୍ଏ ।
୫ ମାତର୍ ପେଇଂନେ ବିତ୍ରେ ଜାଣ୍ତେନେ ଜଦି ଗ୍ୟାନ୍ ଗଣ୍ତା ଲେଃଏ ମେଁ ଇସ୍ପର୍ନେ ଡାଗ୍ରା ପାର୍ତନା ଡିଙ୍ଗ୍ଲେ ତେଲା ଆମେକେ ଇସ୍ପର୍ ଗ୍ୟାନ୍ ବିଏ ଡାଗ୍ଲା ମେଁ ସାର୍ଦା ମନ୍ରେ ଆରି ରକ୍ୟା ସୁଗୁଆ ସାପାରେକେ ଦାନ୍ ଡିଙ୍ଗ୍ଏ ।
୬ ମାତର୍ ପାର୍ତନା ଡିଙ୍ଗ୍କେଲା ଇଃକୁଣ୍ଡିଗ୍ ଅନ୍ମାନ୍ ମାଡିଂଚେ ବିସ୍ବାସ୍ ଡିଂଚେ ସ୍ମରେପା । ଜା ସନ୍ଦେଅ ଡିଂଏ, ମେଁ ତର୍ବର୍ ଆବୁଂକ୍ନେ ଲଅଡ଼ି ସୁଗୁଆ ।
୭ ଦେତ୍ରକମ୍ ରେମୁଆଁ ମାପ୍ରୁନେ ଡାଗ୍ରା ମେଃଡିଗ୍ ବାଏ ଡାଗ୍ଚେ ମନେ ଆଡିଙ୍ଗ୍ଲେ ।
୮ ମେଁ ମ୍ୱାର୍ମନ୍ ରେମୁଆଁ ନିଜର୍ ସାପା ଅଲେଙ୍ଗ୍ନ୍ନିଆ ଆଙ୍କ୍ଆନ୍ତ୍ ।
ସାକାର୍ ଆରି ଗରିବ୍
୯ ଦରିଦ୍ର ଅବସ୍ତାନ୍ନିଆ ଲେକ୍ନେ କ୍ରିସ୍ଟ ବିସ୍ବାସି ଉର୍ନତି ଡିଙ୍ଗ୍ଲା ଗରବ୍ ଡିଙ୍ଗ୍ଆର୍ଏ ।
୧୦ ସାକାର୍ କ୍ରିସ୍ଟ ବିସ୍ବାସି ମେଁନେ ଦରିଦ୍ର ଡିଙ୍ଗ୍କେଲା ଗରବ୍ ଡିଙ୍ଗ୍ଲେ ଡାଗ୍ଲା ସାକାର୍ ଚେଃମୁଆଁ ସାରି ସୁଗୁଆ ଲୱେଏ ।
୧୧ ସ୍ନିନେ ତାରାସ୍ ତାତିରେ ଚେଃମୁଆଁ ନ୍ସୁଆର୍ୱେଏ, ମେଁନେ ସାରି ଲଃୱେଏ ଆରି ସବା ନାସେୱେଏ । ଦେତ୍ରକମ୍ ସାକାର୍ ଣ୍ଡିଗ୍ ମେଁନେ ସାପା କାମ୍ ଇଂ ବିତ୍ରେ ମେଃସୁଆ ଲଚ୍ୟାୱେଏ ।
ପରିକ୍ୟାନ୍ନିଆ ସାମ୍ନା
୧୨ ଆଣ୍ଡିନେ ରେମୁଆଁ ଦୁକ୍କସ୍ଟକେ ସାମ୍ୱାଲେ ଲଃଏ ମେଁ ଦନ୍ୟ; ଡାଗ୍ଲା ଦେକ୍ରକମ୍ ପରିକ୍ୟା ଜିତେଲା ଇସ୍ପର୍ ମେଁନେ ସିସ୍ଇଂକେ ଆଣ୍ତିନେ ଜିବନ୍ ବିଏ ଡାଗ୍ଚେ ପାର୍ମାନ୍ ଡିଙ୍ଗ୍ବକେ ମେଁ ଆତେନ୍ ପୁରୁସ୍କାର୍ ରକମ୍ ବାଏ ।
