14
1 Dubartiin ogeettiin mana ishee ijaarratti;
gowwaan immoo harkuma isheetiin mana ofii diigdi.
2 Namni qajeelummaan jiraatu Waaqayyoon sodaata;
kan karaan isaa jalʼaa taʼe garuu isa tuffata.
3 Afaan nama gowwaa dugda isaatti ulee of tuulummaa fida;
arrabni ogeeyyii garuu isaan eega.
4 Yoo qotiyyoon hin jirre, dallaan duwwaa taʼa;
garuu humna qotiyyoo tokkootiin midhaan baayʼeen argama.
5 Dhuga baatuun amanamaan hin sobu;
dhuga baatuun sobaa immoo dhara of keessaa gad naqa.
6 Qoostuun namaa ogummaa barbaadee hin argatu;
nama waa hubatuuf garuu beekumsi dadhabbii malee dhufa.
7 Ati nama gowwaa irraa fagaadhu;
arraba isaa irraa beekumsa hin argattuutii.
8 Ogummaan hubattootaa akka isaan karaa isaanii beekan isaan godha;
gowwummaan gowwootaa garuu karaa irraa isaan balleessa.
9 Gowwoonni cubbuutti qoosu;
qajeeltota gidduutti garuu hawwii gaariitu argama.
10 Garaan gadda ofii isaa ni beeka;
namni biraa tokko iyyuu gammachuu isaa irraa hin qooddatu.
11 Manni nama hamaa ni bada;
dunkaanni nama qajeelaa immoo ni daraara.
12 Karaan qajeelaa namatti fakkaatu tokko jira;
dhuma irratti garuu duʼatti nama geessa.
13 Kolfa keessatti iyyuu garaan nama dhukkubuu dandaʼa;
gammachuunis gaddaan dhumuu dandaʼa.
14 Namni hin amanamne gatii karaa isaa,
namni gaariin immoo gatii hojii isaa argata.
15 Namni homaa hin beekne waan hunda amana;
namni qalbii qabu garuu tarkaanfii isaa ilaallata.
16 Namni ogeessi of eeggata; waan hamaa irraas ni deebiʼa;
gowwaan garuu waan hundatti jarjara; of illee hin eeggatu.
17 Namni dafee aaru gowwummaa hojjeta;
namni daba hojjetu garuu ni jibbama.
18 Namni homaa hin beekne gowwummaa dhaala;
qalbeeffataan garuu beekumsa gonfata.
19 Namoonni hamoon fuula namoota gaarii duratti,
jalʼoonnis karra qajeeltotaa duratti sagadu.
20 Hiyyeeyyii olloonni isaanii iyyuu ni jibbu;
sooreyyiin immoo michoota hedduu qabu.
21 Namni ollaa isaa tuffatu cubbuu hojjeta;
kan rakkataaf garaa laafu garuu eebbifamaa dha.
22 Namni hammina yaadu karaa irraa hin baduu?
Warri waan gaarii karoorsan garuu jaalalaa fi
amanamummaa argatu.
23 Jabaatanii hojjechuun hundi buʼaa buusa;
oduun faayidaa hin qabne garuu hiyyummaa qofa fida.
24 Gonfoon ogeeyyii qabeenya isaanii ti;
gowwummaan gowwootaa garuu gowwummaa dhala.
25 Dhuga baatuun dhugaa lubbuu baraara;
dhuga baatuun sobaa immoo soba dubbata.
26 Namni Waaqayyoon sodaatu daʼannoo jabaa qaba;
ijoolleen isaas daʼoo argatu.
27 Waaqayyoon sodaachuun burqaa jireenyaa ti;
kiyyoo duʼaa irraas nama deebisa.
28 Ulfinni mootii tokkoo baayʼina uummata isaa ti;
yoo uummanni hin jirre garuu ilmi mootiis ni bada.
29 Namni obsa qabu hubannaa guddaa qaba;
kan dafee aaru garuu gowwummaa mulʼisa.
30 Garaan nagaa qabu dhagnaaf jireenya kenna;
hinaaffaan garuu lafee tortorsa.
31 Namni hiyyeessa cunqursu kan isa Uume tuffata;
namni hiyyeessaaf garaa laafu immoo Waaqa kabaja.
32 Hamoonni jalʼinuma isaaniitiin badu;
qajeeltonni garuu duʼa keessatti illee
amanamummaa isaaniitiin daʼannoo argatu.
33 Ogummaan qalbii nama waa hubatuu keessa jirti;
garaa gowwootaa keessatti garuu hin beekamtu.
34 Qajeelummaan saba ol guddisa;
cubbuun garuu saba kamiif iyyuu salphina.
35 Mootiin tajaajilaa ogeessatti ni gammada;
kan isa qaanessutti garuu ni dheekkama.