ପିତରଙ୍କ ପ୍ରଥମ ପତ୍ର
ପିତର୍ନେ ପର୍ତୁମ୍ ଉଲିଆଃ
ପିତର ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ପିତର୍ନେ ପର୍ତୁମ୍ ଉଲିଆଃ ପ୍ରେରିତ୍ ପିତର୍ନେ ବାନ୍ ଗ୍ନୁଆର୍ ଡିଂଲେଃଗେ । ପିତର୍ ମେଁ ଜାଣ୍ଡେଃ ବାରି ମେଁ ଆଜାକେ ଆକେନ୍ ଉଲିଆଃ ଗୁଆର୍ଡିଂକେ ଆତେନ୍ ବିସୟ୍ରେ ବାସଙ୍ଗ୍ଚେ ଉଲିଆଃ ଗୁଆର୍ଡିଂକେ । ମେଁ ଆକେନ୍ ଉଲିଆଃନ୍ନିଆ ସର୍ତେ ରେମୁଆଁ କିସ୍ଟିୟାନ୍ଇଂକେ ଆଃଦର୍ସେଚେ ଉଲିଆଃ ଗୁଆର୍ଡିଂକେ । ୧:୧; ୧:୧୭ ବାରି ୨:୧୧ମେଁ ମେଁନେ ପଡ଼େଣ୍ଡ୍ରେଇଂକେ ଡେକ୍ରକମ୍ ଆଃଦର୍ସେଚେ ଗୁଆର୍ଡିଂକେ ଡାଗ୍ଲା ମେଇଂ ବିନ୍ବିନ୍ ଦେସ୍ନ୍ନିଆ ଚିନ୍ବିନ୍ ଡିଂଲେଃଆର୍ଗେ । ଡାଗ୍ଲା ଆକେନ୍ ଉଲିଆଃ ଉଃଡ଼ିକ୍ଲିଗ୍ନ୍ନିଆ ପିଲିପିୟ ମଣ୍ଡଲି ଡାଗ୍ରା ପାଉଲ୍ନେ ଉଲିଆଃ ସୁଗୁଆ ଲେଃକେ । ଗୁଲୁଏ ରେମୁଆଁ ବିସ୍ବାସ୍ ଡିଂଆର୍ଡିଂକେ ଜେ ପର୍ତୁମ୍ ପିତର ଜିସୁକିସ୍ଟନେ ଜନମ୍ନେ ୬୫ ମୁଆଁ ଇଡ଼ିଂ ଗ୍ନୁଆର୍ ଡିଂଲେଃଗେ ।
ପିତର ଆକେନ୍ ଉଲିଆଃ ରୋମ୍ବାନ୍ ଆଜାକେ କି ମେଁ ବାବିଲ୍ ଡାଗ୍ଚେ ବାସଙ୍ଗ୍ଆର୍ଏ ଆତ୍ବାନ୍ ମେଁ ଗୁଆର୍ବଆର୍ଗେ ୫:୧୩ । ପିତର ଆକେନ୍ ଉଲିଆଃନ୍ନିଆ ଆଃମ୍ୟାବିଃଡିଂକେ ଜେ ଆକେନ୍ ଉଲିଆଃନେ ଉଦେସ୍ ଆପେକେ ସାଆସ୍ ବିଃନେ ନ୍ସା ବାରି ଇସ୍ପର୍ନେ ସତ୍ ଦୟା ପରିକ୍ୟା ଡିଂନେ ଲେଃକେ ୫:୧୨ । ଆକ୍ଅରିଆ ସମାନ୍ ଲେଃକେ ଆତେନ୍ଇଂ ୧ ପିତର୍ ୨:୧୧–୩:୭; ବାରି କଲସିୟ ୩:୧୮–୪:୬ । ଆକେନ୍ ଞ୍ଜିକ୍ଲିଗ୍ ଉଲିଆଃନେ ସାପା ଅଦ୍ୟାୟ୍ନ୍ନିଆ ପରିବାର୍ନେ ସମ୍ପର୍କ ବାରି ଅଦିକାର୍ ବିସୟ୍ରେ ଆଦେସ୍ ବିଃଏ ।
