Fhe Bakɨmen Kaman Kameŋ Ruk 3

Zon Gumgi Ruai Guma Zisas ga nzuav tuav ga mbui.

Matiu 3.1-12; Mak 1.2-8; Zon 1.19-28

1-2 +Sisar Taiberias Roma gari guman pan kav kim, anan 15 mparive hɨgi. Mba tugen Pontius Pairat, ana Zudia fhaiŋ gari guman pana vhari ki. Herot, ana mba tugen, ana Gariri fhaiŋ gari guman pan ki. Anan ŋguga Firip, ana Ituria gum Trakonitis fhaiŋ gari guman pan ki. Risanias, ana Abirene fhaiŋ gari guman pan ki. Mba tugen Anas gum Kaiafas, mani Fhe Bakɨme rotu gari guman panani ki. Mba tugen Sekaraian kama Zon, ana gumgi ki fhuv ŋanen kim, Fhe Bakɨme wo bunin mba gumgi gu mbigi ga suan za ana suaŋgi. 3 +Zon Gumgi Ruai Guma mba Zordan mbɨ gani ga ruav Fhe Bakɨme buni vhuuiŋ bun nzuaim, gumgi gu mbigi ana han zi. Mbe zim, ana khaŋ mbe nzuai, “Nde ndavi domdorɨrim, gu nde ruarim, Fhe Bakɨme nde fhum muuŋgi tɨvi mbatɨgi vhɨzgip, nta ndɨkndɨk ŋangirga.” 4 +Fhum Fhe Bakɨme kha kameŋ wo kamthooŋ guma Aisaia ga nɨɨŋgi. Ana ne khergim, ne ana gavar ki. Mba kameŋ khare,

“Guma the, ana gumgi ki fhuv ŋanen kɨv kamɨv khaŋ suanga, ‘Nde Guma Bakɨme suaŋv tuavi khɨrɨv nta ndim thɨgara maaŋri.

5 Nde mba tuavar ki rugi ndavi, nde nta pɨnɨv, nde mba mbɨkshɨɨ bakɨvi gum bisaŋrire, nde nta khov, nta ndim thɨgɨra maaŋri.

Mba kɨzgeregi tuavi, nde ntan muuŋgirim, nta purara mbarari.

Nde mba kora verav ndagi tuavi, nde ntan muuŋgirim, nta guigira mbɨrira ŋgɨgɨri.

6 +Nde maaŋ muunga, kha nuianan ki gumgi gu mbigi, mbe zam Fhe Bakɨme taagi mbe ndirga tɨva ganɨnga.’ ”

Khe Fhe Bakɨmen kamthooŋ guma Aisaia suaŋgi buni khare. Ana buni zav khara thɨgi.

7 +Zon Gumgi Ruai Guma fhum Fhe Bakɨme kamthooŋ guma Aisaia suaŋgi bunira zɨn vugap, ana zav, gumgi ki fhuv ŋanen hɨgi. Ana hɨgap, Fhe Bakɨme buni vhuuiŋ bun nzuaim, gumgi gu mbigi vhɨrve wari ruar zav khavgiap Zon Gumgi Ruai Guma han zi. Mbe ana han zim, ana khaŋ mbe nzuai, “Nde kurigi mbatɨgi fara muuŋgi gumgi, Fhe Bakɨme ndav shirɨ bakɨme, nden ki. The nde suaŋgim, nde ana ndav shirɨ ŋkɨɨa khɨngip regɨrie? 8 +Gu guigira nde nzuai, nde guigira ndavi domdorgip, nde Fhe Bakɨme nzuai tɨvir muuŋri. Nde mba tɨvir muunga, nde ndavi domdorgi tɨvi mba ti. Nde maaŋ muuŋ thav, thaŋ nzuav fhura khaŋ wari ga nzuai, ‘Nza Abrahaman nzɨgi ma.’ Gu guigira nde nzuai, Fhe Bakɨme vuzvuk ma. Ana vuzvugirga, ana ntige kha ŋkɨɨr gumgi tharir muuŋgirga, mba gumgi mbe Abrahaman nzɨgi kɨrga. 9 +Nde khueŋ mbarara. Tuik ntigem khira ndɨɨrin ki. Khira vhɨgi vhuuiŋ mbai fhu, mbe mba khira kɨv, nta gorɨv, nta fuv vhava suegɨrga.”

10 +Ana ne nzuaim, mba gumgi gu mbigi vhɨrve ne mbararagiap anan nzarigi, “Maaŋgi, nza ram muuŋrie?”

