18
Babilon Osmulita Yɨt
1 Onggɨt kak ke re kon yɨr awond, kwa yɨpa aneru pumb tungg ke inkonj. Ɨ ton ukoi danda okati na yɨbnonj, sɨ tina b'ogɨl ɨnyomarenat kea gowukoi yɨnyomaronj.
2 Ɨ ton ket danda kɨma unenonj da,
“Ukoi taun Babilon, ke osmulitonj, ke osmulitonj.
Sɨ ton awonj re negɨr wɨngawɨnga waina wɨmenapu pɨpmet na
ɨ komkesa negɨr kɨlkɨl wɨngawɨnga waina taun na
ɨ dɨde komkesa kɨlkɨl tɨbam b'angga dɨde ngena waina taun na.
3 Mop nokɨp komkesa kantri onggɨtyam Godɨmna ukoi soro kɨma b'ɨsagɨkam ɨk kena pɨp aukɨto
onggɨt konggamna negɨr b'iyena mɨle map.
Ɨ kwa gowukoi kingɨp kea ton kɨma negɨr b'iyena mɨle amnɨkenento.
Ɨ dɨde gowukoi b'asoga rɨgap toda kea onggɨtyam tina b'ogɨl wulkɨp darɨnd wɨmena danda ke jogjog gasa kɨma rɨga aukɨto.”
4 Ɨ re kon kwa yɨpa nonykok utkundond wub kumb ke, Ton yindonj da,
“Koina rɨga! Wɨn ti pɨlke opekinam,
nokɨm da ɨdenat wɨn maka yingg takasindam tina negɨr mɨle.
Ɨ wɨn ɨtrɨngenjinam tina sake wa pɨlke,
nokɨm da ɨdenat wɨn maka takatenindam onggɨtyam sake.
5 Mop nokɨp tina negɨr mɨle re kea b'aikɨndenento ngɨrpu de pumb tungg wa
dɨde God kea nonyɨk amjinonj tina negɨr kɨma kaokao mɨle.
6 Wɨn ti wogoninam nangga na re ton agoninonj.
Ɨ wɨn mɨra womnena nɨmogpyam nangga na re ton amnɨkinonj.
Ɨ dɨde wɨn nɨmogpyam seoseo ɨk tina kapond wongjɨkawa rɨja na re ton rɨga wa agoninonj.
7 Ɨ wɨn ti ɨja na wogoninam b'ɨdgotnena dɨde yii b'ɨrɨnena
rɨja na re ton b'ogɨl ɨnyomarenand wɨbnenenonj
dɨde rɨja na re ton b'ogɨl wulkɨp darɨnd wɨmena wikenonj.
Mop nokɨp ton tina garɨnd windenenonj odede b'asourena yɨt kɨma da,
‘Kon omisɨn re konggayam king en.
Ɨ kon ma mik en,
sɨ kon ma ɨta ngai yii b'ɨtrɨnenyɨn.’
8 Sɨ onggɨt paemb odede sake ti pɨlwa tuweny dem yɨpa bibɨr wɨngɨrɨnd,
opi re uj ɨ yii b'ɨrɨnena ɨ dɨde sou.
Ɨ wulɨt ɨta tin tembkau dem
mop nokɨp Yonggyam God yet ra tin b'ɨsagɨkam tomneny ra ukoi dandam Rɨga e.
9 “Ɨ gowukoi kingɨp kea ton kɨma negɨr b'iyena mɨle amnɨkenento dɨde b'ogɨl wulkɨp darɨnd wɨmena wuwenonj. Sɨ ra ton wul dɨmɨl b'ɨrmatena kɨma kimbra bungbung yɨr ongi dem tin embombɨnd, ton opima yii tiyagɨki dem dɨde gar kopa kɨma yii b'ɨtrɨnenanj dem.
10 Sɨ ton opima onggɨtyam tina b'ɨdgotnena map moga taukanj dem. Sɨ onggɨt paimemb ton pajapaja owɨnki tekeny dem dɨde ket taenanj dem da,
‘O ukoi taun, ukoi dandam taun Babilon!
Ke sake yokas, ke sake yokas.
Mop nokɨp tina negɨr ma b'ɨsagɨka ik re sobijogjog wɨn nate.’
11 “Ɨ gowukoi b'asoga rɨgap yii tiyagɨki dem dɨde gar kopa kɨma yii b'ɨtrɨnenanj dem onggɨt konggam gatab. Mop nokɨp makwa yɨpa rɨgat opima ket towaina b'asoga gasa imda teyeniny dem.
12 Sɨ opimemb jɨ towaina osogɨka gasa, gold ɨ silba ɨ b'ogɨl ngɨndngɨnd gɨmo ɨ b'ogɨl ngɨndngɨnd timtim jag, ɨ kɨlkesa ngɨndngɨnd kobɨrgɨm ɨ b'ogɨl kuskus uwaluwal kobɨrgɨm ɨ ngɨndngɨnd rorol kobɨrgɨm ɨ b'ogɨl kuskus kobɨrgɨm, ɨ komkesa b'engabenga otomanti ngɨrangngɨrang wul dɨde ukoijog b'angga elepen orkak ke omnɨki otomanti b'engabenga gasa, ɨ ukoi wulkɨp kɨma b'ogɨl wul ke ɨ bronj ayɨn ke ɨ ayɨn ke ɨ dɨde otomanti danda gɨmo ke omnɨki b'engabenga gasa,
13 ɨ ngɨrangngɨrang wulkabgɨm ɨ otomanti ngɨrangngɨrang gaya, ɨ ngɨrangngɨrang gasa ɨ b'ogɨl ngɨrangngɨrang wulpoj ɨ b'ogɨl ngɨrangngɨrang pauda ɨ greip ɨk ɨ olib gaya ɨ b'ogɨl plawa ɨ wit kɨp ɨ kau ɨ mamoi ɨ oso dɨde oso ke ɨrgɨnatena trak, ɨ wɨko rɨga ɨ dɨde rɨgaina yɨrkokar.