ସାରାସାରି ବେଲା ଡାଗ୍ରା ଡିଂଡିଂକ୍ନେସା କସ୍ଟ ବେଲା ଣ୍ଡିଗ୍ ଡାଟ୍ ଲେଃନେସା କିସ୍ଟିୟାନ୍ଇଂକେ ସାଆସ୍ ବିଃଡିଂକେ ୪:୧ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ପିତର ମେଁନେ ପଡ଼େଣ୍ଡ୍ରେଇଂକେ ନିଜର୍ ବିସୟ୍ରେ ସାମୁଆଁ ଆରି ଲେଃନେ ଟାନ୍ ବିସୟ୍ରେ ବାସଙ୍ଗ୍ଡିଂକେ । ୧:୧-୨
୨. ପିତର ଇସ୍ପର୍କେ ଦନ୍ୟବାଦ୍ ବିଃଡିଂକେ ଜେ ସାପାରେ ଇସ୍ପର୍ନେ ଉଦାର୍ ବାନ୍ନିଆ କୁଡ଼େଃଆର୍ଏ ଆଣ୍ଡିନେ ମେଇଂନେ ଜିବନ୍ନେ ସାଆଜ୍ୟ ଡିଂଏ । ୧:୩–୨:୧୦
୩. ଇଡ଼ିଂ ମଞ୍ଚ୍ପୁରେ ଡିଡିରକମ୍ ନିମାଣ୍ଡା ବାବ୍ରେ ମ୍ବ୍ରନ୍ସା ଡିଂଏ ବାରି ଆଣ୍ଡା ଆରି କୁନୁଏଃ ମାଲିକ୍ ଆରି ଚାକର୍ ବିତ୍ରେ ଡିଡିରକମ୍ ମିସୁଃ ଲେଃନେ ଡିଂଏ ଆତେନ୍ ଆଦେସ୍ ବିଃଡିଂକେ । ୨:୧୧–୪:୧୧
୪. ଆକେନ୍ ଇଡ଼ିଂ କସ୍ଟ ବେଲା ଡାଟ୍ ଲେଃନ୍ସା ପିତର ମେଇଂକେ ସାଆସ୍ ବିଃଡିଂକେ । ୪:୧୨–୫:୧୧
୫. ମେଁ ମେଁନେ ଉଲିଆଃ ଗୁଆର୍ନେ ସାରାସାରି ଆଃଡିଂଡିଂକେ । ୫:୧୨-୧୪
୧
୧ ନିଂ ପିତର ଜିସୁ କିସ୍ଟନେ ମୁଇଂ ବେକ୍ନେ ସିସ୍ ପନ୍ତ ଗାଲାତିୟ କାପ୍ପାଦକିଆ ଆସିଆ ଆରି ବେଥିନିଆ ନ୍ନିଆ ଜତ୍କତ୍ ଡିଂକ୍ନେ ମୁଡ଼ି ବାସାକ୍ନେ ରେମୁଆଁଇଂ
୨ ଆବା ଇସ୍ପର୍ନେ ସିସେ ଗିଆନ୍ ଅନୁସାରେ ଆତ୍ମାନେ ବାନ୍ ପବିତ୍ର ଡିଂଚେ ସାମୁଆଁ ମାନେଃପା, ବାରି, ଜିସୁ କ୍ରିସ୍ଟନେ ମିଆଁରେ ଉର୍ଚିଗ୍ନେ ନ୍ସା ପାଙ୍ଗ୍ପେଲେଃକେ, ମେଇଂନେ ଡାଗ୍ରା ଉଲିଆଃ ଗୁଆର୍ଣ୍ଡିଂକେ । ଇସ୍ପର୍ନେ ଆସିର୍ବାଦ୍ ଆରି ସାନ୍ତି ସାପା ପେନେ ଡିଂଲେଃ ।
ମୁଇଂ ମ୍ବ୍ରଲେଃକ୍ନେ ଆସା
୩ ନେଇଂନେ ମାପ୍ରୁ ଜିସୁ କିସ୍ଟନେ ଆବା ଇସ୍ପର୍କେ ଦନ୍ୟବାଦ୍ ବିଃଲେଃ ମେଃଡାଗ୍ଲା ମେଃ ମେଃନେ ମାଡାନେ ଲିବିସଃଚେ ଜିସୁ କିସ୍ଟକେ ଗୁଏଃକ୍ନେବାନ୍ ଆର୍ମୁଇଂତର୍ ଆଃତଡ଼ିଆଚେଃ ଆନେଃକେ ତ୍ମିନେ ଜିବନ୍ ବିଃବକେ । ଏନ୍ ଆନେକେ ମ୍ବ୍ରଲେଃକ୍ନେ ଆସାରେ ପୁରାପୁରି ଆଃଡିଂବକେ ।