11 +Mbe mba nzambareŋ ga muuŋgim, Zon Gumgi Ruai Guma mbe ŋgarkarav khaŋ mbe nzuai, “Guma fhava shaara phunini kɨv, ana then mba fhava shaar ki fhuv guma then nɨɨŋgiri. Guma mba ki, ana vhɨra mba tɨvara muuŋgiri. Ana mban mba mba ki fhuv guman nɨɨŋgiri.”

12 +Ana mba bunin mbe nzuav kim, ŋkɨɨa ndia rui gumgi mbari, mbe vhɨra wari ruar zav zegi. Mbe zegap anan nzarigi, “Guma Rum, nza ram muuŋrie?”

13 Ana mbe ŋgarkarav khaŋ mbe nzuai, “Nde mba gumgi han ŋkɨɨa ndiv, nde mba ŋgu gari guman pan ndir zav nde suaŋgi thara zɨn ŋgɨv mbe han ŋkɨɨa ndiri. Nde mba tha kamaŋv fhura mbe guiguigip mbe ŋkɨɨa ndi thari.”

14 +Ana maaŋ mbe nzuaim, mba ntari ga mbui gɨɨtɨvi mbari maaŋ kav vhɨra anan nzarigi, “Maaŋgi, nza ram muuŋrie?”

Ana mbe ŋgarkarav khaŋ mbe nzuai, “Nde ŋkɨɨa kɨvgip ndirgane suaŋv fhura gumgi ga shɨshɨgɨp, rɨrɨvar mben nɨɨŋv, mbe ŋkɨɨa ndi thari. Nde guman pan nde vhezi vhez, ana nde tugɨra tɨgi.”

15 Gumgi gu mbigi vhɨrve, mbe Fhe Bakɨme taagip mbe ndir zav farasarigi guman rargap wari ki. Zon Gumgi Ruai Guma mba bunin mbe nzuav mba khesharigi tɨvi ga mbuim, mbe ana garav wari wo ndavi vherira kha ndɨkndɨgi mbui, “Khe nza mba rarga ki gumara khare thi?” 16 +Mbe mba ndɨkndɨgi ga mbuim, Zon Gumgi Ruai Guma mbe ŋgarkarav khaŋ mbe nzuai, “Gu mbɨn nde ruai, na zɨn zi guma, ana guigira ŋkasŋka bakɨme ki. Gu vhɨra ana ŋkarve nɨman ŋguav ana ŋkari sharive mpiiŋ fhɨrgirga tuktɨgi fhu. Ana Fhe Bakɨme Ŋina Ŋaar gum vhavar nde ruarga. 17 +Ana vhɨra bigi heei rɨmani khɨga zi. Ana zɨv, mba rezi fhara muuŋgi mba wit, ana nta heenga. Ana mba wit vhuuiŋ, ana ntan won wit vhor zav muuŋgi phenan vhorga. Ana mba wit mbatɨgi, ana nta fugɨp, nta fuv mba zazera mbara muuŋgiap shiav ki vhava suegɨrga.”

18 Zon Gumgi Ruai Guma, mbe thivgip havhargirga buni vhɨrvera mba gumgi gu mbigi ga nzuav Fhe Bakɨme buni vhuuin mbe nzuai.

19-20 +Zon Gumgi Ruai Guma zumgum harigi tugar, Gariri gari guman pana Herot ga vhegi. Herot tɨvi mbatɨgi vhɨrve ga muuŋgiap, wom hɨgap, won ŋguga tɨn ana muuŋ Herodis ga tɨgi. Zon Gumgi Ruai Guma ne nzuav ana vhegi. Herot hɨgap, harigi bigɨna mbatɨga mueŋ phorga mba bigi tɨkhɨngiap, Zon Gumgi Ruai Guma suirav ana ndim bɨna khɨngi.

Zon Gumgi Ruai Guma Zisas ruagi.

Matiu 3.13-17; Mak 1.9-11

21-22 ++Zon Gumgi Ruai Guma Zisas ruagim, Herot zumgum Zon Gumgi Ruai Guma ndim bɨna khɨngi. Zon Gumgi Ruai Guma mba gumgi gu mbigi ruav kim, Zisas zim, Zon vhɨra ana ruagi. Zon Gumgi Ruai Guma Zisas ruagim, ana Fhe Bakɨme phorga nzuaim, Heven fhogim, Fhe Bakɨme Ŋina Ŋaar fhomne fara muuŋgiap gegap, zerap, ana perigi. Ana ana perigim, Fhe Bakɨme Hevenan kav khaŋ nzuai, “Ndu nan Kam ma! Gu guigira ndu vuzvugiap ndun ndikndigi!”

Khe Zisasan nzɨgi zɨri khare.