୧୩ ଜାଣ୍ଡେଃ ପରିକ୍ୟା ଆଃଆସାନେ ସେଃମଁ ଡିଂନେ ବେଲା ଆତେନ୍ କିତଂବାନ୍ ପାଂଲେଃକେ ଡାଗ୍ଚେ ଆଏତେଲେଃ । କିତଂ ନାଲେନେ ବିସୟ୍ ନ୍ସାଃ ଆସା ଆଡିଂଆର୍ ଣ୍ତୁ ଲେଃ ମେଁ ଆଜାକେ ଆସା ଆରାଃଡିଂ ଣ୍ତୁ ।
୧୪ ଡାଗ୍ଲା ରେମୁଆଁ ନିଜର୍ ପାପ୍ କାମ୍ ଡିଙ୍ଗ୍ଚେ ନିଜେ ପରିକ୍ୟାନ୍ନିଆ ଲଃଏ ।
୧୫ ଦଦ୍ୟା କାମ୍ ଡିଙ୍ଗ୍ନେ ବାନ୍ ପାପ୍ ଜନମ୍ ଡିଙ୍ଗ୍ଏ ବାରି ଆତେନ୍ ପାପ୍ ମ୍ନାଚେ ଜାବର୍ ଡିଙ୍ଗ୍ଲା ଗୁଏଃ ଡିଙ୍ଗ୍ଏ ।
୧୬ ନିଜର୍ ବୟାଁ ବାରି ତନାଇଂ ଆଜଟେ ଆଡିଙ୍ଗ୍ପା ।
୧୭ ସାପା ନିମାଣ୍ଡା ଦାନ୍ ବାରି ସାପାବାନ୍ ମ୍ନା ପୁରୁସ୍କାର୍ କିତଂନେ ଆବା ବାନ୍ ପାଙ୍ଗ୍ଲେଃଏ । ମେଁ ସାପା ଆର୍କେ ସ୍ନି ଚାଙ୍କୁଆନେ ତିଆର୍ ଡିଙ୍ଗ୍ଣ୍ଡ୍ରେ । ମେଁ ନ୍ଲୁଡ଼୍ୟା ଡିଙ୍ଗ୍ଚେ ଆବଦ୍ଲେ ଣ୍ତୁ ।
୧୮ ସାପା ଜିବ୍ଜନ୍ତୁ ମଞ୍ଚ୍ପୁର୍ ଡାଗ୍ରା ନେ ଡିଡିରକମ୍ ପର୍ତୁମ୍ ଟାନ୍ ଅଦିକାର୍ ନେଡିଂଏ ଆକେନ୍ସା ମେଁ ନିଜର୍ ଇକ୍ଚାରେ ସତ୍ ସାମୁଆଁ ବାନ୍ ଆନେକେ ଆଃରେଃକେ ।
ଦ୍ରିଗ୍ପା ବାରି କାମ୍ ଡିଙ୍ଗ୍ପା
୧୯ ନିଜର୍ ବୟାଁଇଂ ମନେ ବପା । ପେଇଂ ଅଁନେ ଜାଗ୍ରତ୍ ଡିଂନେ ଦର୍କାର୍ ଡାଗ୍ଲା ମ୍ୟାଃଚେଂଚେ ସାମୁଆଁ ବାସଂପା ।
୨୦ ଗିସେଃ ଡାଗ୍ରା ସାନ୍ତି ଡିଂପା । ମେଃଡାଗ୍ଲା ରେମୁଆଁ ଗିସେ ନ୍ସାଃ ଇସ୍ପର୍ନେ ପବିତ୍ର ଜଜନା ସରାଃ ଡିଂଏ ।
