6
1 Gafu se makitarabafukami ki Dios, makiggimallakkami sikwayu ta mangwakayu si mangipaita si wara serbineno angngikallaꞌnga sikwayu.
2 Se aneno nepeturaꞌnga a kunna si,
“Diningngagguweno kararaddaw sin awa nanandammangku si allakkantakayu, e dinuffunantakayu sin nadaꞌngeno attoꞌna awa pangisalakangku sikwayu.”
Dingngaggandonad inaya sinapiti Dios. Iyawinna awino pappaduffunandaw sikwana se nadaꞌngennino awa pisalakanna si tolay.
Ino Inattammanda Pablo Sino Nanulduwanda Sino Nalawara Damag
3 Sino pangwammi sino tarabafuwa netalakki Dios sikwami, palanammi takesi awaningke kabalawammi, ta awana rasonino tolayira si ammera panguruwan sino ituldumi.
4 Sino ammina akwammi, ipaitamingke si i Diosino gakkuruwingke a passerbiyammi gafu sino piyattammammi sino ammina dyaꞌmi anna kaburungammi andino kattalatalawa makwa sikwami.
5 Namipidyakamiya nasiwasiwaꞌwattan anna nabalud anna binakkundakamiyeno tolayira a manggamma mamapatay sikwami. Kanayungkamiya madyatan sino tarabafumi, mabbiraggami ke anna mabisibisinangkami.
6 Maita kappay si i Diosino passerbiyammi gafu se awaningke narakkatta akwammi, e gakkuruwa ammumiyi Dios. Attammammi amminino akwanino tolayira sikwami e nannakangkami sikwara ammin. Duffunandakamiyeno Espirituwi Dios e gakkuruwingke ino agganggammi sino kasittolemi.
7 Ipaitami kappay si i Diosino passerbiyammi se ituldumiyeno sapiꞌna a kakuruwan, e aneno pannakadamana sikwami. Inaya kinagaddangnga neyaꞌda i Dios sikwami, kunnangke armasmiya pangaffut si narakkat anna panellad sino baggimi.
8 Sino passerbiyammi ki Dios, aneno miyatal sikwami e anakeno mangilopalopet, aneno maddayawira e ana kappayino massapitira si narakkat mappeafu sikwami. Sapitanda si massisirikami, gampade ituldumiyeno kakuruwan.
9 Kunnino korwanira si awana serbimi, udde naddinnamaggami kepay. Sapitanda si gapapatekami, udde itandaw, aggabiyaggami kepay. Massiki nepasiwaꞌwaꞌdakamiyi Dios, ammena inoꞌganan.
10 Massiki odduweno kalowanino nakammi, kanayungkami kepaya maanggam. Massiki pobirikami, odduweno tolaya pabbaꞌnangngammi si makkikiyad. Awaningke kukwami sito lubag, udde akwamiyeno ammina ana ki Dios.
11 Ikkayuwa kakkolaꞌmi sitan Corinto, sinapiꞌmi sikwayuweno ammina ana sino nakammi, se dokallingke ino agganggammi sikwayu ammin sitan.
12 Bakkanna kurangino agganggammi sikwayu, udde ikkayuweno nakkurang si agganggam sikwami.
13 Tatabbantakayuwa kunnangke gakkuruwa abbintakayu. Anggammandakami nadda kunnangke ino agganggammi sikwayu.
Ammena Dama A Mannumangino Manguruwira Andino Ammena Mangurug
14 Kakkolak, ammena meannunga makiatawa onnu makisosyukayu sino ammenera mangurug, se ammena menumangino naggaddang sino narakkat. Damana kadda mamungino nabaggaw anna lammuk?
15 Ammena kappay dama a mittateno nakanda Kristo anni Ofag, antuweno awangkappay pakkunnanino nangurug annino ammena nangurug.
16 Meannung kadda medaggeno sinandiosira sino templowi Dios? Ammena, e kunna kappay sikwatam, se ikkanetamino templowa pagyananino aggabiyaya Dios. Se aneno sinapiti Dios si,
“Magyanaꞌnga sikwara e bumbulunangkuwera. Ikkanaꞌngeno Diosda e iraneno tolek.”
17 Antu gafuna, sinapikkappayi Dios si,
“Mekatwekayu sino ammera mangurug ta ammekayu mekunna sikwara. Ibbattandawino narakkatta aggangwara ta pagamwangantakayu.
18 Ikkanaꞌngeno Amayu e ikkayuneno abbingku. Antuweno sinapiti Afu Dios a mannakadama.”