୪ ଆତେନ୍ ନ୍ସାଃ କିତଂ ମେଃନେ ରେମୁଆଁଇଂନେ ନ୍ସାଃ ଆଣ୍ତିନେ ମାଲେଦାମ୍ ଆସିର୍ବାଦ୍ ବକେ, ଆତେନ୍ ଅବା ନ୍ସାଃ ନେଃଇଂ ଉର୍ନେଲେଃକେ । ଆତେନ୍ ମେଁ କିତଂ ଡାଗ୍ରା ପେଇଂନେ ନ୍ସାଃ ରାଃସିଙ୍ଗ୍ ବକେ । ଆତ୍ଡାଗ୍ରା ଆତେନ୍ ଆବୁଡ଼େ ଣ୍ତୁ, ଆବୁଡ଼େ ବା ଆମଏଲା ଣ୍ତୁ ।
୫ ଇଡ଼ିଂଡାମୁଏଃ ଆଣ୍ତିନେ ଉଦାର୍ ଉଡ୍ରା ଡିଂଏ ଆତେନ୍ ଅବା ନ୍ସାଃ ପେଇଂ ବିସ୍ବାସ୍ ନ୍ସାଃ ଇସ୍ପର୍ନେ ବପୁରେ ନିମାଣ୍ଡା ପେଲେଃକେ ।
୬ ଆତେନ୍ ନ୍ସାଃ ପେଇଂ ସାର୍ଦା ଡିଂପା ଜଦି ନାନା ପର୍କାର୍ନେ କଷ୍ଟ ନ୍ସାଃ ଆପେକେ ଏଃକେ ଉଡ଼ିସି ନ୍ସାଃ ଦୁକ୍ ଡିଂନେ ଦର୍କାର୍ ଡିଂ ପାରେ ।
୭ ପେଇଂନେ ବିସ୍ବାସ୍ନେ ପର୍ଚଲ୍ ପରିକ୍ୟା ଡିଂନେ ଏନ୍ ସାପାନେ ଉଦେସ୍ । ବଃୱେକ୍ନେ ସୁନାକେ ସୁଆଡାଗ୍ରା ପରିକ୍ୟା ଡିଂଆର୍ଏ । ପେଇଂନେ ବିସ୍ବାସ୍ ସୁନା ବାଦୁଲ୍ ମାଲେ ମୁଲ୍ୟବାନ୍ ଡିଂଲେଃକେସାଃ ପରିକ୍ୟା ନ୍ସାଃ ଆମେକେ ପୁରନ୍ ଡିଂନେ ଡିଲାଡିଗ୍ ଦର୍କାର୍ । ଆତେନ୍ ଡିଂୟାଲା ଜିସୁ କିସ୍ଟ ଉଡ୍ରା ଡିଂନେ ବେଲା ପେଇଂ ପ୍ରସଂସା, ଗୌରବ୍ ଆରି ସନ୍ମାନ୍ ଲାବ୍ ଡିଂଏ ।
୮ ଏଃକେ ପେଇଂ ଆମେକେ କେଆଲେଃଲା ଣ୍ଡିଗ୍ ଆଲାଦ୍ ଡିଂପେଡିଂକେ ଆରି ମେଁଡାଗ୍ରା ବିସ୍ବାସ୍ ଡିଂପେଡିଂକେ ।
୯ ପେଇଂନେ ବିସ୍ବାସ୍ନେ ଚୁଚୁ ଜେ ଆତ୍ମାନେ ଉଦାର୍ ଆତେନ୍ ପେ ବାପେଲେଃକେ ।
୧୦ ଆକେନ୍ ଉଦାର୍ ବିସଏରେ ବାବବାଦିଇଂ ଜତନ୍ ବାବ୍ରେ ତୁର୍ଚେ ଇସ୍ପର୍ ଆରେକ୍ନେ ଦାନ୍ ବିସଏରେ ଇଡ଼ିଂଡେ ଗଟେନେ ସାମୁଆଁ ବାସଙ୍ଗ୍ବଗେ ।
