5
Da taguro timaan utano hinanawat tano Watong.
1-2 Io, bar hinsaa mehet tane Krais, pa mu le supi ter be mehet na pakat ta nianga ukaia ho mu utano pana bung ing kakarek ra linge na hanawat kinong mu iat mu nunure timaan ter be no pana bung tano Watong na hanawat hoke no hinanawat ta tike ut na kukuman ra bung.
3 Ira matanabar di na tange be, “Dait pai nale burte ta tike linge. A malum i kis ter ta dait.” Io, ta ikino pana bung iat a but na haragawai na hana tupas di hoke ira harpaas na bulu ing be tike haine i ura kinakaho. Ma pata ta nong pai nale hilo.
4 Ma mu ira hinsaa mehet, ikin ra bung pai nale hakarup mu hoke tike ut na kukuman kinong pa mu le nati na kadado.
5 Pata. Mu bakut, mu lon tano palai ra kasasa. Pa dait le lon tano kadado ra bung.
6 Io kaie, waak dait kubabo hoke di tari. Na tahut be dait na matawas ma dait na taguro ma ra palai na lilik hoke di ing pa dile mamo.
7 Dong ing di kubabo, di la kumkubabo ra bung. Ma ira ut na minamo, di la maamo ra bung.
8-10 Iesene dait, dait ira turadi gar na madares. Io kaie, waak dait haruat hoke ira ut na minamo. Dait na taguro timaan. Hoke ira umri, dait na sige no nudait nurnur ma no nudait harmarsai harbasie hoke tike sigasige na pala riam. Ma hoke ira umri bileng, dait na kuhe no nudait nurnur kawase no haralon kinong God paile bul no nuno lilik be no nuno ngalngaluan na hana tupas dait. Pata. I sip be na halon dait tano nudait Watong Jisas Krais nong ga mat uta dait. Ma iga mat uta dait waing dait na lon tikai ma ie. Pata ta linge be dait lon ter be dait te mat. Dait na lon tikai ma ie.
11 Io kaie, mu na habalaraan ma haragat harbasiane mu hoke mu la gilgil.
Da mur ira bilai na tintalen.
12 Io, bar hinsaa mehet tane Krais, mehet saring mu be mu na urur ta dong ing di manga papalim nalamin ta mu. Di balaure mu ta ira numu nilon tano Watong. Ma di pir mu bileng.
13 Na tahut be mu na manga lik hatamat di ma be mu na marse di uta ira pinapalim di gil. Mu na harabalaan harbasie.
14 Bar hinsaa mehet, mehet haragat mu be mu na hakatom ira malmalungana, ma mu na habalaraan di ira ut na nginarau, ma mu na harahut di ing pa dile tur dades, ma be pa mu nale manga haiah ura hapadano tikenong.
15 Mu na harbalaurai timaan be waak mu balu ra sasana ma ra sasana baling. Iesene mu na walar hatikane ura gilgil ra tahut harbasie ta mu ma di ira mes bileng.
16 I tahut be mu na laro hathatikai.
17 Mu na sasaring hait.
18 Mu na tanga tahut utuma hone God ta ira linge bakut. Urah, kinong God i sip be mu ing mu kis ter tane Krais, mu na lon hobi.
19 Waak mu tur bat no pinapalim tano Halhaaliena Tanuo.
20 Waak mu malok leise ira nianga gar na tangetus.
21 Iesene, i tahut be mu na walar kilam ira linge bakut. Mu na palim kawase ira bilai.
22 Mu na tur talur ira mangana sasana bakut.
23 Mehet sasaring be God iat nong i ter ra malum ta dait, na bul hasisingen ira numu nilon bakut be na halhaalien talur ira sasana ter ta ira gamgamatien. Ma mehet sasaring bileng be ina balaure ira tanua mu, ira tinga mu, ma ira palatamai mu waing pata tikenong na tale ura kilkilam mu be a mon sasana ta mu tano pana bung be no nudait Watong Jisas Krais na hanawat.
24 God nong i tato mu na gil kakarek kinong ila gilgil haruatne ira nuno nianga.
25 Bar hinsaa mehet, na tahut be mu na sasaring uta mehet.
26 Mu na haatne leh ira hinsaa dait tane Krais ma mu na gagawane leh di ma ra tahut na tintalen.
27 Iou tange hadades ta mu tano hinsana ra Watong be mu na was ikin ra pakpakat ter ta ira hinsaa dait bakut.
28 No harmarsai tano nudait Watong Jisas Krais na kis ta mu.