14 Sɨ b'asoga rɨgap tendenanj dem da,
‘Moina ukoijog singi iyeni b'ogɨl gasap
kea men mɨrarenyi.
Ɨ komkesa b'ogɨl gayagaya metmet owou dɨde b'ogɨl ngɨndngɨnd gasa
mor pɨlke b'eomnenanj.
Sɨ makwa ngai yɨpa rɨgat opima onggɨtyam gasa tadarkiny dem.’
15 Ɨ ket b'asoga rɨga yepiya re onggɨt Babilon ke jogjog gasa kɨma rɨga aukɨto, ton opima moga map pajapaja owɨnki tekeny dem onggɨtyam taunɨmna b'ɨdgotnena gatab, ɨ ton ket yii tiyagɨki dem ɨ dɨde yii b'ɨtrɨnenanj dem gar kopa kɨma.
16 Ɨ ton ket tendenanj dem da,
‘O ukoi taun, ke sake yokas, ke sake yokas.
Ton kɨlkesa ngɨndngɨnd kobɨrgɨm ke ɨ b'ogɨl kuskus uwaluwal kobɨrgɨm ke ɨ dɨde b'ogɨl kuskus kobɨrgɨm ke b'ikoka wikenenonj,
ɨ ton gold ɨ b'ogɨl ngɨndngɨnd gɨmo ɨ dɨde b'ogɨl ngɨndngɨnd timtim jag ke b'ajgi wikenenonj.
17 Sɨ onggɨt taunɨmna b'ogɨl wulkɨp darɨnd wɨmena re kea b'eomneny sobijogjog wɨnɨnd.’
“Sɨ komkesa gɨga iyena rɨga ɨ komkesa gɨgand menon rɨga dɨde gɨga wɨko rɨga ɨ dɨde komkesa sɨpand wɨko rɨga, ton opima pajapaja owɨnki tekeny dem.
18 Ɨ ra ton ɨtemb taun so omni kimbra yɨr ongi dem, ton opima unena kɨma ara tuweny dem da, ‘Rɨka ɨta yɨpa odede ukoijog taun yɨbɨm?’
19 Sɨ ton opima gar bebɨg map towaina mopɨnd sungar b'ɨskena teyenanj dem, ɨ yii tiyagɨki dem dɨde gar kopa kɨma yii bɨtrɨnenanj dem. Sɨ ton ket tunenanj dem da,
‘O ukoi taun, ke sake yokas, ke sake yokas.
Komkesa rɨga yepiya re gɨga kɨma wekenonj sɨpand, ton kea b'ogɨl gasa asogenento onggɨt taunɨnd.
Sɨ ɨngkenaemb ton b'ogɨl wulkɨp darɨnd wekenenonj.
Ajɨ ɨtemb taun re kea b'eomneny sobijogjog wɨnɨnd.’
20 Sɨ pumb tungg ɨ yɨna rɨga ɨ ɨtmɨkitijog rɨga ɨ dɨde bageyam,
wɨn b'ogla sam kɨma ngolengole aininam onggɨt taun gatab.
Mop nokɨp Godte negɨr ma b'ɨsagɨka yoramis onggɨt taunɨm pɨlɨnd
rɨja na re ton negɨr dɨde b'ɨdgotnena aramiteneninonj wa pɨlɨnd.”
21 Ɨ ket yɨpa danda kɨma anerut ukoi gɨmo yurowatonj dɨde ket sɨpa wa b'ɨskonj. Ɨ ton ket yindonj da,
“Ukoi taun Babilon
ɨja emb jɨ ɨsanikesa b'ɨski ɨbɨm dem,
ɨ makwa ngai ɨta odari dem.
22 Sɨ rɨgap ma kwa ngai opima towaina ara tutkundenanj dem mor pɨlke,
opi re gita ɨpaya rɨga ɨ ger ɨtanga rɨga ɨ wugewuge ɨpaya rɨga ɨ dɨde bibol ɨpaya rɨga.
Ɨ ton makwa ɨta ngai yɨpa odede rɨga odari dem mor pɨlke,
ɨt re b'engabenga wɨp gasa omnɨka rɨga.
Ɨ ton makwa ngai opima tutkundenanj dem mor pɨlke
owou ipanjɨka ara.
23 Ɨ lampa ngaya
makwa ɨta ngai b'usaya b'atnyorateny dem mor pɨlke.
Ɨ dɨde sisɨl kongga kɨma rɨga dɨde sisɨl leo kɨma kongga waina nonykok
makwa ngai opima ton tutkundenyi dem mor pɨlke.
Mop nokɨp moina b'asoga rɨga re gowukoi pumbjog nyɨ rɨga im
dɨde man komkesa kantri moina negɨr minj nya ke b'anygɨnena nya wa wɨp amneninot.
24 Sɨ bageyam dɨde yɨna rɨga waina kus kea de onggɨt taunɨnd adarkɨto,
ɨ kwa daka kea adarkɨto komkesa rɨgaina kus
yena re onggɨt taunɨt uj tama na ipowa eyeneninonj onggɨt gowukoi wɨngɨrɨnd.”