Matiu 1.1-17

23 +Zisas ruagiap, anan mparive vov 30 thɨgim, ana won ŋaara bakɨme khavgiap, ana mbua rui. Ana Fhe Bakɨmen buni vhuuiŋ bun gumgi gu mbigi ga nzuav, mben kurkura ga rui. Ana maaŋ mbua ruim, mba gumgi gu mbigi, mbe kha ndɨkndɨgar ana mbui, “Nza kaŋgi, ana Zozevan kam ma.” 24 Zosep, Heri ana tegi. Heri, Matat ana tegi. Matat, Rivai ana tegi. Rivai, Merki ana tegi. Merki, Zanai ana tegi. 25 Zanai, Zosep ana tegi. Zosep, Matatias ana tegi. Matatias, Amos ana tegi. Amos, Nahum ana tegi. Nahum, Esri ana tegi. Esri, Nagai ana tegi. 26 Nagai, Mat ana tegi. Mat, Matatias ana tegi. Matatias, Semen ana tegi. Semen, Zosek ana tegi. 27 +Zosek, Zoda ana tegi. Zoda, Zoanan ana tegi. Zoanan, Resa ana tegi. Resa, Zerubaber ana tegi. Zerubaber, Seartier ana tegi. Seartier, Neri ana tegi. 28 Neri, Merki ana tegi. Merki, Adi ana tegi. Adi, Kosam ana tegi. Kosam, Ermadam ana tegi. Ermadam, Er ana tegi. Er, Zosua ana tegi. 29 Zosua, Eriesar ana tegi. Eriesar, Zorim ana tegi. Zorim, Matat ana tegi. Matat, Rivai ana tegi. 30 Rivai, Simeon ana tegi. Simeon, Zuda ana tegi. Zuda, Zosep ana tegi. Zosep, Zonam ana tegi. Zonam, Eraikim ana tegi. 31 +Eraikim, Merea ana tegi. Merea, Mena ana tegi. Mena, Matata ana tegi. Matata, Natan ana tegi. Natan, Devit ana tegi. 32 +Devit, Zesi ana tegi. Zesi, Obet ana tegi. Obet, Boas ana tegi. Boas, Sarmon ana tegi. Sarmon, Nason ana tegi. Nason, Aminadap ana tegi. 33 +Aminadap, Atmin ana tegi. Atmin, Arni ana tegi. Arni, Hesron ana tegi. Hesron, Peres ana tegi. Peres, Zuda ana tegi. Zuda, Zekop ana tegi. 34 Zekop, Aisak ana tegi. Aisak, Abraham ana tegi. Abraham, Tera ana tegi. Tera, Nahor ana tegi. Nahor, Seruk ana tegi. 35 Seruk, Reu ana tegi. Reu, Perek ana tegi. Perek, Eber ana tegi. Eber, Sera ana tegi. 36 +Sera, Kainan ana tegi. Kainan, Arpaksat ana tegi. Arpaksat, Siem ana tegi. Siem, Noa ana tegi. Noa, Ramek ana tegi. 37 Ramek, Metusera ana tegi. Metusera, Enok ana tegi. Enok, Zaret ana tegi. Zaret, Mahararer ana tegi. Mahararer, Kenan ana tegi. 38 +Kenan, Enos ana tegi. Enos, Set ana tegi. Set, Adam ana tegi. Adam Fhe Bakɨme fharav muuŋgi guma ma. a

+ 3:1-2 Ru 1.80 + 3:3 FG 13.24; 19.4 + 3:4 Ais 40.3-5 + 3:6 Sng 98.2; Ais 52.10 + 3:7 Mt 12.34; 23.33 + 3:8 Zo 8.33; 8.39 + 3:9 Mt 7.19 + 3:10 FG 2.37 + 3:11 Ru 11.41; 2 Ko 8.14; Ze 2.15-16; 1 Zo 3.17 + 3:12 Mt 21.32; Ru 7.29 + 3:14 Kis 23.1; Wkp 19.11 + 3:16 Mt 3.11; FG 13.25 + 3:17 Mai 4.12; Mt 13.30 + 3:19-20 Mt 14.3-4; Mk 6.17-18 + 3:21-22 Zo 1.32 + 3:21-22 Stt 22.2; Sng 2.7; Ais 42.1; Mt 3.17; 17.5; Mk 1.11; Ru 9.35; Zo 1.32 + 3:23 Ru 4.22; Zo 6.42 + 3:27 1 Sto 3.17-19; Esr 3.2 + 3:31 2 Sml 5.14 + 3:32 Rut 4.17-22; 1 Sml 16.1-13 + 3:33 Stt 29.35 + 3:36 Stt 11.10-26 + 3:38 Stt 4.25–5.32 a 3:38 Adam, Fhe Bakɨme fhara guarara kha won nuiana muuŋgiap, ana farvera Adam ga muuŋgi. Adam, ana za kha nuianan ki gumgir ndia ma.