୧୧ ଆତାନ୍ ଇନାମ୍ ପେଇଂ ଅଃନା ଆରି ଡିରକମ୍ ବାବ୍ରେ ପେବାଏ ମ୍ୟାଃ ନ୍ସା ମେଁଇଂ ଚେସ୍ଟା ଡିଂବଆର୍ଗେ । ଏନ୍ ବିସୟ୍ରେ ପବିତ୍ର ଆତ୍ମାନେ ସାଆଜ୍ୟରେ ମେଁଇଂ କିସ୍ଟନେ କଷ୍ଟବାକ୍ନେ ଆରି ଇଡ଼ିଂ ଆସିର୍ବାଦ୍ ବାନେ ବିସୟ୍ରେ ସୁଚନା ବିଃବଗେ ।
୧୨ ଇସ୍ପର୍ ଏନ୍ ବାବବାଦିଇଂକେ ଡାଗ୍ରା ଆତର୍ସା ଆର୍କେ ଜେ ମେଁଇଂ ନିଜର୍ ନିମାଣ୍ତା ନ୍ସା ମେଃଣ୍ଡିଗ୍ ଡିଂ ଆଡିଂଆର୍ଗେ । ମେଇଂ ଆଣ୍ତିନେ ଡିଂଆର୍ଡିଂଗେ, ଆତେନ୍ ପେଇଂନେ ନ୍ସା ମାଣ୍ତା ଲେଃଗେ । ପ୍ରେରିତ୍ ପବିତ୍ର ଆତ୍ମାନେ ୱାଡ଼ିରେ ଏକେ ଆଣ୍ତିନେ ବ୍ନାଲିର୍ ଆୱେଚାଣ୍ଡ୍ରେ ନିମାଣ୍ତା ସାମୁଆଁ ଆଦ୍ରିଗ୍ ଡିଂଆର୍ଗେ ପେ ଏକେ ମେଇଂବାନ୍ ଅଁ ପେଡିଂକେ ଏନ୍ ସାପା ବିସୟ୍ନେ ଅରତ୍ ବୁଜେ ନ୍ସାଃ କିତଂ ଦୁତ୍ଇଂ ଡିଗ୍ ରାଜି ।
ପବିତ୍ର ଜିବନ୍ କାଟେ ନ୍ସା ୱାନେ
୧୩ କାମ୍ ପୁରନ୍ ଡିଂନେ ତିଆର୍ ଡିଂପା । ଜାଗ୍ରତ୍ ଲେଃଚେ ଜିସୁ କିସ୍ଟ ଆତର୍ସାକ୍ନେ ବେଲା ଆଣ୍ତିନେ ଆର୍ସିବାଦ୍ ଆପେକେ ରକ୍ୟା ଡିଂଏ ଆତାନ୍ ଡିଲାଡିଗ୍ ବିସ୍ବାସ୍ ବପା ।
୧୪ ଇସ୍ପର୍ନେ ସାମୁଆଁ ମାନେଃପା । ମାମ୍ୟାନେ ସିସେ ଆଣ୍ତିନେ ଦଦିଆ ଆସା ଡିଂପେଲେଃଗେ ଆତାନ୍ ନ୍ସା ପେନେ ଜିବନ୍ ଆରି ଆସଜେଗ୍ପା ।
୧୫ ଡାଗ୍ଲା ପେନେ ୱା ବକ୍ନେ ଇସ୍ପର୍ ଡିରକମ୍ ପବିତ୍ର ପେଇଂ ନିଜର୍ ନିଜର୍ ବେବଆର୍ ଦେତ୍ରକମ୍ ପବିତ୍ର ଆଡିଙ୍ଗ୍ପା ।
୧୬ ସାସ୍ତର୍ନ୍ନିଆ ଗ୍ନୁଆର୍ ଲେଃଗେ ପେଇଂ ପବିତ୍ର ଡିଙ୍ଗ୍ପା ଡାଗ୍ଲା ନେ ପବିତ୍ର ।
୧୭ ଇସ୍ପର୍ ସାପାରେନେ କାମ୍ଦାମ୍ ଅନୁସାରେ ବିଚାର୍ ଡିଂଏ । ପେଇଂ ମେଁ ଡାଗ୍ରା ସାର୍ଲନେ ବେଲା ଆମେକେ ଆବା ଡାଗ୍ଚେ ୱା ପେମ୍ୟାକେ । ତେଲା ଏନ୍ ଦର୍ତନିନେ ପେଇଂନେ ଜିବନ୍ନେ ଇଡ଼ିଂବେଲା ଆମେକେ ବୁଟଇରିଆଃଚେ ଦିନ୍ ଆଃବିତେ ପେମ୍ୟାକେ ।