୨୧ ମାତର୍ ପେଇଂ ସାପା ରକମ୍ ଦଦ୍ୟା ଅବ୍ୟାସ୍ ଆରି ସତ୍ଣ୍ତୁନେ କାମ୍ ଆତାର୍ ବିଃପା । ଇସ୍ପର୍ନେ ଡାଗ୍ରା ନିଜେକେ ଆତାର୍ ବିଃପା ବାରି ପେନେ ଗାଗ୍ଡ଼େନ୍ନିଆ ମେଁ ଆଡିନେ ବ୍ନାଲିର୍ ବିଗ୍ ବକେ ବାରି ଆଡିନେ ଆପେକେ ରକ୍ୟା ଡିଙ୍ଗ୍ ନ୍ସା ଇକ୍ଚା ଆତେନ୍ ଗ୍ରଅନ୍ ଡିଙ୍ଗ୍ପା ।
୨୨ ପେଇଂ ନିଜେ ନିଜେକେ ଆଜଟେଗ୍ପା । ମେଁନେ ସାମୁଆଁ ସରାଃ ଅଁଲା ମାଲେ ଣ୍ଡୁ । ଆମେକେ କାମ୍ନ୍ନିଆ ଲାଗେପା ।
୨୩ ଆଣ୍ଡିନେ ରେମୁଆଁ ଇସ୍ପର୍ନେ ବ୍ନାଲିର୍ ସରାଃ ଅଁଏ, କାମ୍ନ୍ନିଆ ବେବଆର୍ ଆଡିଙ୍ଗ୍ ଣ୍ତୁ ମେଁ ଦାର୍ପନ୍ନ୍ନିଆ ନିଜର୍ ରୁପ୍ କିକେନେ ରେମୁଆଁ ସୁଗୁଆ ।
୨୪ ମେଃ ନିମାଣ୍ଡା ଡିଂଚେ ନିଜର୍ ରୁପ୍କେ କେଏ ଡାଗ୍ଲା ଆତ୍ବାନ୍ ତାର୍ୱେକ୍ନେ ଦାପ୍ରେ ମେଃନେ ସତ୍ ରୁପ୍ ମେଃ ଆବଃବିଏ ।
୨୫ ଡାଗ୍ଲା ରେମୁଆଁନେ ମୁକ୍ତି ନ୍ସା ମୁଇଂ ବିନ୍ ନିୟମ୍ ଲେଃକେ । ଜେ ଆତେନ୍ ଅଁଚେ ଆବଆବି ଣ୍ତୁ ବାରି ମେଁନେ ଆଡ଼ାତ୍ରା ସାପା କାମ୍ନ୍ନିଆ ମନ୍ ବିଚେ ଆତାନ୍ ପାଲନ୍ ଡିଙ୍ଗ୍ଏ । ଇସ୍ପର୍ ଆତାନ୍ ସାପା କାମ୍ ଡିଙ୍ଗ୍ଏ ।
୨୬ ଜାଣ୍ଡେଃ ମେଃଆରେ ନିଜେକେ ଦରମ୍ ମନେ ଡିଂଡିଂକେ ? ମେଃ ଜଦି ନିଜର୍ ନ୍ଲିଆକେ ସାନ୍ତି ଆରାଃଡିଂ ତେଲା ମେଃନେ ଦରମ୍ କାମ୍ ସାପା ସରାଃ ଆରି ମେଃ ଚା ନିଜେକେ ନାଲେଡିଂକେ ।
୨୭ ଆଣ୍ଡିନେ ଦର୍ମକାମ୍ ଆବା ଇସ୍ପର୍ନେ କେନ୍କେନ୍ନିଆ ପର୍ଚଲ୍ ଆରି ନିମାଣ୍ଡା ଆତେନ୍ ଡିଂଗେ ଆଃସିରେ ଉଂଗଏଃ ଆରି ଗୁଏସାଙ୍ଗ୍କୁଏଇଂନେ ଜତନ୍ ଡିଂନେ ଆରି ଦର୍ତନିନେ ପାପ୍ବାନ୍ ନିଜେକେ ମୁକ୍ତି ନେଃବପା ।