୧୮ ପେ ପେମ୍ୟାଃ ପେନେ ଅଃସେଣ୍ତ୍ରେଇଂନେ ବା ପେବାକ୍ନେ ନିୟମ୍ ବେକାର୍ ଜିବନ୍ବାନ୍ ଆପେକେ ମୁକ୍ତି ଡିଂ ନ୍ସା ଉଡ଼ି ଦାମ୍ ବିଃନେ ପଡ଼େଲେଃଗେ । ଆତାନ୍ ବୁଡ଼େୱେକ୍ନେ ରୁପା ଲେଃ ସୁନା ଣ୍ତୁ
୧୯ ଡାଗ୍ଲା ଆତାନ୍ ନିର୍ଦସି ପବିତ୍ର ମେଣ୍ତା ଉଂଡେ ତୁଲ୍ନା କିସ୍ଟନେ ଆତ୍ମା ପୁଜାନେ ଅମୁଲ୍ୟ ମିଆଁ ।
୨୦ ମେଁ ଦର୍ତନିନେ ଆରେକ୍ନେ ସିସେ ଆଃ ଇସ୍ପର୍ନେ ନ୍ସା ସ୍ରିଚେ ଲେଃଆର୍ଗେ ଆରି ପେ ନ୍ସା ଏନ୍ ତେଃଡାନେ ବେଲା ଆତର୍ସା ବଆର୍ଗେ ।
୨୧ ମେଁ ନ୍ସା ପେ ଇସ୍ପର୍ ବିସ୍ବାସି ପେଡିଂକେ । ମେଁନେ ଗୁଏଃକ୍ନେବାନ୍ ଆର୍ମୁଇଂତର୍ ଆତଡ଼ିଆଚେ ଆଲାଦ୍ ଡିଂବକ୍ନେ ଇସ୍ପର୍ନେ ଆଡ଼ାତ୍ରା ପେନେ ବିସ୍ବାସ୍ ଆରି ଆସା ଡାଟ୍ ଡିଂଲେଃକେ ।
୨୨ ଏକେ ପେଇଂ ସତ୍ନେ ପ୍ଲାଃ ୱେପେଲେଃକେସା ନିଜେ ନିଜେକେ ପବିତ୍ର ଡିଂପେବକେ ଆରି ବିସ୍ବାସି ବୟାଁଇଂକେ ଆଲାଦ୍ ଡିଂନେ ଇକ୍ଚା ନାଲେଃକେ । ନିଜେ ନିଜେକେ ଆଲାଦ୍ ଡିଂପା ।
୨୩ ମେଃଡାଗ୍ଲା ଇସ୍ପର୍ନେ ଜିବନ୍ତ ଆରି ଗୁଏଃବ୍ରୁଆ ଜାକ ସାମୁଆଁ ନ୍ସା ପେଇଂ ମେଃଣ୍ଡିଗ୍ ଗୁଏଃଲେଗ୍ନେ ଆବାନେ ଉଂ ସୁଗୁଆ ଣ୍ତୁ ମାତର୍ ଅମର୍ ଆବାନେ ଉଂ ସୁଗୁଆ ଆର୍ମୁଇଂତର୍ ଜନମ୍ ଲାବ୍ ଡିଂପେବକେ ।
୨୪ ସାସ୍ତର୍ ଡାଗ୍ରା ଗ୍ନୁଆର୍ ଲେଃକେ ।
“ରେମୁଆଁ ଜାତି ଚେଃମୁଆଁ ସୁଗୁଆ ।
ମେଇଂନେ ସାପା ସବାକ୍ନେ କଣ୍ତାସାରି ସୁଗୁଆ ।
ଚେଃମୁଆଁ ନ୍ସୁଆର୍ ୱେଏ, ସାରି ଜଡ଼େ ଲଃଏ
୨୫ ଡାଗ୍ଲା ମାପ୍ରୁନେ ସାମୁଆଁ କାଲାଆଃ ଲେଃଏ ।”
ଏନ୍ ସାମୁଆଁ ପେନେ ଡାଗ୍ରା ଆଦ୍ରିଗ୍ ବଆର୍ଗେ ।